31.03.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

31.03.2022, च़ित्थॖर (चैत्र/चैत) गटॖ पछॖ (कृष्ण पक्ष) च़्वदह (चतुर्दशी) देवादेव ब्रसवार (गरूवार/वीरवार/ब्रहस्पतवार), श्री सप्तर्षि सम्वत  5097, नक्षत्र पू.भा, राश मीन (चलान) ऋतु वसंत (चलान) द्रठपऻन्च़ुक (पंचक) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़माल ॴस पानस सॖत्य ग्यवान ज़ि बॖ हा छस कऻशिर कूर, कऺशीरि प्यठॖ लऺज्यमॖच़ स्यठाह दूर, छस बॖ ब्यॆयि हना मजबूर, याद छुम प्यवान ल्वकचारुक गूरॖ-गूर। बरादरन बूज़ तीज़मालि हुन्द यि वच़ुन तॖ प्रुछ़ुनस हऻरऻन्यगी सान ज़ि मऻजी अज़ कथ कथि प्यठ प्यॆयि च़्यॆ यिम हर्फ ज़ॖ च़ोर याद। म्यॆहाबा प्यॆयि हंगतॖ मंगॖ कऺशीर अज़ याद। जवाब द्युत तीज़मालि बरादरस। नाय तॖ कऺशीर मऺशिथ गछ़ि कऺमिस तॖ किथॖपऻठ्य। बरादरन कऺर पनॖनि कथि वज़ाहत। कऺशीर हाबा छि याद व्वंय च़्यॆ तॖ म्यॆय यऻच़। नवि पुयि छु नॖ कॆंह न्युन ह्यॊन कऺशीरि। यिम त्रॖह पान्च़ॖत्रॖह वऺरी असि कऺड्य कऺशीरि न्यबर, सान्यन शुर्यन छॆ नॖ बॊयी ज़ि कऺशीर छा जाय किनॖ  कांह जानवर। तीज़मालि वॊन बरादरस। सान्यन शुर्यन छॆ नॖ पताह ज़ि तिहॖन्ज़ कऻशिर ज़्यव छि क्याह। ॳस्य ति छि यी वऺनिथ पनुन कचुल बाह त्रॊक करान ज़ि कऺशीरि मंज़ छिनॖ व्वंय मुस्लमान ति कऻशिर्य पऻठ्य कथ करान। याने ॳस्य छि यि मऻनिथ पकान ज़ि ज़न छि तिमय सऻन्य वतॖ हावक। मत्लब मुस्लमान अगर कऻशिर पऻठ्य कथ छु नॖ करान, ॳस्य बटॖ ति अगर कऻशिर्र पऻठ्य कथ करव नॖ तॖ कांह फरॖख छॆ नॖ प्यवान। यि छि असि ग़लत सोंच। असि छुनॖ फिकिरी तरान यि ज़ि मुस्लमान संख्या छि हुर्रान गछ़ान दॊह पतॖ दॊह तॖ कऻशुर बटॖ छु छ़ॊकान संख्यायि मंज़ दॊह पतॖ दॊह। कऺशीरि मंज़ ओस माहोल केंच़व रंगव बडॖ जान वख अकि मगर केंच़व रंगव ओस सख गन्दॖ तॖ सितमलद। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

ज़ऺर्य बूज़ बहि वुहॖर्य बडशाह मूद। असर ह्यॊतुन सपदुन बासान छु। दपान मानॖनीय जज सऻब छु यछ़ान बोज़ुन व्वंय ज़ि अमा कऻश्यरिस बटस क्याह सना गऺयो कऺशीरि मंज़ कुनवुहशथ तॖ नमतस मंज़। सु छु यछ़ान व्वंय ज़ालुन ज़ि कम सना ॴस्य तिम यिमव नर-संहार कॊर। हालांकि दपान यॆमि ब्रोंह ति करेयो असि विलज़ार मगर न आव सरकारस आर तॖ न बूज़ न्यायालयन सोन ज़ारॖपार। असि बटन पज़ि नमुन तस यॆम्य यि फिल्म काशमीर फाईल्ज़ बनऻव तॖ तस्दीक़ कॊर सारिवी ज़ि यि फिल्मि मंज़ हावनॖ आमुत छु ति छु पऻज़्यपऻठ्य गुदर्योमुत असि। जज सऻब ति दपान छु मऻनिथ ज़ि सॊबूत छु कऻफी कऻतिलस ताम वातनॖ बापथ। बस दुआ करव ज़ि तिम मारॖवातल गछ़न ज़िन्दॖ रोज़ॖन्य तीतिस कालस यीतिस कालस मंज़ तिमन ज़िन्दॖ-ज़ुवसॖय सज़्ज़ा यी बोज़नावनॖ तॖ दिनॖ ति। असि प्यॆयि शैहलत हिश कुनि हदस ताम। हालांकि न्वक्सानॖच पूर्ती गछ़िनॖ वुम्बरन मगर दग़ लॊति हिश। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)