05.03.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

05.03.2022, फागुन (फाल्गुन) ज़ूनॖ पछॖ (शुक्ल पक्ष) त्रय (तृतीया) बटॖवार (शनिवार/शनिश्चरवार) श्री सप्तर्षि सम्वत 5097, नक्षत्र रेव, राश मेष (रऻच़ हॖन्ज़ॖ 02.29 बजि प्यठॖ), ऋतु शिशर (चलान) द्रठॖपऻन्च़ुक (पंचक) समाप्त

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि दपान हाबा छोटी हॖन्दि यिनॖ पतॖ ॴसॖन ह्यॆच़ॖन माधव जुवनिस गरस मंज़ रोनक ज़्यादय हिश यिन्य। कमि सॗत्य सना। बरादरन प्रुछ़ तीज़मालि। नऺव्य नऺव्य चीज़ गरस मंज़ यिनॖ मूजूब तॖ ब्यॆयि क्याह। आहनी मऻजी यॆमॖ वख्तॖच यि कथ ॳस्य करान छि तमि वख्तॖ मा ॴस्य सऻरी चीज़ सारिनी हॖन्द्यन गरन मंज़ दस्तियाब आसान। अदॖ युस नॊव चीज़ कुनि गरस मंज़ यिवान ओस तमि गरॖक्य बऻच़ ॴस्य ज़न क्याहताम ज़्युत ह्यु लबान। आहनबा ति छुय पॊज़। दपान माधव जियिन्य च़ूरिम न्यॆचिव ऒन मऻलिस प्रॖछ़िथ रेडियो। यॆलि मऺहलॖवाल्यव वुछ  पोशकर नाथ रॆडियो ह्यथ गरॖ अच़ान दपान सऻर्यसॖय मऺहलस लऺज्य ज़न पारय। शामन दपान आयि महलॖक्य ल्वकॖट्य ल्वकॖट्य शुर्य माधव जियुन गरॖ यि रॆडियो वुछनॖ बापथ। हालांकि अमि ब्रोंह ओस दपान म्युनस्पूलटी वाल्यव अख लौवॖड-स्पीकर लोगमुत अथ मऺहलस मंज़ कत्यथ ताम खुलॖ जायि तॖ दपान यिम मऺहलॖक्य लूख ॴस्य मा खबरॖ बोज़ान रोज़ान तती प्यठॖ। खऻर। दपान यि रेडियो ति ओस आमुत थवनॖ माधव जुवनिस कुठिस मंज़ॖय। माधव जूवॖनिस गरस मंज़ शामन शामन इकॖवटॖ सऺमिथ बजन कीर्तन करनॖच प्रथा दपान ॴस न्वशि अननॖ फतॖ वारॖ वारॖ हना कम ह्यॆच़मॖच़ गछ़ॖन्य। रेडियो अननॖ पतॖ दपान गरॖक्य बऻच़ ॴस्य तऺथ्य सऺत्य व्यस्त रोज़ान ज़्यादॖ। बजन कीर्तन ओस व्वंय यिवान करनॖ कुनि छुटी दॊह। यि बदलाव ओस आमुत अथ गरस मंज़। गरॖक्य बऻच़ ॴस्य सऻरी माधव जूवनिस कुठिस मंज़ बिहिथ रेडियो बोज़ान रोज़ान। मऺहलॖक्य मुस्लमान शुर्य ति दपान ॴस्य मंज़्य मंज़्य यिवान रोज़ान तॖ कुठिकिस दरवाज़स निश बिहिथ रैडियो प्यठॖ बऻथा वऻथा बोज़ान रोज़ान। कथ छि जऻरी।

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर -  कऺशीरी मंज़ ॴस्य डून्य परमूज़नॖ पतॖ यारबल वसान वुसुर्य, आरि, च़ोंग, नऻर्यवन, पोश वगैरा व्यतस्तायि मंज़ प्रवाह करनॖ बापथ तॖ तिमन यारबलन प्यठ ॴस्य नावि हऻन्ज़ होरॖ योरॖ प्यठॖ यिवान रोज़ान तॖ असि निशि डून्य रटान रोज़ान तॖ असि नावि सवऻर्य ति करनावान रोज़ान। चप्पव सॗत्य ॴस्य तिम हऻन्ज़ डुन्य सॊम्बरावान रोज़ान यिम डून्य ॳस्य ॴस्य प्रवाह करान। यि नज़ारॖ ति ओस वख अकि वुछुन लायक़ आसान। अमि पतॖ ॴस आसान अख बऺड कऻम स्व गऺयेयि डून्य बऻगरावॖन्य हकन हमसायन, अंगन ॴश्यनावन, यारन दोस्तन, व्यसन सॊदरन। अकि अंदॖ प्यठॖ ब्यॆयिस अंदस ताम ओस आसान वातनावुन यि नऺवीद। कान्दर वानचि च़्वचि आसॖ यिवान बऻगरावनॖ डोन्यन सॗत्य सॗत्य। केंच़न जायन ॴस्य च़्वच्यव कनि नक़द पौंसॖ दिवान। नव्यन न्वश्यन हॖन्दि माल्यनि प्यठॖ ॴस्य सथ सथ ॴठ ॴठ शथ डून्य वातान तॖ तथ सॗत्य रोठ, च़्वचि, ट्यॊक, नऻर्यवन, नवीद तॖ कॆंह रॊपियि शॊगून खऻतरॖ आसान। तीलॖ ॳठम ताम ॴस्य ॳस्य डून्य बऻगरावान रोज़ान।  यिम शुर्य कऺशीरि न्यबर ॴस्य आसान तिमन ॴस्य डाकॖ कि जऺर्यि यि नवीद  पार्सलॖ कऺरिथ सोज़ान रोज़ान। म्वकलैयि तिम दॊह, म्वकल्यव सु युन तॖ गछ़ुन, व्वंय रूद नॖ सु हक़ हमसायि न रूद सु अंग ॴश्यनाव। यथ रीच़ रिवाजस मंज़ ति आव बदलाव कति कोर। कऺशीरि न्यबर लगनॖ पतॖ वुछ असि नॊव दौया। वुछ्य नऺव वथा तॖ मऺशॖरऻव असि प्रऻन्य कथा।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.bligspot.com प्यठॖ ति)