31.07.2018

31.07.2018, श्रावणॖ (श्रावण/ सावन),गटॖ पछॖ (कृष्ण पक्ष),त्रय (तृतीय),बॊम्वार (मंगलवार) श्री सप्तार्षि सम्वत 5094, राश मीन (रऻच़ हॖन्ज़ि 4.53 बजि प्यठॖ), ऋतु ग्रीष्म (चलान), द्रठॖपऻन्च़ुक (पंचक)(चलान)...अज़ छि संकट च़ोरम (संकट निवार्नीय चतुर्थी) व्रत ति
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: वगुव च़टुन
    अ: अंदरीय-अंदरीय बॆयिस
         न्वकसान वातनावुन
2. मु: वति हुन्द तॖ व्यॆथि हुन्द
         सॊबूर
    अ: स्यठाह बर्दाश्त करुन/
          स्यठाह सब्र आसुन
3. मु:वुरुन वुछिथ ख्वर वाहरावुन
    अ आमदनी वुछिथ खर्च करुन
4. मु: वातल बटवार
    अ: कालॖ-पगाह करुन/टाल-
          मटोल करुन/वादॖ पूरॖ न
          करुन
5. मु: वऻन्लिज दुबॖ फेरॖन्य
    अ: स्यठाह हऻरऻनी गछ़ॖन्य/
         कुनि चीज़ुक बॆख़बर पऻठ्य
         न्वकसान गछ़ुन
*************************
1. मल.....Dirt/Rub
2. मोल.... Father
3. मील.... Ink/Mile
4. मूल..... Base/Root
5. म्यूल.... Has met/Has
                found
6. मेल..... To meet
7. म्युल.... To unite/To
                come together
8. मऺल्य....To buy/To pur-
                chase
9. मॊलुल...Costly/Precious
                Valuable/Expen-
                since
10. मोन...To keep quiet/To
                observe silence
                To remain calm
*************************
गीता ज्ञान  : अध्याय-4  :
हे अर्ज़न, मनस मंज़ मॖ समशय थव
ज्ञानॖ तलवारि सॗत्य यि च़टिथ त्राव
गछ़ तयार य्वद कर त्राव अज्ञान
वॊन भगॖवानन गीता ज्ञान
************************
कुनवुहशथ तॖ नमतॖ प्यठॖ वुन्युख ताम यानि ज़ॖ सास अरदाहस ताम  बनेयि वारियाह संस्थायि यिम पनॖनि समाजिक्यन लूकन हॖन्दि बॆहबूदी बापथ कऻम छि करान।कऺशीरि प्यठॖ प्यव असि सारिनीय च़लुन तत्युक दहशत वुछिथ, क़त्लॖगारत वुछिथ तिमनॖय मुसलमानन हॖन्द्य दऺस्य यिम बटन सॗत्य नालॖमॊत कऺरिथ ॴस्य तॊतताम पकान। य्यॊत वऻतिथ आयि छकॖरन सऻरीय बटॖ होरयोर तॖ कॊरुख पनुन पान खडा करनुक संज़। अथ्य असनाहस मंज़ द्रायि कॆंह ब्यॆनि-बऻय यिमव कमर कॊस तॖ ह्यॆच़ॖख अख-ॳक्यसॖन्ज़ ख़बर-अतर ह्यॆन। यी करान करान आयि ग्रन्दि रॊस संस्थायि बारसस ब्यॊन-ब्यॊन जायन मंज़। यि दास्तान छि सारिनीय ख़बर ज़ि ॳस्य कति ॴस्य तॖ ॳस्य कॊत वऻत्य। मगर पकान-पकान च़ाव वारिहान संस्थायन ख्रॊप ति, कॆंच़न संस्थायन गयि छलॖ ति, कॆंह गयि नाबूद तॖ कॆंच़व नव्यव संस्थायव कॊड कलॖ ति। क्वस संस्था क्याह कऻम छि करान यि वुछान वुछान ह्यॆच़ कॆंच़व लूकव कॖठ-कडॖन्य, कॆंच़व लूकव ह्यॆच़ तऻरीफ़ करॖन्य, कॆंच़न आव ख्वश तॖ कॆंच़न आव नॖ ख्वश। बहरहाल संस्थायि ति छि पकान पनॖन कऻम करान बारव दिनॖवऻल्य ति छि पनॖनि कामि सॗत्य लऺगिथ। समाजस क्याह म्यूल, कोताह म्यूल, कऺम्यसॖन्दि दऺस्य म्यूल या क्याज़ि म्यूल नॖ, क्वस कमी रूज़, कमिस मंज़ रूज़ अम्युक मुल्यांकन छु यिवान विज़ि विज़ि करनॖ। वुछव ब्रौहकुन कस सॖन्ज़ मऻज्य स्वन तोलि तॖ कस सॖन्ज़ मऻज्य रौफ तोलि। हालस छि सऻरीय पनॖनि पनॖनि हिसाबॖ छला-छला कडान तॖ क़दम-क़दम कडान
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

30.07.2018

30.07.2018, श्रावणॖ (श्रावण/सावन) गटॖ पछॖ (कृष्ण पक्ष) द्वय (द्विती),च़न्द्रवार (सोमवार), श्री सप्तार्षि सम्वत 5094, राश कुम्भ (चलान), ऋतु ग्रीष्म (चलान), द्रठॖपऻन्च़ुक (पंचक)(चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: रातॖ मॊंगुल
    अ: रातस ति कऻम करनवोल/
         यॆमिस नॖ रातस नॆन्दॖर यी
2. मु: रामच़न्द्रॖसुन सुम-स्वथ
    अ: संगीन रिश्तॖ
3. मु: राम-राज आसुन
    अ: सु समय यथ मंज़ खूब
         मस्ती यी करनॖ बिना रोक
         टोक के
4. मु: ललि हुन्द नीलॖ-वठ
    अ: सख़ मुसीबथ तुलुन
5. मु: वनॖ वॊथॖमुत
    अ: बद-तमीज़ी पऻठ्य युस
         व्यवहार करान/कामि
         करनुक यस नॖ सलीकॖ
         आसि
*************************
1. सन....To intervene
2. सॊन...Deep
3. सोन...Ours
4. स्वन...Gold/Co-wife
5. स्वर. Vowel/Movement
6. सर...Lake
7. स्वरुन...To remember
8. स्वख..... Happiness/
               Pleasure
9. सुर..... Rythem
10. सोर.....Pig
*************************
गीता ज्ञान : अध्याय-4  :
अज्ञानी श्रदायि रॊस शकी इन्सान
छि परमार्थ निशॖ ज़रूर गिरान
सु यॆमि लूकॖ नॖ परलूकॖ स्वख प्रावान
वॊन भगॖवानन गीता ज्ञान
*************************
अज़ छि श्रावणॖ च़न्द्रवार तॖ फ़ाकॖ। यि रयथ छु यिवान मानॖनॖ सानि ज़ऻच़ मंज़ बडॖ श्रूच़ तॖ पवित्र। यथ रयतस मंज़ छिनॖ असि बटन मंज़ वारियाह बऻय-ब्यॆनि स्युन यानि न्यॆनि यानि मांस ख्यवान। ठूल नॖ ख्यवान। गन्डॖ नॖ ख्यवान। नित्य सुबहऻय प्रभातन वऺथित श्रान-ध्यान करान। शिव सॖन्ज़ आराधना ज़्यादय पहान करान। न्यॆनि या ठूल न ख्यनस पतॖ क्याह कारण छु अमिच व्याख्या छु नॖ कांह करनॖच कूशिश करान बस छु नॖ ख्यॊन तॖ छु नॖ ख्यॊन। कॆंह रस्म तॖ रिवाज छि असि पानॖ बनऻव्यमॖत्य तॖ ॳसी छि तिमन प्यठ अमल करान। यॆत्यन नॖ साफ़-सुथरॖ पऻठ्य कुनि चीज़च ब्वय आसि या ज़ऻन्यकऻरी आसि ॳस्य छि तथ वनान ज़नानॖ-शास्त्र या बटॖ-गज़िट। यॆलि सोन शुर छु यछ़ान ज़ानुन कुनि कथि पतुक तरक, ॳस्य छि नॖ ह्यकान तऺमिस समजऻविथ तॖ सु ति पनॖनि मनॖ मुवऻफिक तिमन रस्मन रिवाजन व्यतरावान रोज़ान। मानान ति न मानान ति। बॊम्वारि द्वह या ब्रसवारि द्वह छि नॖ कॆंह बटॖ स्युन (न्यॆनि) या ठूल ख्यवान, ॳड्य छि नॖ च़न्द्रवारि द्वह ख्यवान, ॳड्य छि नॖ शॊकुरवारि द्वह ख्यवान। क्याज़ि छि ख्यवान या क्याज़ि छि नॖ ख्यवान सारिनॖय छु पनुन पनुन तरक तॖ तमि मूजूब छि तिम पनॖन्यन पनॖन्यन गरन मंज़ स्व प्रथा चलावान मगर अस्लियत वनॖनवोल छु नॖ कांह मेलान या ॳस्य छि नॖ ज़ानॖनॖच कूशिश करान। मगर यिमन चीज़न प्यठ बहस करुन छु ज़रूरी ख़ास कऺरिथ ॳज़्यकिस दौरस मंज़ यॆतिनस ॳस्य च़ुवऺतिस प्यठ खडा छि।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

29.07.2018

29.07.2018, श्रावण (श्रावण/सावन), गटॖ पछॖ (कृष्ण पक्ष) द्वय (द्विती), आथवार (रविवार/ एतवार), श्री सप्तार्षि सम्वत 5094, राश कुम्भ (शामन 5.5 बजि प्यठॖ) ऋतु ग्रीष्म (चलान)...अज़ लगि द्रठपऻन्च़ुक (पंचक) ति...च़ूंकि द्वय छि ज़ॖ गछ़ान, द्वय-हुन्द वॊहरवोद यी पगाह यानि त्रॖहमि जुलाई
*************************
जे के विचार मंचॖ तरफॖ छुस बॖ त्वहि सारिनीय यछ़ान
       ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: म्यंगॖ ख्यॆनि
    अ: कथॖ बकॖवास करुन/
         परेशान करुन
2. मु: मॊत लऻगिथ सालॖ बतॖ
         ख्यॊन
   अ: चोर लऻगिथ पनुन मतलब
        कडुन
3. मु: मॊदुर म्यकॖराज़
    अ: मॊदुर कथॖ न्यॆबॖर्य मगर
       अंदॖर्य-अंदॖर्य ज़ख वातॖनावुन
4. मु: यड तॖ च्यड
    अ: ख्यनाह-च्यनाह तॖ बस
5. मु: यॆड सॗत्य च़ॊप ह्यॊन
    अ: अंदॖर्य-अंदॖर्य न्वकसान
          वातॖनावुन
*************************
1. नष्ट.....To vanish/To ruin
             To wither/ To lose
             To annihilate
2. निश... Near/Close to/
              According to
3. निशान...Mark/Sign/Spot
             Trace/Flag
4. निशात...Nishat garden
           in Kashmir/Delight
5. नशॖ.. Intoxication/Pride
6. नाश....To destroy
7. न्वश... Bride
8. निशऻन्य... Betrothal/Dec-
              laration/Assent
9. नसीब.....Luck/Fate/Lot
              Fortune/Destiny
10. नऺसिहत...Advice/Coun-
              sel/Admonition
*************************
गीता ज्ञान  : अध्याय-4  :
कर्मॖ यूगॖ युस सारिनॖय कर्मन
शक त्रऻविथ करि वॆशनारपन
सु प्वरुष कर्मॖ बंधन म्वकलान
वॊन भगॖवानन गीता ज्ञान
*************************
ऋष्यव मुनियव बनोव सोन धर्म-कर्म तॖ ॳस्य गयि तिहन्दिस वनॖनस प्यठ पकान तॖ वुनि ति छि तिहन्दिसॖय वऺन्यमॖतिस प्यठ पकॖनॖच कूशिश करान। कॆंह संस्कार छि अज़कल व्वंय असि बासान ज़ि यिम ह्यकव बदलऻविथ ति क्याज़ि हालात बदलेयि, जाय बदलेयि, मिज़ाज बदलेयि, खयालात बदलेयि, करनवऻल्य बदलेयि तॖ करनावन-वऻल्य बदलेयि। अशद ज़रुरत छि ज़ि ॳस्य दिमव पनॖनिस पानस दॖनन तॖ वुछव ॳस्य कत्यन छि खडा तॖ ॳसि क्याह पज़ि करुन। फ़ज़ूल चीज़न दिमव रॊख्सत तॖ थवव तिम चीज़ यिम ब्रौंह कुन सानि नवि पुयि बकार यी। तुहुन्द वनुन क्याह छु अथ मुतलक, बॖ छुस यछ़ान बोज़ुन तुहन्ज़ि ज़्यॆवि। हवन कऺर्य वारियाह, भवन बनऻव्य कम, समाजस मंज़ छि हवनव बगऻर ति वारियाह ग़म यिम दूर करनॖ बापथ छु असीय कमर गन्डुन। न्यॆबरिम यी नॖ कांह।
म्यॆ वॊन यॆमि ब्रौंठ ति ज़ि यि हवन करुन व्वंय सिरिफ देखा-दीखी ब्यॆयि नॖ कॆंह। कऻत्यहान छु हवनुक महत्व पताह, कत्याहन छु मंत्रन हुन्द सार पताह, कुस कमिस तॖ कत्यन छु ह्यॆछनावनुक सादन छ़ान्डान। अख बॊड सवाल छु यि मगर ॳस्य छि शुत्रमुर्गॖसॖन्द्य पऻठ्य ज़ऻनिथ-मऻनिथ कलॖ ब्वन कुन थऺविथ द्वह-द्वह कडान। रिफारम छु अनुन तॖ अनुन छु।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि)
(koshursabak.blogspot.com ति वुछिव)

28.07.2018

28.07.2018, श्रावनॖ (सावन) गटॖ पछॖ (कृष्ण पक्ष), ऒक्दॊह (प्रथमा/ प्रतिपदा), बटॖवार (शनिवार /शनिश्चरवार), श्री सप्तार्षि सम्वत 5094, राश मकर (चलान),ऋतु ग्रीष्म (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
          ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु:बबॖ बॖडतम तॖ ख़दमता
        करतम
   अ: बऺड्यसन्द्य दऺस्य ल्वकटिस
        सीवा वातॖन्य
2. मु: ब्रांदॖ कऺन्य
    अ: मूलाधार/स्यठा मज़बूत
3. मु: मनटि लॆजि पांज़ु गछ़ुन
    अ: पज़नॖ प्यॆठ कऻन्सि कॆंह
          मीलिथ तम्युक अहंकार
          गछ़ुन
4. मु: मुरि बिहित दऻर खॖन्ज़ॖन्य
    अ: ब्रौंहकनि बिहित कऻन्सि
         बे-यज़थ करुन
5. मु: माज़स मंज़ कॊंड
    अ: फिकिर आसॖन्य/परेशान
         गछ़ुन
*************************
1. कन....Ear
2. कान.  .Mine/Quarry/
               Arrow
3. कांछुन...To wish/To love
           To  desire/To ask
            for/To require/ To
            need/To want/To
            demand
4. कान्दुर.....A  Baker
5. कान्ड..... A chapter (of
            a book)/Part,
            Division/Section
6. कांछ़ा......Any one/Any
            body/Some one/A
            few/An unknown
            person
7. कामना.....To desire
8. कांगॖर...... Fire-pot/
                    Kangri
9. कांह........Any
10. काह...... Eleven
************************
गीता ज्ञान  :  अध्याय-4  :
तिथय पऻठ्य बोज़ हे अर्ज़न
छु दज़वुन नार ज़िनिस बस्म करान
ज्ञानॖ ॳग्न सऻरी कर्म ज़ालान
वॊन भगॖवानन गीता ज्ञान
*************************
राथ ओस ज़ूनि ग्रुहुन। अमि ग्रहनुक सूतक ओस लगान दुहचि ज़ॖ बजे प्यठय। असि मंज़ छि मान्यता ज़ि गरस मंज़ ख्यनॖ चीज़न प्यठ गछ़ि दर्भ-तुज्य थवॖन्य। सवाल छु दुकानदार क्याह आसि करान। ॳमिस वानॖवऻलिस छि ॳस्य ह्यवान सामानॖ युस ग्रहनॖ-लदॖय छु आसान। व्वंय छि ॳस्य दपान ज़ि फ्रिजस मंज़ चीज़ थऺविथ छु नॖ दर्भुक ज़रूर्थय। यि फल्सफॖ छु नॖ फिकिरी तरान कॆंह। नम गछ़न नॖ ग्रहनस मंज़ कासॖन्य। ख्यॊन-च्यॊन गछ़ि नॖ सूतक लगनॖ प्यठॖ ग्रुहुन म्वकलनस ताम। म्यॆ छु नॖ बासान यिमन कथन प्यठ आसि कांह गोर करान। कॆंह लूकन आसि नॖ पताह ति ज़ि ग्रुहुन छु।
दपान यथ नॖ पूश तथ छु नॖ दूष।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

27.07.2018

27.07.2018, हारॖ (आषाड़) ज़ूनॖ पछॖ (शुक्ल पक्ष), पुनिम (पूर्णिमा), शॊकुरवार (शुक्रवार/ जुम्मा), श्री सप्तार्षि सम्वत 5094, राश मकर (चलान), ऋतु ग्रीष्म (चलान)...अज़ छु ग्रुहुन ति
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: फ़कीरॖ डऺन्ड आसॖन्य
    अ: ॴसिथ-बऺसिथ ति मंगान
          रोज़ुन
2. मु: फ़तह मत्युन बताह
    अ: मुफ्तुक बताह ख्यॊन बॆ-
          मन्दछ पऻठ्य
3. मु: फ़साद फ़ुटुल
    अ: युस हमेशॖ लडऻय तुलनाव-
          नस प्यठ आसान
4. मु: फिरिथ फ्यरन छ़ॖनुन
    अ: युस पनुन क़सूर ब्यॆयिस
          प्यठ खारि
5. मु: बंगि मंज़ नच़ुन
    अ: मस्त  ॴसिथ वथ डलॖन्य
*************************
1. सऻजिश... Conspiracy/
                   Plot
2. साज़गार.... Conducive/
            Favourable/Agree
            able/Appropriate
3. सागवान....Teak tree
4. सास..... Thousand
5. सावुन... To put to sleep/
                 Lull
6. साबन.... Soap
7. सगॖनावुन...Irrigate
8. सागर..... Sea/Ocean
9. सार.....Central idea/To
               search/To carry
10. साक़ी..One who serves
                 wine/Beloved/
                 Sweetheart/
                 Cup-bearer
*************************
गीता ज्ञान  : अध्याय-4. :
पऻपियन ख्वतॖ ति पऻपी ॴसिथ
ज्ञानॖ-रूपॖ नावि सवार सप्दिथ
पापॖ-सागरॖ मंज़ॖ छि तार लबान
वॊन भगॖवानन गीता ज्ञान
*************************
अज़ छु ज़ूनि-ग्रुहुन। यि ग्रुहुन छु लगान अज़ शामन रऻच़ॖहॖन्ज़ि काह  बऺजिथ तॖ च़ुवनज़ाह मिन्टॖ (11.54 रात्रि) प्यठॖ रऻच़हॖन्ज़ि त्रॆ बऺजिथ तॖ कुनवनज़ाहन मिन्टन (3.49 रात्रि) ताम। सऻन्य जंत्री छि वनान ज़ि यि ग्रुहुन यी सऻनिस वतनस मंज़ यानि भारतस मंज़ वुछनॖ। अमि अलावॖ यी वुछनॖ ब्यॆयन मुल्कन मंज़ ति। अमि ग्रहनुक सूतक छु शुरु गछ़ान अज़ दुहचि ज़ॖ बऺजिथ च़ुवनज़ाह (2.54 दिन) मिन्टॖ प्यठॖ। दपान छि ज़ि सूतक लगनॖ विज़ि या ग्रहनकालस मंज़ गछ़ि श्रान-ध्यान करुन, दान, ज़प, हवन बेतरी करनॖ सॗत्य छु कल्याण गछ़ान।ब्यॆयि दपान ज़ि अथ समयस मंज़ यानि सूतक लगनॖ प्यठॖ ग्रुहुन म्वकलनस ताम गछ़ि नॖ मूर्ती स्पर्श करॖन्य, ख्यॊन-च्यॊन, नम कासॖन्य, श्वंगुन।बऺर्च़ ज़नानि पज़ि नॖ सब्ज़ी च़टॖन्य, पापड बुज़ॖन्य या ज़्याद व्वथुन-बिहुन, न्यबर नेरुन। प्रथकऻन्सि पज़ि असवुन तॖ गिन्दवुन रोज़ुन अथ समयस मंज़।
वनॖनॖ छु आमुत वारियाह मगर कुस कोताह कऺरिथ ह्यकान छु अथ प्यठ हॆकि बॊड बऺहस सप्दिथ।
अज़ छि हारॖ-पुनिम ति। कऺशीरि मंज़ ॴस्य अज़्यकि द्वह मार्तन्ड यानि भवन खसान तॖ श्रान-ध्यान तॖ श्राद्द-वाद ति हावान।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(वुछिव koshursabak.blogspot.com ति)

26.07.2018

26.07.2018, हारॖ (आषाड़) ज़ूनॖ पछॖ (शुक्ल पक्ष), च़्वदह (चतुर्दशी), ब्रसवार (वीरवार/ बृहस्पतवार), श्री सप्तार्षि सम्वत 5094, राश मकर (रऻच़ हॖन्ज़ि 4.11 बजि प्यठॖ), ऋतु ग्रीष्म (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: पजि तल थवुन
    अ: खारॖ रोज़ुन/मनॖच कथ
         मनस मंज़ दॊब्रावॖन्य
2. मु: पतॖ-पतॖ पछ़लोव
    अ: सॗत्य-सॗत्य पकनवोल
3. मु: पऺज़ कथ छि सारिनॖय ट्यठ
         लगान
    अ: ख़राबस बुथिस प्यठ
         ख़राब वनुन छु तस ख़राब
         लगान
4. मु: पॊत-पॊत पादशाहस ति
         गऻबथ
   अ: पऻनस पऺत्यकिन्य कऻन्सि
        हन्ज़ निन्दा करॖन्य
5. मु: प्वतल्यन पूज़ा तॖ बऻच़न
         इज़ाह
   अ: पनॖन्यन गरिक्यन नॖ पृछ़ुन
        ति लूकन ख़दमत करॖन्य
*************************
1. क्रोल/क्रोर.....Crust (of a
                        wound)
2. क्राल......Potter
3. क्रूर....... Well/Cruel
4. क्रूठ...... Difficult/Hard
5. क्रूद...... Anger
6. क्रीम..... Cream
7. क्रख..... To cry
8. क्रुहुन.... Black
9. क्रेहनॖ-माज़....Lever
10. क्रॊछ़...A big iron spine
             used for baking
             purposes/A small
             shovel
*************************
गीता ज्ञान  : अध्याय-4  :
यिम लूख नॖ ज़ांह यऺगॖन्य करान
मनशॖ-लूकॖ स्वख कॗत्य प्रावान
परलूख ति छि तिम रावरावान
वॊन भगॖवानन गीता ज्ञान
*************************
अज़ छि ज़्वाला-च़्वदह यानि ज़्वाला दीवी हुन्द ज़ा-द्वह। कऺशीरि मंज़ ओस ॳज़्यकि द्वह ख्रॖवि यॆति ज़्वाली जी मन्दर छु मेलॖ लगान। यि ज़्वाला दीवी मन्दर ति छु ह्यॊर ॳकिस ल्वकटिस पहाडस या ॳकिस वुडरि प्यठ बनिथ तॖ ब्वनॖ-प्यठ ह्यॊर ताम छि हेरॖ बनिथ। हालांकि मंदरस ॳन्द्य-ॳन्द्य छॆ नॖ ज़्यादॖ खुलॖ जाय तोति ओस तति लूकन हुन्द युन-गछ़ुन अज़्यकि द्वह बराबर रोज़ान। ख्रॖव छु अख गाम  वुयनॖ तरफॖ कऺशीरि मंज़ यॆति ज़्वाला-दीवी पनॖन स्थापना कऺरिथ छि। ओर ति ॴस्य ॳस्य तऺहर यथ खसान वख्तॖ-अकि।
हारुन रयथ ह्यॊतुन अंद वातुन। पगाह छि हारॖ-पुनिम।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

21.07.2018

21.07.2018, हारॖ (आषाड़),ज़ूनॖ पछॖ (शुक्ल पक्ष), नवम (नवमी), बटॖवार (शनिवार/ शनिश्चरवार), श्री सप्तार्षि सम्वत 5094, राश वृश्चिक (रऻच़ हन्ज़ि 4.16 बजि प्यठॖ), ऋतु वर्षा (चलान)....अज़ छि हारॖ नवम ति
*************************
जे के विचार मंचॖ तरफॖ छुस बॖ त्वहि सारिनीय यछ़ान
     ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु:नाटॖ दांद
    अ: महामूर्ख
2. मु: नारॖ मंज़ॖ गुलज़ार
    अ: बडि मुसीबतॖ मंज़ॖ नेरुं
3.मु:  नारॖ विज़ि क्रूल खनुन
    अ: ज़रूरतस प्यठॖय कुनि
         मसलुक हल छ़ान्डुन
4. मु: नाव थॊद तॖ नस्यति ज़ॊद
    अ: हावुन बऺल्य थज़्ज़र
5. मु: नऺहलस प्यठ दऺहलॖ
   अ: अख ॳक्यसॖन्दि ख्वतॖ
        खस्यतॖय
*************************
1. इशतियाल....Anger/Provo
                cation/Instiga-
                tion/Incitement
2. इशटाम-फ़रोश...Stamp-
                 paper seller
3. इस़रार...Request/Persis-
             tance/Constancy
4. इज़ाफ़ॖ.... Enhancement/
             Enlargement/Addi
             tional/Excess/
             Surplus
5. इज़तिराब.... Impatience/
             Restlessness/Dis
             turbance/Uneasi-
             ness/Anxiety/
             Commotion
6. इतलाह... Information/
             Intimation/Notice
             Communication/
             Notification
7. इशतिहार....Poster/Adver
           tisement/Publicity
           Bill/Notification
8. इशारॖ...Hint/Suggestion
               Indication/Clue/
               Sign
9. इशारॖ हावुन...To show
               direction/To give
               a hint
10. इसम...Name
*************************
गीता ज्ञान  :  अध्याय-4  :
प्राणायाम करनवऻल्य यूगीजन
प्राण अपान शहन हॖन्ज़ गति रोकान
यगन्यॖ सॗत्य पापन नाश करान
वॊन भगॖवानन गीता ज्ञान
*************************
मान्यता छि ज़ि अज़ छि शारिका जयन्ती। अमि मूजूब ओस ॳज़्यकि द्वह वख्तॖ अकि यानि त्रॖह वऺरी ब्रौंठ कऺशीरि मंज़ हारी-पर्वतॖ यानि परबतॖ आसान म्वत मत्यॊमुत। सुबहस ब्रह्म-महूर्त प्यठय यानि रऻच़-हॖन्ज़ॖ त्रॆयि बजि प्यठय ओस आसान  रस्तॖ लॊगमुत लूकन हुन्द पर्बतॖ।शुर्य बऺड्य ज़नानॖ मर्द, बुज़र्ग, कोरि लऺडकॖ सऻरीय ॴस्य वातान च़ऺक्रीश्वर, मान-मान ॴस लगान पकनस, दवॖ-दव ॴस्य करान च़क्रीश्वरच्यन हेरन। ॳड्य ॴस्य हेरॖपऻव्य गंज़रावान, ॳड्य ॴस्य वख्त वुछान ज़ि कुस वाति ह्यॊर ब्रौंठ। आरती हॖन्ज़ गूंज ॴस ग्रज़ान आसान। कॆंह बख्त ॴस्य अज़ च़ॊट यानि तऺहर-शूशनोर खारान तॖ शूशॖनोर गऻन्टन त्रावान। मेलॖ ओस लगान। च़क्रीश्वर नीरिथ ॴस्य पहाडॖ पऺत्यकिनीय कॆंह वसान तॖ कऻठ्य-दरवाज़स ताम वऻतिथ तति थख कडान। ति क्याज़ि अज़ छि हारॖ-नवम। हालांकि पूरॖ प्रयास छु यिवान करनॖ फरीदाबाद (अनंगपुर) हारी-पर्वतॖस स्वय शक्ल-सूरत दिनॖच य्यॊस कऺशीरि पर्वतस ॴस मगर असल गव असलॖय तॖ नकल गव नकली। दिलस छि ग्राय लगान यॆलि-त्यॆलि कऺशीरि मंज़ कऺड्यमॖत्य द्वह याद यिवान छि। ऒन कयाह ज़ानि प्रॊन बतॖ। नवि पुयि क्याह छि ख़बर ज़ि तिहन्द्यव ज़िठ्यव क्याह त्रोव पथकुन। कमन-कमन चीज़न निशि प्यव तिमन अथॖ-छलुन। खऻर...यि बुथि आव तऺथ्य छु वुछुन, सुय छु व्यतरावुन सुय छु पकनावुन। प्रोन गव पथकुन व्वंय वुछ यथकुन
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
   भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(koshursabak.blogspot.com ति वुछिव)

20.07.2018

20.07.2018, हारॖ (आषाड़) ज़ूनॖ पछॖ (शुक्ल पक्ष) ॴठम (अष्टमी), शॊकुरवार (शुक्रवार/ जुम्मा), श्री सप्तार्षि सम्वत 5094,राश तुला (चलान), ऋतु वर्षा (चलान)....अज़ छि हारॖ ॴठम ति ************************* जे के विचार मंचॖ तरफॖ छुस बॖ त्वहि सारिनीय यछ़ान ऒरज़ुव तॖ दॊरकॊठ ************************* नमस्कार त्वहि सारिनीय म्योन माहरा पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ ************************* 1. मु: नमस प्यठ नून नॖ द्युन अ: स्यठाह कंजूस आसुन 2. मु: नवशेरवानिन अदालत लागॖन्य अ: फ़साद तुलुन/बॊड दंगॖ करुन 3. मु: नस रटान वगुव च़टान अ: धर्मात्मा बऺनिथ दुष्ट आसुन वनुन कॆंह तॖ करुन कॆंह/ अंदरी-अंदरि द्वख वातनावुन 4. मु: न्यॊठस च़ोंग दज़ुन अ: च़ूर आसुन/च़ूरॖसॖन्ज़ अलामात 5. मु: न्यॊठ हावुन अ: साफ़ इन्कार करना/कांह चीज़ रटिथ वापस न करुन ************************* 1. पान....Body/Betel 2. पाम...Reproach/Blame/ Taunt 3. पामाल. Trampled/Down trodden/Laid low Devastated 4. पागल... Mad 5. पान गालुन...To work hard To crush 6. पान मारुन...To make hue and cry/To make a noise 7. पोन्य....Water 8. पानस....Himself 9. पानस-पानस...Personal/ Individual/Respec tive 10. पान-दान...Betel-box ************************* गीता ज्ञान : अध्याय-4 : कॆंह प्राण अपान वायू द्वनवय यूगी अख ॳकिस मंज़ करान लय कॆंह प्राण प्राणन मंज़ हुमान वॊन भगॖवानन गीता ज्ञान ************************* म्यॆ करेये व्यनती यॆमि सबकॖ दऺसय पनॖन्यन माज्यन, बायन ब्यॆन्यन ज़ि तिम सोज़हऻन कॆंह प्रच़ॖ (Riddles) म्यॆ पनॖनि पनॖनि ग्रुपॖ दऺस्य ताकि बॖ ह्यकहऻ तिम सॊम्बरऻविथ ॳक्यसॖय जायि तॖ पतॖ वातनावहऻ पनॖनि बरादरी मंज़ तिहन्ज़ि जानकऻरी बापथ। कॆंच़व सोज़ॖ कॆंह प्रच़ॖ मगर माने रोस। अगर कऻन्सि निश प्रच़न हुन्द खज़ानॖ छु तऺमिस छि गुज़ऻरिश ज़ि सु सूज़्यतन म्यॆ माने ह्यथ। अख ग्रुप छु वुन्यक्यनस कऻम रॖच़ करान स्व गऺयि यि ज़ि अमि ग्रुपॖक्य सदस्य छि गिन्दान पानॖवुन्य सब़्ज़ी परज़ॖनावॖन्य, गरॖक्य चीज़ परज़ॖनावॖन्य, संस्कारन हॖन्ज़ ज़ऻन्यकऻरी दिन्य, वगैरा वगैरा। यि कऻम छि जान बनिस्बतॖ कि पानॖवुन्य ल्यकॖ-ल्यख, दॊंखॖ-दोंख, अख-ॳकिस पामॖ दिन्य। कॆंच़न ग्रुपन मंज़ छु यी चलान रोज़ान दुहकिस-दॊहस।अमि ख्वतॖ बॆहतर छु पनुन वख्त कुनि जान कामि कुन लागुन। यॆमि सॗत्य ब्यॆयिस कॆंह फ़ऻयदॖ मेलि। वऺलिव बदलावव ॳस्य पनॖन लेखनॖच चाल, बोज़नॖच चाल तॖ कथ करनॖच चाल। ************************* कऻशुर हॆछव कऻशुर परव कऻशिर्य पऻठ्य पानॖवुन्य कथबाथ करव ************************* नऺविव तॖ फोलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (बूज़िव म्यूज़कॖ प्यठॖ ति बूज़िव म्यऻन्य यि आवाज़) (वुछिव blog: koshursabak.blogspot.com ति)

19.07.2018

19.07.2018, हारॖ (आषाड़) ज़ूनॖ पछॖ (शुक्लॖ पक्ष) सतम (सप्तमी), ब्रसवार (वीरवार/ बृहस्पतवार), श्री सप्तार्षि सम्वत 5094, राश तुला (शामन 7.55 बजि प्यठॖ), ऋतु वर्षा (चलान)...अज़ छि हारॖ सतम
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: दन्दव सान ज़ामुत
    अ: स्यठाह तेज़ बुद्दि वोल
2. मु: दूरि-दूरि मर्च़ मेठान नऺज़्य-
         दीक वऻतिथ नाबद ट्यठान
    अ: दूर रूज़िथ छु लोल बडान
       तॖ नज़दीक ॴसिथ छु गटान
3. मु: नंगॖ तॆह
    अ: छ़ॊरू थज़्ज़र थवुन
4. मु: नखस खारुन
    अ: पज़नॖ प्यॆठ लोल बरुन
5. मु: ननवऻर्य नाव नेरुन
    अ: कुनि कथि प्यठ बदनऻमी
         गछ़ॖन तॖ सु दाग़ न च़लुन
*************************
1. शान्द...A pillow (near
              head)/A support/
              A shelter
2. शान्त...Calm/Silent/Mild
              Quite/Sober/
              Peaceful
3. शानॖ... Shoulder/To
               show boldness
4. शांश... Fast breathing/
               Suffocation/
               Asthma
5. शाह.... Breath/Sigh/Res
             piration/breathing
             King like
6. शान..Dignity/Splendour
            Grandeur/Glory
7. शाम... Evening
8. शामॖ-शामय...In the even-
            ing itself
9. शामॖ-रऺग...Black colour
10. शाम-सुंदर... Beautiful/
             One of the names
             of Lord Krishna
*************************
गीता ज्ञान  : अध्याय-4  :
कॆंह धन तॖ तप ज़प यऺगॖन्य करान
कॆंह सख़ अहंसा व्रत दारान
कॆंह सत् संग तॖ ज्ञान यऺगॖन्य करान
वॊन भगॖवानन गीता ज्ञान
*************************
कऺशीरि मंज़ छु म्यॆ वुछमुत ज़ि प्रथ गरस मंज़ ॴस अख प्रथा चलान सु ज़न गव ज़ि संध्या च़ॊंग ॴस ज़ालान, सन्यवार्यन दॊहय पोन्य बदलावान, सुबहऻय नॆंद्रि वऺथित ग्वडॖ ब्रांद छलान, वुज़स लिवान, मंज़्य-मंज़्य हेरन हॆरि प्यठॖ ब्वन ताम (यानि त्र्यन या च़्वन पोरन मकानन) लिवान रोज़ान, द्वारस लिवान। यि कऻम ॴस तति रऻतिब चलान यानि प्रथ द्वह अख नियम बनिथ आसान। कऺशीरि न्यबर नीरिथ फुट्य शायद यिम सऻरी नियम। म्यॆ छु नॖ बासान ज़ि व्वंय आसि कांह संध्या च़ोंग ज़ालान, सन्यवार्यन पोन्य बदलावान वगैरा वगैरा। काव-पऺट ॴस आसान यथ प्यठ दॊहय कावस ॴस्य पानस ख्यनॖ ब्रौंठ तमिस ख्यन थवान। यॆति छॆ नॖ कावॖ-पऺट थवनॖच गुंजऻयिशिय फ्लैटन मंज़। सन्यवारि थवनस सॊंब छे नॖ जाय। तति ॴस्य कमरॖक्यन लबन प्यठ भगवान सॖन्द्य फोटू आसान तॖ सुबहऻय ॳछ खुलिथॖय ओस बासान ज़ि ज़न छि ॳस्य कुनि स्वर्गॖ-लूकस मंज़ रातस रूद्यमॖत्य तॖ करान छि भगवानसुन्द दर्शुन। शुर्यन ति बासान ज़ि फोटुवस बुथ वुछुनॖ सॗत्य छु द्वह फ्रूच़ नेरान। मगर यिमव खयालव निशि दूरेयि ॳस्य वारियाह। यॆति योर छु नॖ कमरॖक्यन लबन प्यठ व्वंय अख कलण्डर थवनस वार, भगवानसुन्द फोटू लागुन छु मुहाल। मन छु ख्वश गछ़ान यॆलि ॳस्य वनान छि वुनि कॆंच़न गरन मंज़ ठोकुर-कुठ यानि पूजा-गर प्रज़लान। वुनि छि यि प्रथा चलान असि मंज़ ज़ानि दय क्वत ताम।
अज़ छि हारॖ सतम, ॳज़्यकि द्वह ॴस्य त्रावान कऺशीरि आंगनन मंज़ हारॖ-मंडुल या व्यूग या रंगोली। यॆति द्युत अथ ति विराम व्वंय।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(परिव म्यॊन यि सबक़ blog: koshursabak.blogspot.com प्यठॖ ति)

18.07.2018

18.07.2018, हारॖ (आषाड़), ज़ूनॖ पछॖ (शुक्ल पक्ष), शॆयम (षष्ठी), ब्वदवार (बुधवार), श्री सप्तार्षि सम्वत 5094, राश कन्या (चलान), ऋतु वर्षा (चलान)
*************************
जे के विचार मंचॖ तरफॖ छुस बॖ त्वहि सारिनीय यछ़ान
        ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: ड्यकॖ डून्य मो फुटॖराव
    अ: अहंकार सख करुन
2. मु: तलवारि दारि प्यठ पकुन
    अ: मुश्किल कऻम करान करान
         नेरुन
3. मु: तालि गुल्य दिथ वदुन
    अ: अफ़सूस करुन/सख़
         पछतावॖ करुन
4. मु: तॊमलस मंज़ कनॖ
   अ: स्यठाह कम तेदाद
5. मु: थ्वकन अथॖ दारॖन्य
    अ: आज्ञाकऻरी आसुन/स्यठाह
         सीवा बाव आसुन
*************************
1. तॖर....A piece of
2. तॗर....Cold
3. तीर...An arrow/Sheep
4. तार...Wire/To cross/
             Telegram
5. तोर...Wooden bolt of a
          door/Have crossed
          There
6. तर.....To drench/To
              cross
7. तरीकॖ...Manner/Method
           Procedure/Path/
           Mode/Custom/
           System
8. तिलसिम...Magic/Spell
           Glamour/Enchant
           ment
9. तुमतुराक...Pomp and
           show/Fanfare
10. तिलॖ....Gold-thread
*************************
गीता ज्ञान  :  अध्याय-4  :
कॆंह यूगी यन्द्रॖयन हॖन्द्यन कर्मन
ब्यॆयि प्राणन हॖन्ज़न क्रयायन
प्रकाशमान ब्रह्म रूप ॳग्नस हुमान
वॊन भगॖवानन गीता ज्ञान
*************************
ज़रूरी छु ज़ानुन पनुन पान। यि छु वॊनमुत बड्यव बड्यव ग्वनवानव तॖ वुनति छि वनान रोज़ान सऻन्य ज़िठ्य, यिमन च़ुक छु पनॖन्यन फ्वलवुन्यन तॖ बडॖवुन्यन शुर्यन हुन्द। तिहन्ज़ि बजऻयी हुन्द च़ुक। मगर सवाल छु   ज़ि कि पनुन पान ज़ानुन क्याह मतलब या माने छु थवान। सान्यन शुर्यन समजावि कुस तॖ किथपऻठ्य। म्योन जवाब छु संस्कृत तॖ संस्कार। यिम ज़ॖ चीज़ छि वातनावन्य असि पनॖन्यन शुर्यन दवहॗक्य पऻठ्य। पीह-पीह छ़ुनुन। दछिन-खॊवॖर्य यॆलि नज़र त्रावान छि तॖ वुछनस तल छु यिवान ज़ि मुसलमान छि मज़हबी किताबॖ परनावान पनॖन्यन शुर्यन मदरसन मंज़, मस्जिदन मंज़, इस्लऻमी स्कूलन मंज़ मगर सऻन्यन शुर्यन छे नॖ अमि रंग्य तरबियत वातान। छि कॆंच़न जायन संस्कृत तॖ संस्कार परनावान मगर सु छु नॖ कऻफी। असि पज़ि अमि कॖस्मॖच सहूलियत वातनावॖन्य पनॖन्यव बनऻव्यमॖत्य आश्रमव दऺस्य, मंदरव दऺस्य तॖ पनॖन्यन पनॖन्यन गरन मंज़ पनॖन मऻल्य-माजि दऺस्य। हवनव ख्वतॖ छु यिम चीज़ ज़्यादॖ ज़रूरी।हवनव सॗत्य मेलन नॖ संस्कार बऺल्कि संस्कारॖ सॗत्य चलन हवन। यॆमिस नॖ मंत्रन हॖन्ज़ ब्वयी आसि सु क्याह ज़ानि हवनुक महत्व मगर यॆमिस मंत्र तगन परॖन्य तमिस तरि पानय फिकिरी ज़ि हवन क्याह छु। मेखल दिनॖ पतॖ थवि शुर योनि गरि किलिस प्यठ क्याह ज़ानि मेखलाय हुन्द मतलब मगर योनुक महत्व ज़ऻनिथ ह्यॆकि शुर समजिथ ज़ि योनि छा किलिस प्यठ थवुन जान किनॖ नऻल्य थवुन जान। इस्लिए छु सानि बापथ हवनवॖ ख्वतॖ संस्कार वातनावनॖच अशद ज़रूरत।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)
(वॊन्य ह्यॆकिव तॊह्य म्यॊन यि सबक़ परिथ blog: koshursabak.blogspot.com प्यठॖ ति)

17.07.2018

17.07.2018, हारॖ (आषाड़) ज़ूनॖ पछॖ (शुक्लॖ पक्ष), पऻन्च़म (पंचमी), बॊम्वार (मंगलवार), श्री सप्तार्षि सम्वत 5094, राश कन्या (दुहचि 3.6 बजि प्यठॖ), ऋतु वर्षा (चलान)....अज़ छि कुमार शॆयम (कुमार षष्ठी)
*************************
जे के विचार मंचॖ तरफॖ छुस बॖ त्वहि सारिनीय यछ़ान
      ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: छ़ॊटि बरि वॊटॖ बॊर
    अ: छ़ॊट वथ रटॖन्य
2. मु: ज़्यॆवि ज़बान चोब लबान
    अ: वऺल्टॖ कथ करनस प्यठ
         बॆज़ती प्यॆन्य
3. मु: ज़ॆठ्यन नर्यन हुन्द बोश
   अ: पनॖन्यन नर्यन हुन्द ज़ोर
         हावुन
4. मु: ज़नानि हुन्द पॊछ़ गरि गरि
         गॊछ़, मर्दॖ सुन्द पॊछ़ लऻग्य-
         तोस क्रॊछ़
   अ: ज़नानि हॖन्दि मालिनि तरफ़ॖ
        आमतिस पऺछ़िस छु ज़्यादॖ
        पाहन खऻतिरदऻरी वातान
5. मु: डऺम्ब्य रूपॖ शाहमार
   अ: नाहवार शुर/द्वखदायक
         न्यॆचुव आसुन
*************************
1. चॊन....To drink
2. चूंकि... Because
3. चूक्य...Wooden bench/
              Police-post/
              Octroi-post/Low
             wooden seat
4.  चोंखरावुन...To squeeze/
             To axert pressure
             upon/To crush/To
             make way forcibly
5. चोंचॖ... Ladle
6. चोन... Your's/Has taken
               (Drank)
7. चोर.... Stupid/Dumb/
              Dull/Fool/Unin-
           telligent/Tightened
8. चार....To tighten/To
              pressurise
9. चोरस...A square/Even
             level/Rectangular 10. चूदॖर्य....Leader/Title of
            landlord/Title of
            Rajputs
*************************
गीता ज्ञान   :  अध्याय-4  :
कॆंह यगन्यॖ रूपॖ दीवता पूज़ान
कॆंह यूगी ब्रह्म रूपॖ  ॳग्नस हुमान
आत्मॖ रूपॖ यगन्युक हवन करान
वॊन भगॖवानन गीता ज्ञान
*************************
राथ सपॖद्य डा. बदरी नाथ कला सऻब स्वर्गवास। यिम ॴस्य फ़रीदाबादॖ रोज़ान। फ़रीदाबादस मंज़ छि सानि समाजिक्य वारियाह बट्टॖ रोज़ान। तमि हिसाबॖ बासेयम शुमशान-गाटस प्यठ हऻज़िरी कमॖय पाहन। म्यॆ वोत वुछान ज़ि ॳर्थी सॗत्य यिम लूख शुमशानबल या शुमशान-गाठ ताम सॗत्य आसान छि तिम छि अख मंत्र परान रोज़ान मगर यि मंत्र छि लूख ब्यॊन-ब्यॊन पऻठ्य परान या कॆंह छिनॖ परानॖय। सही मंत्र परनवऻल्य आयम नज़रि कमॖय पाहन। म्यॆ सूंच ज़ि म्यॆ पज़ि पनॖन्यन बायन-ब्यॆन्यन ताम यि मंत्र ॳज़्यकि सबॖक़ॖ दऺस्य वातॖनावुन ताकि तिम ह्यकन अम्युक सही उच्चारन कऺरिथ यॆलि तॆलि ज़रूरथ प्यॆयि। वैसे छि वारियाह मंत्र यिवान परनॖ ब्यॊन-ब्यॊन ज़ऻच़न मंज़ मगर सानि ज़ऻच़ मंज़ छु यिहोय अख मंत्र ॳस्य रोज़ान परान योत्ताम दाह संस्कार सपदान छु...मंत्र छु:
  "क्षन्तव्योमे अपराधा
  शिव शिव शिव भो
 श्री महादेव शम्भो"
परनवऻल्य बूज़िम परान छि चिन्ता बूमी अपरादा....ॳड्य छि परान क्षमता यूमी अप..... ॳड्य छि परान ख्यनता बूमी....वगैरा वगैरा।
मरुन छु सारिनीय यि छु पज़र।अज़ ॳकिस पगाह ब्यॆयिस। भगवानस छि ॳस्य मंगान ज़ि स्यॆदि-बुथि दीज़ि मौत। कला सऻब ॴस्य यूगी यॆमि हिसाबॖ यिमन अन्त समय वोत। दपान ॴस्य ज़ि ब्रह्म  महूर्तॖ ब्रौंठॖय ॴस्य नेन्दरि वथित ज़ल-मल कऺरिथ आमॖतय तॖ ब्यॆयि श्वॊंगिमॖत्य तॖ पतॖ नॖ वथ्यिमॖती। यिछ़ मृत्यु छि कऻन्सि कऻन्सि नसीबस आसान। दय कऺरिन पर्दॖ सारिनीय। सऻरीय रूज़िन वारॖवति। सारिनॖय रूज़िन ज़्यूठ आय म्यॆन ॴही पूशिन म्यान्यन ब्यॆन्यन बायन।
ग्वनवान छि असि निशि दूर गछ़ान मगर तिहन्द्यन तिमन ग्वनन हॖन्ज़ रऻछ करॖन्य छु सोन फर्ज़ बनान।
"युस आव तस छु गछ़ुन
मौतस क्याह करि चोन तॖ म्योन
पशुन"
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)

16.07.2018

16.07.2018, हारॖ (आषाड़) ज़ूनॖ पछॖ (शुक्ल पक्ष), च़ोरम (चुतुर्थी), च़न्द्रवार (सोमवार) श्री सप्तार्षि सम्वत 5094, राश सिंह (चलान), ऋतु वर्षा....सऻन्क्रऻच़ फ़ाकॖ
*************************
जे के विचार मंचॖ तरफॖ छुस बॖ त्वहि सारिनीय यछ़ान
       ऒरज़ुव तॖ दॊरकॊठ
*************************
नमस्कार माहरा त्वहि सारिनीय म्योन
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन कथबाथ
*************************
1. मु: गरि ति हाख परि ति हाख
         नाहकय ज़ुवॖ गरी द्राख
    अ: कांह फ़र्ख न बासॖन्य
2. मु: गरि नॖ वय तॖ नालस टय
    अ: अपुज़ थज़्ज़र हावुन
3. मु: गाडॖ हान्ज़न्य
    अ: बद-व्यवहार करनवाज्यन
         ज़नान
4. मु: छानॖ जुम्माह करुन
    अ: अकी सातॖ सोरुय ख़र्च
          करुन
5. मु: छ़्वपॖ छय रोपॖसॖन्ज़ कर-
         खय तॖ स्वनॖसॖन्ज़
   अ: छ़्वपॖ कऺरिथ रोज़ुन छु जान
        यॊदवय कथ करॖन्य ति
        आसि कथ गछ़ि करॖन्य
        शूबिदार
*************************
 1. च्योन.....Your's
 2. चून्य..... Diamond
 3. चूनॖ...... Lime/Leak/
                  Ooze
4. चोंखुर.... A small group
                  of people
5. चॊगॖल्य... Back-biting/
                  Tale-bearing
6. चोब...  Lashing/Beating
7. चाबुक...Hunter/Whip
8. चोक....Crossing/Cross
               roads/Market
9. चोकॖ.... Kitchen
10. चोकाठ...Frame
*************************
गीता ज्ञान : अध्याय-4  :
मॊह मम्तायि दॖय अबिमान त्रऻविथ
ब्रह्म ज्ञानस मंज़ मन दऻरिथ
यगॖन्य पॊछ़ सऻरी कर्म करान
वॊन भगॖवानन गीता ज्ञान
*************************
न करन पानॖ कॆंह तॖ न दिन कऻन्सि कॆंह करनॖ। ओन दांद रावरावान सासन दांदन वथ। कऻन्सि छि पतॖवथ यिछ़ॖय फ़ितॖरथ आसान तमिस छु नॖ अमि रॊस ब्यॆयि कांह कऻम नज़रि तल यिवान। सऻनिस समाजस मंज़ ति छि यिथ्य अनासर मूजूद। यि छि अलगॖय ज़ाथा अख आसान। यिमन छि नॖ ह्यंग आसान मगर यिमन छि म्यंगॖ दग आसान। सिरिफ़ क्रकय याच़ॖ रोज़ान दिवान। गरि ति तॖ परि ति। इन्सान छु वैसे ही परेशान आसान पनॖन्यन मसलन हल छ़ान्डान रोज़ान तॖ प्यठॖ यॆलि तऺमिस टंव-टंव करन वऻल्य बुथि प्यवान सु छु पलव च़टनस यिवान। अगर कांह कॆंह कऻम कऻन्सि हॖन्दि बापथ करान छु असि पज़ि ख्वश गछ़ुन।तऺमिस शख्सस ज़ंगॖ कडनॖ बजायि मदद करुन। ह्यमथ बऺडरावॖन्य वथ हावॖन्य न कि वथ रावरावॖन्य। नॊक्तचीनी करॖन्य छि नाकारॖ । यॊदवय बासान छु ज़ि कऻम करनवोल शख्स छु गलत क़दम तुलनवोल जऻनी छि दपान ज़ि तमिस पज़ि तती रुकावुन सु शख्स तॖ सही वथ हावॖन्य अगर तगान छस। न तॖ गव छ़्वपॖ-दम कऺरिथ बिहुन तॖ वुछुन ज़ि सुय क्याह छु करान। छ़्वपॖ छय रॊपसॖन्ज़ करखय तॖ स्वनॖसॖन्ज़।वऺलिव कूशिश करव ज़ि यथ पनॖनिस कऻशिर्य-बटॖ समाजस खारव अख-अख सीर तॖ बनावव अख शूबवॖन्य अमारत युथ यिन वाल्यन सान्यन शुर्यन अख जान तॖ प्रज़लवॖन्य मिसाल बऺनिथ रोज़ि।
*************************
कऻशुर हॆछव कऻशुर परव
कऻशिर्य पऻठ्य पानॖवुन्य कथबाथ करव
*************************
नऺविव तॖ फोलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(बूज़िव म्यूज़कॖ प्यठॖ ति बूज़िव म्यऻन्य यि आवाज़)