20.03.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

---------------------------------

🙏🙏 नमस्कार माहरा

20.03.2022, च़ित्थॖर (चैत्र/चैत) गटॖ पछॖ (कृष्ण पक्ष) द्वय (द्वितिय) देवादेव, आथवार (रविवार/ऐतवार), श्री सप्तर्षि सम्वत 5097, नक्षत्र चित्र, राश तुला (दुहचि 11.11 बजि प्यठॖ), ऋतु वसंत (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

वख्तस सॗत्य सॗत्य आव माधव जुवनिस गरस मंज़ ति बदलाव। तीज़मालि वॊन बरादरस। आहनी मऻजी। पतॖवथॖ आयि यी वुछान। प्रान्य प्रऻन्य गऺयि नेरान नऺव्य नऺव्य गऺयि यिवान। बरादरन वॊन तीज़मालि। क्वदर्यतुक निज़ाम छु अद्भुत। यि तॊर नॖ अज़ताम कऻन्सि फिकिरी। ॳस्य छि वनान रोज़ान ज़ि ॳर्य आयि सऻरी ऒर कुस गव मगर यॊदवय वुछव तॖ ॳर्य ति कति छि यिवान सऻरी। लॊंग ल्यॊच़, ऒन कोन, ज़ॊर कॊल, हॊल स्यॊद ति आयि यिवान ज़न्मस। दपान युस ति ज़न्मस यिवान छु सु छु पऺत्यमि ज़न्मॖक्यन कर्मन हुन्द फल ह्यथ यिवान तॖ युस योरॖ गछ़ान सु छु पनॖन्यन कर्मन हुन्द फल ह्यथ गछ़ान। दपान युस युथ ववान छु सु छु त्युथ लोनान। तीज़मालि वॊन बरादरस ज़ि माधव जुवनि तॖ सऻम्पकुजिनि हॖन्दि स्वर्गवास गछ़नॖ पतय लऺज्य माधव जुवनिस गरस यिहऻय दॖनन हिश्य। कति तिम पान्छ़ बऻय, ज़ॖ ब्यॆनि, पान्छ़ दॖरकाकॖनि,बाह शुर्य तॖ माधव जुव तॖ सऻम्पॖकुज्य। गरॖ युस ओस ऒरुत तॖ बॊरुत ह्यॊतुन हनि हनि छ़ॊकुन। बरादर रूद बोज़ान तॖ तीज़माल रूज़ वनान। ब्यॆनि ज़ॖ गऺयि पनुन पनुन वऻरिव तॖ बसोवुख पनुन पनुन गरॖ पानॖनि आयि त्रायि। तिमन ति दपान ज़ामॖत्य ॴस्य त्रॆ त्रॆ च़ोर च़ोर शुर्यहेन। यपऻर्य गऺयि बाहव शुर्यव मंज़ॖ दपान ॴठ शुर्य कऺशीरि न्यबर थऺज़ तऻलीम हऻसिल करनॖ बापथ। द्वन बायन यिम स्कूलस मंज़ मास्टर बनेमॖत्य ॴस्य तिमन ॴस तब्दीली करनॖ आमॖच़ कमन ताम गामन कुन तॖ तिम ॴस्य पनुन पनुन अयाल ह्यथ द्रामॖत्य। गरॖ ओस बासान  क्रेकि चिखि रॊस। बरादर रूद बोज़ान यि वख्तुक फ्युर। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कऺशीरि मंज़ छि वुनि ति कऻशिर्य बटॖ कॆंच़न गामन मंज़ कुनवुशथ तॖ नमतॖ प्यठॖ रोज़ान आमॖत्य, कॆंह बटॖ छि कऺशीरि शहरस मंज़ ति रूज़िथ। हऻरऻनी छि यि ज़ि तिमन छु ना सना डर, खोफ़, दऺहशथ, फ्रठ, खोच़ुन लगान तिमन तिमन जायन यॆत्यनस यॆत्यनस तिम बऺसिथ छि। अथ कथि पतॖ क्याह वजह गछ़ि आसुन बॖ छुस सोंचान। दय कऺर्यनख रऻछ

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)