25.03.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

25.03.2022, च़ित्थॖर (चैत्र/चैत) गटॖ पछॖ (कृष्ण पक्ष) ॴठम (अष्टमी) शॊकुरवार (शुक्रवार/जुम्मा/भार्गववार), श्री सप्तर्षि सम्वत 5097, नक्षत्र मूल, राश धनु (चलान), ऋतु वसंत (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

दमी डींठॖम नद वहवनी

"दमी ड्यूंठुम सुम न तॖ तार

दमी डींठॖम थऺर फ्वलवॖनी

दमी ड्यूंठुम गुल न तॖ ख़ार"

मऻजी यि लल-वाक् कती प्यॊय च़्यॆ याद। बरादरन प्रुछ़ तीज़मालि। ज़्यूठ व्वशा त्रऻविथ वॊन तीज़मालि ज़ि माधव जुवुन गरॖ प्योम याद। वख अकि वुह पॖन्च़ॖह बऻच़ ल्वकॖट्य बऺड्य मिलनऻविथ तॖ अज़ नॖ च़ोर बऻच़ ति मीलिथ। कति सु शोरोगुल तॖ व्वंय नॖ तति च़ऺर तॖ हऻर नॖ बिल्यबिचुर तॖ न बुलबुल। बरादरन द्युत कथि दमा ह्यु तॖ वॊनुन तीज़मालि ज़ि च्योन वनुन छु स्यठाह पॊज़।कऺशीरि मंज़ यॊदवय ॳस्य पनुन वंशज वुछव तॖ हऻरऻन्यगी छि सपदान। यिम मुस्लमान अज़ कऺशीरि मंज़ रोज़ान छि यिहॖन्द्य पूर्वज छि सऻरी बटय ॴस्यमॖत्य अज़ शॆ सथ वऺरी ब्रोंह। ती आयि ॳस्य बोज़ान वुन्युखताम। म्यॆहाबा बूज़ गुलाम नऺबी आज़ाद युस मिनिस्टर ओस अज़ कसताम रिपोर्टरस वनान ज़ि तऺम्यसॖन्द्य पुर्वज ति  छि कऻशिर्य बटॖ ॴस्यमॖत्य शॆ सथ वऺरी ब्रोंठ। बरादरन बऺडरऻव पनॖन्य कथ यि वऺनिथ ज़ि मऻजी शॆख मॊहम्मद ऒब्दुलाह सॖन्द्य पूर्वज ति छि बटय ॴस्यमॖत्य। दफ कऺशीरि मंज़ॖक्य सऻरी मुस्लमान छि च़कि कऻशिर बटॖ ॴस्यमॖत्य। इतिहास छु गवाह अमि कथि हुन्द। मगर धर्म परिवर्तन कॊर तिमव तॖ डऺजिख नियर तॖ यि नसॖल थऻवॖख प्यतरावॖन्य असि। बरादरन कऺर कथ पूरॖ। यि वुछिथ छु इन्सान दपान ज़चि च़टहऻ। युसुय रॊछुम तऺस्य निशॖ रछतम ख्वदायो। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""

काशमीर फाईल्ज़ फिल्मि प्यठ छि चर्चा जऻरी। रोज़ॖन्य ति गछ़ि। यीच़ मेहनत छि आमॖच़ करनॖ पज़र पऺज़रावनॖ बापथ। बेखबरन खबरदार करनॖ बापथ। सरकारस वुज़ॖनावनॖ बापथ। मऺशिथ गोम ग़म म्यॆ पनुनुय ग़म च्योन याम नज़र आम। डॊलुम ह्यस होश य्यॆ रोवुम क़हर च्योन याम नज़र आम। हालांकि यि फिल्म हावान हावान गोछ़ इन्कलाब युन मगर बासान छु कॆंह लूख छि ज़ऻनिथ मऻनिथ अथ पज़रस प्यठ ति सियासत करान। दरअसॖल छि अख कथ पऺज़़ स्व गऺयि यि ज़ि दपान आज़मोवमुत गव पोवमुत। सरकारन तॖ हरकारन छु अज़ताम कऻशुर बटॖ आज़मोवमुत तवय छख नॖ शायद ग्रेन ति गछ़ान। मगर अज़ नय तॖ पगाह न्याय मेलि असि ति। सास रंग ज़िन्दगी बदलान मनॖ यो गछ़ च़ॖ मोयूस अज़ निराशा छि आशा पगाह रऻच़ हुन्द सफर बस छु क्रूठ

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिवpodcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)