30.03.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

30.03.2022, च़ित्थॖर (चैत्र/चैत) गटॖ पछॖ (कृष्ण पक्ष) त्रुवाह (त्रयोदशी) देवादेव ब्वदवार (बुधवार), श्री सप्तर्षि सम्वत 5097, नक्षत्र शत, राश मीन (रऻच़ हॖन्ज़ि 4.32 बजि प्यठॖ) ऋतु वसंत (चलान) द्रठपऻन्च़ुक (पंचक) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि यॊदवय खान्दरस ताम छि कूर आसान मऻलिस माजि हॖन्दिस सायेबानस तल, खान्दरॖ पतॖ छि कूर न्वश हॖन्दिस रूपस मंज़ वऻरिव गरस मंज़ क़दम थवान तॖ तति छु निज़ाम बदलान। खान्दार अकि तरफॖ दाय तदबीर दिवान तॖ बकाया वऻरिव बऻच़ ब्यॆयि तरफॖ। ॳमिस न्वशि छि वऻरिव वऻतिथ पनॖन्य ति कॆंह अरमान व्वतलिथ यिवान। खान्दरॖ ब्रोंह छि यि कूर आज़ाद ख़यालन रंग बरान रोज़ान मगर खान्दरॖ पतॖ छि तस्वीर यकदम बदलान। परस्तिथि बदलान, सोंच बदलान, व्यवस्था बदलान, ज़िम्वऻरी बदलान, जाय बदलान, राय बदलान। अथ बदलावस कुन वुछिथ छि रातॖच कूर ॳज़िच न्वश बऺनिथ पऺरिथ लीखिथ आसनॖ पतॖ ति या नोकरी मंज़ ॳसिथ ति सोंच़ान ज़ि क्याह रोज़ि जान। यि फऻसलॖ करुन ति छु वख्तस स्यठाह मुश्किल आसान। बरादर प्यव तीज़मालि हॖन्ज़ कथ बूज़िथ सोंचस ज़ि कऺशीरि मंज़ रूज़िथ ओस माहोल बदलय। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

कथि मंज़ क्वथ कडनस मंज़ छि ॳस्य कऻशिर्य बटॖ ताक़। पानॖ करव नॖ कॆंह मगर ब्यॆयिसॖन्दिस कऺर्यमॖतिस रोज़व कॖठ कडान। काशमीर फाईल्ज़ फिल्म बनावनस मंज़ कऻच़ाह मॆहनत आसि लऺज्यमॖच़ यि ज़ानि फिल्म बनावनवोलुय मगर तऺम्यसुन्द मक्सद यक तरफ़ा कऺरिथ ह्यॆच़ असि मंज़ केंच़व सियासत करॖन्य। ॳड्य वनान सोरुय छु नॖ आमुत हावनॖ, ॳंड्य वनान यूत हावनॖ आमुत छु तथ मंज़ छु नॖ कुनि कुनि जायि पूरॖ पज़र आमुत हावनॖ या पज़र वनॖनॖ आमुत। ॳड्य दपान अथ फिल्मि गछ़ि नॖ टैक्स लगुन। ॳड्य दपान अख कथ तॖ ॳड्य दपान ब्याख कथ। मगर म्यॆ छु बासान ज़ि अमि फिल्मि वॖज़ॖनऻव्य सऻरीय। अमि फिल्मि दऺस्य गऺयि तिम सऻरी बेदार यिम यिमन द्वयत्रॖहन वऺरियन या ज़ऻनिथ मऻनिथ ॳछ बंद कऺरिथ ॴस्य या थिमन ताम नॖ अस्लियथ वातनावनॖच कूशिश ॴस आमॖच़ करनॖ। फिल्म वुछिथ छि सऻरी त्राहि त्राहि करान। कऻशिर्य बटन प्यठ यूत ज़ुलुम तॖ तमि पतॖ ति सरकऻर्य कारवऻही नदारत। जिहाद कॊर शॊरु मुस्लमानव न कि बटव।  मुस्लमानन मोर मुस्लमान न कि बटन। बटॖ ति मोर मुस्लमानवॖय तॖ वुन्युखताम आव कऺशीरि मंज़ सुय मारान। वुछुन छु सरकार किथॖ पऻठ्य दी बटस इन्साफ तॖ कॊत ताम छु बटस ब्यॆयि प्रारुन।

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिवkoshursabak.blogspot.com प्यठॖ ति)