04.04.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

माता चन्द्रघण्टाय हॖन्ज़ पूज़ा अज़

+++++++++++++++++

🙏🙏 नमस्कार माहरा

04.04.2022, च़ित्थॖर )(चैत्र/चैत) ज़ूनॖ पछॖ (शुक्ल पक्) त्रय (तृतीया) देवादेव च़ऺन्दॖरवार (सोमवार), श्री सप्तर्षि सम्वत 5098, नक्षत्र। भरण, राश वृष (रऻच़ हॖन्ज़ि  09.01 बजि प्यठॖ), ऋतु वसंत (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी  नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

अज़ छि ज़ंगॖ त्रय। यि दॊह ति ओस यिवान मनावनॖ बडॖ रसमो रिवायतव सान कऺशीरि मंज़ वख अकि। मगर यनॖ ॳस्य कऻशिर बटॖ कऺशीर त्रऻविथ आयि कुनवुहशथ तॖ नमतॖ प्यठॖ यि ज़ंंग त्रय रसॖम छि नाव मात्र बापथ मनावान। तीज़मालि वॊन बरादरस। बरादरन वॊनॖनस ज़ि मऻजी म्यॆ छु याद ज़ि सानि ज़नानॖ आसॖ गछ़ान पनुन पनुन माल्युन सातॖ बापथ तॖ आसॖ यिवान सिन्य सालाह ख्यथ च्यथ तॖ आसॖ यिवान नून तॖ अतॖगथ ह्यथ। तीज़मालि वॊन बरादरस ज़ि तिम मालिन्य कतिबा रूद्य। यि रसॖम हाबा छि निबावान व्वंय कॆंह संस्थायि वऻल्य ति क्याज़ि कॆंचन ज़नानन छुनॖ माल्युन गछ़नस वार व्यस्तार। आहनी मऻजी ती ओसुस बोज़ान ज़ि आथवार आसनॖ म्वखॖ कऺर यि प्रथा पूरॖ अख दॊह ब्रोंठॖय याने राथॖय हालांकि ज़ंगॖ त्रय दॊह छु अज़। ख्यनाह च्यनाह ॴस्य करान ॳज़्यकि दॊह कऺशीरि मंज़। न्यॆनि बताह ॴस्य ख्यवान टास कऺड्य कऺड्य। वरादरन वॊन तीज़मालि ज़ि म्यॆ हय छु बूज़मुत ज़ि नवरात्रॖन मंज़ ॴस्य ॳस्य कऻशिर्य बटॖ मामस याने न्यॆनि ख्यवान कऺशीरि मंज़ ग्वडनिक्यन च़्वन दॊहन तॖ नवम दॊह ॴस्य च़ॊट याने तऺहर च़र्वनॖ खारान च़ऺक्रीश्वर तॖ ॴस्य बऻगरावान तॖ शूशनोर ॳस्य त्रावान तति गऻन्टन। आहनबा च्योन वनुन छु पॊज़। म्यॆहाबा बूज़ ज़ि यि प्रथा छि कॆंच़व बटव जऻरी थऻवमॖच़ वुन्युखताम योर यिनॖ पतॖ ति। गव तिम छि असली कऻसिर्य बटॖ। बरादरन कऺर अंसान असान कथ पूरॖ। कथ छि जऻरी।

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव।

 भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)