07.08.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

-----------------------------------

🙏🙏 नमस्कार माहरा

07.08.2022 श्रावनॖ (श्रावण) ज़ूनॖ पछॖ (शुक्ल पक्ष) दऺहम (दशमी) आथवार (रविवार/ऐतवार), श्री सप्तर्षि सम्वत 5098, नक्षत्र अनूरा, राश वृश्चिक (चलान), ऋतु वऺहरात (वर्षा) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

तीज़मालि वॊन बरादरस ज़ि म्यॆ हाबा छु याद प्यवान ज़ि कऺशीरि मंज़ यॊदवय कांह लऻज़िम पॊछ़ यिवान ओस गरिक्य सऻरी बऻच़ ॴस्य पऺछ़्य लऻज़्य मंज़ लगान रोज़ान। कूशिश ॴस्य करान ज़ि कुनि कॖस्मॖच कऺमी गऺछ़ नॖ खऻतिरदऻरी मंज़ रोज़ॖन्य। बतॖ ख्यावनॖ विज़ि ओस पऺछ़िस यिवान अथॖ चिलम्ची मंज़ स्वरशावनॖ। तौलिया तॖ साबन ह्यथ ओस नफ़र व्वदॖन्य रोज़ान। बतॖ थाल ब्रोंंह कनि थऻविथ ॴस गरॖच यॆज़मनबाय या यॆज़मन थलि थलि मुलर गऺंन्न्डिथ वुछान रोज़ान यॊत्ताम पॊछ़ ओस बत्तॗ ख्यवान रोज़ान। बत्तॖ ख्यवान ख्यवान ॴस्य दहि लटि प्रॖछ़ान रोज़ान यि ह्यॆयिव, हु ह्यॆयिव, म्योन मरुन छुय, म्यऻन्य द्रॖय छय, बत्तॖ आसिवॖ यख गोमुत, गर्म बत्तॖ फॊल ह्यॆयिव वगैरा वगैरा। बत्तॖ ख्यथ गऺये ब्यॆयि सॊय प्रक्रिया दॊहरावॖन्य याने चिलम्ची मंज़ अथ छलनावुन, तौलियायि अथॖ व्वथॖरावुन। पॊछ़ ओस तृप्त गछ़ान यि मॆहमान नवऻज़ी वुछिथ। बरादरन वॊन तीज़मालि ज़ि मऻजी अज़कल छु सऻर्यसी बदलाव आमुत। न छि व्वंय अथय चलनावान तॖ न स्व कस्मॖ कस्मय यिवान करनॖ। अज़कल छि नज़ाकत आमॖच़। व्यलायती हाव-बाव छु यिवान वरतावनॖ। डाईनिंग टेबुलस प्यठ यिवान पऺछ़िस ख्यावनॖ। सारेय ज़ियाफतॖ छि यिवान थावनॖ मेज़स प्यठ तॖ पऺछ़िस यी मन करि ती पानय तुलान रोज़ान पनॖनि मर्ज़ी मुतऻबिक। कऺशीरि हॖन्ज़ स्व परम्परा गऺयि गऻबॖय। स्व दरॖ दरॖ करॖन्य प्रथा म्वकलेयि व्वंय। तीज़मालि वॊन बरादरस ज़ि कऺशीरि मंज़च़ि पऺछ़्य-लऻज़्य मंज़ हाबा ओस आसान अलगॖय मज़ॖ। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)