15.07.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

15.07.2022 श्रालन (श्रावण) गटॖ पछॖ (कृष्ण पक्ष) द्वय (द्वितिय), देवादेव, शॊकुरवार (शुक्रवार/जुम्मा/भार्गववार), श्री सप्तर्षि सम्वत 5098, नक्षत्र श्रयन, राश कुम्भ (रऻच़ हॖन्ज़ि 04.15 बजि प्यठॖ), द्रठॖपऻन्च़ुक (पंचक) शॊरु,ऋतु वऺहरात (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन वॊन तीज़मालि ज़ि दॊयिमि दॊह सुबहऻय गव छ्यॆडि हुन्द शंख नाद कनन तॖ ग्वसान्यन हॖन्दि शोर-ओ-गुलॖ सॖत्य गऺयि सऻरीय याथी तयार दोयिमि पडावॖ बापथ। दॊयिम पडाव कुस बा ओस प्यवान। तीज़मालि प्रुछ़ बरादरस। चन्दनवोर  ओस मऻजी दॊयिम पडाव। कोताह फऻसलॖ ओस प्यवान तय करुन पऺहलगामॖ प्यठॖ च़न्दनवोर ताम। तीज़मालि प्रुछ़ बरादरस। क़रीबव ॴठ नव मीन ओस प्यवान पऻदल पकुन। तमि वख्तुक अख मीन गव ॳज़्युक डॏड किलोमीटर। छ्यॆड्य ॴस ब्रोंह ब्रोंह पकान तॖ यात्री ॴस्य तिमन पतय पकान रोज़ान। प्रभातन पऺहलगाम त्रऻविथ ॴस्य च़न्दनवोर दुहचि द्वन त्र्यन बज़रगन ताम वातान। गुर्यवऻल्य ति ॴस्य सॗत्य सॗती आसान। च़न्दनवोर वऻतिथ ॴस्य थख कडान तॖ मर्द मर्दन ॴस्य ग्वडॖ च़्वल खनान।कमि बापथ। तीज़मालि प्रुछ़नस। बत्तॖ-स्युन रननॖ बापथ। चूंकि यि सोरुए अलाकॖ ओस पहऻडी तॖ जंगल। दछिन्य खोवुर्य ॴस्य कुल्यन हुन्द काठ सॊम्बरावान तॖ ज़ालान रोज़ान अथ च़्वलि मंज़ तॖ ओस बत्तॖ-स्युन तयार गछ़ान। बॏवलियन प्यठ ॴस्य अथॖ ख्वर चलान, श्राना करान, बानॖ-वानॖ छलान रोज़ान। खॗमॖ ॴस्य खडा करान तॖ ॴस्य श्वॊंगाम। शामन ॴस्य ब्यॆयि ख्यवान च्यवान तॖ त्रॆयमि पडावॖच तयऻरी करान। सामान वटनस या वाहरावनस ॴस्य गुर्यवऻल्य ति बराबर मदद करान रोज़ान। अमि पतॖ कुस बा पडाव ओस आसान। च़न्दनवारि पतॖ ओस त्रॆयिम पडाव वावज्यन मगर तमि पडावॖ मंज़य ओस प्यवान खसुन पहाडस यथ वनान ॴस्य पिश्य-बाल। यि पहाड़ ओस हना सख़ खसुन आसान। बरादरन वॊन तीज़मालि। मगर महादेव सॖन्ज़ि कृपायि सॗत्य ॴस खसान सऻरी। त्रॆयमि दॊह ॴस्य तिथय पऻठ्य न्यॆन्दरि वॊथान छ्यडि हॖन्ज़ॖ शंख-नादॖ  सॗत्य न्यॆन्दरि व्वथान तॖ नेरान ॴस्य वावज्यन कुन। कत्थ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव  koshursabak.blogspot.com प्यठॖ ति)