21.11.2021

21.11.2021, मॊंजहोर (मार्ग/मगर) गटॖ पछॖ (कृष्ण पक्ष) द्वय (द्वितिय) आथवार (रविवार/ऐतवार) श्री सप्तर्षि सम्वत 5097, मक्षत्र रोहि (चलान) राश मिथुन (रऻच़ हॖन्ज़ि 9.10 बजि प्यठॖ) ऋतु हेमन्त (चलान)

*************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

*************************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

*************************

कऻशिर्य बटन गव सख़ न्वकसान। बरादरन वॊन तीज़मालि। आहनबा सु गवा न्वक्सान, यि गऺयि त्रठॖय। पनॖनि वऻन्सि छुनॖ ज़ांह ति यि तूफान वुछमुत। तीज़मालि द्युत जवाब बरादरस। बरादरन थऺव कथ जऻरी यि वऺनिथ ज़ि सान्यन शुर्यन प्यठ प्यव ब्रख वारियाह। कऺशीरि मंज़ ओस शुर बडान तॖ पऺरिथ लीखिथ ॴसॖस सरकऻर्य नोकरीयाह मेलान तॖ ओस मऻलिस माजि ॳछन तलॖय रोज़ान। मऻलिस मनाज़ि ति ॴस च़म शिहिज रोज़ान शुर कॊट पानस ब्रोहकनि वुछिथ। हय अदक्याह सु ओसा कम तस्लाह आसान। तीज़मालि वॊन बरादरस। हालांकि सरकऻर्य नोकरियव खऻतरॖ ति ॴसॖख प्यवान दोरॖ दोर करॖन्य, ज़ुव च़टुन, ॳक्यसॖन्ज़ सुफऻरिश ब्यॆयिसॖन्ज़ सुफऻरिश छ़ान्डॖन्य तॖ अदॖ ओसुख कॆंह मेलान। आहनी अक्सऺरियतस मंज़ ॴस नॖ अक्लियतस व्वमेद रोज़ान मगर व्वथ वलद कऺरिथ ओसुस ॴखरस कॆंह न तॖ कॆंह मेलान तॖ ओस फ्रख ह्यु त्रावान। कांह कांह शुर ओस ट्रेनिंग करनि बापथ कऺशीरि न्यबर नेरान। मगर कऺशीरि प्यठॖ च़लनॖ पतॖ बदलेयि तस्वीर सऻरॖय। सरकऻर्य नोकरी गऺयि गऻबॖय। हतव शुर्यव मंज़ॖ छि नमनमथ शुर्य व्वंय प्राईवेट नोकरीयन मंज़ तॖ छि यि दऺप्यज़ि ति अलऻन्द्य बिचऻर्य। कर दिनख जवाब नोकरियन मंज़ॖ, खबरॖय छख नॖ लगान। खुलॖ पऻठ्य छिनॖ शाह ह्यकान ह्यथ। च़ोर दॊह यॊदवय च़ेर गछ़्यख च़क्जि तलॖ छिख च़ऻन्गिज निवान कऺडिथ तॖ ह्यवान बिचऻर्य छ़्रटॖ छ़्रठ करॖन्य। बरादरन द्युत थख ह्यु कथि। त्रैशि गिलासा च्योन तॖ ब्यूठ तीज़मालि हॖन्दिस बुथिस कुन मुदय गऺन्ठिथ। तीज़माल ति गऺयि कथ ताम ख्यूबस मंज़। कथ छि जऻरी    

*************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""""""""""

कऻशिर ग्रन्द - गिनती कश्मीरी में - अकहऻठ (इकसठ) दूहऻठ (बासठ) त्रूहऻठ (त्रॆयसठ) च़ूहऻठ (चौंसठ) पान्च़ॖहऻठ (पैंसठ)

*************************

नऺविव तॖ फॊलिव

भूषण कौल "दीप" 

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)