18.07.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

18.07.2022 श्रावनॖ (श्रावण) गटॖ पछॖ (कृष्ण पक्ष) पऻन्च़म (पंचमी), देवादेव, च़ऺन्दॖरवार (सोमवार), श्री सप्तर्षि सम्वत 5098, नक्षत्र पू.भा, राश मीन  (सुबहॖचि 06.33 बजि प्यठॖ), द्रठॖपऻन्च़ुक (पंचक) (चलान), ऋतु वऺहरात (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

थऺक्यमॖत्य ॴस्य सऻरी योर ताम वातान वातान यि दऺप्यज़ि ति क्रॊथॖ ओस गोमुत मगर सॗती ॴस मनॖच खुशी ज़ि सुबहस नीरिथ वातव अमरनाथ ग्वफायि ताम तॖ करव शिव लिंग दर्शुन। बरादरन वॊन तीज़मालि। यि बालतलॖच वथ क्याज़ि सना ॴस खतरनाक। तीज़मालि प्रुछ़ बरादरस। तिमन दॊहन ओस बोज़नस मंज़ आमुत ज़ि बालतलॖ तरफॖ य्वॊस वथ छि स्व वथ छि कमि ताम फहाड पहाडॖ किन्य स्यॊदुय ग्वफायि ताम वातनावान मगर दपान ॴस्य ज़ि शीनॖ प्यॆठ छु प्यवान पकुन, कुनि कुनि जायि तुलॖकतुर आसनॖ म्वखॖ ओस पऻदल पकन वाल्यन रिकिन गछ़नुक या खर गछ़नुक खतरॖ रोज़ान तॖ भगवान  रऺछिन यॊदवय कऻन्सि ख्वर ओरॖ योर डलिहे सु यीहे नॖ अथी कुनि। हालांकि तमि वति ॴस्य नॖ आम यात्री यिवान गछ़ान मगर यिम कॆंह लूख स्वनॖमर्गॖ तरफॖ रोज़ान ॴस्य या यिमन तपऻरिम वथ यऺच़ ॴस आसान तिमय ॴस्य अमरनाथ यात्रा तमि वति करान रोज़ान। बरादरन वॊन तीज़मालि। खबर कऺच़ दॊह ॴस्य लगान तमि वति ग्वफायि ताम वातनस। तीज़मालि प्रुछ़ बरादरस। छ़ॊट वथ आसनॖ म्वखॖ दपान तपऻर्य ॴस्य यात्री श्रावनॖ पुनिम कालॖ गरि नीरिथ पुनिम दॊह दर्शुन कऺरिथ ऒक्दॊह दॊह वापस गरॖ वातान रोज़ान। बरादरन वॊन तीज़मालि। अज़कल आसि यि वथ व्वंय जान बनेमॖच़। तीज़माल ॴस यछ़ान ज़ानुन। दय ज़ानान। तनॖ ति गव ज़माना अख यॆलिच कथ म्यॆ वऺन्यमय। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)