06.07.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

06.07.2022 हारॖ (आषाढा) ज़ूनॖ पछॖ (शुक्ल पक्ष) सतम (सप्तमी) ब्वदवार (बुधवार), श्री सप्तर्षि सम्वत 5098, नक्षत्र उ.फा, राश कन्या (चलान), ऋतु ग्रीष्म (चलान)...अज़ छि हारॖ सतम

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

मऻजी अज़ हय छि हारॖ सतम दपान। बरादरन वॊन तीज़मालि। यि वऺनिथ हाबा वातॖनऻवथस च़्यॆ बॖ ब्यॆयि अकि फिरि कऺशीरि। तीज़मालि वॊन बरादरस ॳज़्यकि दॊह हाबा ॴस्य ॳस्य कऻशिर्य बट कऺशीरि पनॖन्यन पनॖन्यन गरन मंज़ सुबहऻय न्यॆन्द्रि व्वथित अथॖ बुथ छऺलिथ ब्रान्दॖ फश दिथ वुज़स ति लिवन-फश दिवान तॖ ॴस्य हाबा आन्गनॖकिस कुनि कूनस मंज़ हारॖ मंडुल बनावान बिल्कुल तिथय पऻठ्य यिथॖ पऻठ्य खान्दरन मंज़ व्यूग छि त्रावान। यि हारॖ मन्डुल ओस यिवान बनावनॖ त्र्यन च़्वन जायन याने आन्गनस मंज़, वुज़स मंज़, चोकस मंज़ वगैरा। हारॖ सतम दॊह छु सिर्यि भगवान सुन्द दॊह यिवान मानॖनॖ तॖ ॳमिस सिर्यि सुन्द गोल आकार छु यिवान बनावनॖ यथ मंज़ ब्यॊन ब्यॊन रंग यिवान छि बरनॖ। अथ हारॖ मंडलस मंज़कनि छि पोश यिवान थावनॖ। तऺहर छि यिवान बनावनॖ। सिरियस पूज़ा कऺरिथ छि तऺहर यिवान बऻगरावनॖ नऺवीदकिस रूपस मंज़। भगवानस छि मंगान ज़ि गरॖ रूज़िन ऒरुत तॖ बॊरुत, प्रकाशमय, ख्वश तॖ ख्वशहाल, सारिनॖय यॆछ़िन वुछुन बहार, सऻरी रूज़िन असवुन्य गिन्दॖवुन्य तॖ प्रज़लवुन्य। तीज़मालि वॊन बरादरस ज़ि नवि पुयि नबा छॆनॖ म्यॆ बासान यिमन रीच़न रिवाजन मुत्तलक  कॆंह ज़ऻन्यकऻरी। आस्यख ति किथॖपऻठ्य। बरादरन वॊन तीज़मालि। वनन वाल्यन हॖन्ज़ व्यछ़य मऻजी। यि प्रथा गऺयि गऻबॖय व्वंय कऺशीरि न्यबर नीरिथ। न रूद सु आन्गुन तॖ न सु वुज़। न चोकस मंज़ स्व जाय  अल्बतॖ वुज़ॖ वुज़ॖ छु गछ़ान ब्यॆयि वातहऻव तथ कऺशीरि मज़ तॖ त्रावान रोज़हऻव हारॖ मंडुल। बरादर सॖन्दि हटि द्राव कमि ताम बऻतुक अख मिस्रॖ - हऻरयेय च़ॖ गछ़तय कऺशीरि ताम, तॊत वऻतिथ हालातन ह्यतॖ साम, वुछतय च़ॖ ठीख ठाख छा म्योन गाम, बॖ हऻय गछ़ॖहऻ गरॖ करहऻ आराम। तीज़मालि गऺयि कन खड़ा यि बूज़िथ। वॊनुन बरादरस च़ॖ क्याज़ि बा रुक्योख बोज़नाव ब्रोंहकुन यि पूरॖ बऻथ। ब्यॆयि कुनि दॊह बोज़नावथ मऻजी यि पूरॖ बऻथ। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव  podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)