22.03.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

22.03.2022, च़ित्थॖर (चैत्र/चैत) गटॖ पछॖ (कृष्ण पक्ष) पऻन्च़म (पंचमी) बॊम्वार (मंगलवार),श्री सप्तर्षि सम्वत 5097, नक्षत्र विशा, राश वृश्चिक (दुहचि 02.33 बजि प्यठॖ), ऋतु वसंत (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

अकि वख्तुक बॊरुत गरॖ ओसुन ह्यॊतमुत श्रॊकुन वख्तस सॗत्य सॗत्य। तीज़मालि वॊन बरादरस। द्वशवय बऻय यिम मास्टर ॴस्य ॴस्य आमॖत्य सोज़नॖ अख लार तॖ ब्याख दार याने अख अनन्तनागॖ तरफॖ कथ ताम गामस तॖ ब्याख वरमुलि तरफॖ कथ ताम गामस। बरादरन वॊन तीज़मालि ज़ि मऻजी ख़बर पॊज़ क्याह तॖ अपुज़ कयाह म्यॆ छु बूज़मुत ज़ि बटॖ मास्टरन दपान ॴस्य ज़ऻनिथ मऻनिथ दूर दूर गामन सोज़ान रोज़ान तॖ मुस्लमान मास्टरन ॴस्य गरस नऺज़्यदीक नऺज़दीक स्कूलन मंज़ सोज़ान रोज़ान। तिहाबा छुय पॊज़। तीज़मालि कॊर तस्दीक बरादरनि कथि। ज़ानि दय कऺशीरि मंज़ क्याज़ि ओस सरकारस कऻशिर्य बटस सॗत्य यूत ज़िद। मास्टरन सॗत्य सॗत्य ओस सरकार मास्टरबायन ति शहरॖ प्यठॖ दूर दूर गामन तॖ गुटन सोज़ान रोज़ान। बरादरन वॊन तीज़मालि ज़ि मऻजी कथि कथि मंज़ प्यॆयम अख कथा याद। क्वस बा कथ। तीज़मालि प्रुछ़ बरादरस। मऻजी म्यॆ ओस अख म्यथॖरा अख। ॳम्यसॖन्ज़ खान्दार्यन ॴस मासटरबाय। यि ॴस रोज़ान कऺशीरि मंज़ पानॖ ॴल्यकऺदलॖ तॖ वातुन ओसुस प्यवान कथ ताम गामस। हश ह्युहुर ॴस्य वृद्ध तॖ तिमन क्युत ॴस थवान बत्तॖ स्युन रऺनिथ तॖ अदॖ ॴस नेरान नोकरी करनि। नबा तॖ अथ मंज़ क्याह बास्योय च़्यॆ नव्यर ह्यु। तीज़मालि प्रुछ़ बरादरस। कथ कति कऺर म्यॆ पूरॖ वुनि। बरादरन वॊन तीज़मालि। अछा तॖ गव कथ छि वुनि बाकय। वॊन तीज़मालि बरादरस। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

यीच़ॖ फिल्मॖ बन्यॆयि कऺशीरि प्यठ वुन्युखताम मगर कशमीर फायलॖज़ फिल्मि हुन्द असर रूद ज़न व्यॊख्तुय म्यॆ बासान। सऻरी छि अख ॳकिस इसरार करान ज़ि यि फिल्म गछ़ि वुछिन्य ज़ॊरूर। वारिहाव चन्नलव प्यठॖ आव बहस करनॖ अथ फिल्मि मुतलक। मोबाईलव दऺस्य ति आयि ब्यॊन ब्यॊन जायव प्यठॖ ब्यॊन ब्यॊन प्रतिक्रियायि हावनॖ।  यूत आतंक आमुत ओस फऻलावनॖ कऺशीरि मंज़ कुनवुहशथ तॖ नमतॖ ब्रोंह नमतस मंज़ तॖ नमतॖ पतॖ  तम्युक अख ज़ॖ फीसद छु आमुत हावनॖ क़शमीर फायलॖज़ फिल्मि मंज़। हालांकि यि ति छि अख हऺकीकत ज़ि सोरुय हावुन छु नॖ मुम्किन ति। मगर बॊड सवाल छु व्वंय ज़ि यॆमि ब्रोंहकुन क्याह। कऺमिस छि क्वस वग रटॖन्य युथ तिमन तति छग लगि तॖ कऻशुर बटॖ कुनि सऺही वति लगि।   

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot प्यठॖ ति)