24.03.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

24.03.2022, च़ित्थॖर (चैत्र/चैत) गटॖ पछॖ (कृष्ण पक्ष) सतम (सप्तमी) ब्रसवार (गरूवार/वीरवार/ब्रहस्पतवार), श्री सप्तर्षि सम्वत 5097, नक्षत्र ज्येष्ठ, राश धनु (शामन 05.30 बजि प्यठॖ), ऋतु वसंत (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

माधव जुवनिस गरस मंज़ वऻच़ नोबथ योत ताम ज़ि ॳड्य वऻत्य बंगलोर, ॳड्य मुम्बय, ॳड्य पूने, ॳड्य जयपुर, गरॖ प्यव कॖनुन तॖ मुस्लमान ॴस्य ॴस वाहरऻविथ प्रारान ज़ि कुस दॊह आसि यॆलि सु अच़ि अन्दर तॖ ॳन्दरिम बटॖ आसि न्यबर। समयन द्युत युथ फ्युर ज़ि माधव जुवुन नाव ह्यॊतुन मऺशिथ गछ़ुन तॖ नवि पुयि ह्यॊत नॊव नच़ुन। यिम वख अकि ॳक्यसॖय थालस मंज़ नानि हॖन्दि अथॖ ॴस्य बतॖ ख्यवान तिमनॖय छुनॖ अज़ पनॖनि माजि मऻलिस ताम वातनस वार व्यस्तार। अड्यन कॊर्यन गव खान्दर पनॖनि ज़ऻच़ मंज़, अड्यव अनि पर-ज़ऻच़ प्यठॖ कोरि, दूर गॖयि अख ॳकिस निशि। हालात बदल्यॆयि, सरकार बंदल्यॆयि, गरॖ प्यठॖ गऺयि बॆगर। माधव जुवन तॖ सऻम्पकुजि हुन्द फोटुव छु यिवान नज़र प्रथ कऻन्सि हॖन्दिस गरस मंज़ मगर तिम संस्कार तॖ स्व संस्कृति छॆनॖ नज़रि यिवान कुनी। तीज़मालि वॊन बरादरस। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

काशमीर फाईल्ज़ फिल्मि हुन्द असर ह्यॊतुन शमुन वारॖ वारॖ। कॊर केंच़व लुकव वदुना रिवुना, केंच़व होव पनुन जोश, केंच़व रोश। आयि कथा गऺयि कथा। सवालॖ छु टाकारॖ ह्यु तऺती खड़ा ज़ि कऻशिरिस बटस ब्रोंहकुन करुन छु क्याह।  अथ कथि प्यठ छि वुनि सऻरी ॴसस त्रॊप दिथ। ब्यॊन ब्यॊन चन्नलॖ छि ब्यॊन ब्यॊन महानुबावन प्रॖछ़गऻर करनस मंज़ आवॖर्य  तिहॖन्ज़ राय ज़ानॖनॖ बापथ ज़ि ॴखॖर गव क्याह कऺशीरि मंज़। करॖ प्यठॖ गव, कयाज़ि गव, कमन सॗत्य गव, कॗति कालॖ प्यठॖ गव, कऺम्यसॖन्दिस राजस मंज़ गव, कमव कॊर, तिमन सॗत्य क्याह वर्ताव कॊरुख, बटॖ च़ॊला पानॖ किनॖ च़ॖलॖरोवुख, वापस कऺशीरि गछ़नुख व्वपाय क्याह छु वगैरा वगैरा। यॆकीन कऺरिव ज़ि यिम छि सारेय तिमय कथॖ यिम पऺत्यम्यव द्वयत्रॖहऻव वऺरियव प्यठॖ वाच़ॖ असि बोज़ान किताबव दऺस्य, फिल्म दऺस्य, ड्रामाहऻव दऺस्य, बऻतव ज़ऺरियि, रू बा रू, ॵन लाईन, ॴफ लाईन। समादान छुनॖ नज़र यिवान। दृड न्याय (याने restorative justice) छुन मुम्किन। 

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)