23.07.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

23.07.2022 श्रावनॖ (श्रावण) गटॖ पछॖ (कृष्ण पक्ष) दऺहम (दशमी), देवादेव, बटॖवार (शनिवार/शनिश्चरवार), श्री सप्तर्षि सम्वत 5098, नक्षत्र कृति, राश वृष (चलान), ऋतु वऺहरात (वर्षा) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मलि वॊन बरादरस ज़ि कऺशीरि मंज़ हाबा ॴस्य नमतॖ ब्रॊंह बोज़ान ज़ि श्रावनॖ पुनिम दॊह ओस यिवान यात्रायन या यिमन तीर्थन गऺछ़िथ तति शिव लिंग या शिव मूर्ती हुन्द  दर्शुन करनॖ। सऻरी श्रद्धालूॴस्य यिमन मन्दरन या ग्वफायन ताम वातान सिरिफ श्रावनॖ पुनिम दुहुय तॖ दर्शुन कऺरिथ ॴस्य वापस फ़ेरान। आहनी मऻजी ती ॴस्य प्रथा खबर कॗति कालॖ प्यठॖ। शेंक्राचार, अमरनाथ, महादेव, गंगॖजटन, सऺर्यश्वर, हऺर्यश्वर, द्यऻन्यश्वर या कुनि ति शिवालय मन्दर। बरादरन वॊन तीज़मालि। मगर हाबा यि प्रथा छॆ नॖ नज़र यिवान अमरनाथ यात्रा करनस मंज़ व्वंय नमतॖ पतॖ। ख़बर क्याज़ि रूज़ नॖ यि प्रथा बरक़रार पऺत्यम्यव केंच़व वऺर्यव प्यठॖ। च्योन वनुन छु पॊज़ मऻजी। अमरनाथ यात्रा छि व्वंय श्रावनॖ पुनिम ब्रॊंह ज़ॖ डाय ऱयथ प्यठॖ शॊरु गछ़ान तॖ यात्री छि करान रोज़ान शिव लिंग दर्शुन। तीज़मालि प्रुछ़ बरादरस ज़ि च़ॖ ओसुख ना वनान ज़ि अमरनाथ ग्वफायि मंज़ुक शिव लिंग ओस गटॖ पछस मंज़ गटान गटान रोज़ान तॖ मालहि दॊह ओस अदृश्य सपदान। आहनी ती ॴस्य वनान तमि वख्तॖ यॆलि ॳस्य गऺयि यि अमरनाथ यात्रा करि अज़ सतहीठ वऺरी ब्रोंठ। मगर अज़कल क्याह छु यात्रीयन यिवान नज़र तति श्रावनॖ ज़ूनॖ पछॖ ऒक्दॊह ब्रोंठ दय ज़ानि। बरादरन वॊन तीज़मालि। बॖ हाबा ॴसॖस बोज़ान ज़ि मंज़ॖ ओस नमतॖ पतॖ कमि ताम वऺर्यि ग्वफायि मंज़ुक शिव लिंग पूरं पऻठ्य  अदृश्य सप्द्मोमुत केंच़स कालस तॖ श्रद्धालू ॴस्य गऻमॖत्य परेशान तॖ हऻरान मगर दपान ॴस्य पतॖ मा ओस सु शिव लिंग कर ताम ब्यॆयि पनॖनिस आकारस मंज़ बन्योमुत। ख़बर हय पॊज़ क्याह तॖ अपुज़ क्याह। बोज़नस मंज़ छि ख़बर क्याह क्याह बोज़ान रोज़ान दफ अल्बतॖ पॊज़ गव ती यि इन्सान पनॖन्यव ॳछव वुछि। कथ छि जऻरी 

**********************

कऻशुर  ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव  koshursabak.blogspot.com प्यठॖ ति)