06.04.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

स्कंदमातायि हुन्द दॊह अज़

+++++++++++++++++

🙏🙏 नमस्कार माहरा

06.04.2022, च़ित्थॖर (चैत्र/चैत) ज़ूनॖ पछॖ (शुक्ल पक्ष) पऻन्च़म (पंचमी) देवादेव, ब्वदवार (बुधवार), श्री सप्तर्षि सम्वत 5098, नक्षत्र रोहन, राश वृष (चलान), ऋतु वसंत (चलान), नवरात्र (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

सन्जि दिवान ज़ऻल्य ह्यन्दॖव्यन्दॖ च़लान नीर्य नीर्य। तीज़मालि वॊन बरादरस। अज़ क्याज़ि प्यॆयी च़्यॆ यि दऺपिथ कथ याद मऻजी। प्रुछ़ बरादरन। बॖ हाबा ॴसॖस बोज़ान ज़ि कऺशीरि मंज़ मा छि मुस्लमान व्वंय पोस्टर बऻगरावान यथ मंज़ दपान लीखिथ छु ज़ि कऻशिर्य बटॖ छि बाहरी याने न्यॆबरिम। च़्यॆ कती बूज़ुथ यि नॊव शोशॖ। बरादरन प्रुछ़ तीज़मालि। व्हाटसापस प्यठ हाबा वुछुम कथ ताम चन्नलि प्य़ठ। तीज़मालि द्युतनस जवाब। बरादरन द्युत दम ह्यु तॖ वॊनुन तीज़मालि ज़ि वख वोता योर ताम ज़ि व्वंय छि परगगरॖय वनान गरगगरन ज़ि तॊह्य छिवॖ नॖ यॆमि नगरॖक्य बऺल्कि छिवॖ तॊह्य बाहरी याने न्यॆबरिम। तीज़मालि वॊन बरादर ज़ि अथ हाबा वनान ज़ि युस म्यॆ रॊछ तऺस्य निश रछतम ख्वदायो।  बरादरन वॊन तीज़मालि ज़ि यॊदवय यि च्योन बूज़मुत पॊज़ छु त्यॆलि बडेयि म्यॆ बासान असि ब्याख परेशऻनी। ॳसि वोत अज़ताम हल छ़ान्डान तॖ सन्ज़ करान वापस कऺशीरि वातनुक मगर तिम छि वुनि करान छ़ल असि सॗत्य तॖ वनान कऻशुर बटॖ छु टनलि अपोरुय जान। तीज़मालि वॊन बरादरस ज़ि बोज़ान ॳसॖस ज़ि मारॖवातल छि वुनि तति नच़ान हऺथ्यार ह्यॆय ह्यॆय।। दपान आतन्कवाद्यव छि राथ ब्यॆयि ज़ॖ त्रॆ नफ़र ॳन्यमॖत्य गोल्यन हॖन्द्यन ज़दस मंज़। तीज़मालि प्रुछ़ बरादरस  ज़ि अमा यि सऻन्य डोमिसाईल सऺर्टिफिकेट लग्या सना कुनि व्वंय तति। यिथ्यन हालातान मंज़ छु म्यॆ  बासान ज़ि असि मा दपन पासपोर्ट बचावुन कऺशीरि गछ़नॖ बापथ। अदॖ बऺड कथ छय नॖ तीज़मालि वॊनॖनस। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)