14.04.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

14.04.2022, च़ित्थॖर (चैत्र/चैत) ज़ूनॖ पछॖ (शुक्ल पक्ष) त्रुवाह (त्रयोदशी) ब्रसवार (गरूवार/वीरवार/ब्रहस्पतवार), श्री सप्तर्षि सम्वत 5098, नक्षत्र पू.फा, राश कन्या (दुहचि 03.54 बजि प्यठॖ), ऋतु वसंत (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

त्राहि त्राहि। तीज़माल रूज़ पानसॖय सॗत्य वनान। बरादरन प्रुछ़ तीज़मालि। मऻजी किहे दऺलील छि, च़ॖ कथ प्यठ बीठॖख त्राहि त्राहि करनि। हतबा वीडियो ज़ॖ च़ोर वुछिम तॖ मन शिठ्योम। मऻजी वीडियो कति वुछिथ तॖ क्याह वुछुथ त्युथ। सोंचान छस ज़ि कति प्यठॖ ह्यमॖ वनुन। हतबा मोबाइलॖस प्यठ वुछिम यिम कॆंह वीडियो तॖ वुछान वुछान त्रऺहरेयस। मऻजी सोरुय यि ॳस्य वुछान छि मोबाइलॖ दऺस्य छुनॖ आसान पॊज़। हतबा क्याह छुख च़ॖ वनान। अपुज़ ति यॊदवय हावन तॖ कोताह। दफ अमापॊज़ तमि कथि हॖन्ज़ ज़ितिन छि आसान कुनि नतॖ कुनि कूनस प्येमॖच़। अदॖ कथ डेरस कत्यन छु ज़ॊंग लगान स्व छि अलग कथ। नाय तॖ च़्यॆ क्याह वुछुथ अज़। अख ज़ॖ वीडियो वुछिम यिमन मंज़ कॆंह बदज़ाथ लूख गऻवन हॖन्ज़ हत्या ॴस्य करान, अख ज़ॖ वीडियो वुछिम यिमन मंज़ दऺर्यावस मंज़ त्रावनॖ बजायि कुल्यन तल ओस आमुत त्रऻवनॖ  नवरात्रॖ पूज़ायि पतॖक्य कॆंह मूर्ती,कतरिव्यन बानन मंज़ वऺवमॖच़ नवदुर्गायि हॖन्द्य कॆंह अंश। नवदुर्गा पूज़ाय पतुक बच्यॊमॖत सामान याने पोश, ॳग्नुक सूर, अडॖदऺज़ लऺकॖर, मोमी लिफ़ाफॖ, मॏली, पेपर प्लेटॖ वगैरा तॖ हून्य ॴस्य मतेमॖय, अख ज़ॖ वीडियो वुछिम ह्यॆन्द्यन हॖन्द्यन जलसन प्यठ कनि लायान कमताम बदबख्त, अख ज़ॖ वीडियो वुछिम ज़ि कथ ताम मन्दरस मंज़ सब्ज़ रंग जन्डॖ खऻर्यमॖत्य केंच़व शरारती लूकव तॖ कथ ताम मन्दरस मंज़ मुस्लमान इस्लऻमी तऻलीम परान तॖ परनावान तॖ तऺथ्य मंनदरस न्यॆबॖरकनि मुस्लमान वाज़ॖवान चलान। बरादरस डॊल बुथ्युख रन्ग तॖ वॊनुन तीज़मालि ज़ि मऻजी कॆंह वीडियो वुछ्य म्यॆति अमी कॖस्मॖक्य। यि छि पऺज़्यपऻठ्य सोंचनॖच कथ। दय ज़ानि असि बटन तॖ तमाम ह्यॆन्द्यन क्याह क्याह छु बुथि वुछुन। बरादरन वॊन तीज़मालि ज़ि बॖ ओसुस वुछान अख वीडियो यथ मंज़ अख संत महात्मा ओस वनान प्रमाण ह्यथ याने अख़बारन मंज़ छपैमॖच़ खबर ज़ि कऺशीरि मंज़ अज़ दऺह पन्दाह वऺरी ब्रोंह  ओस अमि ख्वतॖ ति गन्दॖ  कऻम आमॖच़ करनॖ याने बटॖसुन्द मांज़ यिवान ख्यनॖ मगर ख़बर दबेयि अखबारक्यन सुर्खियन मंज़ॖय तॖ कुनि तरफॖ कॊर नॖ कऻन्सि उफ ति। तनाव छु च्ववापऻर्य पनपान। वुछुन छु कॗतिस कालस रोजन यिछ़ॖ कथॖ फऺतिस तल। कथ छि जऻरी  

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)