05.08.2022

नमस्ते शारदे देवी काशमीर पुरवासिनि त्वामहं प्रार्थये नित्यं विद्यादानं च देहि मे

----------------------------------

🙏🙏 नमस्कार माहरा

05.08.2022 श्रावनॖ (श्रावण) ज़ूनॖ पछॖ (शुक्ल पक्ष) ॴठम (अष्टमी) शॊकुरवार (शुक्रवार/जुम्मा/भार्गववार), श्री सप्तर्षि सम्वत 5098, नक्षत्र स्वाति, राश तुला (चलान), ऋतु वऺहरात (वर्षा) (चलान)

**********************

त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**********************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**********************

वारियाह कालस रूद बरादर दरवाज़स ठुख-ठुख करान दरवाज़ॖ मुच़रोव नॖ कऻन्सि। बरादरन सूंच ज़ि शायद मा आसि तीज़मालि न्यॆन्दॖर प्यॆमॖच़ तवय छॆ नॖ बर मुच़ॖरावान। बरादरन ज़ोन मुनऻसिब वापस नेरुन तॖ च़ीर्य पाहन ब्यॆयि युन। गन्टॖ द्वयि गन्टॖ पतॖ आव बरादर तॖ कॊरुन ठुख ठुख तॖ तीज़मालि मुच़ॖरोवुस दरवाज़ॖ तॖ कॊरनस नमस्कार। नमस्कारस द्युतनस नमस्कारॖ सॗत्य जवाब तॖ प्रुछ़ बरादरन तीज़मालि ज़ि मऻजी च़्यॆ ॴसॖय गऺन्य न्यॆन्दॖर प्यॆमॖच़ शायद तवय आसी नॖ म्योन ठुख ठुख बूज़मुत। हय क्याहबा छुख वनान। च़्यॆ छयना ख़बर ज़ि म्यॆ छु सुलि न्यॆन्दरि व्वथनुक आदत। च़्यॆ करबऻग्य कॊरुथ ठुख ठुख। गन्टॖ डॏड गन्टॖ ब्रोंठ आयोस मऻजी मगर बर ओस बंद तॖ वारियाहस कालस ठुख ठुख कऺरिथ द्रास वापस तॖ सूंचुम पतॖ पाहन यिमॖ।  अछा गव च़ॖ ओसुख आमुत ग्वडॖ। आहनी मऻजी  च़ॖ कति ॴसॖख अगर श्वॊंगिथ ॴसॖख नॖ। बरादरन प्रुछ़नस। हत्बा बॖ ॴसॖस श्रान करान त्यॆलि तमि सातन। तीज़मालि द्युतनस जवाब। बॖ हाबा छस गरि गरि सोंचान ज़ि कुन लगि नॖ कुनि। सऻथी आसुन छु ज़ॊरूरी। जान छु नाकारॖ छु, दोद छु दाग़ छु, कुन ज़ॊन क्याह करि। कॊत वाति। कस वनि क्याह वनि। बरादरन वॊन तीज़मालि कथ च़टान च़टान ज़ि च्योन वनुन हय छु पॊज़। सऻथी आसुन छु लऻज़्यमी। अख तॖ अख गव काह। वख अख ओस यॆलि दारि बर रहि-रास यलॖ ॴस्य आसान मगर वंख गव युथ सख़ ज़ि व्वंय छि दारि बर त्रॊपरिथ बिहिथ आसान। ग्वडॖ ॴस्य गरॖ बऺड्य बऺड्य तॖ बऻच़व सॗत्य बऺरिथ आसान अज़कल गऺयि गरॖ ल्वकॖट्य तॖ बऻच़ छ़ॊकेयि। तीज़मालि बऺर हऻमी बरादर सॖन्दिस वनॖनस तॖ प्यॆयस कॆंह प्रऻन्य कथॖ याद। कथ छि जऻरी 

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव  koshursabak.blogspot.com प्यठॖ तमि)