03.07.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

03.07.2022 हारॖ (आषाढा) ज़ूनॖ पछॖ (शुक्ल पक्ष) च़ोरम (चतुर्थी), देवादेव, आथवार (रविवार/ऐतवार), श्री सप्तर्षि सम्वत 5098, नक्षत्र अश्ले (चलान), राश सिंंह (सुबहॖचि 06.30 वजि प्यठ), ऋतु ग्रीष्म (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि राथ हाबा ॴस्य तिकिहॖन्ज़ परमेशहवरी परेशान ज़न। च़ कऺम्यसॖन्ज़ कथ छख करान। बरादरन प्रुछ़ तीज़मालि। हय यिहऻयहाबा य्वॊस त्वहि हमसायि ॴस्यवि कऺशीरि मंज़। तीज़मालि पोवनस याद। बरादरन द्युत ज़ोर ह्यु पनॖनिस ज़ॆहनस तॖ प्यॆयस याद तिम सऻरी गरॖ यिम वंख अकि तऺम्यसॖन्दिस मकान ॳन्द्य पऺख्य रोज़ान ॴस्य। खर यिम व्वंय ख़ेर छि लेखान, थालॖच़ूर यिम व्वंय रैना छि लेखान, कुच़ॖर्य यिम व्वंय काच़ॖर्य छि लेखान, मन्दल यिम व्वंय मंडल छि लेखान, वगैरा वगैरा। बरादरसॖन्दिस मकानस दऺछिन्य खोवॖर्य ॴस्य सऻरी बटॖ गरॖ गणपतयारॖ मऺहलस मंज़। मुस्लमान ॴस्य नॖ बऺहरान जलसॖ जॊलूस तपऺर्य कडनस। वख्तन ख्यव व्वलगॊतुन तॖ बटॖ छुनॖ अज़ बऺहरान तमि मऺहलॖ मंज़्य पकनस। बरादरस प्यव द्वयत्रॖह वऺरी प्रोन सु पनुन मऺहलॖ याद तॖ त्रोवन ज़्यूठ व्वशा। च़ॖ कथबा ख्यूबस गोख। तीज़मालि दिच़ॖस ज़ीर। क्हींनय मऻजी च्यानि कथि द्युतनम वुतुश ह्यु यि हमसायि नाव बूज़िथ। टनलि यपोर वऻतिथ मऻजी न रूद असि कांह साये तॖ न कांह हमसायैय। बरादर सॖन्ज़ कथ बूज़िथ गऺयि तीज़माल ति भावुक पाहन। कऺशीरि हॖन्ज़ कथ यॆलि त्यॆलि ति व्वथान छि दिलस छि दुबराय हिश गछ़ान। यकदम छु यॆत्युक सोरुय मऺशिथ गछ़ान तॖ ॳछन तल छु कऺशीरि हुन्द नज़ारॖ याद यिवान। बरादरन वॊन तीज़मालि ज़ि च़्यॆ ह्यॆच़ेयथ परमेश्वरी हॖन्ज़ कथ करॖन्य। क्याज़ि ॴस परेशान स्व। यिहऻय हाबा पनॖनि माजि ज़्यॆवि मुतलक ॴस वनान। बतस आयि ग्रख। बॖ फ्यारॖ ग्वडॖ बतॖ।कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव  koshursabak.bllogspot.com प्यठॖ ति)