11.04.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

11.04.2022, च़ित्थॖर (चैत्र चैत) ज़ूनॖ पछॖ (शुक्ल पक्ष) दऺहम (दशमी) च़ऺन्दॖरवार (सोमवार), श्री सप्तर्षि सम्वत 5098, नक्षत्र तिष्या (चलान) राश कर्कट (चलान) ऋतु वसंत (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि यि कऻशुर बटॖ क्याह ज़ाथ छु बॖ हाबा छस हऻरान। बरादरन प्रुछ़ तीज़मालि हऻरऻन्यगी हुन्द सबब। हतबा अख वजह आसिहे तॖ वनहऻय। नाय तॖ कांह अख वजह वन। तीज़मालि वॊन बरादरस ज़ि यॊदवय च़्यॆ ज़्वन आसी कऺशीरि मंज़ ॴस्य नॖ बटॖ वख अकि गन्डॖ या रोहनॖ ख्यवान। टमाटर ख्यनस ति ॴस्य करान परहेज़। सब्ज़ी य्वॊस ति बनावहऻन शाकाहारी या मांसाहारी याने वैष्नव या मामस ॳकिस ति सिनिस मंज़ ॴस्य नॖ त्रावान गन्डॖ, टमाटर या रोहनॖ। दपान ॴस्य यिम चीज़ गऺयि छ़्यॆट। मगर  व्वलॖग्वतुन ख्यव वख्तन युथ ज़ि अज़कल छुनॖ यिमव चीज़व रॊस ख्यन हटि ब्वन वसानॖय। रामलालस बिचऻरिस गऺयि ज़ॖ हिसॖ। याने 'ह' म्यूल रामस तॖ बन्यऻव हराम तॖ यिहऻय 'ह'' म्यूल लालस तॖ सु बन्यऻव हलाल। मगर बटॖ छु वुनि सुय रामलाल। सु छु जटकॖ माज़ ति ख्यवान तॖ हलाल मांज़ ति ख्यवान रोज़ान। मुस्लमान छुनॖ जटकॖ माज़ ख्यवान। बटॖ सॖन्दिस ख्यनस च्यनस मंज़ छु आमुत कति कोर बदलाव। छ़्यॊट श्रूच़ रूद लबि ताकस।  म्यॆ छु बूज़मुत ज़ि दपान ॴस्य वख अकि ज़ि शुर्यन ख़ास कर कोरियन गछ़न नॖ व्वज़ॖल्य मर्च़ॖवांगन दार चीज़ दिन्य ख्यनॖ बापथ ति क्याज़ि यिम चीज़ ख्यनॖ सॗत्य ॴस्य दपान ज़ि मिजाज़ छु तेशल याने गर्म रोज़ान मगर सु वनुन ति छुनॖ व्वंय कांह माने थवान। बरादर गव बोज़ान तॖ वॊनुन तीज़मालि ज़ि ज़मानॖ बदल्यव, हालात बदलॆयि कऻशुर बटॖ ति अगर बदल्यव च़ूर क्याह कऺरॖन। नबा बदलुन छु वख्तस सॗत्य सॗत्य प्यवान तॊताम गव ठीख मगर पनॖनि धर्मुक ख़याल थऻवुन ति छु ज़ॊरूरी। छ़्यॆछरुक श्रोच़रुक ख़याल थावनु ति छु ज़ॊरुरी। पाठ पूज़ा करुन ति छु ज़ॊरूरी। संस्कृति तॖ संस्कारन रऻछ करॖन्य ति छि ज़ॊरूरी। ख़बर ग़लत मा वॊनुम। नाय मऻजी च्यऻन कथ ति छि याद थवनस लायक। पनॖन्य फाकॖ तॖ व्वत्सव मऺशरऻविथ ब्यॆयि ज़ऻच़ हॖन्द्य फाकॖ तॖ व्वत्सव पानॖनऻवॖन्य छुनॖ जान रोज़ान कुनि ति ज़ऻच़ बापथ। बरादरन वॊन तीज़मालि।कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)