30.06.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

30.06.2022 हारॖ (आषाढा) ज़ूनॖ पछॖ (शुक्ल पक्ष) ऒक्दॊह (प्रथमा/प्रतिपदा), देवादेव, ब्रसवार (गरूवार/वीरवार/ब्रहस्पतवार), श्री सप्तर्षि सम्वत 5098, नक्षत्र पुनर्वसु, राश कर्कट (शामन 06.23 बजि प्यठॖ), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

म्यॆ छु याद यिवान पनुन ल्वकॖचार यॆलि बॖ ओसुस शायद अवलस परान रघुनाथ मन्दिर मिडल स्कूलॖ, करन नगर, श्रीनगरॖ कऺशीरि सनॖ 1950-हश मंज़। बरादरन वॊन तीज़मालि। ल्वकचारॖच क्वस बा कथ प्यॆयी च़्यॆ याद अज़। सवाल कॊर तीज़मालि बरादरस। कथ प्यॆयम याद मऻजी ज़ि स्कूलॖ वाल्यव द्युत असि कऻशुर क़ऻयदॖ युस उर्दू ज़बऻन्य मंज़ छापनॖ ओस आमुत तॖ ह्यॊतुख सु क़ऻयदॖ असि शुर्यन परनावुन। ॳस्य ॴस्य शुर्य तॖ रूद्य परान ती यि तमि वख्तुक मास्टर जी ओस परनावान तॖ बोज़ान रोज़ान परनोवमुत सबक़। गव कऻशुर ॴस्य स्कूलन मंज़ परनावान। तीज़मालि वॊन बरादरस। आहनी मऻजी म्यॆ छु पूरॖ ज़ॆहनस मंज़ ज़ि तथ सरकऻर्य स्कूलस मंज़ ह्यॆच़ेयोख कऻशुर परनावुन मगर। बरादर रुक्यव वनान वनान। तीज़मालि दिच़नस ज़ीर तॖ प्रुछ़नस मगर क्याह। च़ॖ क्याज़ि रुक्योख अडॖवती। बरादरन कऺर पनॖन्य कथ पूरॖ यि वऺनिथ ज़ि सु क़ऻयदॖ छु असि पॊरमुत मसा ॳकिस या द्वन ऱयतन कुल। म्यॆ छु याद प्यवान ज़ि यि क़ऻयदॖ आव नॖ पतॖ ज़ांह ति परनावनॖ यीतिस कालस म्यै तमि स्कुलॖ प्यठॖ मिडल पास कॊर। मिडल पास याने प्रुछ़नस तीज़मालि। मिडल पास गऺयो ॷठ्यमि जमऻच़ तॖ दऺहमि जमऻच़ पास करनस ॴस्य वनान मैट्रिक पास। बरादरन तोरनस फिकरी। ख़बर पतॖ क्याज़ि आव नॖ यि कऻशुर परनावनॖ सरकऻर्य स्कुलन मंज़। तीज़माल ॴस यछ़ान ज़ानुन। सियासथ। बरादरन द्युतनस जवाब। अथ मंज़ क्वस बा सियासथ आसिहे। तीज़मालि प्रूछ़ बरादरस। यि सियासथ तऺर नॖ असि तमिसातॖ फिकरी मगर तॊर फिकरी असि स्यठाह च़ीर्य। मुस्लमानन हुन्द दबाव रूद असि कऻशिर्य बटन प्यठ ग्वडॖ प्यठय। यि ति छु अख खास वजह ज़ि ॳस्य रूद्य महरूम पनॖनि माजि ज़्यॆवि निश। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव  koshursabak.blogspot.com प्यठॖ ति)