02.08.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

02.08.2022 श्रावनॖ (श्रावण) ज़ूनॖ पछॖ (शुक्ल पक्ष) पऻन्च़म (पंचमी) बॊम्वार (मंगलवार), श्री सप्तर्षि सम्वत 5098, नक्षत्र उ.फा, राश कन्या (चलान), ऋतु वऺहरात (वर्षा) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

पनॖन्यन ख़यालन द्यू व्वंय च़ॖ फ्युर, कुस कडान अज़कल त्वमलस छु स्युर। रऺडीमेड च़ऻरिथ मेलान ब्यॆयि कनॖ कम। दम करुं दम करु दमॖ काका दम। ऒंगजि थफ कऺरिथ कति शुर्य व्वंय पकान, ज़ॖ क़दम कडान याम तिम छिय थकान। तिमन गछ़ि ग्वडॖ प्यठय आसुन टम टम। दम करुं दम करु दमॖ काका दम। कति तिम पान्छ़ शॆ ॴठ नव शुर्य, अज़ यिमन अख ज़ॖय, तिमन ति खुर्य। फ़ीस वीस बऺर्य बऺर्य पेरैंट बरहम। दम करुं दम करु दमॖ काका दम। वाह वाह मऻजी। मज़ॖ आव बोज़ान बोज़ान। बरादरन वॊन तीज़मालि। यि बऻथ कयाज़ि प्यॊय च़्यॆ याद अज़ मऻजी। ॳज़्युक वख वुछिथ हाबा प्योम पनुन सु पॊतकाल याद। तीज़मालि वॊन बरादरस। नरकऺन्य क़लम अनॖन्य, गरॖन्य, स्यफ अनॖन्य, मीलॆन्दुरस मंज़ स्यॆपि मील बनावॖन्य तॖ दोजि प्यठ लेखुन। दूज छलॖन्य, ह्वखॖनावॖन्य तॖ मॊहरॖ रोज़ुन दिवान तॖ पतॖ गऺयो तथ प्यठ लेखुन। अकि तरफॖ अंग्रीज़ लेखुन तॖ दोयिमि तरफॖ ह्यॆन्दी या उर्दू। लेखुन हिसाबॖक्य सवालॖ हल करनॖ बापथ ओस यिवान स्लेट इस्तिमाल करनॖ यथ प्यठ चाकॖ सॗत्य या स्लेट-पैन्सिलॖ सॗत्य यिवान ओस लेखनॖ। बरादर गव बोज़ान तॖ ओस ज़न पनॖनिस ल्वकचारस छ़ॏन्ड दिवान। मऻजी तिम दॊह नय यिन नॖ ब्यॆयि फीरिथ। आहनबा वुनि नय म्यॆ वॊनुय कॆंह। वलॖ व्वंय चमव म्वगॖल्य च़ाय तॖ छ़िरॖ च़ॊट। पतॖ दिमव ब्यॆयि फ्युर मज़दार कथन। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

*****************"****

नऺविव तॖ फॊलिव

भूषण कौल"दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दस्य ति)

https://anchor.fm/bldeep

(यि सबक़ वुछिव  koshursabak.blogspot.com प्यठॖ तमि)