10.11.2021

10.11.2021, कार्तिक (कतक) ज़ूनॖ पछॖ (शुक्ल पक्ष) शॆयम (षष्ठी) देवादेव ब्वदवार (बुधवार), श्री सप्तर्षि सम्वत 5097, नक्षत्र उ.षा, राश मकर (चलान), ऋतु हरुद (शरद) (चलान)...चूंकि पगाह छि सतम रावान पगहुक वॊहरवोद यी ॳज़्य

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

***************************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमस्तुते

**********************

तीज़मालि च्यावनोव बरादर म्वगॖल्य चाय तॖ तथ सॗत्य दिच़ॖनस दुकॖवारि फुल्कॖ जोरॖ तारॖ मरॖ। बरादरन रचेयो चायि खोस अथॖ सॗत्य मगर तीज़मालि दिच़नस दऺज्य तॖ दॊपनस खोस हाबा छुय तॊत अथस प्यठ यी नॖ रटनॖ। बरादर गव हऻरान खोस वुछिथ। मऻजी तॊह्य छिवा वुनि खऻसिस मंज़ॖय चाय च्यवान। तीज़मालि कऺर असनऻहना तॖ वॊनुन बरादरस। म्यॆहाबा छु नॖ कपस मंज़ वार यिवान सुति म्वगॖल्य चाय। यिम शुर्य छि च्यवान कपन मंज़ॖय मगर म्यॆ छि थऻवमॖच़ पनॖन्य खऻस्यहऻन अलग। खऻस छिवा मूजूद त्वहि। प्रुछ़ बरादरन। आहनबा खऻस्य छि मगर ऊर्य छि प्यथ अल्मारि मंज़। मऻजी यथ म्वगॖल्य चायि छि वनान कऺहवॖ ति। कऺशीरि मंज़ ॴस्य मुस्लमान वनान कऺहवॖ तॖ बटॖ ॴस्य वनान म्वगॖल्य चाय। यिथय पऻठ्य ॴस्य ॳस्य वनान शीर्य चाय मगर मुस्लमान ॴस्य वनान तथ नूनॖ चाय। तिमन मंज़ व्वथनॖ ब्यॆहनॖ सॗत्य सॗत्य ॴस्य ॳस्य ति म्वगॖल्य चायि कऺहवॖ वनान। मुस्लमान ॴस्य पऻनिस आब वनान मगर ॳस्य ॴस्य नॖ आब वनान। ॳस्य ॴस्य पोन्य वनान। मऻजी अथ म्वगॖल्य चायि मंज़ कम कम चीज़ ॴस्य यिवान रलावनॖ। तीज़मालि ह्यॆत्य नाव वनॖन - समावारस मंज़ हाबा ॴस्य पोन्य, म्वगॖल्य चाय वऺथॖर, मऺदरेर, च़ीटिथ ॴलॖ, च़ीटिथ बादाम, रॊंग,मरॖच़, क्वंग, दालचीन च़ीटिथ, अदरख, गुलाब वऺथॖर। यिम काह चीज़ मिलनऻविथ ओस बनान कऺहवॖ। मगर अज़कल छिनॖ यिम चीज़ नऺनी। व्वंय छि त्रावान चायि वऺथॖर तॖ ॴलॖ बादाम तॖ दालचीनी प्यूंता तॖ छि च्यवान। अथ आसिहे आसान मुश्कि अम्बर। हाय वनय क्याह स्व चाय क्याह ॴस बनान। च्यॆ व्वंय यि गछ़ी यख। कथ छि जऻरी

**********************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

"""""""""""""""""""""""""""""""

कऻशिर ग्रन्द - गिनती कशमीरी में - शॆ (छे:) सथ (सात) ॴठ (आठ) नव (नौ) दऺह (दस)

**********************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)