10.03.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

10.03.2022, फागुन (फाल्गुन) ज़ूनॖ पछॖ (शुक्ल पक्ष) ॴठम (अष्टमी) ब्रसवार (वीरवार/गुरुवार/ब्रहस्पतवार), श्री सप्तर्षि सम्वत 5097, नक्षत्र रोहिन, राश मिथुन (रऻच़ हॖन्ज़ि 01.03 बजि प्यठॖ), ऋतु शिशर (चलान)...अज़ छि तीलॖ ॴठम (तेल अष्टमी) ति

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

माधव जुवुन गरॖ ओस ऒरुत तॖ बॊरुत गरॖ बासान। कुस शुर कऺम्यसॖन्दिस अटस प्यठ ओस आसान या कऺम्यसुन्द शुर नानि हॖन्दिस बेबिस मंज़ या बुड्यबब सॖन्दिस दऺलिस तल ओस आसान फिकिरी ओस नॖ तरान तॖ न ओस कांह सनान। मकानस ओस आमुत व्वंय त्रॆयिम पोर ति त्रावनॖ। वार्यॆन ॴस ख्वश यि वुछिथ ज़ि च़्वन दॖरकाकन्यन हॖन्द्य शुर्य ॴस्य गरसॖय मंज़ तऺम्यसॖन्दि अथॖ ज़्यॆवरावनॖ आमॖत्य। तीज़मालि वॊन बरादरस। च़्वन दॖरकाकॖन्यन हॖन्द्य शुर्य कऻत्याह सना ॴस्य मऻजी। बरादरन प्रुछ़ सवालॖ तीज़मालि। बोज़ान हाबा ॴसॖस ज़ि बाबी आसॖ त्रॆ कोरि, प्यारी आसॖ त्रॆ न्यॆचिव तॖ अख कूर, छोटी मा ओसॖ अख न्यॆचुव तॖ त्रॆ कोरि तॖ रानी ति ओसमुत ओस अख कूर तॖ अख न्यॆचुव। तॖ पॗन्च़मि न्वशि याने बीबी क्याह ओस। सवाल प्रूछ़ बरादरन तीज़मालि। दपान तऺमिस छुनॖ ओसमुत कांह शुर। स्व दपान ॴसमॖच़ ॴस ल्वलॖमतॖ लाय करान रूज़मॖच़ दॖरकाकन्यन हॖन्द्यन शुर्यनॖय। जवाब द्युत तीज़मालि। अलॖ पलॖ दपान माधव जुवनिस गरस मंज़ ॴस्यमॖत्य ॴस्य बाह शुर्य। ग्रज़ान दपान ओसमुत ओस माधव जुवुन गरॖ वख अकि। यकुत ओस गरस मंज़, मऻलिस माजि हुन्द सायि ओसमुत ओस सारिनी शुर्यन ह्यॆरि प्यठॖ ब्वन ताम। वरादरन वॊन तीज़मालि। मऻजी कुस आनन्द आसिहे यिवान माधव जुवस पनॖनि बागॖच फुलवऻर वुछिथ।आहनबा तथ क्याह छु वनुन। दफ यि गऺयि बाग्यवऻनी। वार्यनि ओस गोमुत थख यिनस। मऺन्ज़िमयऻर्य सुन्द युन ति ओस गोमुत बंद। दफ अल्बतॖ गुरु जी याने ब्रह्मण सुन्द आव गव ओस बड्योमुत। तीज़मालि वॊन बरादरस। ख़बर क्याज़ि। प्रुछ बरादरन ब्याख सवाल। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

""""""""""""""""""""""""""""""""""'

कऺशीर -  अज़ छु सु दॊह यॆमि दुहुक सान्यन शुर्यन ओस आसान वख अकि कऺशीरि मंज़ बेसबरी सान इन्तिज़ार याने तीलॖ ॴठम। कांग्रि ख्वर, क्रॆंज्लि ख्वर, कानिल-क्रॆंज्लि च़ऺक्य, फुचिमच़ॖ फ्वतरि वगैरा ॴस्य यिवान सॊम्बरावनॖ तॖ यिमन मंज़ ओस यिवान बरनॖ ह्वख गासॖ तॖ  ॴस यिवान गन्डनॖ गासॖव रज़। अथ गासह ॴस्य दिवान च़ॖख तॖ अथ ओस नार ह्यवान जम जम करान। रज़ि गऺन्डिथ यिम दज़वॖन्य कांग्रि ख्वर बेतरी ॴस्य गिलनावान पनॖनि कलॖ प्यॆठ्य तॖ ॴस्य ग्यवान रोज़ान जतॗंतॗ जतॗंतॗ। व्यतस्ता गाठन याने यारॖबलन प्यठ ॴस्य ज़ालान रोज़ान। गर आंगन मंज़ ति ॴस्य ल्वकॖट्य म्वकॖट्य चीज़ ज़ालान तमि आयि ज़ि युथ नॖ त्यम्बॖर लगि गरकिस कुनि तरफ़स। यि नज़ारॖ ओस आसान वुछुन लायक़। दऺर्याव बठ्यन सॗत्य लऺगिथ बाहच़ॖन मंज़ हऻन्ज़ या हऻन्ज़बायि आसॖ रऻछ रोज़ान करान पनॖन्यन बाहच़क्यन पशन यिमन  छ़्यॆयि पश ॴस्य आसान। यिथपऻठ्य ॴस्य तीलॖ ॴठम मनावान कऺशीरि मंज़। अमि अलावॖ ॴस्य ॳज़्यकि दॊह व्यतस्तायि मंज़ च़ऻन्ग्य यिवान प्रवाह करनॖ। हेरऺच़ हुन्द त्योहार ओस अज़ सम्पन्न सप्दान तॖ वसंतॖच व्वमेदवऻरी कुन ॴस्य क़दम कडान। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)