08.11.2021

08.11.2021, कार्तिक (कतक) ज़ूनॖ पछॖ (शुक्ल पक्ष) च़ोरम (चतुर्थी) देवादेव च़ऺन्दॖरवार (सोमवार) श्री सप्तर्षि सम्वत 5097, नक्षत्र मूल, राश धनु (चलान) ऋतु हरुद शरद (चलान)

*************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ। वुद्यूग करव मुकाम प्रावव

**************************

  महामऻरी नाश - मंत्र

जयन्ती मंगला काली भद्रकाली कपालिनी। दुर्गा क्षमा शिवा धात्री स्वहा स्वधा नमोस्तुते

*************************

मऻजी च़्यॆ वॊनुथ ज़ि सऻन्करऻच़ दॊह ति ॴस्य कऻशिर्य बटॖ सत्यदीव बनावान। यि सऻन्कराथ क्याह मतलब छि थवान। बरादरन प्रुछ़ तीज़मालि। म्यॆहाबा छुय नॖ ज़्यादॖ ज्ञान अथ मुतलक। अल्बतॖ म्यॆ छु बूज़मुत ज़ि कऻशिर बटॖ ॴस्य विक्रमी सम्वतक्यन ऱयतन हॖन्द्यन पऺत्यमिस दॊहस दपान सऻन्कराथ तॖ अमि दॊह ॴस्य सत्यदीव बनावान। तीज़मालि द्युत जवाब बरादरस। बरादरन द्युत पनॖनिस ज़ॊहनस ज़ोर ह्यु तॖ वॊनुन तीज़मालि कुन। म्यॆहय प्यव याद। क्याह प्यॊय याद। प्रुछ़ तीज़मालि। दपान अमि सऻन्करऻच़ दॊह छु सिरियि भगवान अकि रऻश्य मंज़ॖ नीरिथ दॊयिमि रऻश्य मंज़ अच़ान। तवय छि अथ दॊहस वनान सऻन्कराथ याने मास अंत या ऱयतुक पऺतिम दॊह। बरादरन वॊन तीज़मालि। चूंकि कऻशिर्य बटॖ ॴस सिरियस ति पूज़ान तवॖ म्वखॖ ॴस्य तिम अमि दॊह सत्यदीव बनावान तॖ यछ़ा करान ज़ि नवि रऻश्य मंज़ ॳच़िथ गछ़ि सिरियि भगवान पनुन अनुग्रह करुन। बरादरन पकनऻव कथ ब्रोंहकुन यि वऺनिथ ज़ि कऻशिर्य बटन मंज़ ति छि ज़ॖ तबकॖ ॴस्यमॖत्य याने मलॖ मऻस्य तॖ भानु मऻस्य। ख़बर हाबा ति क्याह गव। तीज़मालि प्रुछ़ बरादरस। बरादरन द्युतनस जवाब ज़ि मऻजी यॊत्ताम म्यॆ बूज़मुत छु सु गव यि ज़ि ज़ूनि छि वनान मल ति संस्कृत ज़बऻन्य मंज़ तॖ सिरियस छि वनान भानु ति तऺथ्य ज़बऻन्य मंज़। सऻन्य पूर्वज यिम सिरियस पूज़ान ॴस्य तिमन आयि वनान भानुमऻस्य तॖ यिम ज़ूनि आयि पूज़ान तिमन ॴस्य वनान मलॖमऻस्य। वख गव पकान, पकान गऺयि तिम तबकॖ ति तॖ गऺयि वारॖ वारॖ रलॖमिलॖ गछ़ान। अम्युक ति मा आसिहे कॆंह वाठ सऻन्करऻच़ सॗत्य। कथ छि जऻरी 

**************************

कऻशुर ह्यॆछिव कऻशुर पऺरिव कऻशिर्य पऻठ्य पानॖवुन्य कथ बाथ कऺरिव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(यि सबक़ वुछिव podcast दऺस्य ति)

https://anchor.fm/bldeep

(यि सबक़ वुछिव koshursabak.blogspot.com प्यठॖ ति)