13.07.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

13.07.2022 हारॖ (आषाढा) ज़ूनॖ पछॖ (शुक्ल पक्ष) पुनिम (पूर्णिमाशी) ब्वदवार (बुधवार), श्री सप्तर्षि सम्वत 5098,

नक्षत्र पू.षा, राश मकर (रऻच़ हॖन्ज़ि 04.33 बजि प्यठॖ)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरन वॊन तीज़मालि ज़ि पऺहलगामॖ ॴस्य गुर्यवऻल्य खलि आसान तॖ तिम ॴस्य पनॖन्य गुर्य पूरॖ यात्रायि बापथ किरायि प्यठ दिवान रोज़ान। गुर्य क्याज़ि बा ॴस्य प्यवान किरायि प्यठ रटॖन्य। तीज़मालि प्रुछ़ बरादरस। तिमन दॊहन ॴस अख प्रथा यि ज़ि यात्री ॴस्य अकि हफ्तॖ बापथ ख्यन-ख्वरदऺनी सामान पनन्यन गरव प्यठॖ सॗत्य तुलान। पऺहलगाम वऻतिथ ॴस्य दुकानव प्यठॖ खॗमॖ किरायि प्यठ अनान तॖ यि खॗमॖ तॖ बकाया सामान ओस यिवान गुर्यन प्यठ सारनॖ। गुरिस कुस ओस पकनावान। तीज़मालि प्रुछ़ बरादरस। गुर्यवोल तॖ ब्यॆयि कुस। बरादरन वॊनॖनस। गव गुर्यवाल्य ति ॴस्य अमरनाथ यात्रा करान रोज़ान। तिम ॴस्य नॖ यात्रा करान मऻजी बऺल्कि तिम ॴस्य कमऻय करान रोज़ान। चूंकि यिम गुर्यवऻल्य ॴस्य सऻरीय मुस्लमान आसान यिमन ओस नॖ यात्रायि सॗत्य कुनि कॖस्मुक लेन-देन आसान। यूतुय योत नॖ, यिम गुर्यवऻल्य ॴस्य यात्रीयन ति गुर्यन प्यठ बॆहनऻविथ पऺहलगामॖ प्यठॖ ग्वफायि ताम तॖ वापस पऺहलगाम ताम निवान रोज़ान। अमि अलावॖ ॴस्य यात्री ज़ऻन्पानन मंज़ गछ़ान रोज़ान। ज़ऻन्पानन मंज़ तीज़मालि प्रुछ़ हऻरऻनी सान। आहनी मऻजी ज़ऻन्पानस मंज़। यि ज़ऻन्पानॖ ॴस्य च़ोर मॊज़ूर पनॖन्य नखन प्यठ तुलान रोज़ान। यिमन ज़ऻन्पानन मंज़ ॴस्य तिम यात्री आसान यिम पऻदल पऺकिथ ॴस्य नॖ ह्यकान तॖ गुर्यन प्यठ गछ़नस खोच़ान। यात्री ॴस्य पऺहलगामस मंज़ॖय यिम सऻरी चीज़ तम कऺरिथ दॊयमि पडावॖच तयऻरी करान रोज़ान। तीज़माल रूज़ बोज़ान बरादरसॖन्ज़ कथ बडॖ दिलचस्पी सान। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव  koshursabak.blogspot.com प्यठॖ ति)