27.06.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

27.06.2022 हारॖ (आषाढा) गटॖ पछॖ (कृष्ण पक्ष) च़्वदह (चतुर्दशी) च़ऺन्दॖरवार (सोमवार), श्री सप्तर्षि सम्वत 5098, नक्षत्र रोहिन, राश वृष (चलान), ऋतु ग्रीष्म (चलान)...चूंकि च़्वदह छि ज़ॖ गछ़ान ॳज़्युक वॊहरवोद यी पगाह 

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि दपान हाबा छि सनातन धर्मस मंज़ छि शुराह संस्कार मानॖनॖ आमॖत्य। ति छु पॊज़ मऻजी दफ अल्बतॖ सऻनिस समुदायस मंज़ छि आमॖत्य 24 संस्कार हावनॖ सान्यन शास्त्रन मंज़। हालांकि बोद्ध धर्मॖ  हिसाबॖ छि 44 संस्कार आमॖत्य हावनॖ। कऻशिर्य बटॖ छि 24 संस्कार मऻनिथ पकान। यिम संस्कार छि दपान इन्सान सॖन्दि ज़्यनॖ प्यठॖ याने गर्भ अवस्था प्यठॖ तस्सॖन्दिस मरनान्तस ताम मानॖनॖ आमॖत्य। यिम संस्कार कम कम छि तथ प्यठ करव ब्रॊंहकुन कथ मगर यॆतिनस छुस बॖ यछ़ान वनुन ज़ि सऻन्य ज़िठ्य यॊदवय यिमन संस्कारन आयि वरतावनॖच पूरॖ कूशिश करान रोज़ान कॆंह संस्कार छि व्वंय यिवान नज़र अन्दाज़ करनॖ शायद कुनि मजबूरी किन्य या कॆंह अज्ञानतायि किन्य। कॆंच़न संस्कारन हॖन्ज़ ज़ऻन्यकऻरी छॆनॖ वारिहान मगर कॆंह संस्कार छिनॖ विधिपूर्वक  यिवान करनॖ। ह्यॆछनावन  वाल्यन हॖन्ज़ व्यछ़य नमी छि। केंच़न संस्कारन छिनॖ ॳस्य ज़्यादॖ महत्व दिवान ज़ऻनिथ मऻनिथ शायद। असि पज़ि संजीदगी सान यिमन संस्कारन सनुन तॖ वरतावॖन्य विधिपूर्वक ताकि यिमन संस्कारन हॖन्ज़ ज़ऻन्यकऻरी वाति सानि नवि पीरि ताम। बरादरन  वॊन तीज़मालि। कथ छि जऻरी     

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव  koshursabak.blogspot.com प्यठॖ ति)