03.11.2021

03.11.2021, कार्तिक (कतक) गटॖ पछॖ (कृष्ण पक्ष) त्रुवाह (त्रयोदशी) देवादेव ब्वदॖवार (बुधवार), श्री सप्तर्षि सम्वत 5097, नक्षत्र हस्त, राश तुला (रऻच़ हॖन्ज़ॖ 8.53 बजि प्यठॖ) ऋतु हरुद (शरद) (चलान) चूंकि पगाह छि च़्वदाह (चॊतुर्दशी) रावान, पगहुक वॊहरवोद यी ॳज़्य

****************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

****************************

  महामऻरी नाश - मंत्र

जयन्ती मन्गला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

***************************

कऻशुर गुरु जी या ब्रह्मा जी समाजस मंज़ न आसनॖ म्वखॖ रूद्य ॳस्य धार्मिक ज्ञानॖ निशि स्यठाह दूर। कऺशीरि मंज़ ॴस्य प्रथ मऺहलस मंज़ आसान ज़ॗज़ त्रॆ त्रॆ मंदर तॖ सऻन्य शुर्य या बऺड्य ॴस्य दॊहय न तॖ मंज़्य मंज़्य दीवी दीवताहन हुन्द दर्शुन करान रोज़ान। टनलि यपोर तरनॖ पतॖ दूरेयि तिम मंदर ति असि निशि। क्वल ब्रह्मुन ओस कुनि कुनि मोक़ा प्यठ, व्वत्सवस प्यठ यॆज़मनस निश यिवान रोज़ान कुनि न तॖ कुनि बहानॖ तॖ यज़मनस या तमि गरॖक्यन बऻच़न ओस कम अज़ कम कुनि कुनि दुहुक महत्व ति वनान रोज़ान। मगर यज़मनसुन्द बुरॖ बरताव वुछिथ बदलोव ब्रह्मा जियन पनुन पेशॖ तॖ ॳस्य गऺयि दूर तमि ल्वकटि म्वकटि ज्ञान निशि ति। योर यिथ न रूद मंदर, न ब्रह्मन तॖ न सु अध्यात्मिक ज्ञान। कमाल कॊर असि बटव पर ज़ऻच़ हॖन्द्य रीति रिवाज पानॖनऻविथ तॖ पनॖन्यन रीच़न रिवाजन मऺशरऻविथ या पर ज़ऻच़क्यन रीच़न सॗत्य मिलनऻविथ। मस्लन करवा चोथ, भाई दूज, लोडी, धन तेरस,छोटी होली, बडी होली, वगैरा वगैरा। पनॖन्य व्वत्सव तस्लन संकट च़ोरम, गणॖ च़्वदह, गाडॖ बतॗ, यक्ष अमावस,तीलॖ ॴठम वगैरा वगैरा  ह्यॆत्य मऺशरावॖन्य। माजि ज़्यव वनॖनस ति छि ॳस्य मंदछान ह्यु तॖ पनॖन्यन शुर्यन सॗत्य ति छि नॖ तथ ज़बऻन्य मंज़ कथ करान। ॳस्य कमि बुथि वनव ज़ि ॳस्य छि कऻशिर्य बटॖ। ॳस्य गऺयि जऻन्य ति तॖ मऻल्य ति। गरॖ रऻवीय रऻव्य, पर ज़्यॆवि ति कॊर असि प्यठ कब्ज़ॖ तॖ ॳस्य आयि व्वंय पर ज़ऻच़ किस गिरिफ्तस मंज़ पूरॖ पऻठ्य तॖ अमि ज़ालॖ मंज़ नेरुन छु बासान दुशवार ति क्याज़ि असि गऺन्ड पानय पऻन्य पानस यि तार। कथ छि जऻरी

***************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

****************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)