03.04.022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

ब्रह्मचारिणी हन्ज़ पूज़ा अज़

+++++++++++++++++

🙏🙏 नमस्कार माहरा

03.04.2022, च़ित्थॖर (चैत्र/चैत) ज़ूनॖ पछॖ (शुक्ल पक्ष) द्वय (द्वितिय) देवादेव आथवार (रविवार/ऐतवार), श्री सप्तर्षि सम्वत 5098, नक्षत्र अश्विन, राश मेष (चलान) ऋतु वसंत (चलान)..नवरात्र (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि प्रुछ़ बरादरस क्याहबा च़ॖ ओसुख ना गोमुत ऊतरॖ जंत्र मंत्र। मऻजी यनॖ ॳस्य कऺशीरि प्यठॖ च़ऺलिथ आयि तनॖ प्यठॖ वोत असि लगातार जंत्र मंत्र गछ़ान पऺत्यम्यव द्वयत्रॖहव वऺर्यव प्यठॖ। बरादरन वॊन तीज़मालि। कॆंह आवा हऻसिल वुन्युखताम। तीज़मालि प्रुछ़ ब्याख सवालॖ बरादरस। बरादरन कऺर नज़राह तीज़मालि कुन तॖ दिच़ॖन ल्वति च़ऺन्डाह पनॖनिस ड्यकस तॖ ह्यॊतुन पनुन तजरुबॖ बोज़नावुन। कथ पनॖन्य शॊरु करनॖ ब्रोंह ओस बरादर यछ़ान कॆंंह ज़ानुन तॖ अवॖ म्वखॖ प्रुछ़ुन तीज़मालि ज़ि मऻजी च़्यॆ छुया याद ज़ि च़ॖ कर द्रायख कऺशीरि प्यठॖ। हय क्याबा यि किछ़ कथ कऺरॖथ। गॊछ़ुम ना याद आसुन। यि कथ नय वुम्बरि गछ़्यम मऺशिथ। बॖ हाबा द्रायस कऺशीरि न्यबर ग्वडनिचि लटि द्यसम्बर 1989 ई० मंज़। कऺशीरि मंज़ कति ॴस्यवॖ तॊह्य रोज़ान। बरादरन प्रुछ़नस। ॳस्य हाबा ॴस्य सोपोरॖ रोज़ान। तॊह्य कति ॴस्यवॖ तति रोज़ान। तीज़मालि कॊर वापस सवाल बरादरस। मऻजी ॳस्य हय ॴस्य अनन्तनाग तरफॖ रोज़ान। ॳस्य द्रायि कऺशीरि प्यठॖ कुनवुहशथ तॖ नमतस मंज़ जनवरी किस ग्वडनिकिस हफ्तस मंज़। म्यॆहाबा वुछ्य जवऻहिर टनल ग्वडनिचि लटि यॆलि बॖ कऺशीरि द्रायस। तति ओसुख तिमनॖय दॊहन सोपोरस मंज़ मंन्दरस ॳकिस नार द्युतमुत तॖ असि आयि पनॖनी हमसायि यि वनॖनि ज़ि मुस्लमान दपान छि क्याहताम सूसॖरि गूसॖरि करान तॖ बोज़ान ॴस्य ज़ि यिमन छि ॳस्य कऻशिर बटॖ कतरावॖन्य।यि कथ बूज़िथ च़ऺज्य असि ख्वर तलॖ म्यॆच़ नीरिथ तॖ प्यॆयि ज़न ॳस्य आसमानॖ यि बूज़िथ ज़ि यि क्याह गव रऻत्यनि मंज़ी । पलि प्यव नॖ कॆंह ज़ि ॴखॖर ॳस्य हय करव तॖ करव क्याह। गछ़व हय तॖ गछ़व कॊत। तीज़मालि गऺयि ॳछ नम यि वनान वनान। युथुय हिसाबा बोज़ च़ॖ मऻजी सपद्यव असि सॗत्य ति। बरादरन कऺर च़टवॖन्य कथ। म्यॆहाबा प्रूछ़्योमय ज़ि जंत्र मंत्रॖ ओसखा गोमुत। च़्यॆ डऻजिथ कथॖय ज़न। तीज़मालि वॊन बरादरस। कथ नय डऻजिम नॖ बऺल्कि कथि छुस कूशिश करान वाठ दिनॖच जंत्र मंत्रस सॗत्य।कथ छि जऻरी   

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)