02.04.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

02.04.2022, च़ित्थॖर (चैत्र/चैत) ज़ूनॖ पछॖ (शुक्ल पक्ष) ऒक्दॊह (प्रथमा/प्रतिपदा) देवादेव बटॖवार (शनिवार/शनिश्चरवार), श्री सप्तर्षि सम्वत 5098, नक्षत्र रेव, राश मेष (दुहचि 11.21 बजि प्यठॖ) द्रठॖपऻन्च़ुक

 (पंचक) (समाप्त), ऋतू बसंत (चलान)

---------------------------------

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

🍇🍇🍇🍇🍇🍇

नवरैह याने नॊव वऺरी नेरुन त्वहि सारिनी ह्रॊच़ तॖ फ्रूच़। मनोकामनायि ति गऺछ़ॖन्य सारिनी स्यद्ध

🍇🍇🍇🍇🍇🍇

बरादरन कॊर नवरेह मुबारक तीज़मालि तॖ तीज़मालि द्युतनस ॴशिर्वाद तॖ वॊनुनस च़ॖ हाबा बजाह गछ़ुन नवुन तॖ फ्वलुन कुल्य ज़गतस सान। बरादरन वॊन तीज़मालि ज़ि मऻजी यि नवरेह ॴस्य वख अकि मनावान कऺशीरि मंज़ बडॖ चिकॖ चावॖ सान। रामॖच़ऺन्द्रिनि ओस मऻलॖ लगान। बतॖ श्युन ह्यथ ॴस्य गछ़ान निशात, शालॖमऻर, हऻर्वन, नैहरू पार्क, चॆशमऻ शऻही। शुर्य ॴस्य नॖ अथि यिवान कुनि। गिन्दान द्रॊकान ॴस्य बॊफ्रूक पऻठ्य। ग़म दफऻयी ॴस गछ़ान। ताज़ॖ हवहऻस मंज़ आसॖ ब्वकॖ फ्वलान। ल्वकॖट्य मोसूम शुर्य ॴस्य नॖ नव्यन पलवन मंज़ व्यच़ान कुनि। द्वयत्रॖह च़्वयत्रॖह वऺरियुक सु मन्ज़रॖ छु बासान ज़न ति छि बस रातॖच कथ। कुनवॖहशथ कुनॖनमथ तॖ नमतॖस मंज़ युस बटन प्यठ ज़ुलुम तॖ नर-सम्हार कॊर तति कऺशीरि मंज़ मारॖवातलव ॳस्य कऻशिर्य बटॖ गऺयि तार तार। ख़बर कम पाफ ॴस्य असि कऺर्यमॖत्य यीत्य ज़ि मुठ्य फऺल्य मूरन गऺयि असि तॖ छऺकॖरावनॖ आयि कपऻर्य कपऻर्य लऺग्य ॳड्य लार तॖ ॳड्य दार। मऺशिथ गऺयि तिम बाग़, सु हवा सु फ़िज़ा। सु नच़ुन तॖ फ़ेरुन। बस रूद अगर याद तॖ सु गव सिरिफ़ सु गु़ज़ोरमुत वखॖत तॖ ब्यॆयि नॖ कॆंह। हमसूस छु यि असि ज़ि सान्यव शुर्यव वुछ नॖ कऺशीर तिमव छोव नॖ सु बसंत बहार यिमन द्वयत्रॖहन वऺर्यन। खऻर व्वमेद छि ज़ि अज़ नय तॖ पगाह, ॴसय ज़िन्दॖगऻनी वातव ब्यॆयि तिमन जायन यिमव जायव प्यठॖ प्यव असि करुन पलायन। बरादरन वॊन तीज़मालि। तथास्तु।  जवाब द्युत तीज़मालि। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)