17.02.2020

17.02.2020, फाल्गुन (फाल्गुन) गटॖ पछॖ (कृष्ण पक्ष) नवम(देवादेव) (नवमी) च़ऺन्दॖरवार (सोमवार) श्री सप्तर्षी सम्वत 5095, राश वृश्चिक (चलान) ऋतु शिशर (चलान)...अज़ छि हुर्य नवम
**************************
          गुरु स्तुति     
शिष्यानां मोक्षदानाय लीलया देहधारणे,
सदेहेपि विदेहाय तस्मै श्री गुरवे नम:।
**************************
             लल वाक्     
परुन पोलुम अपॊरुय पॊरुम
केसर वनॖ वोलुम रटिथ शाल
परस प्रॖनुम तॖ पानस पोलुम
अदॖ गोम मोलूम तॖ ज़ीनिम हाल
           ***********
अर्थात:- मैं ने जो पढा उस का मनन किया, जो पढने में नहीं आ सकता, अर्थात, सूक्षम ज्ञान भी पढ लिया। मन रूपी शेर को जंगल (विचारों में से निकाल कर) से गीदड की तरह पकड कर लाया, अर्थात काबू कर लिया। औरों को समझाया किंतु पहले उस का स्वयं पालन किया। तब जाके जाना कि मैं ने मैदान को जीत लिया अर्थात, लक्ष्य को पा लिया
**************************
           नुंदॖ ऱेशिन्य श्रुक्य   
प्रॆनिस बदनस मल्युन दाग़ गोम
ज़ाग गोम नीरिथ बाग ॳन्दरे
हारिनि गर्मियि पॊह तॖ माग गोम
फाह गोम नीरिथ हर बन्दरे
ज़ज़रनॖ छॊकॖ हनि हनि दाह गोम
ग्वनाह गऻय च़ऺर्य तॖ कऺहय उबरे
म्यूठ तॖ मॊदुर ख्यथ उन्दॖ सियाह गोम
नाह गोम पानस राह कस करे
            **********
माने:- म्यऻनिस मनस मंज़ गव शक पऻदॖ, युस म्यऻनिस प्रॆनिस बदनस प्यठ मॊकुर दाग़ ज़न गव इज़्हार। शर्मि किन्य बासॆयम ग्रेशमॖ च़ंज्यन मंज़ ति तॗर, यॆमि सॗत्य बन्दॖ बन्दॖ बास्योम ज़ुव नीरिथ च़लान। हनि हनि ज़न च़ाम ज़ॊज़ुर अमि गमॖ सॗत्य, ज़ि स्यठाहव ग्वनाहव किन्य कति वॊथ बॖ ब्यॆयि थॊद। म्यूठ तॖ मॊदुर ख्यॆय ख्यॆय बासॆयम दॊहय यड खऻली। यड खऺच़ॖम नॖ ख्यथ ति ज़ांह। कस खारॖ व्वंय तख्सीर यॆलि यि सोरुय कर्मस प्यठ छु दारमदार। स्वरनस दिच़ म्यॆ दॊहय नऻहवनकलॖ, व्वंय क्युथ कर्म तॖ क्युथ तम्युक फल।
**************************
पंचान्ग:- अज़ छि हुर्य नवम। यॊदवय वुछव तॖ हेरथ छि ॳज़्यकि प्यठॖ शुरु गछ़ान। राथ ताम कॊर असि आदिदेव महागणेश्य सॖन्ज़ आराधना, माजि ज़्वला जी  हॖन्ज़ आराधना, माजि दुर्गायि हॖन्ज़ आराधना, पार्थीश्वर बनोव, गरॖनावय कऺर वगैरा वगैरा।
ॳज़्यकि प्यठॖ छि असली व्वंय शिव जीयिन्य आराधना करान। शिवस मंज़ लीन गछ़नॖच कूशिश करान। भजन कीर्तन रूद चलवुन  तॖ रोज़ि चलवॖन्य, हारन गिन्दुन ति छु बराबर पकान रोज़ान। द्वह द्वह छु नेरान तॖ सऻन्य साधना ति छि  तेज़ रंग ह्यवान रटॖन्य। साथ  वुछिथ यानि जान द्वह वुछिथ ॴस्य कऺशीरि मंज़ वख्तॖ अकि  क्रालस निशि वटक सामानॖ अनान यानि  बॊड नॊट, ल्वकुट नॊट, डुलॖज, टऻक्य, परवॖ, च़ऻन्ग्य, सन्यवारि बेतरी तॖ सु सामानॖ ॴस्य छऺलिथ छॊकिथ थवान ठोकुर कुठिस मंज़ या कुनि तथ जायि यॆतिनस हेरथ पूज़ा करॖन्य ॴस आसान। हालांकि वख्तस सॗत्य सॗत्य ॴस तब्दीली आमॖच़ कऺशीरि मंज़ॖय, स्व गऺयि यि ज़ि कतरिव बानॖ बदलॖ आयि स्टील बानॖ। नॊट त्रोव तॖ गागॖर आयि टऻक्य त्रऻव्य तॖ प्लेटॖ आयि, डूलॖज बदल्यॆयि तॖ ब्ववुल आव, च़ऻन्ग्य बदल्येयि तॖ दिया आव तॖ क्रालस निशि सामानॖ अनुन गव बंद। क्रालस गव यि कार कम। निकॖ सिकॖ चीज़ ॴस्य हालांकि रोज़ान अनॖवुन्य मगर स्टीलुक सामनॖ बन्याव मुस्तकॖल।व्वंय छि ॳस्य योर यिथ यॊहऻय सामानॖ छलान छॊकान तॖ थवान ठोकुर कुठिस मंज़ वातॖनऻविथ कुनि रॖति द्वह। सन्यवारि ति छि स्टीलचय अनान। परात, थाल, गिलास, काशवॖ, धूपॖ स्टैंड, अगरबऺत्य स्टैंड वगैरा, यिम ति छि स्टीलकिय मेलान। व्वंय छि शिवलिंग ति यिवान स्टीलुकॖय या मारब्लुक। यिथॖपऻठ्य छि हुर्य  नवम यिवान मनावनॖ। हेरथ मऻज्य आयि, स्वन ह्यथ आयि, ऱवफ ह्यथ आयि धन ह्यथ आयि, गरॖ सोन आयि। हेरथ मऻज्य आयि।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)