12.07.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

12.07.2022 हारॖ (आषाढा) ज़ूनॖ पछॖ (शुक्ल पक्ष) त्रुवाह (त्रयोदशी), देवादेव, बॊम्वार (मंगलवार), श्री सप्तर्षि सम्वत 5098, नक्षत्र मूल, राव धनु (चलान), ऋतु वऺहरात (वर्षा) (चलान)...चूंकि पगाह छि च़्वदह (चतुर्दशी) रावान पगहुक वॊहरवोद यी ॳज़्य

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन वॊन तीज़मालि ज़ि मऻजी यि छ्यॆड्य याने यिम सऻरी साध संत ॴस्य श्रीनगर अखाडा मन्दरॖ प्यठॖ पऻदल पकान पकान पऺहलगाम ताम वातान युस अमरनाथ यात्राय हुन्द ग्वडॖन्युक पडाव छु यिवान मानॖनॖ। यिम सऻरी साध संत ॴस्या पऻदल गछ़ान रोज़ान पऺहलगाम ताम। तीज़मालि प्रुछ़ हऻरऻनी सान बरादरस। आहनी मऻजी कम अज़ कम सऻरी अल्बतॖ कॆंह तिम साध संत यिम मऺर्यदियादम या कॆंह तिम यिम अपंग माने लऺन्ग्य ल्यॆच ॴस्य आसान तिम ॴस्य गाड्यव दऻस्य पऺहलगाम ताम वातान। बरादरन वॊन तीज़मालि। तिमन दॊहन आसॖ नॖ गाडि ति ज़्यादॖ मॊय्यसर आसान। साधन संतन ॴस्य त्रॆ च़ोर दॊह लगान पहलगाम ताम वातनस। आम यात्री ॴस्य श्रावणॖ पुनिम ब्रोंह शॆ सथ दॊह मंज़ॖ फरॖख थऻविथ पऺहलगाम वातनॖच कूशिश करान। एहतियात ओस यिवान वरतावनॖ सु गव यि ज़ि यॊत ताम नॖ छ्यॆड्य ग्वडॖ दॊयिमि पडावॖ बापथ नेरिहे आम यात्री ह्यकहऻन नॖ तिमन ब्रोंको नीरिथ। यि ओस सरकऻर्य ह्वॊकुम आसान।बरादरन वॊन तीज़मालि। यूत सख बन्दोबस्त ओसा आसान। तीज़मालि प्रुछ़ बरादरस। आहनी मऻजी यि ओस अख नियम तॖ प्रऻन्य परम्परा। तथ मंज़ छु नॖ कांह शक़। पऺहलगामॖ प्यठॖ ॴस असली यात्रा गछ़ान शॊरू ति क्याज़ि ॳकिस निर्धारित समयस ताम ओस आसान वातुन पऺहलगाम। ब्यॊन ब्यॊन जायव प्यठॖ ॴस्य श्रद्धालु स्यॊदुय पऺहलगाम वातान। पऺहलगामस मंज़ आसिहे जान रोनक़ आसान। तीज़मालि प्रुछ़ बरादरस।रोनक हय हनाह दफ शोलॖ ओस मारान पऺहलगाम तिमन दॊहन यॊत ताम यात्रायि अंद ओस वातान। ख्यनुक-च्यनुक इन्तिज़ाम क्याह सना ओस आसान। तीज़मालि प्रुछ़ बरादरस। दम ह्यु दि। च्यान्यन सारिनी सवालन दिमॖ बॖ जवाब। च़्यड कर हनाह। बरादरन वॊन तीज़मालि। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast  दऺस्य ति)

https://anchor.fm/bldeep

(यि सबक़ वुछिव  koshursabak.blogspot.com प्यठॖ ति)