07.11.2021

07.11.2021, कार्तिक (कतक) ज़ूनॖ पछॖ (शुक्ल पक्ष) त्रय (तृतीया) देवादेव आथवार (रविवार/ऐतवार) श्री सप्तर्षि सम्वत 5097, नक्षत्र ज्येष्ठ, राश धनु (रऻच़ हॖन्ज़ॖ 09.04 बजि प्यठॖ) ऋतु हरुद (शरद) (चलान)

***************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

****************************

  महामऻरी नाश - मंत्र

जयन्ती मंगा काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

***************************

सत्य दीव छु दरअसॖल नारायण सॖन्ज़ पूज़ा। सत्य माने पज़र। नारायन छु पॊज़ तॖ बकाया छि सऻरॖय माया या मिथ्या। यि सत्य दीव छि कऺशीरि मंज़ कऻशिर्य बट स्यठाह कालॖ प्यठॖ आमॖत्य करान दीवऻली व्वत्सवस प्यठॖय योत नॖ बऺल्कि वारिहान मोक़न प्यठ। सऻंक्रऻच़ प्यठ ति ॴस्य सत्यदीव करान मगर यि प्रथा ह्यॆच़ॖन वारॖ वारॖ कम कम गछ़ॖन्य। व्वंय छि केंच़नॖय मोक़न प्यठॖय यि सत्यदीव ॳस्य बटॖ करान। दपान दीवी दीवताहन छि मॊदॖर्य चीज़, मॊदुर वऻणी, मॊदुर्य व्यच़ार ख्वश करान तॖ मॊदुर्य पूर्य छि अन्नुक प्रऺतीक यिवान मानॖनॖ तॖ तवय छि सत्यदीव करान रोज़ान तॖ नारायणस, गणेश जियस, लक्ष्मी जी तॖ समस्त दीवी दीवताहन क्यन नावस प्यठ सत्यदीव बनावान तॖ नऺवीद किस रूपस मंज़ तिमन ब्रोंहकनि थवान तॖ यछ़ा करान ज़ि तिम सऻरी दीवी दीवता रूज़िन ख्वश तॖ कऺरिन असि प्यठ अनुग्रह तॖ सूज़िन स्वख समृद्धि हर हमेशॖ। यि यछ़ा छि ॳस्य प्रे्यपुन परान परान करान तॖ तिमन आवाहन करान ज़ि तिम करन यि सोन नवीद स्वीकार। तीज़मालि वॊन यि बरादरस तॖ बरादर गव कन दिथ बोज़ान। मऻजी यि छु पॊज़ ज़ि सऻन्य संस्कार छि स्यठाह थऺद्य तॖ रॖत्य रुद्यमॖत्य। बरादरन वॊन तीज़मालि कुन। यिम हाबा छि सऻन्य संस्कारॖय ज़ि ॳस्य छि मऺर्य मऺर्य ति ज़िन्दॖ वुन्युखताम। सान्यव ऋश्यव मुनियव तॖ सान्यव ज़िठ्यव छि दिच़मॖच़ वख्तॖ वख्तॖ यिछ़ॖय शिक्षा तॖ ज्ञान युस ॳस्य आयि वुन्यखताम वरतावान। तीज़मालि वॊन बरादरस। व्वमेद छि ज़ि यॆति ब्रोंहकुन ति रऺछ़रावि यि परम्परा तॖ मऺर्यादा सऻन्य नऺव पुय। बरादरन कऺर यि मनोकामना। तथास्तु। तीज़मालि मॊंग भगवानस हलम दऻरिथ। कथ छि जऻरी  

**************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

***************************

नऺविव तॖ फॊलिव

भूषण कौल "दीप (बूज़िव ॳज़्युक सबक़ म्यानि ज़्यॆवि ति)

(ॳज़्युक सबक़ वुछिव

podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)