08.08.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

---------------------------------

🙏🙏 नमस्कार माहरा

08.08.2022 श्रावनॖ (श्रावण) ज़ूनॖ पछॖ (शुक्ल पक्ष) काह (एकादशी)  च़ऺन्दॖरवार (सोमवार), श्री सप्तर्षि सम्वत 5098, नक्षत्र ज्येष्ठ, राव धनु (दुहचि 02.36 बजि प्यठॖ), ऋतु वऺहरात (वर्षा) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

बरादरस प्यव क्याहताम याद तॖ वॊनुन तीज़मालि ज़ि मऻजी अगर च़्यॆ ज़्वन आसी कऺशीरि मंज़ ॴस नॖ जायि हॖन्ज़ व्यछ़य। कांह पॊछ़ यॊदवय ॳकिस द्वन रऻच़न बापथ ति यिवान ओस परेशऻनी ॴस नॖ कुनि कॖस्मॖच गछ़ान। कुनि ति कुठिस मंज़ कुनि ति कूनस मंज़ वाहराव्यो गब्बॖ फरदा, तंथ प्यठ वाहराव्यो नॊव या द्वबि-द्राव करॖच तॖ दिच़ेयोस शान्दॖगॊन्डा साफ़ छऺज्यमॖच़ वूरा तऻरिथ। प्यठॖ त्रावेयोस वुरुन मौस्मॖ हिसाबॖ याने लेफ, कमॖल्य, च़ादर, खेश या ब्यॆयि कॆंह तॖ पॊछ़ ओस श्वॊंगान। तीज़मालि वॊन बरादरस ज़ि हत्बा पऺछ़िस हाबा छि वुनि ति त्युथुय वरताव यिवान करनॖ मगर यॆति हाबा छि ज़ायि हॖन्ज़ व्यछ़य। जायि छ़ॊचर आसनॖ म्वखॖ छु पऺछ़्यसुन्द रातस  प्यठ युन म्यॆ वुछमय ग्वबान ह्यु। प्यठॖ अगर पऺछ़िस कांह पछ़लोव ति सॗत्य आसि। गरिक्यन बऻच़न छि पऺन्य डलान यि सूंचिथ ज़ि कुस कतिनस श्वॊंगि। फ्लैटन मंज़ छि ब्यडव ग्वडय जाय रऺटमॖच़ आसान। सौफॖ, कुर्सी, मेज़, अलमारि कुठ्यन मंज़ आसनॖ म्शखॖ छॆ नॖ काह जाय मॊकॖज आसान यॆतिनस आमुत्त नफ़र ह्यॆकि श्वॊंगिथ। बरादरन वॊन तीज़मालि ज़ि मऻजी अथ दपान छि पऺछ़िस पॊछ़ खरान । तीज़मालि कॊर जुम्लॖ पूरॖ यि वऺनिथ ज़ि दपान खानॖदारस द्वश्यवय। बरादरन वॊन असान असान तॖ खानदारिनि त्रॆश्यवय। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव  podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)