09.03.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

09.03.2022, फागुन (फाल्गुन) ज़ूनॖ पछॖ (शुक्ल पक्ष) सतम (सप्तमी) ब्वदॖवार (बुधवार) श्री सप्तर्षि सम्वत 5097, नक्षत्र कृति (चलान), राश वृष (चलान) ऋतु शिशर (चलान)

-----------------------------------

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

माधव जुवनिस गरस मंज़ आसॖ आमच़ॖ ब्यॆयि ज़ॖ न्वशि दपान। यिम नवि ज़ॖ न्वशि आसॖ सॊम्बिस सॊम्बॖय तिक्याज़ि युहुन्द खान्दर ओस सपद्योमुत कालॖ पगाह। हालांकि यिम ज़ॖ न्वशि ति आसॖ दपान संस्कारव बऺरिथ, स्यठाह जान जान गरव प्यठॖ। चूंकि यिहॖन्द्य मालिन छि ॴस्यमॖत्य शहरस मंज़ॖय  युहुन्द माल्युन युन गछ़ुन दपान रूदमुत ओस ज़्यादय पाहन बकाया न्वश्यन  न्यसबतॖ। वख्तस सॗत्य सॗत्य ॴस नज़ाकथ ति बड्यॆमॖच़। ख्यनस च्यनस मंज़, तुलॖ त्रावि मंज़, व्वथनस बॆहनस मंज़, पलवन दलवन मंज़, सोंचनस समॖजनस मंज़।तीज़मालि वॊन बरादरस। दफ गरॖ ओस बड्योमुत प्रथ रन्गॖ। बरादरन वॊन तीज़मालि। आहनबा लऺसिन दपान छोटी ति आसॖ कोर्यॆय ज़ामच़ॖ, बाबी तॖ प्यारी ति आसॖ ब्यॆयि प्यामच़ॖ। तीज़मालि वॊन बरादर ज़ि माधव जुवनिस गरस मंज़ दपान ओस जान च्युर्यग्यॊश, क्रख चिख, शुर्यन हुन्द असुन गिन्दुन बडान रूदमुत। च़ूर्यमि न्वशि ओस नाव थवनॖ आमुत रानी तॖ पॗन्च़मि न्वशि ॴस्य वनान बीबी। आहनी मऻजी त्यॆलि ॴस्य यिथी नाव आसान। मस्लन बेटॖ, बेटा, बिटु, बिटॖ, बूटॖ, बोटॖ, ब्वटॖ,  निच्य, निकॖ, वगैरा। आहनबा टाठ्यन्यार ति ओस आसान तॖ थवान ॴस्य तऺथ्य ॳन्द्य पऺख्य नाव मस्लन टोठॖ, टऻठी, टाठि, ब्यॆनिटऻठ, बॊयटोठ, सऻबॖ, ब्यॆनसऻब, बऻयसऻब, ब्यॆनिजिगॖर, ब्यॆन्यजी, बैहनजी, बऻयराज, बऻयजान, वगैरा। यिमन नावन मंज़ यॊदवय वुछहऻव टाठ्यन्यार तॖ पान्यार ओस टाकारॖ नज़र यिवान। बरादरन वॊन तीज़मालि ज़ि यूत बदलाव नाव थावनस मंज़ आव त्यूतॖय दूर्यॆव माय महोब्बत वारॖ वारॖ। शुर छु सुय मगर शुर्य सॖन्दि रछनुक अन्दाज़ बदल्यव। मायि मेछरस मंज़ ति छु अज़कल आमुत बदलाव तिक्याज़ि मऻलिस माजि छॆनॖ फुर्सथ तॖ नान्य बुड्यबबस छुनॖ ज़्यादॖ यख्तियार। तीज़मालि द्युत कथि थख ह्यु। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीर - वख अकि ॴस कऺशीरि मंज़ नऺवीद बऻगरावनॖच प्रथा रूज़मॖच़ सऺद्यव प्यठॖ कुनि नतॖ कुनि रूपस मंज़। सु ज़न गव ज़ि वॊहरवऻदिस प्यठ ॴस्य तऺहर बऻगरावान पनॖनिसॖय मऺहलस मंज़  पान्च़न सतन बटॖ गरन तॖ तिम ॴस्य तोरॖ नून म्वठा दिवान रोज़ान। सऻन्क्रऻच़ प्यठ ॴस्य सत्यदीव करान याने पूर्य बनावान केंच़न गरन ताम वातनावान। न्वश यॆलि द्वद ह्यथ वऻरिव यिवान आसॖ सु द्वद ति ओस यिवान बऻगरावनॖ।  दीवऻली प्यठ ॴस्य मिठऻय बऻगरावान। शुर ज़्यनॖ पतॖ त्रुय यॆलि ओस आसान तेल ओस यिवान बऻगरावनॖ। शुर यॆलि पास गछ़िहे च़्वचि आसॖ यिवान बऻगरावनॖ  साहिबॖ सतम दॊह ओस खिर यिवान बऻगरावनॖ। पन्नुक नवीद रोठ तॖ हेरच़ हुन्द नऺवीद डून्य ॴस्य मऺहलॖ न्यबर ति यिवान वातनावनॖ। अथ बऻगरावनस पऺत्यकिन छु ख़ास मक्सद रूदमुत म्यॆ बासान मिलच़ारुक, पान्यारुक, टाठ्यन्यारुक तॖ रसॖम रिवाज रऺछ़रावनुक। यि प्रथा गऺयि वारॖ वारॖ ख़तम। बस अख ज़ॖ रसॖम त्रऻविथ। तिमन रसमन हुन्द ति शाह छुन व्वंय ह्यॊतमुत छ़्वकुन। यिम रसॖम रऻव्य नऺव्य प्रऻव्य असि कम त्रऻव्य तॖ ॳस्य कमव त्रऻव्य।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)