22.04.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

22.04.2022 वह्यक (वैशाख/बैसाख) गटॖ पछॖ (कृष्ण पक्ष) शॆयम (षष्ठी) देवादेव, शॊकुरवार (शुक्रवार/जुम्मा/भार्गववार), श्री सप्तर्षि सम्वत 5098, नक्षत्र पू.षा, राश मकर (रऻच़ हॖन्ज़ॖ 01.52 बजि प्यठॖ), ऋतु वसंत (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि दपान अनन्तनागस मंज़ छि कथ ताम जायि आमॖत्य कॆंह फ्लैट तयार करनॖ यिमन मंज़ केंच़न कऻशिर बटॖ परिवारन बॆहनावनॖच मुस्लिम छि ज़ेरि अमल। बरादरन प्रुछ़ तीज़मालि ज़ि मऻजी क्याह सना अनन्तनागस छा वुनि सुय नाव किनॖ बदलॖ नाव। नबा त नाव क्याज़ि बदलावन। तीज़मालि कॊर वापस सवाल बरादरस। मऻजी अनन्तनागस छु तिमव करताम नाव बदलऻविथ इस्लामाबाद थोवमुत। च़्यॆ छय ना खबर। नबा असि वोत अनन्तनागॖय वनान अज़ताम। तीज़मालि द्युत बरादरस जवाब। मऻजी त्यॆलि ॴस्य ॳस्य कऺशीरी मंज़ॖय यॆलि मुस्लमानव ओस प्राइवैट बसन प्यठॖ अनन्तनागॖचि जायि इस्लामाबाद ल्यूखमुत।  सु नाव मा थवन तिम म्यॆ बासान तिथय पऻठ्य। आहनबा तॖ त्यॆलि कति बदलावन यॆलि सु ग्वडॖ प्यठय आमुत छु लेखनॖ। सरकारॖच मन्ज़ूरी छा सना आमॖच़ दिनॖ अथ नावॖ बदली। तीज़मालि प्रुछ़ बरादरस। सु ननि व्वंय यॆलि ॳस्य तॊत वातव। बरादरन द्युत जवाब। बॖ हाबा छस सोंचान ज़ि सान्यन शुर्यन क्याह बनि। तिहन्ज़न नोकरियन क्याह सना करन। बरादरन वॊन तीज़मालि ज़ि मऻजी शुर्यन हुन्दुय योत मसलॖ नाय छु नॖ बऺल्यकि छि हतॖबऺद्य मसलॖ ब्यॆयि ति। कऻत्यहान मस्लन दिमव वाठ। यि नय छॆनॖ सहल कथा मऻजी ब्यॆयि वापस कऺशीरि गछ़ुन। यिमन द्वयत्रॖहन वऺर्यन मंज़ बदल्येयि ग्रॆन्दि रॊस रंग। यॆति असि तॖ तति तिमन। वुछुन छु व्वंय वाठ लगि कमन कमन ति क्याज़ि ॳड्य बदल्यॆयि समयस सॗत्य सॗत्य,ॳड्य रऺट्य महामऻरी तॖ ॳड्य नी यमन तॖ ॳड्य ख्यॆयि ग़मन। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)