08.09.2019

08.09.2019 भऻद्रप्यथ (भाद्र) ज़ूनॖ पछॖ (शुक्ल पक्ष) दऺहम (दशमी) आथवार (रविवार/एतवार),श्री सप्तर्षी सम्वत 5095, राश धनु (चलान) ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1.मु: दफतम तॖ पकय
   अ: बॆहवाल/तस मुतलक वनान
        युस पऻन्य पानॖ कांह कऻम
        आसि नॖ करान
2. मु: दब हा लॊगुय पांछ़ क़दम
         आयि नफ़ा
    अ: मुसीबतस मंज़ पानस
          तसला द्युन
3. मु: दब छु नॖ कऻन्सि हुन्द बब
         ज़ि पास गछ़्यस
    अ: मुसीबत ह्यॆकि कऻन्सि ति
         यिथ
4. मु: दबस प्यठ द्रुस
    अ: मुसीबतस प्यठ मुसीबत
          युन
5. मु: दऻर गोंछ़ि रॊस
    अ: नाबाल्यॆग
**************************
1. अकसीर.....Effective/
             Efficacious/Active
2. अकार बकार युन...To help/
             Cooperate with/
          Lend a helping hand
3. अकऻल्य वरशुन... Untimely
                               rain
4. अत़वार....Conduct/Ways
                    Manners/Cus-
                toms/Behaviour
5. असलियथ...Reality/Truth
                Basic facts/Origi
          nally/Genuineness/
          Parity
6. असॖल....Real/Original/
           Principal stock in
        trade/Root/Essence/
        Root cause
7. असली....Real/Genuine/
                  Original
8. अशुद ख्यॊन....To regret/
                  Sorrow/Grieve
9. अशुद लागुन....To become
                  unconscious/
                To be senseless
10. अशुद....A medicine for
                 eyes/A kind of
                 poison
**************************
         गीता ज्ञान  :अध्याय 16
असुर ज़ात आच़ार व्यच़ार नॖ ज़ानान, न न्यॆबरिम न अंदरिम शुद्धी आसान। न जान चाल चलन
न पज़र आसान
वॊन भगवानन गीता ज्ञान
**************************
खांदरॖ पतॖ माहर्यॆनि हॖन्द्य ब्यॊन ब्यॊन रूपन मंज़ अख रूप छु यथ ॳस्य वनान छि शान्दगऺन्ड्य तोतॖ। यि रूप ज़नानि हुन्द छु बडॖ महत्वपूर्ण रूप आसान। यि रूप छु गरस अर्शस प्यठ खारान या फ़र्शस प्यठ पावान। दारोमदार छु ॳमिस ज़नानि अंदरिम नियथ किछ़ छि। दुहुक गर्युक नज़ारॖ छि यि ज़नान शामन बिस्तरस प्यठ बिहिथ रॗनिस कनस तल बावान यानि बोज़नावान तॖ रून छु ॳमिस ज़नानि हॖन्दिस वनॖनस प्यठ विश्वास कऺरान तॖ तमी आयि पनुन व्यवहार जतावान। यॊदवय ज़नानि नियथ साफ़ आसि स्व छि रॗनिस शामस बिस्तरस प्यठ बिहिथ  सारॆय दुहचि कथॖ सकारात्मॖ  रूपस मंज़ वातनावान तॖ मर्द छु तमी तरीकॖ गरस शूबरावान। यॊदवय नियथ ज़नानि हॖन्ज़ ख़राब आसि, स्व छि नकारात्मॖ रूपस मंज़ दुहचि कथॖ शामन पनॖनिस खानॖदारस वातनावान तॖ कन बरान यॆमिकि वजह सॗत्य मर्द छु गरस मंज़ अलगऺड्य तॖ मलगऺड्य तुलान तॖ गरॖ छु डांवाडोल गछ़ान। तवय छि  माहर्यॆनि वनान शान्दॖगऺन्ड्य तोतॖ ति। मगर असि पज़ि नॖ यि मऺशरावुन ज़ि माहर्यॆनि हॖन्द्य रूप छि महान आमॖत्य मानॖनॖ। माहर्यॆन यानि महा रऻनी, न्वष यानि नॊव बहार, लक्ष्मी, सरस्वती, अर्धांगनी, यश्यस्वनी, सृष्टी या मऻज्य। ब्यॊन ब्यॊन समयस प्यठ छि यि कूर खान्दरॖ पतॖ ब्यॊन ब्यॊन रूप दऻरिथ पनॖनिस बऻच़स सॗत्य गर-नाव चलावान तॖ अख वंश छु ब्रौंह ब्रौंह पकान रोज़ान। पनॖनिस रॗनिस छि यि ज़नान नखि डखि रूज़िथ तऺम्यसॖन्दिस द्वखस स्वखस मंज़ क़दम ताल बराबर थऺविथ पकान रोज़ान। पनुन पान, पनुन आराम मऺशरऻविथ छि पनॖनिस वऻरिव दऺरिस सीवा करान रोज़ान, पनॖन्यन शुर्यॆन कट्यन पालन-पोशन करान।  तिमन संस्कारन हॖन्ज़ ज़ऻन्यकऻरी दिवान रोज़ान।
मालिन दऺरिस सॗत्य छु ॳमिस ज़नानि खान्दरॖ पतॖ ति लगाव रोज़ान। विज़ि विज़ि अकार-बकार यिवान। ख्वश नसीब छि तिम यिमन सकारात्मॖ रूपस मंज़ पनॖन्य आश्यन छि लानि यिवान। कथ ज़ि जऻरी
**************************
"कंद्यव ग्रह कंद्यव वनवास
युथुयय छुख तॖ त्युथुय आस
मनस दऻर रठ सऻन्पनख सुवास
क्याह छुय मलुन सूर तय सास"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

07.09.2019

07.09.2019,भऻद्रप्यथ (भाद्र) ज़ूनॖ पछॖ (शुक्ल पक्ष) नवम (नवमी) बटॖवार (शनिवार/शनिश्चरवार)श्री सप्तर्षी सम्वत 5095, राश धनु(चलान),ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: दऺह दर दिन्य या हज़ार दर
         ॴखरथ
    अ: ॳकिस खऻरातस छु सासॖ-
          बॊद मुवाज़ मेलान
2. मु: दानॖ ब्यॊन तॖ पानॖ ब्यॊन
    अ: युस ब्यॊन द्राव तस छु नॖ
         गरॖ बऻच़न हॖन्ज़ फिकिर
         आसान
3. मु: दऺह छि दोस्त तॖ दऺह छि
         दुशमन
    अ: प्रथ मामलस मंज़ ख़बरदार
         रोज़ुन/सऻरी छि नॖ हमदर्द
         आसान/प्रथ कऻन्सि छि
         दोस्त ति आसान तॖ दुशमन
         ति आसान
4. मु: दानॖ मीरन ख्यॆयि कम जानॖ
         मीर
    अ: लंगर चलावन वऻल्य छि
         ॴखरस न्वकसान तुलान
5. मु: दांदन ख्यॆयि पतॖज पनॖन्य
         ख्यॆयन मंदॖज
    अ: स्व हर्कत करॖन्य यॆमि सॗत्य
         पानसॖय तक्लीफ़ वाति
**************************
1. अकलॖ बकल....Lose one's
             senses/Become
             confounded/Irri-
             tated
2. अकतऻजी....Fortyone
3. अकत्रॖह......Thirtyone
4. अकॖहऻठ.....Sixtyone
5. अकवुह......Twentyone
6. अकिलटि....Once upon a
                      time
7. अकॖनन्दुन....A loving son
8. अकि रंगॖ...Chips of same
             block/Of same
             shape
9. अख ब्याख.....Any one/
             Hardly anyone/
             Rare/A few
10. अख तॖ अख गव काह....
             Majority is authori
          ty/Union is strength
**************************
         गीता ज्ञान  :अध्याय 16
यथ लूकस दॊयि प्रकऻर्य मनुश्य आसान, दीव प्रकृच़ वाल्यन हॖन्ज़
स्यॆदी ज़ान। असुर खसलथ वनय
व्यस्तारॖ सान
वॊन भगवानन गीता ज्ञान
**************************
संस्कारन हॖन्ज़ कथ चि चलान। यज्ञोपवीत संस्कारॖ पतॖ छु मनुश्यस अख बॊड संस्कार प्यवान पूरॖ करुन, सु गव ॳम्यसुन्द खऻन्दर यानि न्यॆथॖर या व्यवाह या विवाह। अमि संस्कारॖ सॗत्य छु मनुश्य ग्रहस्त-आश्रमस मंज़ क़दम त्रावान। अथ आश्रमस मंज़ ॳच़िथ छु मनुश्य सॖन्ज़ि जीवन यात्रायि मंज़ रंगॖ रंगॖक बदलाव यिवान रोज़ान। वन्शुक व्यस्तार सपदान। शुर्य कऺट्य फॊलान-फूलान। गर्युक निज़ाम बदलान ति क्याज़ि ग्रहस्त-आश्रम छु दॊयव बऻच़व सॗत्य पकान। मर्द तॖ ज़नान। यि ज़नान छि कालॖ शामॖ ताम अख कूर आसान, य्वस माहर्यॆन बऺनिथ ब्यॆयिस गरस मंज़ यिथ पनुन माल्युन मऺशरऻविथ अकि नवि अनहारुक ग्वड बरान। ॳमिस माहर्यॆनि छि वारियाह कॖस्मॖक्य नाव प्यवान खान्दरॖ पतॖ अथ वऻरिव गरस मंज़ यिथ। दपान छि यि माहर्यॆन गऺयि गरिच ब्रांदॖकऺन्य माने यॊदवय यि ब्रांदॖकऺन्य स्यॆज़ बीठ तॖ गरॖस छु पोर पोर खसान तॖ गरॖ छु बॊड बनान तॖ यॊदवय यि ब्रांद कऺन्य हऺज्य बीठ तॖ गरस छु पोर पोर छॊनान तॖ गर छु वऺस्य प्यॆयि प्यॆयि ऒड रॊज़ान या रोज़ानॖय नॖ। यि छु असर ॳमिस माहर्यॆनि हुन्द वऻरिव गरस मंज़ पनॖन्य पाद त्रावन सॗत्य पऻदॖ सपदान। माने खान्दर छु अख स्यठाह महत्वपूर्ण संस्कार यिवान मानॖनॖ।  ॳम्यसॖय माहर्यॆनि छु दॊयिम नाव प्यवान न्वष। न्वषि हुन्द माने छु नव-बहार यानि गरॖच खुशी हुन्द स्रोत। न्वषि यॊदवय पनुन व्यवहार जान आसि गरॖ छु शादमान बासान, असवुन तॖ गिन्दवुन बासान। यॊदवय ॳमिस न्वषि पनुन तौर तऺरीकॖ, व्यवहार ठीख आसि नॖ, अथ गरस छि हिसॖ-बटऻय गछ़ान, छलॖ-छांगॖर गछ़ान, गरस मंज़ बऻच़ दॖयान रोज़ान तॖ द्वन बऻच़न ति पानवुन्य मुच़ुकरी रोज़ान। तनाव पऻदॖ सपदान। गरिक्यन ज़िठ्यन कॗन्सन अज़ाब वातान। न्वषि हुन्द स्वभावॖय छु गरॖच तस्वीर बनावान या बिगाडान। ॳमिस माहर्यॆनि हुन्द ब्याख नाव छु शान्दॖगऺन्ड्य तोतॖ ति। अम्युख बखान करव पगाह। कथ छि जऻरी
**************************
"सु मनॖ गारुन मंज़ यथ कंदे
यथ कंदि दपान स्वरूप नाव
लूब मॊह च़लिय शूब यीयय कंदे
यॆथ्य कंदि तीज़ तय सोर प्रकाश"
(सोर: सिर्यि/सोरुय/पॊज़/असली)
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

06.09.2019

06.09.2019,भऻद्रप्यथ (भाद्र) ज़ूनॖ पछॖ (शुक्ल पक्ष) ॴठम (अष्टमी) शॊकुरवार (शुक्रवार/ जुम्मा) श्री सप्तर्षी सम्वत 5095, राश धनु(रऻच़ हॖन्ज़ॖ 4.57 बजि प्यठॖ) ऋतु वर्षा (चलान)...अज़ छि गंगॖ ॴठम ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: दऺह गज़ ह्यॊर क्याह दऺह
         गज़ ब्वन क्याह
    अ: हिशी कथा बोज़ॖन्य
2. मु: दऺह बऻच़ काह ज़ऻच़
    अ: मिज़ाज ब्यॊन ब्यॊन/यॆलि
         नॖ सारिनी बऻच़न कुनी राय
         आसि
3. मु: दऺह चन्दस दऺह व्वंदस दऺह
         शान्दस
    अ: यॆलि नॖ कथ साफ़ पऻठ्य
         वनॖनॖ यी/प्रथकुनि चीज़ुक
         बराबर ख़याल रोज़ुन
4. मु: दारो कऺम्यु फाटनोवुख दॊप
         नस पनॖन्य प्वन्य
    अ: यॆलि पनॖनी न्वकसान वातॖ-
         नावन
5. मु: दानस प्यॆवतन पानस ख्यॆ-
         तन
    अ: रुत कांछुन/पानॖ ॴस्यतन
         बजाह
**************************
1. अग.....Knot/A joint (in a
               stem)
2. अगन बोट....Steamer
3. अगस्त पोश....Seasonal
           flower/Costly thing
4. अगर.....If/In case
5. अगाद....Vast/Lot of/
              Countless/Very
              deep/Tall/Very
              large/Hefty
6. अगुन....One fold/One
                  side
7. अकॖय लर....One sided
8. अख......One
9. अख नतॖ अख....Any one/
                            Some one
10. अख जोरॖ....Couple/Pair
**************************
        गीता ज्ञान  :अध्याय 16
दीव ज़ात मुक्ती हॖन्ज़ वथ प्रावान
असुर ज़ात मॊह ज़ालॖ वलनॖ यिवान
हे अर्ज़न च़ॖ छुख दीव ज़ऻच़ इन्सान
वॊन भगवानन गीता ज्ञान
**************************
यज्ञोपवीत संस्कारॖच कथ ॴस राथ चलान। कऻशिर्य बटन मंज़ छि अख धारना यि ज़ि यॊनि छ़ॖनॖनॖ सॗत्य छु मनुश्य दॊयिमिस ज़न्मस मंज़ अच़ान। कऻशुर बटॖ आसनॖच अख पहचान, अख प्रज़नथ छि ॳम्यसुन्द योनि। योनि छ़निथ छु यि मनुश्य पंडित तॖ ह्यॆकि कऺरिथ कर्मॖ-कांड। यज्ञोपवीत समाप्त सपदिथ छु यि मेखलि माहराज़ॖ ब्ह्मचऻरी वस्त्र कऺडिथ नऺव्य पलव लगऻविथ यारबल वसान तॖ पूज़ा कऺरिथ वापस गरॖ यिथ ग्वडॖ व्यूगिस प्यठ खड़ा गछ़ान। गरिचि ज़नानॖ छि हॆन्ज़यॆ कऺरिथ वनवान कॆंह मंत्र। यज्ञोपवीत तॖ मेखला छि ज़ॖ ब्यॊन ब्यॊन चीज़। हालांकि ॳस्य छि सऻर्यसॖय संस्कारस मेखला वनान मगर मेखल छि सु पन आसान यथ ॳस्य वनान छि ॴट्यपन। दपान छि ज़ि ॴट्यपन यॆमिस गऺन्डिथ आसि तऺमिस छु नॖ यऺड मंज़ ज़ांह गैस पऻद गछ़ान। मून्जी गासॖच रज़ बनऻविथ छु बनान ॴट्यपन मगर अज़कल छु अख मॊट पन यिवान लागनॖ ॴट्यपन बदलॖ। वारिहान कऻशिर बटस छु नॖ ॴट्यपन लऻगिथ आसान। चूंकि यज्ञोपवीत छु गायत्री या उपनयन संस्कार ति यिवान माननॖ। यि संस्कार छु अख महत्वपूर्ण संस्कार यिवान सानि ज़ऻच़ मंज़ मानॖनॖ।उपनयन मतलब छु ज़ि शिश्य ग्वरस नऺज़दीक अनुन। यि छु अख ज़्यूठ विषय इस्लिए दिमव यथ संस्कारस यॆती विराम।
**************************
"कंद्यव करख कंदि कंदे
कंद्यव करख कंदि व्यलास
भूगॖय मीठ्य दितिथ यथ कंदे
अथ कंदि रोज़ि नॖ सूर न तॖ सास"
(कंदि=शरीर)(व्यलास=कॗमती वस्त्र)
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

05.09.2019

05.09.2019 भऻद्रप्यथ (भाद्र) ज़ूनॖ पछॖ (शुक्ल पक्ष) सतम (सप्तमी) ब्रसवार (वीरवार/ ब्रहस्पथवार/गुरुवार), श्री सप्तर्षी सम्वत 5095,राश वृश्चिक (चलान),ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: ख़ाम तमाह तॖ अपज़्योर
  अ: लालची छु बदनियथ आसान
2. मु: खानॖ माज्यन तानॖ बागय
    अ: हक़दार शख्सन छु नॖ शूबि
         दार कॖस्मत आसान
3. मु: ख़ान बडा ख़ान बड़ा मंज़
         बाग च़ोचि ॳडा
    अ: यॆलि कऻन्सि नाव थॊद
         आसि अमापॊज़ खर्च करि
         म्वखसरय
4. मु:खऻकी फूकी गर्दि आसमऻनी
    अ: यॆलि कांह सऻर्यसॖय फ़ान
         कऺरिथ पऺथरिस लारि/यस नॖ
         कॆंह ति सूरथ रोज़ि
5. मु: ख़ानॖ मऻलिस नॖ कोज तॖ
         परज़्यन मुमिज़
    अ: गरिक्यन बऻच़न नॖ वातुन तॖ
         परद्यन साल करुन
**************************
1. अल...... Pumpkin
2. अलॖवान.....Pashmina
3. अलॖ वांगन...Pumpkin and
                       brinjal mix/
                To do something
4. अलमदत......Praise/Well
                       done
5. अलमास....Poison/Name
                      of a precious
                      stone
6. अलमबरदार....Head/Pro-
                tagonist/Chief
7. अलग...Separate/Alone/
                Aloof/Distinct/
                Detached/Apart/
                Alone/As under
8. अलग अलग... Individually
                Separately/One
              by one/Severally
9. अलाय बलाय.......Misfor-
               tune/Calamity/
               Disorder/Bad
               luck/Nonsense
10. अलाव....Fire/Trash/
                     Large fire
**************************
         गीता ज्ञान  :अध्याय 16
डूंग गुमंड क्रूद ब्यॆयि अज्ञान तिमन प्वरुशन हुन्द्य लक्ष्यन आसान।यिम असुर खऺसलथ ह्यथ पऻदॖ सपदान
वॊन भगवानन गीता ज्ञान
**************************
यज्ञोपवीत गव कऻशिर्य पऻठ्य मेखल। वेद भाषा मुतऻबिक छु मेखलि हुन्द मतलब स्व सद्-बुद्धि
यथ मंज़ ईश्वर-ज्ञान हऻसिल सपदिथ परमात्माहस ताम वातनावनॖच अख सऺही वथ मेलान छि। ॴट्य पन लागुन ति छु यॆमी संस्कारुक अख हिसॖ यिवान मानॖनॖ। यानि योनि तॖ ॴट्यपन छु मेखलाय हुन्द अख लक्ष्यन। दपान छि ॴट्यपन लागुन छु नॖ केवल कऻशर्यन बटनॖय ताम योत महदूद बऺल्कि छि पारसीयन मंज़ ति यि प्रथा चलान। ब्यॆयि अमि अलावॖ छि वनान ज़ि पारसीयस छि ममऻनियत कांह ति पवित्र किताब ॴट्य पन रॊस परॖन्य।ॴट्य पन रॊस ह्यकन नॖ तिम मन्दर गऺछ़िथ तॖ न ह्यकन कांह पाठ पूज़ा कऺरिथ। असि कऻश्यर्यन बटन छु नॖ म्यॆ बासान वारिहान ॴट्यपन लगावनुक आदत। यॊनि ताम ति छि कॆंह नासमज या अज्ञऻनी शुर्य हटि न्यबर थवान कऺडिथ युस अपशॊगुन छु यिवान मानॖनॖ। योनि छु असि त्र्यन ऋणन हॖन्ज़ याद पावान, अख पनॖन्यन पूर्वजन हुन्द ऋण, दॊयिम पनॖन्यन ऋश्यन हून्द ऋण तॖ त्रॆयिम देव ऋण।कऻशिर्यन बटन मंज़ छु मेखल संस्कार स्यठाह उत्म तॖ पवित्र संस्कार यिवान मानॖन। कथ छि जऻरी।
ख़बर आयि ज़ि श्री बन्सी लाल सफाया सऻबन युस फ़रीदाबादॖ बऺसिथ छु, ओस न्यमंत्रन द्युतमुत ततचि वैकुन्ठ मंडली वाल्यन यिमव तऺमिसॖन्दि गरि बजन कीर्तन कऺरिथ विनायक च़ोरम द्वह शोबायिमान बनोव तॖ शाम रहति खऻर पनॖन्यव लीलायव सॗत्य, बऻतव सॗत्य, तॖ बजनव सॗत्य। तमि पतॖ बऻगरोव सफाया सऻबन्यव प्रसाद बतॖ तॖ दमोलव वगैरा रूपस मंज़। बजाह रूज़िन सऻन्य शुर्य कऺट्य तॖ यिथय पऻठ्य रूज़िन पनॖन्य प्रज़नथ बनावान तॖ पनॖनि सभ्यतायि तॖ स़स्कारन रऻछ करान। वैकुन्ठ बजन कीर्तन मंडली छु म्योन शत शत प्रणाम
**************************
"कवॖ छुख दिवान अनिने बछॖ
त्रुखय छुख तॖ अंदरॖय अछ़
शिव छुय अती तय कुन मो गछ़
सऺहज़ॖ कथॖ म्यानि कऺर्यतव पछ़"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

04.09.2019

04.09.2019, भऻद्रप्यथ (भाद्र) ज़ूनॖ पछॖ (शुक्ल पक्ष) शॆयम (षष्ठी) ब्वदवार (बुधवार) श्री सप्तर्षी सम्वत 5095, राश वृश्चिक (रऻच़ हॖन्ज़ॖ 10.13 बजि प्यठॖ, ऋतु वर्षा (चलान)...अज़ छि कुमार शॆयम ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: खानॖदार गव थानॖदार
    अ: गर्युक ज़्युठ ह्यॆकि कऻन्सि
          ति रोबॖ दाब कऺरिथ
2. मु: खर किरायि तॖ ॴश्यनऻवी
         क्या
    अ: लेन-देनस मंज़ गछ़ि नॖ
         ॴश्यनऻवी अनॖन्य/कार
         बारस मंज़ गछ़ि नॖ कऻन्सि
         ति पच़ुन
3. मु: ख़जिलज़दस छु बराबरॖय
    अ: बदनाम नफ़र छु नॖ बद-
          नऻमी खॊच़ान
4. मु: खरॖ सुन्द मरुन छु हूनि-
         सॖन्ज़ शऻद्य
    अ: कऻन्सि हॖन्दि मरनॖ ब्यॆयिस
         फ़ऻयदॖ
5. मु: ख़रस बोर खरबचस अतॖ-
         गथ
    अ: अड्यन हकॖ तॖ अड्यन ना
         हकॖ
**************************
1. अलवॊंद..... Hanging
2. अलॖबऻन्य.... Plough
3. अलॖ पोश....Pumpkin
                      flower
4. अलॖ पलॖ.... Round about/
                 To some extent
5. अलॖ त्रंगॖर....Mess/Large
               family/Encumb-
               rance
6. अलॖ डलॖ..... Movement/
                       Motion
7. अलॖ सूद....Give and take
8. अलॖ शहर...Wilderness/
                     Law lessness
9. अलॖ किज....Curved piece
                 of wood used in
                 joining the parts
                 plough
10. अलॖमऻर्य..Almirah/Ward
                 robe/Cupboard
**************************
          गीता ज्ञान  :अध्याय 16
 हे अर्ज़न यिम छि सऻरी तिहॖन्द्य ग्वन, यिम दीव सम्पदा ह्यथ गऻमॖत्य उत्पन्
यिम सऻरी तिहुन्द लक्ष्यन ज़ान
वॊन भगवानन गीता ज्ञान
**************************
संस्कारन मंज़ अख महत्वपूर्ण संस्कार असि कऻशिर्यन मंज़ छु यज्ञोपवीत या मॆखला या उपनयाना। यिम छि अकी संस्कारॖक्य ब्यॊन ब्यॊन नाव।मान्यता छि ज़ि यि संस्कार करनॖ सॗत्य छु मनुश्य ईश्वरस नऺज़दीक वातान। विधि पूर्वक करनॖ सॗत्य छु साधकॖ सॖन्दिस मनस मंज़ अख शऻन्ती मेलान, ज्ञानॖच नज़र खुलान। मोक्ष द्वार छु मॖच़ॖरावनॖ यिवान्। मनुश्यसॖन्ज़ जीवन यात्रा सफ़ल सपदान। यज्ञोपवीत रूपी कुल्फॖच कुंज़ छु गायत्री मंत्र। च़ॊवह अछरन हुन्द यि मंत्र परनॖ सॗत्य छि ख्वश-नसीबी हॖन्ज़ि वतॖ यलॖ गछ़ान। यगोपवीत छु आसान त्रु-लॊर। गायत्री मंज़ ति छि त्रॆ चरण। "तत्सवितुर वरेण्यं"...ग्वडन्यु चरण "भर्गो देवस्य धीमहि"....दॊयिम चरण तॖ "धियो यो न: प्रचोदयात"...त्रॆयिम चरण। मानॖनॖ छु यिवान ज़ि यि गायत्री मंत्र छु कल्पॖ वृक्ष, यि पज़ि मनॖ मंगव ति छु मेलान। गायत्री छि पंचमुखी ति वनान। 1. ओम् 2. भूर्भुव:स्व: 3. तत्सवितुर वरेण्यम 4. भर्गो देवस्य धीमहि
5. धियो यो न: प्रचोदयात।
यि सोन शरीर ति छु पांच़व तत्वॖ सॗत्य बनिथ यानि म्यॆच़, पोन्य, हवा/वायु, नार/अग्न, आकाश।
गायत्री हॖन्दिस ग्वडनिकिस चरनस मंज़ रूज़िथ ब्रह्मा, दॊयिमिस मंज़ विष्णु तॖ त्रॆयिमिस मंज़ छु रूज़िथ महेश। यिम त्रॆ शक्ति छि गायत्री मंज़ बऺरिथ।
कथ छि जऻरी
**************************
"ओरॖ ति पानय योरॖ ति पानय
पानय पानस छु नॖ मेलन
प्रथम अच़्यस नॖ मूलय दऻनी
सुय हा मालि च़ॖय आश्च़र ज़ान"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नऺविव तॖ फॊलिव
 भूषण कौल "दीप"
(koshursabak.blogspot.com ति वुछिव)

03.09.2019

03.09.2019 भऻद्रप्यथ (भाद्र) ज़ूनॖ पछॖ (शुक्ल पक्ष) पऻन्च़म (पन्चमी) बॊम्वार (मंगलवार) श्री सप्तर्षी सम्वत 5095, राश तुला (चलान) ऋतु वर्षा (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: ख़रस खसनॖ नॖ मंदछुन तॖ
         खर खरॖ करनस क्याह
         मंदॖछुन
   अ:कांह चीज़ इस्तिमाल करनस
        नॖ शर्म यिन्य तॖ सु चीज़
        सम्बालनस क्वस शर्म छि
2. मु: खरन नर तॖ नरन खर
    अ: यॆलि नॖ मनॖ मुवऻफिक
          नफ़र प्यॆयि/ह्यिवस ह्यु नॖ
          प्यॊन/यॆलि ना-बराबर रून
          तॖ ज़नानॖ आसि
3. मु: खर पूतिस गुर्य पूत प्यॆठ-
         वऻन्य द्युन
    अ: यॆलि ल्वकचि कामि खऻतरॖ
          बॊड मुवाज़ॖ मंगनॖ यी
4. मु:खर क्याह ज़ानि ज़ऻफरानुक
         क़दॖर
    अ: ज़ानन वोलॖय छु चीज़ुक
         क़दॖर ज़ानान
5. मु: खर ह्यंग तॖ वूंटॖ नच़ुन
    अ: बऺल्य नाराज़ गछ़ुन या
          ज़िदस लायनॖ युन
**************************
1. अमऻनी....Casual/Official
               work done under
               contract
2. अमा.....In case/Beside
3. अमार.... Curiosity/Long-
                 ing/Desire
4. अमास..Extra fat/Obesity
5. अमापॊज़....In fact/But
6. अम्बार.....Big heap
7. अम्ब.....Mango
8. अमरूद.... Guava
9. अमर्यथ.... Nectar/The
              foods of the Gods
10. अम्बर..... Stack/Heap/
           Accumulation/Sky/
           Abundant/Ample/
           Clothes/Dresses
**************************
         गीता ज्ञान  :अध्याय 16
तीज़, ख्यमा, बाव सबॖर तॖ शुदी
ब्यॆयि नॖ कऻन्सि सॗत्य थावॖन्य दुशमनी
न पनॖनि बजरुक आसुन अबिमान
वॊन भगवानन गीता ज्ञान
**************************
 संस्कारन मंज़ छु अख संस्कार शुरिस विद्या दिनुक। च़ाटहाल शुर सोज़ुन ग्वडनिकि द्वह तॖ तति प्यठॖ गरॖ वापस अनुन छु यिवान अख संस्कार मानॖनॖ। शुरिस ग्वडन्युक वॊहरवोद धूम-धाम सान करुन ति छु अख संस्कार।  पतॖ प्रथ वऺरियि वॊहरवोद  मनावुन छि अख प्रथा बनान।  हालांकि अज़कल छु अख  वॊहरवोद त्रॆयव प्रकऻर्य यिवान मनावनॖ सु ज़न गव ज़ि अख वॊहरवोद छु  कऻशिर्य पंचान्गॖ हिसाबॖ। अमि द्वह छि जंत्री मंज़ लीखित जन्म-दिन पूज़ा यिवान करनॖ तॖ भगवानस प्रार्थना करान जीवन यात्रा सफल बनावनॖच। तऺहर यिवान बनावनॖ, तॖ तथ प्रेप्युन यिवान हावनॖ तॖ यिवान बऻगरावनॖ प्रसाद ज़ऻनिथ   ॳहलस-मऺहलस।प्रेप्युनुक अर्थॖ छु ब्यॆयिस वातनावुन तॖ त्युहुन्द ॴशिर्वाद रटुन। तऺहर छि पानस ख्यनॖ ब्रौंह च़ॊट क्षेत्रपाल रूपस मंज़ च़र्यन हार्यन ति यिवान त्रावनॖ। ।  चूंकि सऻनिस पंचान्गॖस मंज़ छु तिथि रावान तॖ लबान रोज़ान,सरकऻर्य यिहातन मंज़ छि प्रथा ईस्वी तिथि ल्यॆखनावनॖच।कऻशुर तिथि छु कमॖय पाहन सान्यन शुर्यन याद रोज़ान अल्बतॖ ईस्वी तऻरीख छु सारिनॖय याद आसान ति कयाज़ि दिन चऺर्याय मंज़ छु यिहऻय तऻरीख यिवान वरतावनॖ। यि छु अख ख़ास वजह ज़ि सान्य शुर्य छि ईसवी तऻरीखस प्यठॖय केक-वेक च़टान तॖ पार्टी जॆशिन मनावान।  यॊदवय पार्टी दिनस आसि नॖ वार व्यस्तार तॆलि छि कांह त्रॆयिम द्वह मुक़र्र कऺरिथ यि द्वह मनावान। हालांकि यिमन द्वन मॊकन छु नॖ सान्यन संस्कारन सॗत्य कांह लेन-देन। कऻशिर्य पंचान्गॖ तिथि छु संस्कार यिवान मानॖनॖ असली। कथ छि जऻरी
**************************
"गायत्रेय अज़पा छ़लॖ अकि तऻजिम
सूहम सतच़ी कऺरमस थफ
अहमस लॊत पऻठ्य ज़ठरॖय वऻजिम
ग्वरॖ कथ पऻजिम च़ऻजिम च़ख"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

02.09.2019

02.09.2019,भऻद्रप्यथ(भाद्र) ज़ूनॖ पछॖ (शुक्ल पक्ष) च़ोरम (चतुर्थी) च़ऺन्दॖरवार (सोमवार) श्री सप्तर्षी सम्वत 5095,राश तुला(रऻच़ हॖन्ज़ॖ 7.23 बजि प्यठॖ) ऋतु वर्षा (चलान)...अज़ छि विनायक च़ोरम ति
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
पांछ़ मुहावरॖ तॖ दऺह कऻशिर्य लफ़ज़ तॖ तिमन हुन्द अंग्रीज़स मंज़ तरजमॖ तॖ गीता जी मंज़ुक अख श्वलूक कऻशिर्य ज़बऻन्य मंज़ तॖ पनॖन्य कथबात
**************************
1. मु: द्वन ख्रावन प्यठ लथ
    अ: यॆलि कांह द्वन काम्यन ज़ंग 
         छ़ॖनि तॖ कांह ति पूरॖ ह्यॆकि
         नॖ कऺरिथ
2. मु: द्वन गाडन छॆनॖ थफ यिवान
    अ: अकि वख्तॖ छि अकऻय
          कऻम अंद वातान
3. मु: दहि वुहिर्य दशहार
    अ: स्व खुशी य्वस वारिहायि
         कऻल्य मेलि
4. मु: दऺहन थवान सय ॳकिस
         नॖ त्रावान वय
    अ: युस वारिहान काम्यन थफ
         छ़ॖनि तॖ ॳकिस ति वाति नॖ
5. मु: दय हय दी तॖ पोशख नॖ
         रटनस
    अ: यॆलि दय मॆहरबऻनी करि
          तॆलि छु फिर्य-फिर्य छ़ॖनान
**************************
1. अमर..... Immortal/Eter-
            nal/Deathless/Un-
            ending/Everlasting
2. अमन..Peace/Tranquility
              Security/Safety
3. अन्यर..... Blindness/
              Obsecurity/Folly
4. अमोल...Precious/Price-
              less/Costly/In-
              valuable
5. अनपड..... Illiterate/Un-
              educated/Unlett-
              ered
6. अन्यर आसुन...To be blind
7. अनथख.... Untiring/Deli-
                gent/Continuous
8. अमि वजह किन्य... For this
                                account
9. अमि मूजूब.... For this
                         reason
10. अमि म्वखॖ...For this
                        cause
**************************
        गीता ज्ञान  :अध्याय 16
यऺन्द्रयन विशयन हुन्द लगाव त्रावुन, शास्त्रस ख़लाफ़ नॖ कांह कार करुन, फ़ज़ूल तमाह तॖ ख्वऻहिश नॖ थावान
वॊन भगवानन गीता ज्ञान
**************************
स़स्कारन हॖन्ज़ कथ छि चलान। ब्याख संस्कार छु श्रान-स्वन्दर।अमि संस्कारॖ सॗत्य दपान छि शुरिस शुद्धी यिवान।ॳम्यसॖन्ज़ि माजि ति मेलान श्रान-वान कऺरिथ पानस शुद्धि। शुरिस छि नॊव पलव छ़ॖनान।शोख़ तॖ पुनसुन छु यिवान करनॖ यानि स्वन्दर छि यिवान करनॖ। अमि पतॖ छु ब्याख संस्कार यिवान करनॖ यथ वनान छि नामकरन करुन।अथ संस्कारस सॗत्य छु ज़ातॖकर्म या काहन्यॆथॖर ति यिवान करनॖ। वनॖनॖ छु यिवान ज़ि काहन्यॆथॖर करनॖ सॗत्य छु शुरिस पऺतिमि ज़न्मॖ निशि शुद्धी सपदान। यि संस्कार छु हिसाबन ज़्यनॖ पतॖ कऻह्यमि द्वह यिवान करनॖ अमापॊज़ यि संस्कार करनस छि वुछान वार व्यस्तार। हालांकि शास्त्र छु वनान ज़ि यॊत ताम नॖ शुरिस कांहन्यॆथॖर यी करनॖ तॊत ताम पज़ि नॖ बऻच़न द्वन संभोग करुन। अथ काहन्यॆथरस प्यठ छु मोल ग्यवस तॖ माछस मंज़ ॴडरिथ सलयि सॗत्य शुर्य सॖन्ज़ि ज़्यॆवि प्यठ ऒम् शब्द ल्यॆखान तॖ कनस तल ति छुस ऒम शब्द परान। ज़रॖकासय छु अख संस्कार ज़रूरी मानॖनॖ यिवान तिक्याज़ि अमि संस्कारॖ सॗत्य छु शुरिस यादाशतॖ बडान, द्यमाग़ तरोताज़ॖ रोज़ान। यॆलि शुरिस दंद ह्यवान छि यिन्य। अमि सातॖ ति छु यिवान खिर बनावनॖ, भगवानस मंगान ज़ि ॳमिस शुरिस गछ़ि नॖ कुनि कॖस्मुक कष्ट सपदुन दंद फटनस मंज़। यिम संस्कार छि स्यठाह महत्व थवान शुर्य सॗन्दिस बडनस मंज़। कथ छि जऻरी
*************************
"अंदर ॴसिथ न्यबर छ़ोंडुम
पवनन रगन कऺरनम सथ
ध्यानॖ किन्य दय ज़गि कीवल ज़ोनुम
रंग गव संगस मीलिथ क्यथ"
पऺरिव यि लल वाख ति
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)