11.07.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

11.07.2022 हारॖ (आषाढा) ज़ूनॖ पछॖ (शुक्ल पक्ष) बाह (द्वादशी), देवादेव, च़ऺन्दॖरवार (सोमवार), श्री सप्तर्षि सम्वत 5098,, नक्षत्र अनुं राश धनु (सुबहॖचि 05.15 बजि प्यठॖ), ऋतु वऺहरात (वर्षा) (चलान) 

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिन।  दुर्गा क्षमा शिवा धात्री स्वहा स्वधा नमोस्तुते 

**********************

बरादरन वॊन तीज़मालि ज़ि ॶमरनाथ याथा हय छि मऻजी च़्वन पान्च़न पडावन मंज़ पूरॖ गछ़ान।  प्रथ वऺर्यि ॴस्य श्रावणॖ पुनिम दॊह अमरनाथ ग्वफायि वऻतिथ शिव लिंग दर्शुन करान। अज़कल हय छि करान रोज़ान श्रावणॖ पुनिम ब्रोंठुय शिव लिंग दर्शुन।। यि कुस दर्शुन छु तॖ त्यॆलि कुस दर्शुन ओस आसान। तीज़मालि प्रुछ़ बरादरस। यिमन शेठन पान्च़हऻठन वऺर्यन मंज़ हय छि मऻजी ज़ऺमीन आसमानॖच फरॖख आमॖच़ तॖ नियमन मंज़ ति छु कति कोर बदलाव आमुत। च़्यॆ आसी म्यॆ बासान याद मऻजी ज़ि ग्वडॖ ॴस वख अकि छ्यॆड्य नेरान रोज़ान। तिमन पतॖ ॴस्य बकाया श्रद्धालू नेरान अमरनाथ यात्रायि बापथ। बरादरन वॊन तीज़मालि। आहनबा म्यॆ छु पूरॖ याद ज़ि कऺशीरि मंज़ ॴस ग्रख व्वथान बाबा जियन हॖन्ज़, साधन संतन हॖन्ज़। ब्यॊन ब्यॊन जायव प्यठॖ यिथ ॴस्य तिम साध संत गरॖ गरॖ फेरान भिक्षा मंगान रोज़ान  तॖ अमरनाथ गछ़नॖ बापथ पलव-दलव, ख्यन-ख्वरदनी  मंगान रोज़ान माने कॆंह नतॖ कॆंह नक़ॖद या जिनॖस। कऻशर्य बटॖ ति ॴस्य दिल मुच़ॖरिथ तॖ पूरॖ श्रद्धायि सान शिव नावस प्यठ दान करान रोज़ान। साधन सतन ख्यावान-च्यावान रोज़ान। बिल्कुल सऺही वॊनुथ च़्यॆ मऻजी। यि छ्यॆड क्याह बा ॴस आसान। तीज़मालि प्रुछ़ बरादरस। सऻरी साध-संत होरॖक्य योरॖठ्य दिशायव प्यठॖ ॴस्य यिवान तॖ कऺशीरि वऻतिथ ॴस्य तिम ॳकिस जायि समान तॖ पतॖ ॴस्य श्रावणॖ पुनिम ब्रोंठॖय कॆंह दॊह पऻदल नेरान ॳकिस जॊलूस किस रूपस मंज़ यथ दपान ॴस्य ज़ि छ्यॆड्य द्रायि। ब्रोंह ब्रोंह ओस आसान काह थदि पायुक संत अख ज़्यूठ डंडॖ ह्यथ। हरॖ हरॖ महादेव नाव ॴस्य स्वरान तॖ रुद्राक्ष मालायि जपान रोज़ान। यि छ्यॆड्य वुछनॖ बापथ ओस लूकन हुन्द हॊजूम ओमराकदलॖ अखाडा मन्दरस न्यबर जमाह गछ़ान। यि प्रथा ॴस वारियाह कालॖ प्यठॖ चलान।  कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव  podcast दऻस्य ति)

https://anchor.fm/bldeep

(यि सबक़ वुछिव  koshursabak.blogspot.com प्यठॖ ति)