05.04.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

माता कूष्माण्डायि हुन्द दॊह अज़

+++++++++++++++++

🙏🙏 नमस्कार माहरा

05.04.2022, च़ित्थॖर (चैत्र/चैत) ज़ूनॖ पछॖ (शुक्ल पक्ष) च़ोरम (चतुर्थी) देवादेश बॊम्वार (मंगलवार), श्री सप्तर्षि सम्वत 5098, नक्षत्र कृति (क्रछ़),राव वृष (चलान) ऋतु वसंत (चलान) नवरात्र (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन वॊन तीज़मालि ज़ि मऻजी बॖ हाबी ओसुस नॖ गोमुत यॆमि लटि याने ऊतरॖ जंत्र मंत्र। खबर क्याज़ि। प्रुछ़ तीज़मालि बरादरस। मऻजी व्वंय छॆ नॖ स्व सामरथ तथ तापॖ क्रायि मंज़ खडा रूज़िथ नऻरॖ बऻज़ी करॖनॖच। नबा तॖ यॊत्तम नॖ नऻरॖ दी दी सरकार वुज़ॖनावोन तॊत्ताम प्यन असि क्रकॖ दिन्यॆ दिन्य। तीज़मालि वॊन बरादरस। ति छु पॊज़ मगर यॆलि सरकार ज़ऻनिथ मऻनिथ कनन थॊप दी तॖ ॳछव ऒन लागि सवऻल्य क्याह सना करि। मऻजी जंत्र मंत्र गऺछ़्य गऺछ़्य कऺर्य असि कऻशिर्य बटव सऻरी यंत्र खऻली मगर कांह ति तंत्र गव नॖ स्यॊद वुन्युखताम। बरादरन वॊन तीज़मालि ज़ि पत्यम्यव त्रॖहव वऺरियव प्यठॖ वोत असि जंत्र मंत्र गछ़ान। त्रॖह वऺरी ब्रोंह ओसुस बॖ अरतऻजी वुहुर। बॖ च़ास व्वंय मऻजी अरसत्त्रन मंज़ मगर नऻरॖ छि तिमय तॖ सान्यन क्रकन ति द्युत नॖ कन सरकारन अज़ताम। हॊट ह्वख असि मगर सरकारस छॆ नॖ ग्रेन ति गछ़ान। तीज़मालि सूंच ज़ि बरादर छु पॊज़ वनान। बरादरन वॊन ब्रोंहकुन ज़ि मऻजी ॳस्य ति छि द्वन ख्रावन प्यठ ख्वर थऻविथ। असि यीच़ॖ संस्थायि बन्यॆयि कऺशीरि न्यबर नीरिथ तीच़न संस्थायन छि ब्यॊन ब्यॊन  वयच़ार तॖ ब्यॊन ब्यॊन मांगॖ। जंत्र मंंत्र वऻतिथ छि बोज़ान रोज़ान प्रथ ॳकिस संस्थायि हॖन्ज़ पनॖन्य पनॖन्य मांग। अवॖ म्वखॖ ति रोव सान्यन मांगन हुन्द व्यकार म्यॆ बासान। व्वंय छु नॖ पानसॖय पलि प्यवान ज़ि कथ संस्थायि सॗत्य जोडव पनुन पान। इस्लियै छु म्यॆ बासान गरि ब्युहनुय जान। हालांकि काशमीर फाइल्ज़ फिल्मि दिच़ेयो मोकॖ असि ब्यॆयि अकि लटि पनुन सीनॖ हावहऻव मुच़रऻविथ सरकारस मगर बासान छु ज़ि यॊमि लटिच ति सऻन्य दमऻल्य मा गछ़ि फऺक्य। बरादर वॊन तीज़मालि ज़ि यॆमि लटि दपान प्रदर्शन ओस ज़ोरदार तॖ तिरंगॖ ओस ज़्यूठ ज़्यूठ शान्दार।  कथ छि जऻरी।

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)