01.05.2021

01.05.2021, वह्यक (वैशाख/ बैसाख) गटॖ पछॖ (कृष्ण पक्ष) पऻन्च़म (देवादेव) (पऺचमी) (देवादेव) बटॖवार (शनिश्चरवार/ शनिवार) श्री सप्तर्षि सम्वत 5097, नक्षत्र मूल, राश धनु (चलान) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*************************"

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            नुंदॖ रॆशॖन्य श्रुक्य

यॆम्य ह्यॊत तिहॖन्दि बरतलॖ ज़ागुन

तस पनॖन्य शरबत पानॖ च्यावे

छिस पऻथॖर ब्यॊन ब्यॊन अकुय छु मागुन

सु यस टोठि तॖ सुय अदॖ प्रावे

           अर्थात

युस दय द्यानस मंज़ थ्यर रोज़ि तस च्यावि सु पनॖन्यव अथव असलुक म्वय। सु दय छु कुनुय मगर ब्यॊन ब्यॊन रंगव छु तम्बॖलावान। यस बऺख्तिस सु टोठि , सुय प्रावि तस

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              **********

1. वाज़वान (Cooked food/Kitchen)

2. वासॖ दीव (Epithet of Lord Krishna)

3. वाश कडुन (To stretch/To lie down/To rest/To relax

4. वाज़ परुन (To preach/To provide advice/To deliver sermon)

5. वाक़ा (To be situated)

              मुहावरॖ

1. मु: स्वनस बोश कनस तल

    अ: प्रथ कुनि चीज़स छु पनॖनि

         जायि सऺही बजर

2. मु: स्वनॖ रॊपॖ कनि छुय 

         ताराचन्द

    अ: छऺलिथ तॖ छॊकिथ, या, 

         ह्यनॖ दिनॖ वरऻय

3. मु: स्वन्दरि हॖन्दि शान्दॖ

    अ: मस मगन आसुन, या, 

         कुनिच नॖ खबरॖय आसॖन्य

        (पनॖन्य शुर्य ह्यॆछॖनऻव्यूख)

**************************

पंचान्ग :- सोंचान छुस बॖ खारॖ कस तखसीर, कऺम्य बदलऻव सानि वतनॖच यि तस्वीर। गरि कऺडिन तॖ परि आयि ह्यनय, शबनम प्यव गुलन कलॖ कडनय। फऺक्य गऺयि सऻरी सऻन्य तदबीर, खोफ़ज़द गव नुंदॖ ऋयॊष तॖ ऋषि पीर। थरॖ थरॖ च़ायि यॆति पनॖवऺथरन, यलॖ गऺयि दऺर्याव लोलॖ चॆशमन, बऻयिस ब्यॆनि रऻव माजि रोव वीर, क़हर वॊथ आलमस ओस युस बे-नज़ीर। महामऻरी छि ऒरूजस प्यठ, रुकनुकॖ नॖ नाव ह्यवान, ॳकिस ॳकिस गिलविथ निवान। कऻशुर बटॖ छु वैसे ति त्वमुलस मंज़ कनस बराबर। यिमन मंज़ ति मूद्य कॗत्य तॖ रूद्य कॗत्य। अजय लिदू-हस क्वस हालथ आसि गऻमॖच़, यॆमिस मोल गव स्वर्गवास तॖ त्रॆयि च़ोरि गन्टॖ पतय गऺयस मऻज्य ति यॆमि सम्सऻर्य। मऻलिस माजि हुन्द सायि कलॖ प्यठॖ व्वथुन कॆंच़न गन्टन मंज़ॖय, यि गव पऺज़्यपऻठ्य प्रलय। यिथय पऻठ्य गऺयि मोती लाल कौल "नाज़" सऻबॖन्य आश्यन स्वर्गवास ब्रिंज़िस मंज़ वुछान वुछान। ब्यॆयि ति यिम अमि महामीरी रऺट्य, ग्रंद करॖन्य छि मुश्किल। बोज़ान छि मगर वऺनिथ छिनॖ ह्यकान, वुछान छि मगर कऺरिथ छिनॖ ह्यकान कॆंह। महामऻरी थऺव नॖ असि कॆंह करनॖच सुरथॖय। ज़ानि दय कॊत ताम छु ब्यॆयि बूगुन यि त्रटॖबुज़ुन। पनुन पान छु बचावुन। ज़ॖ मास्कॖ लऻगिथ न्येरुन न्यबर सुति यॆलि मजबूरी न्येरनॖच आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन, खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन, बुज़र्गन हुन्द ह्यस थावुन, माजि शारिकायि शर्ण गछ़ुन तॖ तऺमिस अनुग्रह मंगुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot. प्यठॖ ति)

30.04.2021

30.04.2021, वह्यक (वैशाख/ बैसाख) गटॖ पछॖ (कृष्ण पक्ष) च़ोरम (चतुर्थी) शॊकुरवार (शुक्रवार/जुम्मा/भार्गवार) श्री सप्तर्षि सम्वत 5097, नक्षत्र ज्येष्ठ, राश धनु (दुहचि 12.07 बजि प्यठॖ),ऋतु बसंत (चलान)...अज़ छि संकट च़ोरम (संकट निवार्ण चतुर्थी) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

            नुंदॖ रॆशॖन्य श्रुक्य

व्वंदॖनय गऺन्ड्यिज़ि तॖ कऻम कति नेरे

वॆह नय खॆज़ि स्रॆह कति फेरे

योरॖ नय गऺछ़्यज़ि तोर कॊत यीज़े

लूब नय आसि तॖ वॊन कति यिये

              अर्थात

तऺहया कऺरिथ यॊद नॖ मन गंडस मंज़ रटनॖ यियि तॆलि कति प्रावहोन दय। तसॖन्दिस लोलस मंज़ यॊद नॖ दिल लोलॖ व्यॆह महसूस करि, तसुन्द श्रॆह रूप ज़ख्मन दग कति करि महसूस। यॊद नॖ ज़ीव मरि ज़न्म कति ह्यॆयि तॆलि, यॊद नॖ दय लोलॖच कामना दिलस मंज़ आसि, दय कति लबहोन तॆलि।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ***********

1. वार (Suitability/Appropriateness/Day of a week)

2. वारय (All right/Right)

3. वारॖ वारॖ (Slowly/Gradually)

4. वारियाह (Many/Much/Most/Excessive/Enough/Sufficient/Plentiful/Abundant)

5. वाज़ॖ (Cook)

                मुहावरॖ

1. मु: स्वदामुन सॊत फॊल

    अ: ग़रीब सुन्द कम छु ॳमीर

         सॖन्दि सासॖ ख्वतॖ जान

2. मु: सॊमिस सॊम न्यामथ तॖ 

         बॆ-सॊम क़यामथ

    अ: ह्यियिस ह्यु छु सजान तॖ 

         बॆ-हिशरन छि ठोंसॖ ठोंस

         रोज़ान

3. मु: सूर मऺथिथ च़ूरॖ जमाथ

    अ: स्व बदमाश जमाथ यथ नॖ

         नन्यर गोमुत आसि

     (पनॖन्य शुर्य ह्यॆछॖनऻव्यूख)

**************************

पंचान्ग :- सोंचान छुस बॖ खारॖ कस तखसीर, कऺम्य बदलऻव सानि वतनॖच यि तस्वीर। सोरुय आलम छु गोमुत अज़ गीर, सीनस लगान छि तीरन प्यठॖ तीर। मसलॖ सऻरी रूद्य फॊतिस तलॖ। बस कुनुय मसलॖ वुन्यक्यनस छु ज़ि यथ महामऻरी कर लगि थख तॖ ॳस्य सऻरी त्रावॖहऻव फ्रख। मोत छु वुन्यक्यनस ताण्डव करान। बे-आर बऺनिथ निवान ॳकिस ॳकिस गरव मंज़ॖ कऺडिथ। शुमशानन मंज़ छॆ नॖ जाय म्वकॖज्य म्वर्दन दाह दिनस, अस्पतालन मंज़ छॆनॖ जाय मॆलान ब्यमारस, ब्यडन हॖन्ज़ व्यछ़य छि। शाह ह्यॊन छु अड्यन मुश्किल तॖ ॵक्सीजनॖच छि व्यछ़य। अड्यन छुनॖ दवाह बाज़रस मंज़ मेलान। प्लाज़मा मेलनॖ बापथ छि कॆंह छ़्रटॖ छ़्रठ करान। टी वी चन्नलॖ छि स्यठहॗय भयानक खबरॖ हऻव्य हऻव्य कमज़ोर दिलॖ वाल्यन फ्रटतम करनावान। इन्सान कॊताह ख्वदग़र्ज़ छु अज़ बन्योमुत ज़ि लूख छि यसलॖ मरान मगर सऻन्य ब्यगऻरत सियासतदान छि ज़ुव च़टान पनॖन्य कुर्सी बचावनॖ बापथ। चुनाव छु तिमन बासान ज़्यादॖ ज़रूरी मरनवाल्यन बचावनॖ ख्वतॖ। पनॖन्य रऻछ छि असि पानय करॖन्य। ज़ॖ मास्कॖ लऻगिथ न्येरुन न्यबर सुति यॆलि मजबूरी न्येरनॖच आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन, खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन, बुज़र्गन हुन्द ह्यस थावुन, माजि शारिकायि शर्ण गछ़ुन। हलम दऻर्य दऻर्य तऺम्यसुन्दुय अनुग्रह मंगुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

29.04.2021

29.04.2021, वह्यक (वैशाख/ बैसाख) गटॖ पछॖ (कृष्ण पक्ष) त्रय (तृतीया) ब्रसवार (ब्रहस्पतिवार/ गुरुवार/वीरवार)श्री सप्तर्षि सम्वत 5097, नक्षत्र अनुं, राश वृश्चक (चलान), ऋतु बसंत))(चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

          नुंदॖ रॆशॖन्य श्रुक्य

यामथ नॖ तफ ज़फ क्रॆशी

तामथ नॖ ग्रंज़ द्वह मंज़ च़ाव

यामथ नॖ सऺहिथ अन तवॖ प्रॆशी

तामथ सु ऱॆश्यतोन कति आव

              अर्थात

यॊद नॖ तसॖन्दि दर्शनॖच कामना करख तॆलि कति यियि सु अथि। युथुय हे ज़ीवॖ तप ज़फ रूप कमऻय करख, तिथुय आसि स्वयं गऺर यॆलि च़ॖ दय पूज़ि हॖन्ज़ि ग्रंज़ मंज़ अच़ख। यॊद बरदाशतॖ करनुक मादॖ सपदी नॖ पऻदॖ, पनुन वॊजूद गछ़ी लूपस। पतॖ कति रोज़ी ऱयॆश्यॖतोन यॆलि नॖ तऺस्य सॗत्य मस आसख सपदमुत।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            *********

1. वादवाद (Arguments/Haughtiness/Impudence)

2. वादवाद करुन (To argue continuously)

3. वादॖ (Promise/An agreement/Assurance)

4. वादॖ थवुन (To keep a promise)

5. वादॖ ख़लऻफी (To break promise/Going back to one's word)

             मुहावरॖ

1. मु: सोज़न बोज़ि इशारॖ सॗत्य 

         कोज़न बोज़ि नॖ दमालि 

         सॗत्य

    अ: गाटॖलिस छु इशारॖ कऻफी

2. मु: सोरुय छु दूर तॖ मरुन छु

         नऺज़्यदीख

    अ: मोत ह्यॆकि कुनि ति सातॖ

         यिथ

3. मु: सोरॖ रग मेलि वोरॖ रग 

         मेलिनॖ

    अ: वोरॖ मऻज्य ह्यॆकि नॖ लोलॖच

         रग ॴसिथ

      (पनॖन्य शुर्य ह्यॆछॖनऻव्यूख)

**************************

पंचान्ग :- महामऻरी नी कम कम वीर, ॳस्य छि बेबस, बेकस तॖ बेपीर, कर सबीलॖ सोन ॳस्य शर्ण च़्यॆ आये, महा गणेशा ॳस्य बिहिथ छि च्यानि शाये, थव च़ॖ बखतन प्यठ पनुन साये। म्यॆ प्यवान याद शोले फिल्मि हुन्द सु सीन यॆतिनस धर्मेन्दर छु इशारॖ सॗत्य संजीव कुमारस दपान ज़ि पानस ब्रोंहकनि प्यॊमुत बॊंदूक पिलनाव मगर संजीव कुमार छुनॖ ह्यकान ति कऺरिथ ति कयाज़ि तस सॖन्ज़ॖ दॊश्यवय नरि छि आसान च़चिमच़ॖ गबरसिंहगन। तिथय पऻठ्य छि यथ महामऻरी मंज़ ॳस्य नरि च़ऺट्य ह्यि। सिरिफ बोज़ानॖय योत मगर वऻतिथ नॖ ह्यकान। वुछानॖय योत मगर कऺरिथ नॖ ह्यकान कॆंह। वदनस ति छुनॖ वार या व्यसॖतार। व्हाटसापन प्यठ छि कॆंह फ़ोन नम्बर ओरॖ योर करान रोज़ान यिमव दऺस्य ब्यमारन ब्यड मेलनॖच या ॵक्सीजन मेलनॖच व्वमेद छि बासान मगर दिल छु शिठान याम पताह छु लगान ज़ि तिम फ़ोन  नम्बर छिनॖ कऻम करान। मरनवाल्यन हॖन्ज़ तेज़ रफतार वुछिथ छु प्रथ इन्सान खौफज़द गोमुत तॖ त्रऺहर्योमुत। कोविड छु बऺर्यन्यव तॖ च़ॖरन्यव मंज़्य ॳच़िथ गरॖक्यन बऻच़न प्यठ हमलॖ करनस मंज़ मशगगूल तॖ लूख छि थऺविथ पनुन पान दूर दूर। ज़ुव छु टोठ सारिनी। सऻरी छि यमस निशि छ़्यफ दिथ बिहिथ मगर यम छु ॴखॖर यम। बखशान छुनॖ कऻन्सि। कांह मंत्र, कांह यंत्र, कांह तंत्र छुनॖ वुन्यक्यनस कारामद सपदिथ। बस पुशॖरोवमुत पान तस निराकारस युस यथ ब्रह्मांडस छु पकनावान। पीर फकीर साद संत छि सऻरी पर्दन तल बिहिथ यि प्रलय वुछान तॖ कॆंह नॖ करान। असि छि पनॖन्य ह्यफाज़थ पानॖ करॖन्य, ज़ॖ मास्कॖ लऻगिथ न्येरुन न्यबर, सुति यॆलि मजबूरी न्येरनॖच आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन, खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन, बुज़र्गन हुन्द ह्यस थावुन तॖ माजि दीवी शर्ण गछ़ुन तॖ तऺमिस अनुग्रह मंगुन। कथ छि जऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

 नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

28.04.2021

28.04.2021, वह्यक (वैशाख/बैसाख) गटॖ पछॖ (कृष्ण पक्ष) द्वय (द्विती) ब्वदवार (बुद्धवार) श्री सप्तर्षि सम्वत 5097, नक्षत्र विशा, राश वृश्चक (दुहचि 11.56 बजि प्यठॖ) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

बुहॖ बयि सुत तॖ शरदार त्रोवुम

सऻर्य वुम्बरि छऻवॖम अकॖय कऻन्थ

सहज़ॖ ज़लॖ यॆलि शरीर नोवुम

बिहिथ सऻर कॊरुम एकांथ

          अर्थात

सम्सऻर्य शुर्य, बब-मऻज्य तॖ बयि त्रऻविथ सारिय वुम्बरि स्वरुम ॳक्य सुन्दुय नाव। दय ज्ञानॖ रूप ज़लॖ कॊरुम शरीर श्वद तॖ पाक। यॆमि किन्य गरि बिहिथॖय कॊरुम सऻर्यसॖय ब्रह्मांडस सऻर

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. वाठ (Connection/Combination/Addition/Match/Link/Relation/Joint)

2. वाटॖदार (With joints/Seamy/Joined)

3. वाटॖनावुन (To get fixed/To affix/To unite)

4. वाटनगॊर (Orthopedition/Bone fixer)

5. वाद (Argument/Arrogance/Inscient talk)

               मुहावरॖ

1. मु: स्वकार क्वकार तॖ पानस

         बकार

    अ: रुत करनस छु रुत फल तॖ

         नाकारस नाकारॖ

2. मु: सोंतॖ सुली तॖ हरदॖ ब्रोंठॖय

    अ: वख्तॖ ब्रुंहॖय

3. मु: सोरुय  छु मऺल्य कथ छि

         मुफुत

    अ: कथ करनस छु नॖ कांह

         ठाक,या, कथ करॖन्य छि

         मुफुत

      (पनॖन्य शुर्य ह्यॆछॖनऻव्यूख)

**************************

प़चान्ग :- कथ बाथ कऺर्यतवॖ खुलॖ डुलॖ पानवुन्य, क्याह पताह कल हो न हो। ॳस्यतव गिन्द्यतव हिकटाह कऺर्यतव क्याह पताह कल हो न हो। हालथ छि बदॖ ख्वतॖ बद्तर। यॆमि हिसाबॖ वुछान छि ज़ि फलऻन्य गव स्वर्गवास, फिस्तऻनिस छुनॖ ब्यड मेलान, यॆमिस गव शाह खारुन वालुन मुश्किल, हुमिस छुनॖ ॵक्सीजन सिलैंडर मेलान। बोज़नस तल आव ज़ि ब्यमारन छि व्वंय अस्पतालव प्यठॖ वापस गरॖ सोज़ान यि वऺनिथ ज़ि न छु यॆति ब्यड तॖ न छु व्वंय यथ ॶस्पतालस मंज़ ॵक्सीजनॖय। सुबहॖ प्यठॖ शाम ताम छि यिहऻय ख़बरा च़्वापऻर्य ज़ि फलऻन्य जायि फलऻन्य मूद। च़ठ तॖ फ्रठ छु गोमुत लूकन। हऻरान छि कॆंह लूख यि वुछिथ ज़ि यॆलि यि महामऻरी छि वुन्यक्यनस व्वबहॗकिस रूपस मंज़ नच़ान, लूख छि मरान यसलॖ, शुमारॖ रॊस, यिमन आई पी एल क्रिक्यट खिलार्यन छु ना ज़रॖ ज़रॖ ति गछ़ान यि मोतुक मार बे-आर पऻठ्य वुछिथ? सऻर्यसॖय ज़गतस मंज़ छु यि दऺप्यज़ि ति मातम तॖ सोन टोठ वतन ति छु अमि मातमुक अख अहम हिस्सॖदर ति क्याज़ि यथ मुल्कस मंज़ छि मरनवाल्यन हॖन्ज़ सख्या स्यठाह ज़्यादॖ दॊयम्यव मुलकव ख्वतॖ। करोरबॊद रॊपियि छु यिमन आई पी एल खिलार्यन प्यठ आमुत खर्चावनॖ तॖ बॆ-फ्रूक पऻठ्य तॖ मोत मऺशरिथ छि गिन्दान। यिमव पौंसव सॗत्य बनहऻन बे-शुमार अस्पताल, मोतस मेलिहे हार, सासॖबद्यन तॖ लछॖबद्यन लूकन हुन्द ज़ुव बचॖहे। कॆंह वयलऻयती क्रिक्यट खिलऻर्य गऺयि वापस पनॖन्यन मुलकन। म्यॆ छु बासान असि ति पज़ि विरोद करुन यिथिस गिन्दॖनस यथ मोकस प्यठ। महामऻरी छु नॖ अंद नज़र यिवान मगर असि छु याद दिवान ज़ि ज़ॖ मास्क लऻगिथ न्यबर नेरुन। न्यबर तॆलि न्येरुन यॆलि मजबूरी आसि। अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन, तॖ खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन, बुज़र्गन हुन्द ह्यस थावुन तॖ माजि दीवी शर्ण गछ़ुन तॖ तऺमिस अनुग्रह मंगुन। कथ छि जऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ)

koshursabak.blogspot.com प्यठॖ ति)

27.04.2021

27.04.2021,च़िथ्थॖर (चैत्र/चैत) ज़ूनॖ पछॖ (शुक्ल पक्ष) पुनिम (🙏देवादेव) (पूर्णिमा) (देवादॆव) बॊम्वार (मंगलवार),श्री सप्तर्षि सम्वत 5097, नक्षत्र स्वाति, राश तुला (चलान) ऋतु बसंत (चलान)...चूंकि पगाह छु ऒक्दॊह (प्रथमा) रावान, पगहुक वॊहरवॊद यी ॳज़्य याने पुनिम द्वह

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

          नुंदॖ रॆशॖन्य श्रुक्य

शश रव सलिल अनल अम्बरदर

मोर तॖ ॳश तॖ मऺरिथ प्रमान

नामास्त वाखॖय संन्ज़दर

वुद म्यॆ रसनय हरस पदान

            अर्थात

आकाश, ज़मीन, हवा, ॳग्नॖ सान छु पांच़न तत्वन हुन्द मनुश आसान। ॳम्यसॖन्दिस शरीरस मंज़ छु आत्मा वास करान। यि शरीर छु मऺरिथ पांच़न तत्वन सॗत्य ब्यॆयि रलान तॖ आत्मा छु दयस सॗत्य लय सपदान। अमी पज़ि ज़न्मस यिथ ॳकिस मनुशस पनुन पान पालनस सॗत्य सॗत् आत्मा ति ज्ञानॖ बलॖ सॗत्य सगनावुन। यूगिक्य शॆ पडाव तय कऺरिथ यूग क्रियायन हॖन्दि अब्यासॖ सॗत्य पनुन आत्मा फॊलरावुन। संज़दर (नुंदॖ रॆश्य) सुन्द वाख छु दय नावॖय योत। तमि नावॖ छुस बॖ रऻसय दयस मारान

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1.वातुल (Shoe maker/Scavenger)

2. वातलगी (Rustic way/Meanness/Vulgarity)

3. वातल वान (Cobbler's shop/Disorganised place/Place full of filth/Refuse/Dirt, etc.)

4. वातॖज (Cobbler's wife)

5. वातुन (To reach/To arrive/To come (upto)/To attain)

               मुहावरॖ

1. मु: सेरॖ वावॖ ख्वतॖ छु डेरॖ वाव

         सख़

    अ: ख्यन च्यन न आसनॖ सॗत्य 

         छॆ नॖ तीच़ सख़ती गछ़ान 

         यीच़ जाय न आसनॖ सॗत्य

         गछ़ान छि

2. मु: सऺहल चीज़स प्यठ जहल

    अ: मोमूली चीज़स या कथि

         प्यठ शरारत करुन

3. मु: स्वनुर नय स्वनॖ च़ूर करि तॖ

         काछ़ गछ़्यस

    अ: स्वनुर छु नॖ ईमानदार 

         आसान

    (पनॖन्य शुर्य ह्यॆछॖनऻव्यूख)

**************************

पंचान्ग:- वुनि छि यि महामीरी पखॖ वाहरऻविथ तॖ निवान ॳकिस ॳकिस पनॖनिस ज़दस मंज़। कऻन्सि मरनस वार छा या न छु,, मोतस छॆ नॖ तमिच फिकिर। तऺमिस छि पनॖन्य कऻम करॖन्य। सरकारन यॊदवय ग्वडॖ प्यठय सऺही क़दम तुलमुत आसिहे, यीच़ मारा मऻरी आसिहेनॖ। अहमदाबादस मंज़ स्टेडियमस प्यठ यूत पौंसॖ गालुन, संसद भवनस नव्यर दिनस प्यठ करोरबॊद पौंसॖ खर्चावुन, मूर्तीयन खडा करनस प्यठ पौंसॖ खर्चावुन, तमि ख्वतॖ जान ओस अस्पतालन वुसत द्युन, आक्सीजनॖच पूरॖ व्यवस्था ब्रोंठॖय करॖन्य, कोम्बुक मेलॖ रद्द करुन, चुनाव रैली बंद कऺरिथ महामऻरी च़ऺलरावनस कुन ज़्यादॖ ध्यान द्युन। मगर सोन मर्कज़ी सरकार रूद शंगिथ तॖ ह्यॊतुन व्वंय नारॖ विज़ि क्रूर खनुन। सियासथ छि वुनि चलान। अख ॳकिस ज़ंगॖ कडनस प्यठ लऺग्यमॖत्य सऻरी। दपान सऻन्य कॆंह प्रदेश छिनॖ आक्सीजन टैंकरन अकि जायि प्यठॖ ब्यॆयिस जायि यिनॖ या गछ़नॖ दिवान। दवा छुनॖ बाज़रस मंज़ सहल सहल मेलान ब्यमारन। यॊदवय मेलान ति छु,कॗमथ छु दऺह गनॖ ह्यवान यिम दुकानदार दपान। कांह लाकम छॆ नॖ यिवान चारनॖ यिमन सूदखोरन। सान्यन कऻशिर बटॖ संस्थायन मंज़ ति छि ला-परवऻही नज़रि यिवान यथ मोकस प्यठ। व्यवस्था हॖन्ज़ सख़ कमी छि टाकारॖ नज़र यिवान। मरनवाल्यन हुन्द शुमार छु बडान। हालथ छि दयनीय प्रथ तरफॖ। वऻतिथ छिनॖ ह्यकान अख ॳकिस निश। मोबाईल फोनन प्यठॖय छि लूख प्रुछ़गऻर रोज़ान करान। करव हय तॖ करव क्याह। यिथ्यन मोकन प्यठ छि बस अख ह्यमथ थवॖन्य। सीनस प्यठ कऺन्य थऺविथ क़दम क़दम कडुन। गिलॖ गोसॖ नॖ कऻन्सि प्यठ करुन तॖ न कऻन्सि हुन्द थवुन। यिम यॆमि सम्सऻर्य द्रायि तिम द्रायि मगर यिम पथकुन छि तिहॖन्दि बचावुक सोंचुन। मास्क लऻगिथ न्यबर नेरुन सुति यॆलि मजबूरी न्येरनॖच आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन तॖ खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन कट्यन हुन्द ख़याल थवुन बुज़र्गन हुन्द ह्यस थावुन तॖ माजि दीवी रोज़ुन मंगान तसुन्द अनुग्रह। कथ छि जऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

26.04.2021

26.04.2021, च़िथ्थॖर (चैत्र/चैत) ज़ूनॖ पछॖ (शुक्ल पक्ष) च़्वदह (देवादेव) (चतुर्दशी) (देवादेव) च़ऺन्दॖरवार (सोमवार) श्री सप्तर्षि सम्वत 5097, नक्षत्र चित्र, राश तुला (दुहचि 12.32 बजि प्यठॖ)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

          नुंदॖ रॆशॖन्य श्रुक्य

ओरतुय बुकर करान क्रॆहन्यव

ओरतुय बिहान बरतल

ओरतुय व्वपर गछ़ान पनॖनो

ओरतुय स्वनस करान सरतल

             अर्थात

नुंदॖ ऱॆश्य छु यॆत्यन च़ोरव कॖस्मव ओरुत शब्द इस्तिमाल कॊरमुत, यिमन च़ोरि कॖस्मॖ माने छु नेरान युस यिथपऻठ्य छु -

ओरुतुय (बदलिहाज़) छु वादॖ कऺर्य कऺर्य बुथि क्रेहनान।

ओरुतुय (बिचोर) दासॖ बावय बरस तल बिहान

ऒरुतुय (आवेज़) छु पनुन ॴसिथ व्वपर सपदान

ओरुतुय (ज़रूरतमंद) छु बदकारव स्वनस सरतल बनावान

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *********

1. वाबस्तॖ (Connected/Related/Bound/Together)

2. वापस (Back/Behind/Return/Give back)

3. वापसी (Return/Returned/Repayment/Refund)

4. वाफ (Season/Proper time)

5. वातॖनावुन (To take something to someone/Cause to send/Supply/Convey/Bring)

              मुहावरॖ

1. मु: स्यॊद सादॖ माहराज़ॖ

    अ: सादगी छु पनुन बजर, या,

         स्यॊद सादॖ गव शाहज़ादॖ

2. मु: स्यॆज़ि ओंगजि छुनॖ ग्यव

         खसान

    अ: युस चीज़ नॖ स्यॊद स्यॊद

         हऻसिल सपदि सु छु कुनि

         विज़ि हजरॖ सॗत्य हऻसिल

         प्यवान करुन, या, रोब दाब

         करुन ति छु ज़रूरी

3. मु: स्यॆदिस हॊल करि क्याह

    अ: यस दिल साफ़ आसि तस

         छुनॖ ब्यॆयि सुन्द हजर कॆंह

         करान, या, नेको नेक कर

         बद लबि पानय

      (पनॖन्य शुर्य ह्यॆछॖनऻव्यूख)

**************************

पंचान्ग:- राथ वॊन कऺम्यतान्य व्हाटसापस प्यठ ज़ि गोपी नाथ आश्रम, बोडी,ज्यॆमि वऻल्य छि पांछ़ ॴठ आक्सीजन सिलैन्डर थऺविथ तॖ दिवान रोज़ान हाजथमंदन पऺत्यम्यव सतव वऺरियव प्यठॖ। यि छि वाकय अख खुशी हॖन्ज़ कथ। मगर अथ मुतलक कऻत्यहान छि ख़बर, बॖह्यकनॖ वऺनिथ। महामऻरी ति च़ायि दोयमिस वऺरियस मंज़ मगर आम लूकन छॆनॖ ख़बर ज़ि पऺत्यम्यव सतव वऺरियव प्यठॖ छि आश्रमस निश यि व्यवस्था। यि ख़बर क्याजि छि कॆंच़नॖय ताम वऻच़मॖच़, यि ह्यकन आश्रम वऻली वऺनिथ। महामऻरी हुन्द प्रकोप छु तेज़ तॖ मरनवाल्यन हॖन्ज़ रफतार ति गऺयि बडान। आक्सीजनॖच व्यछ़य ति छि। सान्यन सारिनी संस्थायन पज़ि व्यवस्था करॖन्य तॖ लुकन हुन्द ज़ुव बनावनुक सबीलॖ बनुन। अमिच छि अशद ज़रूरथ। त्रासदी छि यि ज़ि ॳकिस बऻयिस  यस दिलुक दोरॖ सॗत्य मृत्यु सपॖज़ अस्पताल निवान निवान तॖ फीर्य गरॖ कुन तिम वापस अन्तिम स़ंस्कार करनॖ बापथ तिमन द्युतु नॖ पनॖनि सुसाईटी वाल्यव शव गरॖ च़ाननय यथ ब्रमस मंज़ ज़ि यि आसि कोविड मामलॖ। मजबूर कॊरुख दपान सु शव न्यॆबॖर्य न्यॆबरी शुमशान ग़ाब वातनावनॖ बापथ। महामऻरी हुन्द दहशत तॖ खौफ छु यूत ज़ि स्यॆदिस मरनस ति छि शकॖ छि नज़रि वुछान व्वंय। गासॖ तुलिस मंज़ ति छु अज़ स्वरुफ बासान लूकन। कॆंच़न जायन बूज़ ज़ि शुर्य पानस सऺत्य न आसनॖ म्वखॖ वोत नॖ काह तिमन अन्तिम संस्कार करनॖ बापथ। दपान कॆंच़व कार्यर्ताहव छि यिछ़ॖ  ज़िम्मॖवऻरी मटि ह्यॆच़मॖच़ तॖ शॆछ वातनस प्यठ छि तिम तथ जाय वातान तॖ तिमन मदद करान। हे भगवान! गीर कऺर्यमॖत्य ॳस्य छीय यॆमि महामऻरी, अमि काच़ि तलॖ कड छिय करान वीलॖज़ऻरी, म्वखती द्यू असि छुख च़ॖ सोन नऻग्यराये, नखि डखि छुख च़ॖय, छु नॖ कॆंह परवाये। ह्यमथ छि थवॖन, मुकाबलॖ छु करुन तॖ महामऻरी छि च़ऺलरावॖन्य। बस नियम छु वरतावुन। ज़ॖ मास्कॖ लऻगिथ न्येरुन न्यबर सुति यॆलि मजबूरी मंज़ नेरुन आसि, अथॖ साबनि सॗत्य छलान रोज़ुन सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन तॖ खान्दरन व्वछ़ॖबन मंज़ न गछ़नुक मन बनावुन, पनुन पान त्रॊपॖरिथ थवुन, शुर्यन हुन्द ख़याल थवुन बुज़र्गन हुन्द ह्यस थावुन तॖ माजि दीवी शर्ण गछ़ुन तॖ तऺमिस अनुग्रह मंगुन। सकारात्मक व्यच़ार थवॖन्य। कथ छि जऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

25.04.2021

25.04.2021, च़िथ्थॖर (चैत्र/चैत) ज़ूनॖ पछॖ (शुक्ल पक्ष) त्रुवाह (देवादेव) (त्रयोदशी) (देवादेव) आथवार (रविवार/ऐतवार) श्री सप्तर्षि सम्वत 5097,नक्षत्र हस्त, राश कन्या (चलान) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

          नुंदॖ रॆशॖन्य श्रुक्य

ज़ॆवॖवुन दॊपहम अलकास मलकास

खलकस छ़ऺन्डिथ ॳन्यहम दाय

नानि हॖन्ज़ श्राख कोनॖ छ़न्यहम हलकस

पॊछ़ ॴसिथ ति ज़ज़ ह्यॆन्य तॖ क्याय

               अर्थात

माजि हॖन्दि थनॖ प्यनॖ विज़ि वुज़नऻविख अलख तॖ मलख। यिथॖ तिथॖ ॳनिख दाय, यॆम्य मऻज्य पीनॖनऻविथ बॖ प्योस थनॖ। म्यॆ छु फेरान ज़ि नान च़टनॖ विज़ि कोनॖ छ़न्य नॖ दायि स्व श्राख म्यऻनिस हऺटिस ति क्याज़ि यिथॖ ति खऻर्य म्यॆ पापॖन्य बऻर्य यथ पऺछ़्य रूप पानस

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

                *********

1. ना कऻबिलॖ ऐतबार (Untrustworthy/Undependable/Unreliable)

2. ना कऻबिलॖ बर्दाश (Intolerable/Unbearable)

3. ना कऻबिलॖ अमल (Impracticable/Not-workable)

4. ना कऻबिलॖ क़बूल (Unacceptable/Inadmissible)

5. ना कऻबलियत (Inefficiency/Incapability/Inability/Unworthiness)

                मुहावरॖ

1. मु: शीनॖ ऱवय शेतान

    अ: ॳन्दॖर्य अख तॖ न्यॆबॖर्य 

         ब्याख

2. मु: श्यॆयव पीरव ख्वतॖ छु

         बॆ-पीरॖय जान

    अ: दऺहन पीर मानॖनॖ ख्वतॖ छु

         बॆ-पीर आसनुय जान

3. मु: शॆरकातॖच ल्यॆज्य छय 

         ख्येमॖच़ होन्यव

    अ: शिर्यकातस मंज़ छि सऻरी

         गऻर ज़िम्मॖदऻरी हावान यॊत

         ताम न्वक्सान छु वातान

       (पनॖन्य शुर्य ह्यॆछॖनऻव्यूख)

**************************

पंचान्ग:- *सास रंग छि ज़िन्दगी बदलान मनॖ मो गछ़ च़ॖ मोयूस अज़ निराशा छि आशा पगाह,  रऻच़ हुन्द सफ़र बस छु ज़्यूठ*।कऺमिस ॴस ख़बर महामऻरी यी यथ रूपस मंज़ व्वतॖलिथ ज़ि मरुन ति गछ़ि मुश्किल। न्यॆन्दरि वऺथ्यतॖय यॆलि मोबाइल छि अथस मंज़ रटान, प्रथ व्हाटसाप ग्रुपस मंज़ छि वुछान फलऻन्य मूद, फलऻन्य छु अस्पतालस मंज़ वऻतिथ ब्यडॖ मेलनॖ बापथ अथॖ ख्वर वायान मगर ब्यड छुस नॖ मेलान, फलऻन्य छु छ़्रटॖ छ़्रठ करान आक्सीजन मेल्यि ना मगर ना व्वमेद यिवान वापस।  बासान छु ज़न छु सारिवॖय आबे हयात बदलॖ मरिन्यवोन्य च्योमुत। ॳकिस पथ अख, ॳकिस पथ अख छि लूख मरान। थख कत्यन कडि यि महामऻरी, पताह छॆनॖ। वारिहाव संस्थायव गोन्ड कमर तॖ ह्यॆतिख आक्सीजन सिलैन्डर पनॖनिस परिसरस मंज़ थवॖन्य तॖ हाजथमंदन हाजथ कडुन। बस कऻशिर्य बटन हॖन्ज़ॖ संसथायि छि यिमव काम्यव निशि लॊब रऺटिथ म्यॆ बासान। सऻरी छि वुन्यक्यनस अज़ाबस मंज़ कुनि नतॖ कुनि रऺन्ग्य। पज़र छु ज़ि कऻशुर बटॖ समाज छु बाकय समाजव न्यसबतॖ ल्वकुट समाज, पौंसॖ टॗंक्य रऺन्ग्य ति, लंगर व्यवस्था करनॖ रऺन्ग्य ति मगर ज़्यादॖ नय तॖ कमॖय सामान ह्यकहऻव थऺविथ यिमन जायन। दफ अमापॊज़ असि छुनॖ ज़्वन अथकुन कऻन्सि। च़ेर गव अथ मंज़ शक छु नॖ कांह मगर वुनि ति छु मोकॖ यिथ कऻम करनॖच। नेबुलायज़र ह्यकव थऺविथ, सास नय तॖ पांछ़ हथ आक्सीजन सिलैन्डर पूरॖ किटॖ सान यानि नोज़ॖल, मास्क, पाईप बेतरी ह्यकव थऺविथ, ज़रूरी दवा ह्यकव थऺविथ, डाक्टरन हॗन्ज़ मुफुत सीवायि हॖन्ज़ व्यवस्था ह्यकव कऺरिथ, अस्पतालन सॗत्य कथबाथ कऺरिथ ब्यॊन ब्यॊन अस्पतालन मंज़ ब्यडन हॖन्ज़ व्यवस्था ह्यकव कऺरिथ। वारियाह कॆंह ह्यकव कऺरिथ पानॖवुन्य मशवरॖ कऺरिथ। ज़यादन च़ेर गछ़ि तॖ पतॖ पछतावव। क़दम तुलव तॖ कऻन्सि हुन्द ज़ुव बचावव। आशा छि थवव ज़ि पगहुक द्वह नेरि रुत। ज़ुव बचावनुक नियम छु वरतावुन। ज़ॖ मासकॖ लऻगिथ न्यबर नेरुन सुति यॆलि मजबूरी न्येरनॖच आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य लऻरिथ नॖ बिहुन, शुर्यन हुन्द ख़याल थवुन, बुज़र्गन हुन्द ह्यस थावुन। महामीरी सॗत्य छु मुकाबलॖ करुन।  कऻफी न्वक्सान तुल। यॆति योर मंगव माजि हुन्द अनुग्रह। तऺस्य पुशॖरावव पान। कथ छि जऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

24.04.2021

24.04.2021,च़िथ्थॖर (चैत्र चैत) ज़ूनॖ पछॖ (शुक्ल पक्ष) बाह (द्वादशी) बटॖवार (शनिश्चरवार/ शनिवार) श्री सप्तर्षि सम्वत 5097, नक्षत्र पू.फा, राश कन्या (दुहचि 11.56 बजि प्यठॖ) ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

         नुंदॖ रॆशॖन्य श्रुक्य

ज़ुवॖ च़ॖ बोज़तो कनॖवान

यि हो मऺर्यनिन्य ख़बर शिनवान छय

कऻल्य हऺन्डिस ज़न निनय पुजवान

यि गासॖ कऻन्य दुनियहिच ब्रमवान छय

           अर्थात

यि सम्सऻर्य लॊह लंगर छु ब्रमॖरावान इन्सानस। हे ज़ीवॖ! कनॖवान यॆलि गछ़ी तथ करतॖ ग़ोर यि छुय मरुन याद पावान यॊद नॖ ख्यनॖ ख्यनॖ मरुन क्रयि विज़ि याद थवख तॆलि ह्यख मरनॖ विज़ि वदुन, ज़न निनय पुजिवान कटस मारनि

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           **********

1. नाशुकुर (Ungrateful/Thankless)

2. नासाफ़ (Unclean/Impure/Dirty)

3. नाफ़रमान (Disobedient/Uncommand/Undutiful)

4. नाफहम (Dull/Stupid/Ignorant)

5. नाकऻबिल (Inefficient/Incapable/Unqualified/Undeserving)

              मुहावरॖ

1. मु: शेतानॖ सॖन्द्य कन ज़ऺर्य

    अ: शेतान छु नॖ कऻन्सि हुन्द

         बोज़ान

2. मु: शेठॖ वुहुर काव तॖ शीतॖ

         वुहुर काव पूत

    अ: अक्लि निश छॆ नॖ वऻन्स 

         कांह कॗमथ थवान, या,

         बेवकूफ मोल तॖ दाना 

         न्यॆचुव

3. मु: शेठ गव तॖ ब्रेठ गव

    अ: बुडिथ छि अकॖल डलान

     (पनॖन्य शुर्य ह्यॆछॖनऻव्यूख)

**************************

पंचान्ग :- छि च़ालॖन पनॖन्य दऻद्य पानय, वखतुक छु यी व्वंय फसानय। ब्यॆनि बऻय बंध तॖ बांधव, छिय बस अख बहानय। वख वोत ज़ि ॴसस थॊप दिथ छु वति पकुन, अख ॳकिस दूरि दूरी मॆलुन, न कऻन्सि हुन्द गरॖ गछ़ुन तॖ न कांह पनुन गरॖ च़ानुन। महामऻरी हुन्द प्रकोप छु ज़बर्दस्त। ऊतरॖ गव पानॖ वीर जी स्वर्गवास, दोयिमि द्वह कॊरहोस दाह संस्कार। राथ ॴस्य गछ़ान गरॖक्य कॆंह बऻच़ वीर जीयिनि अस्थी ह्यथ गट गंगा कुन तॖ वती आख फोन ज़ि वीर जियिनि माजि ति त्रऻव्य प्राण। खूंत्य लदस खूंत पतय।गऻड्य फिरॖख अडॖ वति प्यठय वापस माजि अन्तेष्टि करनॖ बापथ। यि गऺयि त्रासदी। कोविड 19-हस सॗत्य छु ब्याख वयरस ति मीलिथ गोमुत तॖ महामऻरी च़ामुत छु नवि सरॖ ज़ुव युथ ज़ि ॳम्य ह्यॊत लूकन हुन्द ज़ुव कडुन स्यठाह तेज़ रफतारि मंज़। दहशथ छु अमि महामऻरी हुन्द युथ ज़ि शवस ब्रोंह कुन गछ़नस छु बीम तॖ छुनॖ इजाज़थ। ब्यमारन हुन्द शुमार छु यूत बड्योमुत ज़ि अस्पतालन मंज़ छॆनॖ जाय मेलान तॖ छिख वापस सोज़ान। कॆंच़न जायन छि ब्यमार अस्पतालस न्यबर सडकि प्यठ बिहिथ आक्सीजन सिलैन्डर ह्यॆय ह्यॆय। टी वी प्यठॖ आव यि वदवुन तॖ वऻन्लिजि खन्जि गछ़वुन नज़ारॖ वुछनस तल। यि छु यि दऺप्यज़ि ति प्रलय। गरिक्य बऻच़ यथ शवस नॖ विधि पूर्वक अन्तिम संस्कार ह्यकन कऺरिथ, अंग ॴश्यनाव नॖ यथ शवस अन्तिम  दर्शन बापथ ह्यकन वऻतिथ, शवस यॆत्यन नॖ च़ोर ज़ऺन्य ह्यकन सऺमिथ नख दिनॖ बापथ, प्रलय क्या आसि अमि अलावॖ। इन्सान छु अज़ लाचार, बेबस, बेवऺसीलॖ गोमुत मगर डख छु रटुन, यि ज़हर छु च्यॊन, कमर छु कसुन तॖ मुकाबलॖ छु करुन अथ महामऻरी सॗत्य। युस गछ़ान सु वापस फीरिथ यी नॖ मगर युस ज़िन्दॖ छु तऺमिस छु पान बचावुन। नसीहथ छि यी ज़ि ज़ॖ मास्कॖ लऻगिथ न्यबर नेरुन सुति यॆलि मजबूरी न्येरनॖच आसि, अथॖ साबनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य नॖ लऻरिथ गछ़ुन। शुर्यन कट्यन हुन्द ख़याल थवुन, बुज़र्गन हुन्द ह्यस थावुन तॖ खान्दरन व्वछ़ॖबन मंज़ न गछ़नुक मन बनावुन तॖ गरन मंज़ पान त्रॊपरिथ रोज़ुन। माजि दीवी छु शर्ण गछ़ुन तॖ दयस छु अनुग्रह मंगुन। कथ छि जऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

23.04.2021

23.04.2021 च़िथ्थॖर (चैत्र चैत) ज़ूनॖ पछॖ (शुक्ल पक्ष) काह (एकादशी) शॊकुरवार (शुक्रवार/ जुम्मा/भार्गवार) श्री सप्तर्षि सम्वत 5097, नक्षत्र मघा,राश सिंह (चलान)ऋतु बसंत (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

         नुंदॖ रॆशॖन्य श्रुक्य

कॆंच़न साहिब्य दिच़ाव क्रच़र

लऻनिस लॆख्यतिस क्या क्युथ क्रय

कॆंह कॊरुन छॊन तॖ कॆंच़न बऺरच़र

आसिनय ॴरच़र कवॖ पुछि यिज़े

               अर्थात

कॆंच़न दिच़ऻय साहिबन सख़ती मगर लीखमॖतिस लऻनिस ह्यकन नॖ कर्म ति बदलऻविथ। कॆंच़न कॊरुन कम तॖ कॆंच़न कॊरुन बरच़र। यॊद नॖ बख्ति बाव आसि तॆलि कमि आशॖ सॗत्य ह्यॆकि ज़ीव कऻन्सि हॖन्दिस सायस तल यिथ

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

               ********

1. नाज़ेब (Unsuitable/Unbecoming)

2. नासाज़ (Indisposed/Out of sorts)

3. नासाज़गार (Unfavourable/Unfortunate)

4. नासमॖज (Foolish/Dull/Unintelligent/Stupid)

5. नाशऻयस्तॖ (Uncultured/Unmannerly/Ill-mannered)

                 मुहावरॖ

1. मु: सेहति बदन तॖ रऻहति जान

    अ: अख ॴही, या, सेहतॖ 

         ख्वतॖ बॊड आराम छुनॖ 

         कांह

2. मु: सबॖर छु स्वनॖसुन्द टूर

    अ: सबॖर करुन छु स्यठाह 

         फऻयदॖ वातॖनावान

3. मु: साहिब छु बखशनहार

    अ: दय छु बखशनवोल

    (पनॖन्य शुर्य ह्यॆछॖनऻव्यूख)

**************************

पंचान्ग:- नेरान अकि फिरि, फ़ेरान नॖ वापस। फेरान मगर तम्यकूय कॆ़च़स कालस। नम गछ़ान ॴछ, यॆलि फ्युर लगान ख़यालस। दम फुट्य गछ़ान, लगान ब्यॆयि तऺथ्य जंजालस।

महामऻरी छि पूरॖ हॊल गंडिथ लऺज्यमॖच़ पतॖ। निवान ॳकिस ॳकिस यॆमि संसऻर्य तॖ करान असि छ़्यनॖ पनॖन्यन निशि। हालथ छि दयनीय। ॳकिस छि यि महामऻरी रटान तॖ सोरुय अयाल छु  वलनॖ यिवान। कुस कऺमिस करि तीमारदऻरी, पलि छु नॖ प्यवान। वुनि छि थफॖ थफ अस्पतालन मंज़ ब्यडन हॖन्ज़, आक्सीजन सिलैन्डरन हॖन्ज़, वैन्टॖलेटरन हॖन्ज़, दवा छु नॖ कॆंच़न मेलान। योदवय कॆंच़न मेलान ति छु, द्वगनॖ त्र्यगनॖ कॗमतस प्यठ दपान मेलान छु। कॖनन वऻलिस छु ज़न मरुन मऺशिथ गोमुत। लालचन छु कॆंच़न कलॖ कॊडमुत। हालांकि पताह छि सारिनी ज़ि मुस्तकॖल छु नॖ रोज़वुन किंही। यि महामऻरी ति गलि अज़ नय तॖ पगाह मगर कॆंच़न गरन फान कऺरिथ। ह्यदायथ छि यी ज़ि गरि न्यबर नॖ नेरून कम अज़ कम दऺहन पंदहऻन दॊहन। यॊदवय न्येरुन मजबूरी छि, ॴसस प्यठ ज़ॖ मास्क लऻगिथ न्येरुन, वापस गरॖ यिथ अथॖ साबनि सॗत्य छलान रोज़ुन, सैनिटयज़र मथान रोज़ुन, आज़रस बाज़रस मंज़ नॖ अख ॳकिस सॖत्य लऻरिथ गछ़ुन। शुर्यन कट्यन हुन्द ख़याल थवुन, बुज़र्गन हुन्द ह्यस थावुन। यूत पिलि त्यूत अख ॳकिस अलज़ुन पलज़ुन तॖ व्वपकार करान रोज़ुन। ह्यमथ नॖ हारॖन्य। ईश्वरस मंज़ आस्था थवॖन्य। माजि दीवी पज़ि मनॖ शर्ण गछ़ुन तॖ अनुग्रह मंगान रोज़ुन। मऺशिथ गोम ग़म म्यॆ पनुनुय, ग़म च्योन याम नज़र आम। डॊलुम ह्यस होश म्यॆ रोवुम, मच़र च्योन याम ऩज़र आम। कथ छि जऻरी।  

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

22.04.2021

22.04.2021, च़िथ्थॖर (चैत्र/चैत) ज़ूनॖ पछॖ (शुक्ल पक्ष) दऺहम (दशमी) ब्रसवार (ब्रहस्पतिवार/ गुरुवार/वीरवार श्री सप्तर्षि सम्वत 5097,नक्षत्र अश्ले, राश सिंह (सुबहॖचॖ 8.15 बजि प्यठॖ)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

          नुंदॖ रॆशॖन्य श्रुक्य

ज़ुव क्यथॖ नॖ रोज़ाख अवलॖचि संज़ॖय

द्रुदस सॊदरॖकऻन्ज़ॖय गव

यिम ज़ागान यिथॖ गाडन हऻन्ज़ॖय

च़ऺल्य वान्गॖज नऺनंज़ त्रऻविथ लॊतव

              अर्थात

हे पानॖ! च़ॖ क्याज़ॖ रोज़ख नॖ पनॖनिस ईमानस प्यठ कऻयिम, यॊतान्य द्रुद गव नीरिथ तॖ गोस सऺदॖरकऻन्ज़ मंज़। यिथकऺन्य हऻन्ज़ छि ज़ालॖ मंज़ॖ गाडि ज़ागान तिथॖ पऻठ्य गछ़ि संसऻर्य लॊहलंगरॖ निश पापव रॊस यॆमि वान्गॖजवारि मंज़ॖ नेरनॖच प्रथ सातॖ कूशिश कऺरिथ अपोर तरनॖच वथ सादॖन्य।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ********

1. नाहक़ (Unjustly/Falsely/In vain/Improperly)

2. नाखान्दॖ (Illiterate)

3. नाख्वश (Displeased/Unhappy)

4. नाख्वशगुवार (Unpleasant/Undesirable)

5. नादार (Poor/Indigent/Pauper/Penniless)

             मुहावरॖ

1. मु: ॴबो प्यॆयियो बलाय 

         मंदछि पतॖ छय ख़जालथ

    अ: अख ॴब छु वारिहा

         ॴबन ज़न्म दिवान तॖ 

         ब्यॆयि खऺजिल करनावान

2. मु: तमाह छु तावन

    अ: लालॖच करनॖ सॗत्य छु 

         ॴखरस न्वक्सान गछ़ान

3. मु: सराफ गऺन्ज़रावान द्यार तॖ

         अतराफ रावॖरावान द्वह

    अ: वख फज़ूल ज़ायि करुन,

         या, तमाशॖगीर

   (पनॖन्य शुर्य ह्यॆछॖनऻव्यूख)

**************************

पंचान्ग:- कोविड-19-हन तुल क़हर। मरनवाल्यन हॖन्ज़ रफ़तार बडेयि ग्रन्दि रॊस। महामऻरी छि ख़तरनाक रूप दऻरिथ। बे-आरॖ पऻठ्य मारान बड्यन क्यो ल्वकट्यन। अस्पतालन मंज़ छॆनॖ ब्यमार थवनस सॊम्ब जाय, ब्यडन हॖन्ज़ व्यछ़य छि कॊहनॖ, ब्यडॖच व्यवस्था छि सपदान तॖ आक्सीजनॖच व्यछ़य छि ब्रूंठ्य यिवान, आक्सीजनॖच कमी छि पूरॖ करनॖच कूशिश करान तॖ व्यटिलेटरन हॖन्ज़ व्यछ़य छि कऻम ख़राब करान। ॳथ्य जदोजहदस मंज़ छु मरीज़ यीतिस कालस ॳछ वटान।  सरकारस मंज़ कमि कॖसमॖच सियासत छि चलान पानॖवुन्य सियासतदानन आम इन्सानस छॆ नॖ फिकिरी तरान।  कोविड केस तऺर्य डायि लछॖ अपोर तॖ मरनवाल्यन हॖन्ज़ ग्रन्द ति वऻच़ बेशुमार। मोतन छि पनॖन्य रफ़तार रऺटमॖच़ लाकमि रॊस। कॊहराम छु वॊथमुथ च़्वपऻर्य। शुमशानन मंज़ छॆ नॖ शवस दाह दिनस सॊम्ब जाय। च़्यन्तायि बापथ छुनॖ कॆंच़न मरगटन प्यठ ज़्युनुय कुनि। म्वर्दॖ ज़ालनस ति छि व्वंय लऻन लऺज्यमच़। यिम कोविड ब्यमारि सॗत्य मरान छि तिहॖन्द्यन गरिक्यन बऻच़न छुनॖ अन्तिम दर्शन करुनुक नसीबॖ। बकाया दरदिलन हॖन्ज़ छॆ नॖ कथॖय। वख छु क्रूठ चलान। म्यॆ रोव अज़ अख यारि जानानॖ अख टोठ म्यॆथॖर, वीर जी डुलू। यि दऺप्यज़ि ति म्यॆ गव अख बोय छ़्यनॖ। कॆंह द्वह ब्रोंठॖय गऺयि म्यऻन्य कॆंह करीबी ॴशनाव वैकुण्ठस मगर गरि न्यबर नेरुन छि मन्नाह। हवा छु सख ख़राब। कुस कतिनस किथॖपऻठ्य यी वलनॖ यथ महामीरी मंज़ पताह छॆ नॖ कऻन्सि। मगर यथ महामऻरी छु असि मुकाबलॖ करुन। ह्यमथ छि थवॖन्य। ज़िन्दॖ रोज़नॖच कूशिश छि करॖन्य। पनॖन्यव गरव मंज़ॖ न्यबर नेरुन छु स्यठाह कम करुन। यॊदवय मजबूरी मंज़ नेरुन ति प्यॆयि, मास्क लगऻविथ छु नेरुन, कुनि मेलस मंज़ या जलसस मंज़ या कुनि खान्दरस वॊछ़बस मंज़ न गछ़नुक मन गछ़ि बनावुन, अथॖ साबॖनि सॗत्य छलान रोज़ुन, सैनिटयज़रुक इस्तिमाल करान रोज़ुन, अख ॳकिस सॗत्य लऻरिथ नॖ बिहुन, शुर्यन हुन्द ख़याल थवुन, बुज़र्गन नॖ गरि न्यबर नेरनॖ द्युन, पनुन ख़याल थवुन। जान आसि ऒर सोरुय छु ऒर। यार च़ॊलुम दिलदार च़ॊलुम, दिलकुय क़रार यारा रोवुम। कथ छि जऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

20.04.2021

20.04.2021, च़िथ्थॖर (चैत्र चैत) ज़ूनॖ पछॖ (शुक्ल पक्ष) ॴठम (अष्टमी) बॊम्वार (मंगलवार),श्री सप्तर्षि सम्वत 5097, नक्षत्र पुन (चलान) राश कर्कट (चलान), ऋतु बसंत (चलान)...अज़ छि दुर्गा अष्टमी

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

        नुंदॖ रॆशॖन्य श्रुक्य

तति क्या करव छ़टि तॖ गटे

यॆति लोलनि वऻलिन्ज फटे हो

खबरि रॊस क़बर पानॖ रटि नालॖमते

मारन कॊन्छ़ तति रटे मो

         अर्थात

अशॖक हकीकि हॖन्दि लोलॖ यॊद वऻन्लिज फटनस आसि आमॖच़ तथ दिलस क्या गछ़ि संसऻर्य द्वखुक असर। क़बरि मंज़ छु नॖ कांह ति सॗत्य वसान न छि तथ अंदर इन्सानस कांह ख़बर ह्यॆनि गछ़ान। यॆलि दय ध्यानस मंज़ थ्यर इन्सान आसि तस छु यॆति ति तॖ तति ति बूज तस नॖ छु क़बरि मंज़ कांह रटनवोल न मारनवोल। क़बर ति छि तस इन्सानस नालॖ रटनस आसान प्रारान

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           *********

1. नाबॖकार (Wicked/Good for nothing)

2. नाबूद (Non existence/Annihilated)

3. नाबीना (Blind)

4. नापाक (Polluted/Uncleaned/Defiled/Dirty/Impure)

5. नापायदार (Frail/Transitory/Unstable)

              मुहावरॖ

1. मु: फ़रहाद बुड

    अ: स्व बुड यस खॊडॖपेंचि 

         आसन

2. मु: फ़कीर च़ाव आंगुन होन्यन

         वॊथ लचि दोद

    अ: हंगॖ तॖ मगॖ कऻन्सि हुन्द

         अज़रवुन युन

3. मु: ग़र्ज़मंद दीवानॖ

    अ: ग़र्ज़मंद छुनॖ (पनुन हाजथ

         कडनॖ विज़ि) अकलि हॖन्ज़ 

         कथ या कऻम करान

       (पनॖन्य शुर्य ह्यॆछॖनऻव्यूख)

**************************

पंचान्ग:- अथ ल्वकटॖस कुठिस मंज़ ॴस्य शुर्य परान लेखान। अख हच्युव सॊन्दूक ओस अथ कुठिस मंज़ यथ मंज़ शुर्य च़ाटॖहालचि किताबॖ, कापी, ज्योमिट़री ब्वकुस, मील दवात, ड्राईयिंग कापी वगैरा थवान ॴस्य तॖ ॳथ्य सॊन्दकस प्यठ ॴस्य रोज़ान करान स्कूलॖच कऻम। अज़कल छु नॖ व्वंय रिवाज यनॖ मोबाईल, लैपट्वाप तॖ कम्प्यूटर आव। न छि व्वंय स्व मशॖक या दूज, न छु सु नरकऻन्य क़लम,न स्यफ, न मील दवाथ तॖ न छि तिम सॊन्दूक नज़रि व्वंय यिवान। व्वंय छि नऺव पडऻय, नऺव सोच। वुज़किस दॊयिमि तरफॖ ति ॴस्य ज़ॖ कुठ्य। यिमन द्वन कुठ्यन मंज़ॖ ॴस वुरसी पऺट्य लऺगिथ य्वस यिमन कुठ्यन ब्यॊन ॴस करान। वुरसी पट्यव यपऻर्यमिस कुठिस ॴस्य बऻयसऻबुन कुठ वनान तॖ वुरसी पट्यव हुपऻर्यमिस कुठिस ॴस्य वनान शान्श्यन। अथ शान्श्यनि मंज़ ओस आसान बिस्तरॖ, टीनॖव्य ट्रंक, अटैची, बेतरी। ॳज़्यक्यन शुर्यन आसि नॖ पताह ज़ि वुरसी गऺयि क्याह। वुरसी ॴस्य आसान लऺकरि पचि यिम लऺकरि हॖन्द्यन द्वन कूट्यन मंज़ ॴस्य यिवान थवनॖ तॖ यिम पचि आसॖ यिवान ह्यॊर ब्वन खारनॖ वालनॖ। यिम वुरसी पऺट्य ॴस्य द्वन कुठ्यन मंज़ॖ दीवारॖच कऻम करान तॖ यॆमि सातन ज़रूरथ प्यॆयिहे, यिम वुरसी पऺट्य ॴस्य ह्यॊर कुन खारान तॖ कुठ ओस रहि रास बॊड बासान मगर मंज़ॖ ॴस दमदऻर आसान य्वस दॊन कुठ्यन ॴस अलग करान। यिम वुरसी पऺट्य ॴस्य लागान डबन मंज़ ति। डब ओस कुठिस न्यबर यिवान लऺकरि हॖन्ज़ बालकऻनिया हिश बनावनॖ अथ ओस नाव प्यवानॖय डबि कुठ। कऺशीरि मंज़ आसॖ सारिनी लर्यन डबि दार कुठ्य आसानॖय। पगाह खसव ॳस्य मकानॖकिस त्रॆयमिस पोरस। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

19.04.2021

18.04.2021

18.04.2021, च़िथ्थॖर (चैत्र/चैत) ज़ूनॖ पछॖ (शुक्ल पक्ष) शॆयम (षष्ठी) आथवार (रविवार/ऐतवार) श्री सप्तर्षि सम्वत 5097, नक्षत्र आर्द्र, राश मिथुन (चलान) ऋतु बसंत (चलान), नवरात्र (चलान)...अज़ छि कुमार शॆयम (कुमार षष्ठी) ति

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

           नुंदॖ रॆशॖन्य श्रुक्य

करतो क्रॆय तॖ यियि तो पॆंजे

मुरखो बोज़तो रंजिविथ

आशकव पुल तॖ पऻतवॖ गंजे

यावुन मुडस च़ॊल रिंज़ॖविथ

            अर्थात

हे मुर्खॖ यानि अज्ञऻन्य ज़ीवॖ, मायि छुसय वनान ज़ि पनुन सऺही तॖ असली मुकाम प्रावनॖ बापथ छिय थऺद्य कर्म करॖन्य। यिम अशॖक हकीकी कुन छि लमान तिम छि श्रद्धायि हॖन्दि सगॖ ब्रोंठकुन पकान मगर यावुन छु अज्ञऻनियस मऺच़ॖरऻविथ वति डालान

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             ********

1. मऻलिश (Massage)

2. मऻलिक (Owner/Proprietor/Master/Lord/Husband/God)

3. माम (Maternal uncle)

4. मामन्य (Maternal aunt)

5. मऻज (Mother)

               मुहावरॖ

1. मु: क्वकुर यूत व्यठान छु तीच़

         छु निच्य ऱयख करान

    अ: ॳमीर बनॖनस सॗत्य सॗत्य 

          छु इन्सान कॊन्जूस बनान

2. मु: क्वकुर गछ़्या बाह त्रख

    अ: ल्वकुट या कऺमीनॖ शख़स 

         ह्यॆकिनॖ अज़मथ प्रऻविथ

3. मु: क्वकथ नय तॖ कऺन्य तऺल्य

         क्याज़ि

    अ: नाकारॖ कथ छि च़ूरि च़ूरीय

         करनॖ यिवान जान कथ नॖ

       (पनॖन्य शुर्य ह्यॆछॖनऻव्यूख)

**************************

पंचान्ग:- ॳस्य छि वुनि बऺडिस कुठिस मंज़ॖय। यथ कुठिस ओस यि सिफथ ज़ि यॆलि ति कांह लऻज़िमदार पोज़ लोछ़ यिवान ओस तऺमिस ॴस्य बॆहनावान यॆथ्य बऺडिस कुठिस मंज़। अवॖ म्वखॖ औस यि कुठ यिवान थावनॖ साफ़ सुथरॖ हमेशॖ। हालांकि डुवान शेरान ॴस्य बकाया कुठ्य ति दफ अमा पॊज़ बऺडिस कुठिस ओस यिवान थवनॖ सफऻयी हुन्द ख़ास ख़याल।  लबन प्यठ लऻग्यमॖत्य फोटुवन हुन्द ज़िकिर कॊर म्यॆ अवॖ म्वखॖ ज़ि सान्यन नव्यन शुर्यन गछ़ि पताह आसुन ज़ि कऺशीरि मंज़ ॴस्य आसान दीवी दीवताहन हॖन्द्य फोटव कुठ्यक्यन लबन प्यठ यसलॖ। दुकानदारन ॴस्य ह्यवान रोज़ान नऺव्य नऺव्य कैलैन्डर यथ प्यठ दीवी दीवताहन हॖन्द्य फोटव ॴस्य छऻपिथ आसान तॖ लागान ॴस्य गरिक्यन लबन तॖ मोन्यन प्यठ। अज़कल छि यि प्रथा व्वंय असि मंंज़ बिल्कुल बंद गऻमॖच़ यनॖ ॳस्य बालॖ यपोर लऺग्य। व्वंय छिनॖ यॆतिक्यन फ्लैटन मंज़ ज़्यादॖतर फोटू लागनॖच रिवायथ पालनॖ यिवान ति क्याज़ि नज़ाकथ छि आमॖच़ अज़कल कुठ्यक्यन लबन रंग करनॖच, ट्यक्सचर करनॖच, वालपेपर लागनॖच तॖ सऻन्य शुर्य छि नॖ यछ़ान फोटव लऻग्य लऻग्य लबन हुन्द हुलियि बिगाडुन। सीनरी वीनरी या फिल्मी हीरो हीरोयन्यन हॖन्द्य फोटव यॊदवय लागन ति कुनि कुनि कूनस, दीवी दीवताहन हुन्द फोटुव छु गरस मंज़ बनऻव्यमॖतिस ल्वकटिस मंदरस मंज़ॖय व्वंय नज़र यिवान। अथ बऺडिस कुठिस मंज़ ओस पऺथरिस प्यठ पॊट वाहरऻविथ बतॖ यिवान ख्यावनावनॖ पछ़्यन बड्यन दॊहन प्यठ। वुह त्रॖह सालर ॴस्य ह्यकान ॳक्यसॖय फेरस मंज़ बतॖ ख्यथ। तीच़ गुंजऻयिश ॴस आसान तथ बऺडिस कुठिस मंज। यॆति छुनॖ सवालॖय पऻदॖ सपदान ज़ि यिथ्य साल तॖ सबॖ यिन करन फ्लैटक्यन कुठ्यन मंज़। यॆति यॊदवय कॆंह लऻज़िमदार पऺछ़्य ज़ॖ त्रॆ रातस प्यठ रोज़नि यिवान छि, पऺन्य छि डलान ज़ि तिम कति तॖ किथॖ पऻठ्य सावोख। व्वसॖ द्रॊस छि वसान सामानस तुलॖ त्राव करनॖ सॗत्य ति क्याज़ि मुर्यन मंज़ छॆ नॖ तीच़ जायि। सोफव तॖ मेज़व छि जाय तमि आयि रऺटमॖच़ आसान ज़ि पनुन पान व्यापनावुन ति छु मुश्किल गछ़ान वख्तस।  कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

17.04.2021

17.04.2021, च़िथ्थॖर (चैत्र/चैत) ज़ूनॖ पछॖ (शुक्ल पक्ष) पऻन्च़म (पऺचमी) बटॖवार (शनिश्चरवार/शनिवार), श्री सप्तर्षि सम्वत 5097, नक्षत्र मृग, राश मिथुन (दुहॖचि 1.09 बजि प्यठॖ),ऋतु बसंत (चलान), नवरात्र (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

       नुंदॖ रॆशॖन्य श्रुक्य

ज़ऺरिस ज़र च़ाम हंगरे

बलि नॖ खंडॖ नाबद शकरे

सुय रंगुर छ़ारुन प्रथ गरे

युस क्रॖहनिस थानस छॊत करे

           अर्थात

अमि ख़यालॖ प्यॆयस कनन ज़र यॆमुक असर काड्यन प्यठ प्यॆयस युस नॖ खंड नाबद तॖ शकर या पलाल सॗत्य छु कॆंह बलनवोल। त्युथ वतॖहावुक गछ़ि छ़ान्डनॖ युन प्रथ गरि, युस अज्ञऻन्य (क्रॖहनिस) मनस ज्ञान ज़ॖच़ि गाशरावि।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *******

1. मालामाल (Rich)

2. मालामाल करुन (Enrich)

3. मऻली (Financial)

4. माला (Rosary/Garland/Necklace)

5. माला फिरॖन्य (To count one's beads/To pray)

              मुहावरॖ

1. मु: क्वकरि हॖन्ज़ि लति छि नॖ 

         पूत्य मरान

    अ: माजि हॖन्दि मार दिनॖ सॗत्य 

         छु नॖ शुर्यन न्वक्सान वातान

2. मु: क्वकुर हय थऺव्यज़्यन 

         म्वख्तॖ डेरस तति ति ह्यॆयि

         तछुन

    अ: इन्सान छु नॖ कुनि ति 

         हालतस मंज़ पनॖन्य आदत

         बद त्रावान

3. मु: क्वकुर हय ख्यॆयि ख़ार 

         तोति सपदिनॖ खार

    अ: इन्सान छुनॖ सिरिफ ख्यनॖ

         ख्यनॖ सॗती बजर प्रावान

       (पनॖन्य शुर्य ह्यॆछॖनऻव्यूख)

**************************

पंचान्ग:- ऊतरॖ प्यठॖ रूद्य ॳस्य आवॖर्य नवरॆह तॖ ज़ंगॖ त्रॆयि सॗत्य। नच़ुना फेरुना कॊर जान पऻठ्य। वऺलिव व्वंय अच़व ॳस्य बऺंंडिस कुठिस मंज़ युस कऺशीरि अथ च़ु पूर मकानॖकिस दॊयिमिस पोरस प्यठ ओस। यि कुठ ओस बकाया कुठ्यव ख्वतॖ बॊड पाहन तॖ तवय ॴस्य अथ कुठिस वनान बॊड कुठ। कुठिस अंदर अच़नॖ ब्रोंठॖय ओस प्यवान ख्वरबानॖ यानि बूठ वूठ वुज़स मंज़ॖय कडुन। अथ कुठिस आसॖ ज़ॖ दारि आंगनॖ तरफॖ तॖ अख दऻर कोचि तरफॖ खुलान। आंंगनॖ तरफॖक्यन दार्यन ॴस्य दारि पट्यव अलावॖ ज़ॖ ज़ॖ पंजरि पऺट्य ति। कोचि तरफॖ दारि ॴस्य सिरिफ ज़ॖ दारि पऺट्य तॖ ब्यॆयि ॴस बिहिन जाय ति। कुठिस मंज़ ओस अख ल्वकुट मेज़ यथ प्यठ जग, गडॖ, विलास वगैरा ॴस्य थवान। हचवि कुर्सी जोराह ति आसॖ अकि तरफॖ अथ कुठिस मंज़। कुठिस मंज़ ओस फरॖश आसान यानि वगुव, सतरऺन्ड, मसनन्दॖ, वगैरा तॖ लबि लबि  ॴस्य आसान गोल तकियि या शांदॖगऺन्ड्य डॊख दिनॖ बापथ। सऻनिस अथ बऺडिस कुठिस मंज़ ॴस्य दरवाज़ॖ अच़वुनॖय खोवरि तरफॖ लबि प्यठ ज़ॖ बऺड्य फोटुव यिम म्यऻन्यस बॖड्यबबॖ सॖन्दि वख्तॖक बूज़ुम ॴस्य लागनॖ आमॖत्य शीशवकिस फ्रेम मंज़। ॳकिस फोटवस मंज़ ॴस्य शारिका सॖहस प्यठ खऺसिथ, दॊयिमिस मंज़ ओस सीता, राम, लक्ष्मण तॖ हनुमान। स्यदॖस्यॊद लबि प्यठकिस फोटुवस मंज़ ओस कृष्ण भगवान तॖ बरॖ अच़ॖवुन दऺछनि तरफॖ ओस अख फोटु शंकर भगवान सुन्द। यिमन च़्वनवऺनी फोटूवन ओस कुनुय साईज़ यिहऻय ज़ॖ फूटॖ खजरॖ तॖ त्रॆ फुटॖ ज़ेछरॖ। कोचि तरफॖ दारि प्यठॖ ॴस्य अख अलमऻर्य ज़ीठ यथ मंज़ धार्मिक किताबॖ यानि कल्याण, शिव पुराण, भागवत तॖ कॆंह धार्मिक मैगज़ीन ॴस्य आसान। अथ सॗती ॴस ब्याख अख अलमऻर्य यथ मंज़ रेडियो ओस तॖ ब्यॆयि कुठ्युक बकाया सामानॖ बेतरी। बडि आकारॖक्य फोटुव लबन प्यठ आसनॖ सॗत्य ओस कुठ यिहऻय शान्ति वन ह्यु बासान। सकारात्मॖक्य व्यच़ार ॴस्य कुठिस मंज़ ॳच़िथॖय वूज़ान। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

16.04.2021

16.04.2021, च़िथ्थॖर (चैत्र/चैत) ज़ूनॖ पछॖ (शुक्ल पक्ष) च़ोरम (देवादेव) (चतुर्थी) (देवादेव) शॊकुरवार (शुक्रवार/जुम्मा/ भार्गवार) श्री सप्तर्षि सम्वत 5097, नक्षत्र रोहि, राश वृष (चलान)ऋतु बसंत (चलान), नवरात्र (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

**************************

           नुंदॖ रॆशॖन्य श्रुक्य

रॆश्य हय रॆश्युत पालहन

संग गालॖहन क्रॆयि हुन्दि अशॖ सॗती

रॆश्य छिनॖ रॆश्युत पालन

पान गालान च़खि ब्वगज़ॖ रॖशि सॗती

             अर्थात

रॆश्य यॊद रॆश्युत पालॖहन क्वसंग गालॖहन तॆलि तिम पनॖन्यव रॖत्यव कर्मव सॗत्य। तिम छि नॖ ज्ञानॖ रेह मंज़ॖ पनुन अंदकार ज़ालान। तिम छि च़ख, हसद तॖ रॖशॖ नारॖ हर विज़ि दज़ान आसान

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              *********

1. माल (Goods/Cargo/Riches/Wealth/Property)

2. मालदार (Rich/Wealthy/Moneyed)

3. मालि ग़नीमथ (Booty)

4. माल गुज़ऻरी (Land revenue/Revenue assessment)

5. मालि मुफुत (Free/Something without effort)

                मुहावरॖ

1. मु: क्वली ग्रज़ान कवय छख?

         आगुर वुछिथ

    अ: बजर छु पतॖ वतय आसान

2. मु: क्वलि ख्वतॖ क्वल छि सर्द

    अ: कांह मुसीबथ छु नॖ दॊयिमि

         ख्वतॖ कम आसान

3. मु: क्वलि काजिवठ खसि नॖ 

         हॊख

    अ: कांह व्वठ छ़ान्ठ छॆ नॖ 

          फऺज़ूल आसान

       (पनॖन्य शुर्य ह्यॆछॖनऻव्यूख)

**************************

पंचान्ग:- राथ ॴस ज़ंगॖ त्रय मगर  यॆमि लटिचि महामऻरी थऻव्य कुल्य आलमॖक्य लूख दहशतस मंज़ युथ ज़ि गरॖ न्यबर ख्वर त्रावनस थॊवुन बीम। सान्यन माज्यन ब्यॆन्यन न्वश्यन कोर्यन आव नॖ माल्युन ताम गछ़नॖ तॖ थॊवुख पनुन पान त्रॊपॖरिथ पनन्यन पनॖन्यन गरनॖय मंज़। शॊगुनॖचि ज़ंगि ख्वतॖ बास्येयि तिमन पनॖनि पानॖच रऻछ करॖन्य ज़्यादॖ ज़रूरी, पनॖनि नरि ज़ंगॖ परि पखॖ यॆमि महामऻरी निशि दूर थवनि ज़्यादॖ ज़रूरी। ती ति रूद जान। जऻनी तॖ सलामऺती ॴस तऺथ्य मंज़। यॆमि लटि ज़ोन नॖ मुनऻसिब सान्यव  संस्थायव ति ज़नानन आलव द्युन तॖ नून तॖ अतॖगथ बऻगरावुन। मोबाईलॖ दऺस्य आयि ख़बर अतर प्रॖछ़नॖ, ॴही तॖ ॴशिर्वाद दिनॖ तॖ ह्यनॖ,  मुबारक दिन तॖ सॗती ओस यिवान वनॖनॖ ज़ि पनॖनि पानुक ख़याल थवुन, शुर्यन ह्यस थवुन, बड्यन नॖ गरॖ न्यबर नेरनॖ द्युन, मास्क थवुन लऻगिथ याम न्यबर प्यॆयिवॖ मजबूरी मंज़ नेरुन। च़्ववापऻर्य छि नवि सरॖ यिहऻय कथ ज़ि फलऻन्य गव स्वर्गस कोविड सॗत्य। यि ति छु नॖ व्वंय फिकिरी तरान ज़ि यि गवा कोविडॖ सॗती किनॖ नविसरॖ आमॖच़ॖ महामऻरी सॗत्य। तथ महामऻरी छु नॖ वुनि नाव ति पताह। हा हाकार छु वुन्यक्यनस च़ुपासे। हालांकि सऻन्य मन तॖ प्राण छि  वछ़ि वऻलिंजि सॗत्य ॳज़्यकि दुहुक मुबारक दिवान मगर फ्रटॖतम छु सॗत्य। पऺन्द्य द्राव, मनावनॖ आयि नॖ तमि चमॖ खमॖ सान यि रातॖच ज़ंगॖ त्रय मगर माजि दीवी रोज़व मंगान ज़ि यॆति योर करि पर्दॖ। दूर च़ऺलॖरावि यि महामऻरी। ज़ुव ओर तॖ जहान् ऒर। ओसय प्रारब्दॖ ब्रोंठुस मनावव हर्षोलासॖ सान यि द्वह यानि ज़ंगॖ त्रय। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि नऺव तॖ प्रऻन्य महामऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

15.04.2021

15.04.2021, च़िथ्थॖर (चैत्र/चैत) ज़ूनॖ पछॖ (शुक्ल पक्ष) त्रय (देवादेव) तृतीया (देवादेव) ब्रसवार (ब्रहस्पतिवार/गुरुवार/ वीरवार), श्री सप्तर्षि सम्वत 5097, नक्षत्र कृति, राश वृष (चलान) ऋतु बसंत (चलान)...अज़ छि ज़ंगॖ त्रय

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

       नुंदॖ रॆशॖन्य श्रुक्य

यॆम्य थवि सथ ज़मीनॖ नव आसमऻनी गंग

तस बॖ मंगॖ सुय म्यॆ दिये

सु यॆलि रोश्यम हंगॖ तॖ मंगॖ

अदॖ कस बॖ मंगॖ कुस म्यॆ दिये

         अर्थात

सथ ज़मीन तॖ नव आसमऻनी गंग यॆम्य दयन मुहय्या असि थवि। तस यॊद बॖ बावॖ किन्य रजू गऺछ़िथ कॆंह मंगॖ, सु करि म्यानि व्यनऺच़ यकदम दस्तखत। यॊद नॖ बॖ सु याद करन च़िंह च़िंह स्वरन, तॆलि सु रोशनऻविथ कस ह्यकॖ मंगिथ तॖ कुस ह्यॆक्यम दिथ।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

              ********

1. मार (Beating)

2. मारुन (To kill/To murder)

3. मारतोल (Sledge hammer)

4. मार्च पास्ट (Marchpast)

5. मार्च करुन (To march)

           मुहावरॖ

1. मु: क्वकॖर तछान तॖ पूत्य

         ह्यैछान

    अ: शुर करि ती यि तसॖन्द्य

          ज़्यिठ्य करान आसन

2. मु: कोचि गरदऻनी गऺयि हालि

         हऻरऻनी

    अ: आवारगर्दी छि तबाह 

          करान

3. मु: क्वलि छ़ॖनुन छु आसान तॖ

         खारुन छु मुश्किल

    अ: बिगाडुन छु सऺहल 

         अमापॊज़ सु शेरुन पऻज़ुन

          छु मुश्किल

       (पनॖन्य शुर्य ह्यॆछॖनऻव्यूख)

**************************

पंचान्ग :- ख़बर कऻच़ा सऺदियव प्यठॖ आमॖच़ छि प्रथा पकवॖन्य असि कऻशिर्य बटन मंज़ ज़ि ॳज़्यकि द्वह आसॖ सानि माजि ब्यॆनि पनुन माल्युन गछ़ान रोज़ान तॖ वापस पनुन गरॖ यानि वऻरिव गरॖ शामस यिवान नून तॖ अतॖगथ ह्यथ। यथ दॊहस छु नाव प्यॊमुत ज़ंगॖ त्रय। ज़ंग यानि जान श्वगुन। सान्यन सारिनी व्वत्सवन मंज़, पर्वन प्यठ, बड्यन तॖ लूकन दॊहन प्यठ छु नून आमुत जान श्वगुन मानॖनॖ तॖ अतगथ यानि रॊपयि लक्ष्मी स्वरूप मानॖन। चूंकि वऺरी छु नॊव शुरू गोमुत, यिनॖ वोल समय नेरि ह्रोच़ तॖ फ्रूच़ अमि म्वखॖ छि अख मान्यता रूज़मॖच़ ज़ि न्वश गछ़ि गछ़ॖन्य पनुन माल्युन पनॖनिस मऻलिस माजि ब्यॆन्यन बायन बऺयकाक्न्यन रुत कान्छन बापथ तॖ वापस पनुन गरॖ यानि वऻरिव युन लक्ष्मी रूपस मंज़ जान श्वगुन ह्यथ यानि नून तॖ अतॖगथ ह्यथ। चूंकि नऺविस बहारस मंज़ तॖ नऺविस वऺरियस मंज़ यि ज़ंगॖ त्रय द्वह गछ़ि युन असान तॖ गिन्दान मनावनॖ, ख्यनाह च्यनाह ॴस्य मालिन्य दॖर्य ति करान तॖ वऻरिव दऺर्य ति। न्यॆनि बतॖ ओस यिवान बनावन, सति सिनि ओस यिवान ख्यनाह च्यनाह करनॖ हुति ति तॖ यॆति ति। यॆमिस ज़नानि मालिन्य तरफॖ कांह ओस नॖ आसान स्व ज़नान ॴस कुनि मंदरस गछ़ान तॖ लठ म्वकलावान या स्व ज़नान ॴस गछ़ान मालिनि तरफॖकिस कऻन्सि नऺज़दीकी रिश्तॖदारस निश तॖ ॴस ॴस छ़्यटरावान यानि चाय वाय च़्यथ पतॖ पनुन गरॖ वापस यिवान। अथ ज़ंगॖ त्र्यॆयि पतॖ छि कॆंह ब्यॊन ब्यॊन कहावच़ ति मानॖनॖ आमच़ॖ यॆमि मूजूब यि द्वह छु आमुत बारसस। अज़कल छि यि द्वह कॆंह सामाजिक संस्थायि मनावान ज़नानन न्यमंत्रन दिथ नूनॖ तॖ अतॖगथ दिथ ऱवख्सत करान। मगर अज़कल महामऻरी आसनॖ म्वखॖ आव नॖ न्यमंत्रन ति दिनॖ। ज़ंगॖ त्रॆयि द्वह ति ॴस्य कऺशीरि मंज़ बागन वागन मंज़ नच़ान फेरान रोज़ान। 1990-तॖ पतॖ ॳस्य बट गऺयि अख ॳकिस निश स्यठाह दूर तॖ सऻन्य यि परम्परा ति ह्यॆच़ॖन्य व्वंय फॖटिन्य हिश्य मगर ज़िन्दॖ थावनॖच कूशिश छि बरक़रार। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।  

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.comm प्यठॖ ति)

14.04.2021

14.04.2021,च़िथ्थॖर (चैत्र/चैत ज़ूनॖ पछॖ (शुक्ल पक्ष) द्वय(देवादेव) (द्विती) (देवादेव) ब्वदवार (बुद्धवार) श्री सप्तर्षि सम्वत 5097, नक्षत्र भरण, राश वृष (रऻच़ हॖन्ज़ॖ 12.10 बजि प्यठॖ), ऋतु बसंत (चलान), नवरात्र (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

         नुंदॖ रॆशॖन्य श्रुक्य

नफसॖय मन मऺच़रावी

मेठि तॖ ज़ेठि पुछ़े

तवय उलग तॖ पुलग रावी

कुनि नतॖ कवॖ मालि पुछ़े

           अर्थात

हतो मालि कमि खऻतरॖ छुख नॖ यि नफ़स गंडॖ रटान। नफ़स तुलनावी व्वटॖ मनस, मेठि तॖ ज़ेठि ख्यनॖ बापथ। यॆमि सॗत्य बेमतलब यॆरिलूक्य तॖ परिलूकुक स्वख गछ़ी अथॖ।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. माखज़ (Source)

2. मादॖ (Female)

3. नर (Male)

4. मऻदियथ (Materialism)

5. मादॖपरस्त (Materialistic)

              मुहावरॖ

1. मु: कॖहरिस सॗत्य गरॖ किथॖ

         कऺन्य कॊरुथ, यी दॊपनम

         ती कॊरुम

    अ: वुल्टॖ शख़सस सॗत्य कऻम

          करनुक तऺरीकॖ छु यी ज़ि 

          तसुन्दुय बोज़ुन हमेशॖ

2. मु: कॊवोक कत्यु, मॆहरनि 

         मॊंडि पतॖ कनि

    अ: यस ज़्यव ख़राब आसि सु

          छु स्यठाह एहतियात पतॖ

          ति वुचापॖ कथॖ करान

3. मु: क्वकॖर करिहे मान मगर

          पूत्यन क्याह करि

     अ: बाज़े छु ज़्युठ शुर्यव हॖन्द्यव

           कारव सॗत्य तंग यिवान

        (पनॖन्य शुर्य ह्यॆछॖनऻव्यूख)

**************************

पंचान्ग:- राथ ओस नवरेह। यॆमिस ति कऻन्सि म्यॆ मुबारक कॊर तोरॖकिस जवाबॖ तलॖ बास्यव म्यॆ ज़ि सु ओस स्वपनस मंज़ बादामवारि मंज़ बिहिथ मस्त ततिचि पोशॖ फुलियि मंज़, या ओस ज़न निशात बागस मंज़ कुल्य छ़ायन तल बिहिथ फंवारन  थलि थलि वुछान, अखा वुछुम शालॖमऻरॖ बाग़स मंज़ बोनि शेहजारस तल बिहिथ, अखा वुछुम ओस हारी परबतॖ च़ऺक्रीश्वरॖक्यन हेरन खसान, कुस ताम वुछुम माजि शारिकायि ज़ारॖ पारॖ करान ज़ि अंसि सारीनी त्रावतॖ ज़ंगि तऺल्य, पाफ शाफ गालतॖ, महामीरी च़ऺलरावतॖ तॖ असि वापस कऺशीरि वातॖनावतॖ, अखा वुछुम ज़ि सु ओस चॆशमॖ शऻही वऻतिथ ततिकिस पऻनिस गलि गलि च्यवान, अखा वुछुम रामॖच़ऺन्दरुन वोतॖमुत बतॖ स्युन ह्यथ तॖ तति मसनन्दाह वाहरऻविथ ख्यनॖच तयऻरी करान। अखा ओस डूंगस मंज़ हऻरवन कुन पकान तॖ डलस मंज़ ख्यलॖवऺथरन सॗत्य गिन्दान। सऻरी ॴस्य स्वपनस मंज़ यिमन जायन वऻत्यमॖत्य। म्यॆति प्रुछ़ुख। म्यॆति वुछ स्वपना तॖ वॊनमख ज़ि सुबहऻय प्रबातन द्रास पर्बथ कुन, वापसी प्यठॖ बनोवुम मन ज़ि सऻरी गरिक्य बऻच़ ल्वकॖ़ट्य बऺड्य ज़िठ्य कॗन्स ह्यथ गछ़व नेहरू पार्कि, चार चिनारी, यानि रॊपॖ लऻंन्क तॖ स्वनॖ लऻन्क वुछव तॖ ब्यॆयि कोतर खानॖ। होवुसबोटस मंज़ ब्यॆहमव तॖ नवरैह मनावव। व्वंय लगऻयिव तॊह्य अंदाज़ यॆमिस स्वपॖनस मंज़ आसन यिम ख़याल वऺथिमॖत्य तऺमिस कोताह तमाह नेरिहे यॊदवय सु प्रॊखुट पऻठ्य यिमन जायन फीरिथ यीयहे। वाकऺई ॴस्य नवरेहॖकि द्वह कऺशीरि मंज़ कऻशिर्य बटॖ  यिमन जायन गऺछ़िथ गाह त्रावान। बटॖ ॴस्य मोथ  मऺशरिथ पोशॖ फुलिया छावान बादामवारि। बस अडॖ ओस लूकव सॗत्य बऺरिथ आसान। ड्राईवर ॴस क्रकॖ दिवान रोज़ान हऻरवन, शालॖमऻर, निशात, चॆशमाशऻही। क्याह द्वह ॴस्य तिम ति। बस रूद अगर याद कॆंह सु गव पनुन ल्वकॖचार। म्यॆ छु सख़ फ़ेरान ज़ि सान्यव शुर्यव वुछ्य नॖ यिम बऺड्य द्वह यिमन जायन। मंदरन मंज़ तॖ यारॖबलन प्यठ ॴस बीरॖ आसान। शुर्य ॴस्य नव्यन पलवन अंग दिवान। नवरॆह द्वह ॴस्य न्यॆनॖ बताह ख्यवान, कऺलियि, रोगनजोश, मछ़ वगैरा। न्यॆनि बतुक सिल्सिलॖ ओस रोज़ान कऻल्यक्यथ च़ोरम ताम। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

13.04.2021

13.04.2021, च़िथ्थॖर (चैत्र/चैत) ज़ूनॖ पछॖ (शुक्ल पक्ष) ऒक्दॊह (देवादेव) (प्रथमा) (देवादेव) बॊम्वार (मंगलवार),श्री सप्तर्षि सम्वत 5097, नक्षत्र अशिव, राश मेष (चलान),ऋतु बसंत (चलान)...अज़ छु नवरेह तॖ वऻशऻकी (बैसाखी)...ॳज़्यकि प्यठॖ छि नवरात्र शुरु

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

         ह्रॊच़ तॖ फ्रूच़ नीरिन

         यि नॊव वऺरी सारिनी

        🥥🍊🍇🍎🥕🍓

        महामऻरी नाश -मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

           नुंदॖ रॆशॖन्य श्रुक्य

सरफस च़ऺल्यज़े अस्तस खंडस

सॖहस च़ऺल्यज़े क्रुहस ताम

दीनदारस च़ऺल्यज़े वहरस खंडस

लऻनिस च़ऺल्यज़ि नॖ ॳछि मुहस ताम

              अर्थात

हे इन्सान! सरुफ यॊद बुथि प्यॆयि तस गछ़ि रछ़ा दूर च़लुन। मगर सॖहस गछ़ि ॳकिस क्रुहस ताम दूर च़लुन। दीनदारस निश यॊद ॳकिस वऺरियस दूर रोज़ख, लऻनिस निश ह्यकख नॖ ॳकिस ॳछ टिटॖवॏरिस ति दूर च़ऺलिथ

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

           **********

1. मातहत (Subordinate/Inferior/Under)

2. माजरॖ (Happening/Occurrence)

3. माहोल (Environment/Surroundings/Milieu)

4. मासिवाय (Besides/In addition)

5. मात (Defeat)

               मुहावरॖ

1. मु: केन्कॖलचि छु डाई गऺर्य याद

         प्यवान

    अ: मशरनुक आदत, या, 

         वख्तस प्यठ नॖ याद प्यॊन

2. मु: कॆंह नॖ कऻम तॖ क्वलॖगोम

    अ: वख ज़ायि करुन

3. मु: कहन गरन कुनी तऻव

    अ: यॆलि स्यठाह व्यछ़य आसि

   (पनॖन्य शुर्य ह्यॆछॖनऻव्यूख)

**************************

पंचान्ग:- अज़ छु नवरेह यानि असि कऻशिर्य बटन हुन्द नॊव वऺरी छु ॳज़्यकि प्यठॖ गछ़ान शुरु। अज़ छु श्री सप्तर्षि सम्वतकि नवि वऺरियुक ग्वडॖन्युक द्वह गछ़ान शुरु। श्री सप्तर्षि सम्वतॖक्य 5096 वऺरी गऺयि पथकुन तॖ नॊव वऺरी यानि 5097-तुक वऺरी गव शुरु ॳज़्यकि प्यठॖ। चूंकि ॳस्य कऻशिर्य बटॖ छि पनॖन्य व्वत्सव, पर्व, वॊहरवोद, श्राद्ध, खान्दर वगैरा मनावान श्री सप्तर्षि सम्वत मुतऻबिक, अवॖ मूजूब छि ॳस्य ति यि द्वह हर्षोलास सान आमॖत्य मनावान। दपान छि ज़ि सोन यि श्री सप्तर्षि सम्वत छु सारिवॖय पंचान्गव मंज़ॖ प्रोन पंचान्ग यथ अज़ 5096 वऺरी गयि बन्येमॖतिस।   विडम्बना छि यि ज़ि ॳस्य कऻशिर्य बटॖ छि पंचान्गॖ दऺस्य ति छऺकॖरिथ। ति ज़न गव  ज़ि ज़्यनॖ वख्तॖ छि ॳस्य श्री सप्तर्षि सम्वतॖ हिसाब शुर्य सॖन्ज़ ट्यॆकिन या ज़ातुक बनावान मगर अस्पतालस मंज़ यानि यॆति शुर ज़न्मस यिवान छु तति छि लेखनावान क्रॖश्चन तिथि यथ ॳस्य वनान छि अंग्रीज़ तऻरीख, येलि शुर च़ाटॖहाल वातान छु, तति ति छि ॳस्य अंग्रीज़ तऻरीखॖय लेखनावनॖ तॖ यि अंग्रीज़ तऻरीख छु अमिस शुरिस ज़्यनॖ प्यठॖ अंतिम दॊहस ताम प्यवान पकनावुन। मगर गरस मंज़ बऺड्य द्वह लूक्य द्वह, खान्दर व्वछ़ब छु सपदान श्री सप्तर्षि सम्वतॖ हिसाबॖ। कॆंह कऻशिर्य बटॖ छि संक्रात फाकॖ दरान विक्रमी सम्वतॖ हिसाबॖ माने ॳस्य छि हुपऻर्य ति ख्वर थऺविथ तॖ यपऻर्य ति ख्वर थऺविथ। असि ह्यॊक नॖ वुन्युखताम यि निर्णय निथ ज़ि ॳस्य पकव ना अकि डन्जि। खऻर यि छु सोंचनस लायक़ विषय। अथ प्यठ कथबाथ करॖन्य छि ज़रूरी म्यॆ बासान ख़ास कर अज़कल ति क्याज़ि तकनीकी बदलाव छु स्यठाह ज़ोर रऺटिथ। नवरेह किथॖ पऻठ्य ॴस्य ॳस्य मनावान कऺशीरि मंज़। अथ प्यठ करव कथ ब्रोंहकुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव 

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

12.04.2021

12.04.2021, च़िथ्थॖर (चैत्र/चैत) गटॖ पछॖ (कृष्ण पक्ष) मावस (देवादेव) (अमावस्या) (देवादेव) च़ऺन्दॖरवार (सोमवार),श्री सप्तर्षि सम्वत 5096,नक्षत्र रेव, राश मेष (दुहचि 11.28 बजि प्यठॖ) ऋतु बसंत (चलान) द्रठॖपऻन्च़ुक (पंचक) म्वकलि अज़। श्री सप्तर्षि सम्वत 5096 वऺरियुक छु अज़ पऺतिम यानि अंतिम द्वह। अज़ छु शामस थाल बरुन तॖ तथ पगाह वारॖकारॖ सुबहस न्यॆन्दरि वऺथित बुथ वुछुन

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

            नुंदॖ रॆशॖन्य श्रुक्य

केंच़न कबर छॆय पोश ज़न शेरे

केंच़न कबर छॆय सियाह चाह

कॆंह गऺल्य साहिबॖ चाने वेरे

कॆंह गऺयि ज़ेरे अकि गुमराह

             अर्थात

रॖत्य कर्म करनवाल्यन किछ़ छॆ कबॖर तसॖन्ज़ि शेरे पोशॖ लागॖन्य। क्वकर्मियन हॖन्द्य बापथ छि क़बर ख्वडस बराबर। कॆंह गऺल्य दयस गऻर्य गऻर्य तॖ कॆंह गऺयि माया ज़ालस मंज़ फऺटिथ असॖलॖचि वति डऺलिथ।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. लायुन (To beat/To strike/To thrash/To lash)

2. लावल्द (Having no issue/Heirless)

3. लाकम (Reins/Bridle)

4. लागुन (To apply to/Imitate/To place/To attach/To stick/To join/To engage)

5. लांज़ (A long stick)

               मुहावरॖ

1. मु: खॊट मॊहर

    अ: सु शखॖस युस नॖ कुनि 

         कारस लगि

2. मु: ख्वरस प्यठ ख्वर

    अ: वऻर्यदाथ, या, वकानॖ

3. मु: ख्वडॖ गुपुन

    अ: युस शख़स पनॖन्य कथ

         अन्दरी रटि

       (पनॖन्य शुर्य ह्यॆछॖनऻव्यूख)

**************************

पंचान्ग:- कऺशीरि प्यठ च़लनॖ पतॖ ति ॳस्य कऻशिर्य बटॖ यपऻर्य यपऻर्य ति लऺग्य, ठोकुर कुठिच प्रथा रूज़ सॗत्य। हालांकि जायि हॖन्ज़ व्यछ़य मूजूब छि ठोकुर कुठि बजायि ल्वकॖट्य म्वकॖट्य मंदर यिवान फ्लैटन मंज़ कूनि कूनस मंज़ या कुनि ताखचस प्यठ थवनॖ मगर मनस मंज़ छु बाव सुय, बख्ति सॊय अल्बतॖ बदलाव छु आमुत क्रियायि मंज़। व्वंय छि नॖ तिथ पऻठ्य गन्टा वायान, वंख नाद तिथॖ पऻठ्य लायान, ट्यॊक करान वगैरा वगैरा। कुनि कुनि जायि मा आसि कऺशीरि हॖन्द्य पऻठ्य यिवान पाठ पूजा करनॖ मगर स्व गऺयि न आसनस बराबर। ज़्यादॖतर शुर्यन या बड्यन छि नॖ जंत्री मंज़ हऻविथ मंत्र ति तगान परॖन्य। हालांकि बालॖ यपोर लऺगिथ कऺर सान्यव बायव ब्यॆन्यव ह्यमथ तॖ खड़ा कऺरिख आश्रम, मंदर वगैरा मगर पाठ शालाय हॖन्ज़ व्यवस्था आयि नॖ करनॖ। हालांकि हवन, हूमा छि यिवान करनॖ, फाकॖ बतॖ ॴठम द्वह छु यिवान बऻगरावनॖ मगर यॆमॖच अशद ज़रूरत छि यानि शुर्य गीता जी परनावॖन्य, महिम्नापार परनावॖन्य, इन्द्राक्षी स्त्रोत्म परनावुन, यिमन चीज़न हॖन्ज़ व्यछ़य छि सऻनिस समाजस मंज़ द्वह पतॖ द्वह बडान गछ़ान। म्यॆ वुछ यिमन त्रॖहन वऺरियन मंज़ ज़ि यॆलि कांह स्वर्गवास छु गछ़ान, तमिस शवस अंतिम संस्कार करनॖ विज़ि छिनॖ ह्यकान जमाह गऻमॖत्य लूख स्यॊद आरती पूरॖ पऺरिथ या ब्यॆयि अख ज़ॖ मंत्र ज़बऻन्य पऺरिथ। असि पज़ि यिमन कऺमियन कुन थ्यान द्युन म्यॆ बासान। खऻर कथ ॴस चलान ठोकुर कुठॖच्य। कऺशीरि मंज़ ॴस जाया खुलॖ डूलॖ वॊथनॖ बेहनॖ बापथ, नच़नॖ फेरनॖ बापथ। यॊत वऻतिथ छि असि तमिच कऺमी बासान। पगाह अच़व ॳस्य बकाया कुठ्यन मंज़ यिम अथ दॊयमिस पोरस प्यठ आस्य आसान सान्यन लर्यन मंज़। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

11.04.2021

11.04.2021, च़िथ्थॖर (चैत्र/चैत) गटॖ पछॖ (कृष्ण पक्ष) मावस (अमावस्या) आथवार (रविवार/ ऐतवार) श्री सप्तर्षि सम्वत 5096,नक्षत्र उभा, राश मीन (चलान) ऋतु बसंत (चलान) द्रठॖपऻन्च़ुक (पंचक) (चलान)...चूंकि मावस छि ज़ॖ गछ़ान ॳज़्युक वॊहरवोद यी पगाह याने 12.4.2021 तॖ च़ऺन्दॖरवारि द्वह

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

      महामऻरी नाश -- मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

           नुंदॖ रॆशॖन्य श्रुक्य

खलॖर द्वदस साद क्या ज़ाने

बेद क्या ज़ाने नागॖर्य पंन

वान्दुर च़न्दनस तर क्या ज़ाने

यम क्या ज़ाने शाम ख्वफतन

            अर्थात

द्वदकि मज़ॖ निश थिथ खलॖर छि बे ख़बर, तिथॖ छु बेद कुल नागॖर्य पन निश अनज़ान। वान्दुर छु नॖ च़न्दनस क़दॖर ज़ानान, तिथयकऺन्य छु नॖ यम ख्वफतन या शाम मानान, तस छु यिनस वख गऺन्डिथ आसान।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

             *********

1. लालॖ ज़ार (Bed of tulip/Bed of roses)

2. लाम (Armed forces)

3. लायक़ (Able/Capable/Competent/Qualified/Worthy/Suitable)

4. लावॖ लशकर (Army with camp)

5. लायि (Pop corn)

                मुहावरॖ

1. मु: ख्यावुन छु नॖ रावान

    अ: कऻन्सि खऻर करुन छु नॖ

         ज़ायि गछ़ान

2. मु: खोसॖ ख्यन

    अ: सालॖ विज़ि प्रथ कुनि थफ

         दिन्य तॖ प्यून्ता प्यून्ता ख्यॊन

3. मु: खॊखॖ ब्रोर

    अ: च़र्यन हार्यन च़लॖनावनॖ

         बापथ ज़चन हुन्द इन्सान

     (पनॖन्य शुर्य ह्यॆछॖनऻव्यूख)

**************************

पंचान्ग:- हेरन खसन पतॖ ॴस्य वातान ॳस्य लरि हॖन्दिस दॊयिमिस पोरस प्यठ। अथ पोरस प्यठ ति ओस आसान वुज़ मगर ल्वकुट। बॖ करॖ यॆत्यनस पनॖनि मकानॖच कथ हालांकि प्रथ लरि यानि मकानस ॴस्य आसान वुज़किस त्र्यशवय तरफन कुठ्य अल्बतॖ कुठ्यन हॖन्द्य नाव ॴस्य आसान अलग अलग। असि ॴस्य कऺशीरि मंज़ डलहसन यार, हब्बॖकऺदलॖ ज़ॖ मकानॖ। अख मकान ओस व्यथि बऺठिस प्यठ त्रु पूर तॖ तलॖ अख गान। यि गान ओस तहखानॖ यथ यॊतिचि ज़बऻन्य मंज़ वनान छि बेसमैंट। दोयिम मकानॖ ओस च़ुपूर। द्वन मकानन मंज़ ओस अख आंगुन। बॖ छुस वुन्यक्यनस कथ करान च़ुपूर मकानॖच। हेरि खऺस्यथॖय बुथि स्यदॖस्यॊद ओस अख कुठ यथ वनान ॴस्य ठोकुर कुठ। यॊत ताम म्यॆ ज़्वन छु कऺशीरि मंज़ ओस प्रथ बटॖ गरस मंज़ ठोकुर कुठ आसान। म्यॆ छु बासान ज़ि भगवान कृष्णॖ सॖन्दिस नावस प्यठ छु प्यॊमुत  अथ कुठिस नाव ठोकुर कुठ ति क्याज़ि भगवान कृष्णस छु अख नाव ठाकुर ति तॖ ठाकुर छु कऻशिर्य ज़बऻन्य मंज़ यिवान वनॖनॖ ठोकुर। दॊयिम वजह ति ह्यकि ॴसिथ अथ कुठिस ठोकुर कुठ वनॖनुक सु गव यि ज़ि ल्वकॖट्यन शिव लिंगन ति छि ॳस्य वनान ठोकर। दॊयव नावव मंज़ॖ कथ नावस प्यठ छु अथ कुठिस ठोकुर कुठ नाव प्यॊमुत यि ह्यॆकिव तोह्य पानॖ ज़ऻनिथ। अथ ठोकुर कूठिस मंज़ ओस गर्युक ज़्युठ सुबहऻय न्यॆन्दरि वऺथित श्रान वान कऺरिथ पूज़ा पाठ करान। अथ ठोकुर कूठिस मंज़ ॴस अख अलमऻर्य मंदंरॖकिस आकारस प्यठ यथ मंज़ ब्यॊन ब्यॊन दीवी दीवताहन हॖन्ज़ॖ मूरच़ यानि मूर्ती आसान आसॖ, पूज़ायि हुन्द सोरुय सामान मसलन दूपॖ, कऻन्ठगन, ट्यॊक, नऻर्यवन, गन्टा, शंख, पोश, अर्ग, च़न्दुन, कॊंग, वगैरा ति ओस आसान। शिव लिंग ओस आसान यथ प्यठ पोन्य ॴस्य बावान तॖ पोन्य बावान बावान ॴस्य मंत्र परान रोज़ान तॖ गन्टा वायान रोज़ान। पतॖ ॴस्य शंख नाद दिवान। दूपॖ कऻंन्ठगन ॴस्य ज़ालान। पतॖ ॴस्य ट्यॊक करान गरिक्य सऻरी बऻच़। ठोकुर कुठिच्यन लबन प्यठ ॴस्य भगवान तॖ भगवऺती  हॖन्द्य शीशुक फ्रेम कर्य कऺर्य फोटू लऻगिथ आसान।  बड्यन दॊहन प्यठॖ ओस यिवान यि ठोकुर कुठ सज्जावनॖ तॖ सऻरी गरिक्य बऻच़ ॴस्य अथ ठोकुर कुठिस मंज़ अंदर न्यबर बिहिथ पाठ पूज़ा करान रोज़ान। ल्वकॖट्य म्वकॖट्य मंत्र ॴस्य आसान सारिनी शुर्यन या बड्यन ज़बऻन्य याद ति क्याज़ि ज़िठ्यन सॗत्य परनॖ परनॖ सॗत्य ओस तिमन ति तऻलीम लगान तॖ ओसुख याद रोज़ान। ज़िठ्यन हुन्द हय्या बीम ओस सारिनी तॖ छ़्यॊट श्रूच़्युक खयाल ओसुख रोज़ान। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

10.04.2021

10.04.2021,च़िथ्थॖर (चैत्र/चैत) गटॖ पछॖ (कृष्ण पक्ष) च़्वदह (चतुर्दशी) बटॖवार (शनिवार/ शनिश्चरवार) श्री सप्तर्षि सम्वत 5096, नक्षत्र पूभा (चलान), राश मीन (चलान) ऋतु बसंत (चलान) द्रठॖपऻन्च़ुक (पंचक) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

        महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

             नुंदॖ रॆशॖन्य श्रुक्य

परान परान पर गऺय

तिम खर गऺय किताबॖ बऻर ह्यथ

यिम दिलॖ निश बाखबर गऺय

तिम नर गऺय फज़ल तॖ अता ह्यथ

             अर्थात

किताबॖ कॆम्य गऺय बऻरखर, मगर यिम दिली तस अनज़ऻन्य सॖन्ज़ ज़ान करन तिम इन्सान लोनन रॖत्य फल। यिम यॆति यज़त तॖ आनंद प्रऻविथ पानस सॗत्य तोर किछ़ ति निन च़्वचि डऻल्य।

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ***********

1. लालॖच (Greed/Temptation)

2. लालॖच द्युन (To tempt/To allure)

3. लालॖच गछ़ुन (To be greedy/To long for/To desire)

4. लालची (Greedy/Selfish/Desirous)

5. लालॖ रॊख (Rosy cheeked)

                  मुहावरॖ

1. मु: ख्यनॖवोलॖय ख्यॆयि तॖ 

         ख्यावि, न ख्यनॖवोल क्याह

         करि

    अ: यस पानस ख्यनस हऻल

         आसि शु छु ब्यॆयिस ति

         ख्यावान

2. मु: ख्यनॖ मंज़ॖ व्वकुस

    अ: ॴसिथ बऺसिथ ति नॖ कॆंह

         अथि युन

3. मु: ख्यनॖ म्यट नऻल्य ज़ऺट गऺयि

         बऺड दौलत

    अ: ज़िन्दगी हॖन्ज़ बुनियऻदी

         ज़रूरथ पूरॖ गछ़ॖन्य

      (पनॖन्य शुर्य ह्यॆछॖनऻव्यूख)

**************************

पंचान्ग:- अमि वुज़ॖ प्यठॖ ॴस हेर दॊयिमिस पोरस कुन खसान। मगर ॳथ्य वुज़स मंज़ ओस आसान वारियाहान गरन हेरि तलॖकनि अख ल्वकुठ खॊत यथ मंज़ म्यॆच़ ॴस यिवान थवनॖ। पनॖन्यन नव्यन शुर्यन यानि यिम 1990-तॖ पतॖ कऺशीरि न्यबरय यथ सम्सारस मंज़ ज़न्मस आमॖत्य छि तॖ यिमन नॖ कऺशीरि हॖन्ज़ लर्यन जायन तॖ तिमन लर्यन मंज़ कमन कमन चीज़न क्याह क्याह सिफऺच तॖ खसूसियत ॴस आसान, तिमन चीज़न सॗत्य यॆमि मोबाईलॖ दऺस्य पऻर्यज़ान करनावॖन्य तिमन शुर्यन छु म्योन अख मक़सद ताकि तिमन तरि फिकिरि ज़ि यिमन चीज़न हुन्द क़दॖर ॳस्य अज़कल छि करान रोज़ान, तिमन चीज़न हुन्द क़दॖर ओस कऺशीरि मंज़ ग्वडॖ प्यठय यिवान करनॖ दफ अमा पॊज़ ॳस्य आयि मसऻवी ज़ानान तॖ पकान रोज़ान। कथ वऺछ़ म्यॆच़ि प्यठ। असि कऻशर्यन बटन ओस म्यॆच़ि सॗत्य वारियाह सॊन लगाव तॖ सम्बंद ति ज़न गव ज़ि म्यॆच़ मथनॖ पतॖ ॴस्य ॳस्य मानाय ज़ि सोरुय सपुद श्रूच़ तॖ साफ़। सुबहस न्यॆन्दरि वऺथित ॴस्य ज़ल मल कऺरिथ अथॖ म्यॆच़ि सॗत्य छलान साबनि सॗत्य नॖ। साबनि हुन्द इस्तिमाल यॊदवय करहऻव ति, ग्वडॖ ॴस्य म्यॆच़ मथान। बानॖ ॴस्य सूरॖ सॗत्य सुरनावान मगर बाकय बानॖ ॴस्य म्यॆच़ि सॗत्य छलान। बानॖ छलनॖच साबन ॴस्य नॖ इस्तिमाल करान। यि प्रथा आयि पतय। ठोकुर कुठिस मंज़ मंदरॖक्य चीज़ ॴस्य म्यॆच़ि सॗती यिवान साफ़ करनॖ तॖ ओस यिवान श्रूच़ मानॖनॖ। म्यॆच़ ॴस आसान गुरॖट्य म्यॆच़ य्वॊस मुसलमान ॴस्य गरॖ पतॖ गरॖ या कोचि पतॖ कोचि फ्वत्यन मंज़ कॖनान रोज़ान। यि म्यॆच़ ॴस यिवान बहच़न मंज़ ति। बहच़ याने बऺड शिकऻर्य यथ मंज़ हऻन्ज़ ॴस्य रोज़ान, ख्यवान च्यवान, व्वथान बिहान, श्वंगान। अम्युक ऒड हिसॖ ओस आसान यलय यथ मंज़ चीज़ थावनॖ ॴस्य यिवान कारॖबार करनॖ बापथ मसलन स्यख, स्येरि, सुरॖख्य, कनि, रूद्य, म्यॆच़, ज़्युन, दानि, त्वमुल, ओट वगैरा। यि म्यॆच़ ॴस यिवान अनॖनॖ पहाडव प्यठॖ। कॆंह लूख ॴस्य साबनि बदलॖ म्यॆच़ मथान श्रान करनॖ विज़ि। अज़कलक्यन चीज़न यानि साबन, सैनिटयज़र, हैण्ठ वाश, फेस वाश वगैरा जऻरी छि मगर कऺशीरि हॖन्ज़ स्व गुरॖट्य म्यॆच़ ॴस यिमन चीज़न कुनुय जवाब। म्यॆच़ि ओस पनुन महत्व मगर यि म्यॆच़ त्रऻव असि पथकुन। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव ॳज़्युक म्योन यि सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

09.04.2021

09.04.2021, च़िथ्थॖर (चैत्र/चैत) गटॖ पछॖ (कृष्ण पक्ष) त्रुवाह (त्रयोदशी) शॊकुरवार (शुक्रवार/जुम्मा/ भार्गवार),श्री सप्तर्षि सम्वत 5096, नक्षत्र पूभा, राश मीन (रऻच़ हॖन्ज़ॖ 12.16 बजि प्यठॖ), ऋतु बसंत (चलान) द्रठॖपऻन्च़ुक (पंचक) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

     महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

            नुंदॖ रॆशॖन्य श्रुक्य

ॳलमुक आगुर कऺलिमुक माने

क्रॆयि हुन्द आगुर येनी खन

शून्यहुक आगुर पानय ज़ाने

सऺदरुक आगुर लबस नॖ छ़्यन

             अर्थात

ज्ञानुक आगुर छु कलिमुक मानि ज़ानुन। सुय ज्ञान व्यवहारस मंज़ऺ ॳनिथ छु दय ज्ञान मनुष्य प्रावान युस दय यॆमि संसार रूप सऺदरुक तॖ शुन्युक छु आगुर

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ********

1. लाफ़ (Boast/Brag/Self praise)

2. लागत (Cost/Expenses/Expenditure)

3. लाल (Favourite/Darling/Dear)

4. लाल पऺरी (Fairy dressed in red)

5. लाल किताब (Red book/Repository of answer to every question)

              मुहावरॖ

 1. मु: ख्यॊन गछ़ि त्युथ युथ 

          ब्यॆयिस ख्वश यी

     अ: ख्यनॖ च्यनॖ क्यन आदॖतन

          प्यठ छि ब्यॆयि सॖन्ज़ नज़र

          आसान

2. मु:  ख्यतॖ गऻव गासॖ धर्मॖकि

          पासॖ

    अ: यॆलि कऻन्सि वऺसीलॖ ॳनिथ

         ज़ारॖ पारॖ करव

3. मु: ख्यमस खार तॖ होरस नॖ 

         हार

    अ: ख्वद गर्ज़ इन्सान, या, 

         कऻन्सि सिरिफ फऻयदॖ

         तुलुन अथॖरॊट नॖ करुन

        (पनॖन्य शुर्य ह्यॆछॖनऻव्यू

**************************

पंचान्ग:- वुज़स दॊयिमि तरफॖ कुठिस ॴस्य वनान बैठक। यि ति ओस वॊटुय आसान अमा पोज़ हुथ वऺटिस मंज़ ॴस्य ख्यवान थ्यवान तॖ यथ वॊटिस मंज़ ॴस्य बिहान, व्वशपाह कड़ान, तासा वासा गिन्दान। यि वॊट ति ओस आसान रवख ह्यु बॊड। ज़िठ्य ज़िठ्य ॴस्य अकि अंदॖ बिहान तॖ ज़नानॖ ज़नानॖ आसॖ दोयिमि अंदॖ बिहान या नतॖ तिम आसॖ अपऻर्यमिस वऺटिसॖय मंज़ ज़्यादॖतर बिहान तॖ गरॖच कऻम कार करान रोज़ान। सब्ज़ी च़ारॖन्य, त्वमुल च़ारुन, ओट छानुन, पलवन कुन्द्य करॖन्य। कुन्द्य माने प्रेस। बैठकॖ सॗत्य ओस आसान ल्वकुठ कुठ यथ वनान ॴस्य बानॖ कुठ। अथ बानॖ कुठिस मंज़ ॴस्य आसान गरॖच सऻरी ॳडिन्य गऺडिन्य याने बानॖ बठॖ, पलव दलव, ब्यॆयिति कॆंह फ़ालतू सामान। बेठकि मंज़ ति ओस आसान फरॖश कऺरिथ याने तलॖ बगॖव्य तिमन प्यठॖ सतरऺन्ड तॖ तथ प्यठॖ मसनंदॖ या कऻलीन या नमदॖ मतलब यॆमिस यिछ़ व्यवस्था आसिहे। कऻलीन नमदॖ वगैरा ॴस्य अमूमन वंदॖसॖय मंज़ वाहरावान। मसनन्दुक चलन ओस ज़्यादय पाहन। छुटी द्वह या आथवारि द्वह ॴस्य कॆंच़न गरन मंज़ तासॖ बिठ लगान। तास ॴस्य गिन्दान यार दोस्त, ॳहलॖक्य मऺहलॖक्य, गरिक्य बऻच़। ज़नानॖ आसॖ नॖ तास वास गिन्दान। लऺडकॖ लऺडकॖ ॴस्य गिन्दान अलग तॖ ज़िठ्य ज़िठ्य ॴस्य गिन्दान अलगॖय। शर्म हय्या ॴस प्रथ गरस मंज़। ज़नानॖ आसॖ पानय सारेयि कामि करान रोज़ान। यॆत्युक ह्यु रिवाज यानि कऻम करनावॖन्य दायव दऺस्य ओस नॖ कऺशीरि मंज़। ज़नानन हॖन्ज़ व्यस्तॖता ॴस रोज़ान यॆर तॖ सलयन सॗत्य या पन तॖ करोशी सॗत्य। सलयि तॖ यैरॖ सॗत्य ॴस्य वोनान बऺन्यानॖ, मोज़ॖ, अथॖपंजॖ, स्कार्फ वगैरा तॖ पंन तॖ करोशी सॗत्य ओस यिवान वोनॖनॖ मेज़पोश ल्बकॖट्य, बऺड्य, च़ॊकून्जल, तिकूनल, गोल, ज़्यीठ्य, छ़ॊट्य मतलब ब्यॊन ब्यॊन कॖसमव। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव म्योन यि ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

Koshursabak.blogspot.com प्यठॖ ति)

08.04.2021

08.04.2021,च़िथ्थॖर (चैत्र/चैत) गटॖ पछॖ (कृष्ण पक्ष) बाह (द्वादशी) ब्रसवार (ब्रहस्पतिवार/ गुरुवार/वीरवार), श्री सप्तर्षि सम्वत 5096, नक्षत्र शत, राश कुम्भ (चलान), ऋतु बसंत (चलान), द्रठॖपऻन्च़ुक (पंचक)(चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

    महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

             नुंदॖ रॆशॖन्य श्रुक्य

च़ॖ म्योन ख्वदाय बॖ च्योन बंदॖ

बंदस हिशिहम बान्दवॖय

कयऻमच़ वख्तन वुछहम अंदॖ

तति रसूलि ख्वदायस अथि कन्दवय

               अर्थात

ही दय च़ॖ छुख म्योन भगवान बॖ छुस च्योन पऻदॖ कॊरमुत बन्दॖ इन्सान। बंदस छि बांदव शूबान। म्यॆ छु पनॖन्यन यॆन्द्रियन वुल्टॖ सग द्युतमुत। कयऻमच़ वख्तॖ वुछहम निचि नज़रि। मगर म्योन फऻसलॖ छु हज़रत मुहम्मद सऻबॖन्यन अथन मंज़ युस म्यॆ पनॖनिस सायस तल रटि

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            ***********

1. लऻज़िम (Necessary/Urgent/Important/Essential)

2. लानथ (Reproach/Censure)

3. लावऻरिस (Unclaimed/Heirless/Stray)

4. लाबुर (Side of a hill)

5. लऻरी (Omnibus)

                 मुहावरॖ

1. मु: ख्यमॖ हऻ तॖ छुम नॖ मऻल

         ख्यमॖ नॖ तॖ मश्यम हऻल

    अ: ख्यनस कांह न तॖ कांह

         बहानॖ छ़ान्डुन

2. मु: ख्यॊन द्युन प्वलावॖ तॖ अथॖ

         छलुन ग्रऺमिथ

    अ: जान कऻम कऺरिथ स्व 

         मोमूली कथि सॗत्य 

         रावॖरावॖन्य

3. मु: ख्यॊन च्यॊन छु पानस

         पानस पामॖ छय बऻगरिथ

    अ: ख्यवान छि ॳस्य पनॖनि

          मर्ज़ी मुतऻबिक अमा पॊज़

          कॖठ छि कडान ब्यॆयिस

        (पनॖन्य शुर्य ह्यॆछॖनऻव्यूख)

**************************

पंचान्ग:-  राथ ॴस्य ॳस्य वॊटिस म़ंज़। चोकस मंज़ ओस आसान ऒकॖच़ोर ति तॖ ब्यॆयि ओस आसान ल्वकुट म्वकुट हाकोल। ऒकच़ऻरिस, दुच़ऻरिस या त्रुच़ऻरिस ॴस्य ज़्युन ज़ालान मगर हाकोल ओस चलान च़ॖनिफल्यव सॗत्य। अथ हाकऻलिस मंज़ ॴस्य लागान शॆश्यतरॖ पऺतरि या ल्वकॖट्य ल्लकॖट्य त्रॆ च़ोर श्यॊशतॖरॖव सीखॖ टुकरॖ तॖ तऺथ्य प्यठ ॴस्य त्रावान त्योंगुल तॖ च़ॖनिफऺल्य तॖ ॴस्य कऺहवॖ या शीर्य चाय हाकऻलिस प्यठ बनावान। थोकस मंज़ ओस आसान कऺश्य दमचूलॖ ति। अमि कऺश्य दमॖचूलुक इसतिमाल ओस यिवान कॆंच़न ख़ास मोक़न प्यठॖय करनॖ। ति ज़न गव ज़ि वंदस मंज़ ओस यिवान पोन्य वुशॖनावनॖ कऺश्य दमचूलस प्यठ तॖ अमि गर्म पानि सॗत्य ॴस्य पलव यिवान छलनॖ या सानि माजि, ब्यॆनि आसॖ कलॖ चलान या पोन्य लदान माने श्रान वान करान। चोकस मंज़ ओस होज़ ति आसान तॖ नलकॖ ति। बानॖ वानॖ ॴस्य ॳथ्य होज़स मंज़ यिवान छलनॖ। थोकस तॖ वऺटिस स्यमंज़ य्वॊस ल्वकॖट लब आसान ॴस्य ॶथ लबि मंज़ ओस दरवाज़ॖ आसान चोकस मंज़ अच़नॖ बापथ। छ़ॆचरुक श्रोच़रुक ख़याल ओस बाज़ऻब्तॖ पऻठ्य यिवान थवनॖ। छ़ॆट्यव अथव ॴस्य नॖ कुनि ति बानस अथॖ लागान। ख्वरॖन ओस नॖ किंहीं लऻगिथ आसान चोकस मंज़ बॆहनॖ विज़ि। थाल खऻस्य गिलासॖ ॴस्य यिवान वऺटिस मंज़ॖय सूरॖ सॗत्य सुरनावनॖ। शुर्य ॴस्य मंज़्य मंज़्य चोकॖ दासस प्यठ बिहिथ प्रारान रोज़ान कर गछ़ि छ़िरॖ च़ॊट तयार ख्यनॖ बापथ। दारि प्यठ बिहिथ ॴस्य म्वगॖल्य चाय तॖ फुल्कॖ ख्यवान रोज़ान। वंदस मंज़ ओस मंज़ लगान दारि प्यठ बेहनस। शीना ओस प्यवान रोज़ान तॖ ॳस्य ॴस्य ज़िन्दगी हुन्द लुत्फ तुलान रोज़ान। चोकि प्यठ यानि हचवि पीरि प्यठ पथर बिहिथ ॴस्य बतॖ ख्यवान। डाइनिंग टेबॖल ॴस्य नॖ कऺशीरि हॖन्द्यन लर्यन मंज़ आसान। अल्बतॖ नव्यन नव्यन मकानन मंज़ ओस यि रिवाज ह्यॊतमुत युन मगर आम तोर पऻठ्य ओस नॖ गरन मंज़ यिम चीज़ आसान। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी।

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक म्योन यि सबक़ podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)

07.04.2021

07.04.2021, च़िथ्थॖर (चैत्र/चैत) गटॖ पछॖ (कृष्ण पक्ष) काह (एकादशी) ब्वदवार (बुद्धवा) श्री सप्तर्षि सम्वत 5096, नक्षत्र धनि, राश कुम्भ (दुहचि 2.59 बजि प्यठॖ) ऋतु बसंत (चलान)..ॳज़्यकि प्यठॖ छु द्रठॖपऻन्च़ुक (पंचक) शुरु

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

       महामऻरी नाश ् मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वाहा स्वधा नमोस्तुते

**************************

             नुंदॖ रॆशॖन्य श्रुक्य

बुगॖ पऻर्य पऻर्य च्यानि क्वदरच़ॖय

ज़ोनुथ यस युथ दितुथ तस त्युथ अवकाथ

साहिबॖ पऻर्य च्यानि मऻर्यफऺच़ॖय

दितुथ रसूलि ख्वदायस मोजिज़ाथ

             अर्थात

ही दय च्यानि गऺच़ लगहऻ बलायि, यस युथ बानॖ ज़ोनुथ तस द्युतुथ त्युथ मोकॖ, समय या जाय। च्यानि मायायि ति गॊछ़ पऻर्य लगुन यॆमिकिन्य त्वहि हऺज़रत मुहम्मद सऻबस द्युतवॖ नामुम्किनस मुम्किन बनावनुक वर

**************************

पांछ़ कऻशिर्य लफ़ॖज़ तॖ तिमन हुन्द अंग्रीज़स मंज़ तर्जमॖ तॖ त्रे मुहावरॖ याने कऻशिर्य दपित

            **********

1. लाज़वाल (Ever lasting/Eternal)

2. लातमाह (Greedless/Without temptation)

3. लायलाज (Incurable/Irremediable)

4. लामहाल (Surely/Certainly)

5. लामज़हब (Irreligious)

               मुहावरॖ

1. मु: ख्यथ ति ख्यनची कल

    अ: सिरिफ ख्यनची परेशऻनी

2. मु: ख्यॆल्य कठ

    अ: अक्लि रॊस व्यॊठ पूठ

          इन्सान

3. मु: ख्यव च्यव रंगॖ च़रि कऻन्टुर

         लॊग वालॖ बरि

    अ: राह कस तान्य तॖ रटान 

          कस तान्य

        (पनॖन्य शुर्य ह्यॆछॖनऻव्यूख)

**************************

पंचान्ग:- ब्रांद यि दऺपज़ि ति ओस यिवान मानॖनॖ मकानुक मुकट। खान्दरस मंज़ ॴस सपदान माहर्यॆन महाराज़स ब्रांदॖ किस दरवाज़स प्यठॖय द्वार पूज़ा। ब्रांदकिस दरवाज़ॖक्यन द्वश्यवऺन्य तरफॖक्यन लबन प्यठ ओस यिवान खान्दरस प्यठ या मेखलायि प्यठ क्रूल खारनॖ, क्रूल माने रंगन हुन्द पोशॖ वऺथॖर, कुल्य लंजि, युस खुशी हुन्द प्रतीक ओस यिवान मानॖनॖ। अज़कल छि यि क्रूल खारान जंजगरॖक्यन दरवाज़न प्यठ या काग़ज़स प्यठ डिज़ाईन बनऻविथ यिवान जंज गरॖक्यन दरवाज़न प्यठ अलऻन्द्य त्रावनॖ। व्वंय रूद्य नॖ तिम ब्रांद तॖ न तिम दरवाज़ॖ। ब्रांदॖ दरवाज़ॖ ॳच़िथ क़दम ॴस्य प्यवान वुज़स मंज़। अथ वुज़स मंज़ ति आसॖ यिवान वारियाह कामि करनॖ। यॊदवय मोसुम ख़राब ओस आसान, वुज़स मंज़ॖय ओस यिवान त्वमुल छ़टॖनॖ, ओट छानॖनॖ, त्वमुल च़ारनॖ वगैरा वगैरा। वुज़स दऺछिन तॖ खोवॖर्य ॴस्य आसान कुठ्य। अथ कुठिस ॴस्य वनान वॊट। कॆंच़न गरन मंज़ ॴस्य अथ वॊटिस वनान स्वलॖहार। वऺटिस मंज़ॖ ओस ॳडिस हिसस मंज़ आसान चोकॖ। यॊदवय अज़कल छि गैसस प्यठॖय ख्यनॖ च्यनुक सामानॖ यिवान बनावनॖ, चोकस मंज़ ओस आसान म्यॆच़ुव दान तिमन दॊहन बनऻविथ। यि दान ओस ऒमूमन त्रु च़ोर आसान। दु च़ोर दान ति ओस आसान। ऒकॖच़ोर ति ओस आसान यथ वनान ॴस्य हाकोल। वॊटिस ॴस्य वनान बैठक ति। वॊटिस तॖ चोकस मंज़ॖ ॴस आसान ल्वकॖट लब खऻरिथ य्यॊस च़ोकस तॖ वऺटिस ॴस ब्यॊन कंरान। वॊटिस मंज़ ओस आसान वगुव या पतॖज्य वाहरऻविथ तॖ तथ प्यठॖ ओस आसान मसनंदॖ वाहरऻविथ।  दारि तॖ पंजरॖ पऺट्य ॴस्य आसान अथ वॊटिस मंज़। पऺथरिस प्यठॖय ॴस्य बिहान तॖ पथर बिहतॖय ॴस्य ख्यवान च्यवान। खुलॖ डुलॖ जाय ॴस आसान। नरि ज़ंगॖ ॴस्य बॆ-फ्रूक पऻठ्य वाहरावान। चोकस मंज़ ओस आसान गरवंजॖ यथ प्यठ नॊट या गागॖर ॴस आसान पोन्य बऺरिथ। कथ छि जऻरी। दय कऺरिन्य असि सारिनी पनॖन्य यऻरी तॖ दूर गऺछ़िन यि महामऻरी। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवॖन्य कथ बाथ करव

**************************

नऺविव तॖ फॊलिव

 भूषण कौल "दीप"

(बूज़िव म्योन यि ॳज़्युक सबक़

podcast दऺस्य ति)

https://anchor.fm/bldeep

(यि सबक़ ह्यॆकिव तोह्य वुछिथ

koshursabak.blogspot.com प्यठॖ ति)