03.06.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

03.06.2022 ज़्येठ (ज्येष्ठ) ज़ूनॖ पछॖ (शुक्ल पक्ष) च़ोरम (चतुर्थी) शॊकुरवार (शुक्रवार/जुम्मा/भार्गववार), श्री सप्तर्षि सम्वत 5098, नक्षत्र पुन, राश कर्कट (चलान), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

यपऻर्य वुछान छस छि तपऻर्य क्रॖहॖन्य काव, क्रुहुन यि ऒबरा कपऻर्य सना आव, हाव व्वंय बहार मऻज्य बऺनिथ च़ॖ बुलबुल, व्यनॖ पोश छावय बावय द्वदॖ डुल, रऻज्ञन्या दी ॴज्ञन्या वातय बॖ तुलमुल। तीज़मालि ग्यॊव ब्याख पद बजनुक ज़ि बरादरन वॊननस ज़ि मऻजॏ ॷठिम पलायन गव शॊरु कऻशिर्य बटन कऺशीरि प्यठॖ ज्यॊम कुन। हतबा चारॖ क्याह छुख। ज़ुव छु तॖ जहान छु। नोकरी छुखॖ ल्यवुन्य। राथ मोरुख बिचोर बैंक मनेजर क्वलॖगामि बैंकस मंज़ॖय। व्वंय क्वस जाय रूज़ महफूज़। गर नॖ, दफ्तर नॖ, स्कूल नॖ, सड़क नॖ, दुकान नॖ। गछ़न हय तॖ गछ़न कॊत। वनन हय तॖ वनन कऺमिस। करन हय तॖ करन क्याह। तापॖ च़न्जन मंज़ छि दरबॖदर विरोध करान ज़नानॖ, शुर्य, बऺड्य, बुज़र्ग, ॳड्य लाचार, ॳड्य ब्यमार। पऺत्यम्यव अरदहऻव दॊहव प्यठॖ छि बिचऻर्य क्रकॖ दिवान ज़ि सोन सूंचतव कॆंह। मगर सरकारस छुनॖ पलि प्यवान ज़ि अथ समस्यायि क्याह हल छु। कऺशीर बनेयि चांदमऻर नविसरॖ। सरकार करान अरॖसरॖ। बड्यन नेतागणन नॖ गछ़ान ज़रॖ ज़रॖ। ह्यॆन्द्यन लॊगमुत कऺशीरि मंज़ मरॖ मरॖ। व्वंय रूद नॖ कॆंह ति परॖ। सऻरी मुलऻज़िम तॖ तिहॖन्द्य अयाल करान छॊरॖ छॊरॖ। तीज़माल गऺयि वनान तॖ बरादर गव बोज़ान। ज़्येठॖ ब्रसवारॖ छि चलान तॖ ज़ीठयऻरॖ ओस वख अकि मऻलॖ लगान। ज़्येठॖ ॴठम छि यिनॖवाज्यन्य। ज़ानि दय क्युथ माहोल रोज़ि तमि दॊह कऺशीरि मंज़ हालांकि केंच़व संस्थायव छि राय दिच़मॖच़ ज़ि युहुस मॖ गऺछ़िव काह क्षीर भवऻनी। हुपऻर्य छि अमरनाथ यात्रा हॖन्ज़ ति तयऻरी यिवान करनॖ। आहनी मऻजी ती छि बोज़ान। पकान छि ॳस्य ति। वुछव हालात कुस रंग रटि। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)