29.09.2021

29.09.2021, ॴशिद (आश्विन/ ॳसूज) गटॖ पछॖ (कृष्ण पक्ष) ॴठम (अष्टमी) ब्वदॖवार (बुधवार), श्री सप्तर्षि  सम्वत 5097, नक्षत्र ॴर्द्र, राश मिथुन (चलान), ऋतु हरुद (शरद) (चलान), ॴठम हुन्द श्राद्ध यी ॳज़्य, पुनिम हुन्द श्राद्ध यी पितृ मावसि दॊह याने (06.10.2021)

************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

************************

  महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

************************

ज़ॖ जंत्री छि अज़कल असि कऻशिर्य बटन प़चान्ग, याने तिथि, वार वगैरा वुछनॖ बापथ। अख छि पंडित ओंकार नाथ शास्त्री जियिन तॖ ब्याख छि पंडित पुनीत जियिन। यॊदवय यिम द्वशवय जंत्री छि विजयेश्वर नावॖ सॗत्य परनॖ यिवान मगर द्वशवऺन्य जंत्री लेखन वाल्यन हुन्द पंचान्ग छुनॖ कुनि कुनि जायि मेल ख्यवान। मस्लन राश लेखनुक समय छुनॖ ह्युवॖय द्वन जंत्रीयन मंज़। ॳकिस मंज़ छु पितृ पक्ष पुनिम हुन्द श्राद्ध हावान पितृ मावसि दॊह, दॊयिमि मंज़ छु हावान यि श्राद्ध पितृ पक्ष ब्रोंठॖय याने बऻदॖरप्यथ ज़ूनॖ पछॖ च़्वदॖश दुहुय। म्यानि वनॖनुक मतलब छु ज़ि ॳस्य छिनॖ ह्यकान यि मोमूली फरॖख पनॖन्यन जंत्रीयन मंज़ ठीख करनऻविथ, कथॖ छि करान तिमन चीज़न हॖन्ज़ यिमन चीज़न सॗत्य वासतय छुनॖ। सऻन्य शुर्य या कॆंह बऺड्य छिनॖ ह्यकान जंत्रीयन मंज़ हऻविथ मंत्र पऺरिथ, थ्यकान छि ज़ि ॳस्य छि यंव तॖ ॳस्य छि ट्यंव। कथ छि जऻरी

************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)