15.04.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

15.04.2022, च़ित्थॖर (चैत्र/चैत) ज़ूनॖ पछॖ (शुक्ल पक्ष) च़्वदह (चतुर्दशी) शॊकुरवार (शुक्रवार/जुम्मा/भार्गववार(, श्री सप्तर्षि सम्वत 5098, नक्षत्र उ.फा, राश कन्या (चलान) ऋतु वसंत (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि ओस कमि ताम खति मंज़ॖ प्रोन एल्बम कॊडमुत तॖ ॴस सन्येमॖच़ केंच़न फोटॖवन मंंज़। बरादरन प्रुछ़ तीज़मालि ज़ि मऻजी यिम करकीय फोटव वुछनस मंज़ छख च़ॖ लीन गऻमॖच़। हतबा राथ ॴसना बऻसऻखी। आहनी ॴसहय अदॖ। म्यॆहाबा प्यव ल्वकचार याद तॖ दिलस लऺजिम ग्राय हिश। ख़बर क्याज़ि। बरादरन प्रुछ़नस। यिम फोटव वुछान वुछान हाबा वऻच़ॖस बॖ पनॖनिस पॊतकालस मंज़ यॆलि ॳस्य गछ़ान ॴस्य डूंगस मंज़ निशात शालॖमऻर बऻसऻखी दॊह। डल सऻलाह ॴस्य करान। बतॖ स्युन ॴस्य डूंगस मंज़ॖय बनावान। डलॖ मंज़ॖ ॴस्य ख्यलवऺथॖर खारान तॖ तिमनॖय प्यठ ॴस्य मज़ॖ सान बतॖ ख्यवान रोज़ान। बरादरस आव ॴसस पोन्य तीज़मालि हॖन्ज़ कथॖ बूज़िथ तॖ वॊनॖनस ब्रोंहकुन ज़ि डलॖच त्रेशाह ति ॴस्य च्यवान रोज़ान। बतॖ स्युन ह्यथ ॴस्य कऺशीरि मंज़ लूख बसन मंज़ ब्यॊन ब्यॊन जायन गछ़ान रोज़ान तॖ बऻसऻखी मनावान रोज़ान। ॳज़्यकि दॊह ॴस्य कऻशिर्य बटॖ इशबऺर गऺछ़िथ गुप्तॖ गंगायि मंज़ श्रान ध्यान करान रोज़ान तॖ कॆंह लूख ॴस्य स्वामी लक्ष्मण जुव आश्रम गऺछ़िथ तऺम्यसुन्द दर्शुन करान रोज़ान। ल्वकॖट्य ल्वकॖट्य शुर्य ॴस्य नॖ व्यच़ान कुनि तॖ ॴस्य नच़ान फेरान। सारेय जायि आसॖ ग्रज़ान तॖ आसॖ आसान कऻशिर्य बटव सॗत्य बऺरिथ मगर अज़ छि तिम जायि प्येमच़ॖ हऺरिथ ति क्याज़ि आतंकवाद्यव न्यू यिमन जायन डुबॖडास कऺरिथ। हालांकि वनॖनस तल छु यिवान ज़ि बऻसऻखी त्योहार छु दरअसॖल पंजाब्यन हुन्द त्योहार मगर ॳस्य कऻशिर्य बटॖ ति ॴस्य मनावान यि त्योहार बडॖ खुमारॖ सान तॖ चमॖ खमॖ सान वख अकि कऺशीरि मंज़। कति यिन फीरिथ तिम दोह। मऺश्यथॖय गव असि यि बॊड दॊह। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)