09.02.2020

09.02.2020, माघ (माघ) ज़ूनॖ पछॖ (शुक्ल पक्ष) पुनिम (देवादेव) (पूर्णिमा) आथवार (रविवार/ एतवार) श्री सप्तर्षी सम्वत 5095, राश सिंह (रऻच़ हॖन्ज़ 7.42 बजि प्यठॖ) ऋतु शिशर (चलान)..अज़ छि काव पुनिम ति
**************************
             गुरु स्तुति   
हरौ रुष्टे गुरु-स्त्राता गुरौ रुष्ठे न कश्चन
सर्व देव-स्वरूपाय तस्मै श्री गुरवे नम:
**************************
             लल वाक् 
क्वल तय म्वल कथ क्युत छुय
तॊत क्युत छुय शांत स्वभाव
क्रेयि हुंद आगुर वति क्युत छुय
अंतिह क्युत छुय ग्वरॖ सुन्द नाव
          **************
अर्थात:- कुल और धन किस लिए  चाहिए तुम्हें। वहां के लिए तो शांत स्वभाव ही चाहिए। क्रिया का जो स्रोत अर्थात प्रभु है वही पथ में काम अता है और अंत में तो गुरु का नाम ही काम आता है।
**************************
           नुंदॖ ऱेशिन्य श्रुक्य     
अथॖ ज़ॖ टुविथ ख्वर ज़ॖ वऻहरिथ
निनम दुनिहिच लोलऺर त्रऻविथ कथ
गरे निनम गीह बार त्रऻविथ
यिनम अंद मज़ार सऻविथ कथ
नुन्दद्यन हूर थवन वलॖलऻविथ
डॗठ्यन दॊज़खुन नार तऻविथ कथ
         *************
माने:- मऺरिथ थवनम अथॖ ज़ॖ वऺटिथ तॖ ख्वर वऻहरिथ। दुनिहियुक लोह लंगर तॖ पनुन बार लूकन प्यठ त्रऻविथ निनम गरि पनॖनि कऺडिथ तॖ अंदमज़ार सावनम कब्रि मंज़। नुंदॖ सऻबनि त्रायि यिम ज्ञऻनी आसन तिमन ललनावन तति हूर। अज्ञऻन्यन ज़ालन दोज़खॖन्य नार
**************************
पंचान्ग:- व्यच़ार अख आव अकि अंदॖ प्यठॖ खान्दरन मुतलक। दपान यिथ पऻठ्य प्वत कालि स्वयंवर ओस यिवान करनॖ तिथय पऻठ्य ह्यकव ॳस्य कऻशिर बटॖ पनॖनि ज़ऻच़ मंज़ यि प्रथा शुरु कऺरिथ मगर ब्यॆयिस ॳकिस तरज़स तॖ रूपस मंज़। कॆंह ज़ऻन्यकार लऺडकॖ तॖ लऺडकी अनोख कुनि ॳकिस मंदरस मंज़ या कुनि होटलस या कुनि बागस मंज़ तॖ सॗत्य अनोख तिहिन्द्य मोल-मऻज्य तॖ अकि अकि कऺरिथ प्रॖछ़व लऺडकस तॖ लऺडकी ज़ि कुस कऺमिस पसंद छु। छा ति किनॖ न। लऺडकॖ तॖ लऺडकी कऺर्यतन पानॖवुन्य प्रछ़गऻर ति योदवय यछ़न। अगर  आंकार करि कांह ति अख, तती करन तिहुन्द मोल-मऻज्य अख ॳकिस सॗत्य अथवास तॖ खान्दरॖच कथ बाथ। वुछनस तल छु यिवान ज़ि अज़कल यिम ज़ऻच़ न्यबर खान्दर छि यिवान करनॖ, तिम कति छि पननि ट्यॆकनि मिलनावान। यॆलि नॖ तिमन दूष यिवान छु मानॖनॖ, त्यॆलि क्याह ज़रूरत छु व्वंय असि पानॖवुन्य ट्यॆकिन मेलनावॖनुक। वैसे ति दपान, ट्यॆकिनि मेलनऻविथ ति छि तिम तिम हऻदिसॖ सपदान यॆम्युक नॖ ज़ांह स्वपनस मंज़ ति सूंचमुत  आसान छु। यिति छॆ नॖ ख़बर ज़ि युस ट्यॆकिन मिलनावान छु सु कोताह पॊज़ वनान छु। ग्वडॖ छि नॖ तिम मेलान ति यिमन ट्यॆकिन मिलनावनॖच मऺहऻरियत आसान छि।अगर लडकस लऺडकी टारि खॊत या लऺडकी लऺडकॖ पनॖनि मनॖ मुवऻफिक पसंद आव, त्यॆलि क्याह ज़रूरत छु ज़ऻच़ न्यबर वर या वधु छ़ान्डुन या छ़ान्डॖन्य। यि छि अख वथ यॆमि दऺस्य ॳस्य ह्यकव लाकम चीरॖ रऺटिथ तॖ पनॖनि ज़ऻच़ न्यबर पनुन शुर नॖ त्रऻविथ। वारियाह तजरुबॖ छु इन्सान करान रोज़ान पननि ज़िन्दगी मंज़ यिति अख तजरुबा ह्यकव ॳस्य बटॖ आज़मऻविथ। बस पहल करनॖच  छि ज़रूरत तॖ ह्यमथ तॖ विश्वास थवनॖच छि ज़रूरत।यथ कथि प्यठ ह्यकव ग़ोर कऺरिथ। कथ छि जऻरी, यऻरी कऺरिन असि बटन दय
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
( बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

08.02.2020

08.02.2020 माघ (माघ) ज़ूनॖ पछॖ (शुक्ल पक्ष) च़्वदह (देवादेव) (चतुर्दशी) बटॖवार (शनिवार/ शनिश्चरवार) श्री सप्तर्षी सम्वत 5095 राश कर्कट (चलान) ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
वन्देहं सच्चिदानन्दं भेदातीतं जगद् गुरुम्
नित्यं पूर्णं निराकारं निर्गुणं सर्व संस्थितम्
**************************
            लल वाक्
क्याह बॊडुख मूह भवॖ सॊदरॖ दारे
स्वथ लूहरिथ प्ययिय तमॖ पऻन्ख
यमबठॖ कऺरिन्यय कऻल्य छोरॖ दारे
कवॖ ज़न कासिय मरनॖन्य शेंख
       ****************
अर्थात:- हे मनुष्य! तुम संसार रूपी सागर (धन तथा पुत्र आदि) के मोह रूपी लहरों में क्यों डूबा है।समय आने पर निर्बल होकर तेरी आंखों में गहरा अंधकार छा जाएगा फिर समय पर यमदूत तेरी छोलदारी अर्थात शरीर का बुरा हाल करेंगे। यह मोह तेरे मृत्यु की शंका कैसे मिटा सकता है।(क्योंकि अपने आपको पहचानने से ही मृत्यु का डर नहीं रहता। अपनी पहचान मोह का त्याग करने से प्राप्त होती है)।
**************************
            नुंदॖ ऱेशिन्य श्रुक्य 
रीज़िक छुय ब्रौंठ तॖ मॊत छुय पतॖ
दुनिया छु शहरुक अतॖय गथ
स्वरुन बुगी तॖ गारुस वतॖ
बोज़खय छय रोज़ान नेक बद कथ
           **************
माने:- दय छुय इन्सानस पऻदॖ कऺरिथ रीज़िख ति सॗत्य दिवान तमि पतॖ छुस मोत पतॖ ब्यॆयि तुलिथ निवान। यानि युस ज़ाव तस छु आसान मरुन। यि दुनिया छु शहरुक युन तॖ गछ़ुन, रोज़ुन छु नॖ कॆंह। रोज़वॖन्य छि इन्सान सॖन्ज़
नीकी तॖ बऺदी अमि खऻतरॖ पज़ि असि यॆमि दुनिया दय लोल मनि ललॖविथ यॊतान्य पिलि तॊतान्य तिहॖन्ज़ॖ वतॖ छ़ारनॖच कूशिश जऻरी थवॖन्य।
**************************
पंचान्ग:- ॳकिस दज़ान दऻर तॖ ब्याख वुशनावान अथॖ। असि कऻशिर्य बटन गव यी यिमन त्रॖहन वऺरियन। तति कऺशीरि मंज़ तुल दहशतगरदव कॊहराम युथ ज़ि बटॖ च़ऺल्य ख़ोफ़जदॖ किन्य। यि कथ छि वऻयिथ ज़ि क़त्लि आम गव बटन कुनवुहशत कुन्नमतॖ प्यठॖ लगातार सुबहस, दॊहलि शामस, रातस तॖ यॊत ताम नौबत आयि बटॖ गव मजबूर पनुन ज़र ज़मीन तती त्रावनॖ बापथ, कॆंह मऻरिख ड्रमस मंज़, कॆंह चीरिख आरस प्यठ, कॆंह गऻलिख मंज़ वति प्यठ तॖ कॆंह क़तरिख गरन मंज़ॖय। क़ऻतिल छि वुनि ति नच़ान फ़ेरान तॖ दुनिया छु हऻरान ज़ि यिमन क्याज़ि आव नॖ सज़ा दिनॖ यिमन त्रॖहन अकत्रॖहन वऺरियन मंज़। कॆंच़व ॳदीबव नी किताबॖ लीख्य लीख्य, कॆंच़व बनावि फिल्मॖ यिमन वऻर्यदातन प्यठ। जायि जायि आयि भाषण बऻज़ी करनॖ, दुनिहॗक्यन ब्यॊन ब्यॊन कूनन मंज़ आयि कऺशीरि प्यठ त्राहि त्राहि करनॖ ज़ि बटन प्यठ कोताह ज़ुलुम आव करनॖ मगर वुन्युख ताम छु बटॖ प्रारान सरकार किस जवाबस ज़ि मारॖवातलन सॗत्य क्या स्लूक यी करनॖ। मंज़्य नी कऻन्सि ॳक्य फिल्मा बनऻविथ तॖ नाव द्युतनस शिकारा। लूकव वुछ यि फिल्म यि ज़ऻनिथ ज़ि कांह आव सान्यन ज़खमन मरहम करनि अमि फिल्मि दऺस्य मगर बोज़न तल आव ज़ि मरहमुक छु तसलीह अमि फिल्मि सॗत्य वऺथ्य ज़खमन क्रऻल्यी तॖ यि फिल्म दपान छि मुद्दा निशि स्यठाह दूर। म्यॆ वॖछ नॖ फिल्म मगर कनन गोम ज़ि यि फिल्म छॆ नॖ कुनि ति आयि असि कऻशिर्य बटन हॖन्दिस दऻदिस वाठ दिवान। खऻर वख करि फऻसलॖ पानय तॖ ननि द्वदुक द्वद तॖ पान्युक पोन्य। वोन्य गव वानस फालव दिथ। सऻन्य क्रख कॊत गऺयि आलव दिथ।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

07.02.2020

07.02.2020,माघ (माघ) ज़ूनॖ पछॖ (शुक्ल पक्ष) त्रुवाह (त्रॆयॊदशी) शॊकुरवार (शुक्रवार/ जुम्मा)श्री सप्तर्षी सम्वत 5095,राश कर्कट (शामचि 6.23 बजि प्यठॖ) ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
              गुरु स्तुति     
अज्ञानतिमरान्धस्य ज्ञानन्यजन- शलाकया
चक्षुर्-उन्मीलितं येन तस्मै श्री गुरवे नम:
**************************
             लल वाक्       
कर्म ज़ॖ कारण त्रॆह कॊंबिथ
यवॖ लबख परिलूकस ॴन्ख
व्वथ खस सिर्यमण्डल छ़ॊंम्बिथ
तवय च़लिय मरनॖन्य शेंख
        ************
अर्थात:- दो कर्म (सत या भगवत प्राप्ति के लिए कर्म और असत अर्थात भगवत प्राप्ति से परे कर्म) तथा ब्रह्मा, विष्णु एवं शिव, इन तीन कारणों से परे (ऊपर) होकर ध्यान कर तो तेरे परिलोक का भला होगा। उठ सूर्य मण्डल को (तकनीक से) तय करके चढ अर्थात प्रकाश का साक्षात्कार कर तो तेरे मरने की शंका समाप्त हो जाएगी।
**************************
           नुंदॖ ऱेशिन्य श्रुक्य   
आदनॖ च़्यतॖ तॊरॖग्य रज़ नियम व्वलऻसी
युथ नॖ ज़ि हॆयिहम त्रऻसी पो
कॗत्यन म्यॆ दुनियाहॖक्य ज़ंजीर कऻसी
सिविज़न ओसुस ग्वरॖ मांदव
तती क्रालॖ गरि लजास वऻसी
यन्दॖ शवॖ क्रालॖ गरि पांछ़ पान्डव
        *************
माने:- जवऻनी मंज़ रऺटॖम नॖ च़्यतॖ गुरिस लाकम यॆमि किन्य बॖ डॊलुस तिमव वतव निश। सु कुस समय ओस यॆमि विज़ि सम्सऻर्य बंदन च़टनॖच म्यॆ कूशिश कऺर। ही इन्सानॖ ल्वकॖचारय यॊद मनॖ रूप गुरिस लाकम चीरॖ गंडस रटख, वॆग्नॖ रॊस संगरमालॖ फ्वलनस लगि नॖ तऻर। यॆमि किन्य कॗत्य ह्यकॖहऻख संसऻर्य बन्दनव निश म्वकलऻविथ। यज़त तॖ मानॖ सान यिख ग्वर मानॖनॖ। यिथ कऺन्य कुन्ती मातायि प्यव क्रऻज बऺनिथ
पांछ़ पांडव ह्यथ वनवास दारुन तॖ ग्वर बऺनिथ ह्यॆछिनऻविन पनॖन्य शुर्य बानॖ थुरॖन्य। रोज़वुन छु दय नाव ब्यॆयि नॖ कॆंह।
**************************
पंचान्ग:- बोज़नस तल आव म्यॆ ज़ि ज्यॆमिस मंज़ युस वृद्ध आश्रम छु आमुत बनावनॖ तथ आश्रमस छु नॖ अज़कल कांह प्रॖछ़ानॖय। यि छि म्यॆ बासान अख जान ख़बर ज़ि सानि ज़ाच़ मंज़ यिम वृद्ध अवस्थायि मंज़ छि वऻत्यमॖतय तिमन छि पनॖन्यन पनॖन्यन गरन मंज़ॖय पनॖन्य शुर्य कऺट्य प्रॖछ़गऻर करान। या यि मऻनिथ पकव ज़ि शुर्यन कट्यन छु पनॖनिस मऻलिस माजि या नानि बऺड्यबबस सीवा करनुक च़ुक बड्योमुत। यि छि वाकॖय अख जान ख़बर। मगर दॊयिमि तरफॖ आयि म्यॆ ब्यॆयि शहरॖ प्यठॖ यि ख़बर ज़ि म्यॆ पज़ि वृद्धाश्रमस मुतलक ज़ॖ लऻनॖ ल्यॆखॖनि ज़ि पनॖन्य बुज़र्ग मतॖ त्रऻव्यतोख वृद्धाश्रमन मंज़ भगवान भरूसे। द्वनवॖनी कथन यॊदवय फ्युर दिमव तॖ ननान छु ज़ि यि समस्या छि वुनि चलान। ॳकिस जायि कम तॖ ब्यॆयिस जायि ज़्यादॖ। ब्याख कारण छु यिवान वुछनस तल यि ज़ि सऻन्य बुज़ुर्ग छि रूद्यमॖत्य कमॖय व्वंय ति क्याज़ि वारियाह वऻत्य स्वर्गस यि दऺप्यज़ि ति समयि ब्रौंठॖय। खऻर यिम हालय हयात छि त्युहुन्द ख़याल थावुन छु सान्यन शुर्यन हुन्द फ़र्ज़ ति क्याज़ि तिहॖन्ज़ सीवा करॖन्य छि असि प्यठ अख कर्ज़। पनॖनिस मुरिस मंज़ॖय यॊदवय सोन वृद्ध अमानथ दी सु छु स्यठाह जान तॖ तऺम्यसॖन्द्य प्राण रोज़न नॖ अवेज़ान तॖ परेशान तऺम्यसॖन्दि मरनॖ पतॖ ति। सऻन्य सभ्यता छि यी वनान तॖ सऻन्य संस्कार छि असि यी ह्यॆछनावान ज़ि असि पज़ि पनॖन्यन ज़िठ्यन मान तॖ यज़थ द्युन, तिहॖन्ज़ सीवा करॖन्य अंत समयस ताम। हालांकि अज़कल छु समयुक अभाव, शुर्य छि अकि अंदॖ, बुज़ुर्ग छि ब्यॆयि अंदॖ। सीवा करनस मंज़ छि तंगी मगर यि ति छि अख हकीकत ज़ि असि पज़न नॖ पनॖन वृद्ध पनॖन्यव तंग्यव मूजूब खति कऺडिथ वति प्यठ त्रावॖन्य। असि ति छु बुडुन पगाह। यि व्यच़ार पज़ि असि पनॖनिस ज़्यॆहनस मंज़ थावुन। युथ ॳस्य वातव पनॖन्यन ज़िठ्यन त्युथ वातन सऻन्य शुर्य असि पगाह। क्वकुर छु तछान पूत छु ह्यॆछान। तऺमिस शुरिस पज़ि पनुन पान कॖस्मतवोल ज़ानुन, यॆमिसॖन्द्य अथॖ पाद पनॖन्यन ज़िठ्यन हॖन्ज़ि सीवायि मंज़ लगन। ज़िठ्यन हुन्द ॴशिर्वाद गछ़ि ज़ानुन च़रणामर्यथ।
*************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

06.02.2020

06.02.2020 माघ (माघ) ज़ूनॖ पछॖ (शुक्ल पक्ष) बाह (द्वादऺशी) ब्रसवार (वीरवार/ब्रहस्पथवार/ गुरुवार) श्री सप्तर्षी सम्वत 5095, राश मिथुन (चलान) ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
           गुरु स्तुति     
अखण्ड मण्डलाकारं व्याप्तंयेन चराचरम्
तत्पदं दर्शितं येन तस्मै श्रीगुरवे नम:
**************************
             लल वाक्         
असे प्वंदे ज़्वसे ज़ामे
न्यथॖय स्नान करे तीर्थन
वुहॖर्य वऺरियस नॊनुय आसे
निश छुय तॖ प्रज़नावतन
       *********
अर्थात:- मनुष्य के अंतर में बैठी शक्ति के बल पर ही प्राणी हंसता है, छींकता है खांसता है जमाई लेता है, तीर्थों पर जाकर स्नान की कांक्षा करता है, सारा वर्ष यही कार्य करते हुए दिखाई देता है, ललेश्वरी का कहना है कि वास्तव में प्रभु नित्य ही यह सारे काम करते हैं, और वही प्रभु तो तेरे पास ही है। ज़रा उसे पहचानो तो।
**************************
          नुंदॖ ऱेशिन्य श्रुक्य   
बॖ पऻर्य कांगरि तॖ जन्दस
यॆम्य वन्दस कऺरॖम तॗरि रऻछी
बहॖ तॖ बहुमत न्यऻमच़ वन्दस
नून तॖ सऺदॖरकऻन्ज़ छुम यऺड रऻछी
बॖ क्या मंगय कलायि कंदस
हन्द तॖ हाख छुम छॊत मऻन्छी
बुगि मॆहरा छ़ुनतस व्वन्दस
द्यवॖ बन्दस गछ़्यम शर्मि रऻछी
           ***********
माने:- बॖ लगहऻ बलाय तथ कान्गरि तॖ जन्दस यॆम्य बॖ तॗरि निश बचोवुस। बलाय दिच़ॖम सारॆ न्यऻमॖच़ सऺदरॖकऻन्ज़स तॖ नूनस यॆमि सॗत्य म्यऻन्य यड छि तृप्त सपदान। बॖ क्या मंगॖ कलायिकंदस यॆलि म्यॆ हाख तॖ हन्द छु माछि ख्वतॖ मॊदुर बासान। रजू गऺछ़िथ छुस तस मंगान ज़ि तिछ़ कृपा करतम यथ व्वंदस यॆमिकिन्य रोज़ि मऺहशर, शर्मंदगी हुंद बुथ पॆयम नॖ वुछुन।
**************************
पंचान्ग:- ज्यॆमिस मंज़ ओस पुरानी मंडी मंज़ अख जंजगरॖ वारियाह प्रोन यॆति ज्यॆमिक डूगरॖ ॴस्य मंज़्य मंज़्य खान्दर करान। बकाया खान्दर ॴस्य सडकन प्यठॖय यिवान करनॖ, म्यॆ छु स्यठाह जान पऻठ्य याद ति क्याज़ि बॖ छुस ज्यॆमिस मंज़ रूदमुत कुनवुहशत पांच़वंज़ाह सनॖ प्यठॖ। मगर यॆलि नमतस मंज़ कऻशिर बटॖ च़ऺलिथ आयि कऺशीरि प्यठॖ तॖ ह्यॊतुख फ्रख त्रावुन ज्यॆमिस मंज़ तॖ ज्यॆमि न्यबर ब्यॊन ब्यॊन जायन, जंज गरॖ गऺयि ज्यॆमिस मंज़ खड़ा यसलॖ तॖ कऻशिर्य बटन हुन्द पौंसॖ वॊट तिमव चन्दॖ बऺर्य बऺर्य तॖ बटॖ गव ख़र्चावान बॆफ्रूक्य पऻठ्य। मजबूरी ॴसॖय ॴस, मान मान ति लऺज्य। यिमन त्रॖहन वऺरियन मंज़ छि ज्यॆमिस मंज़ क़दमॖ क़दमॖ पतॖ बैंक्यट हाल तॖ कमावान बटन हुन्द माल तॖ हावान कमाल। बटन हॖन्द्य दऺस्य म्यूल ज्यॆम्यक्यन लूकन ज़बर्दस्त कारॖबार तॖ तिमन छिनॖ पऺद्य अथि यिवान। बटन हॖन्द्यन खान्दरन गव बदलाव यिवान तेज़ रफतारि मंज़। हालांकि सान्यव कॆंच़व बायव कॊर ह्यमतो-समतो तॖ बनऻविख आश्रम वगैरा, मगर जंजगरॖ बनावनस मंज़ रूद्य पथ, पथ रूद्य वारिहान काम्यन मंज़ मगर अख ख्वश यिवॖन कथ छि ज़ि पनॖन्यन शुर्यन दिच़ॖख जान तऻलीम तॖ तिम लऺग्य कुनि बाल-बछि। मगर ज़रूरत छु पनुन कम्यूनटी सैंटर बनावनुक, यॆमि सॗत्य पनॖनिस समाजस राहत मेलि। कम पौसॖ प्यॆयि ख़र्चुन। म्वखसरॖ वनुन म्योन छु यि ज़ि अज़कलकिस खान्दरस छु नॖ व्वंय सु चिकॖचाव, युस वखतॖ अकि कऺशीरि मंज़ ओस आसान। इन्टरकास्ट यानि पर-ज़ऻच़ मंज़ खान्दर करनॖ सॗत्य छु खान्दरुक मज़ॖ गोमुत किरॖकिरॖ। हयबुंगॖ ह्यि छि आसान वुछान अख ॳकिस द्वनवय दऺर्य। इशारव सॗती छि कऻम चलावान ति क्याज़ि अख ॳक्यसॖन्ज़ ज़बान छॆ नॖ फिकिरी तरान। हशि ह्यॊत टंगुक नाव, न्वशि हऻव टंग (Tongue), यि वुछिथ हशि गव रंगस बदरंग, बऻयलालॖ ति ज़न आसमानॖ प्यठॖ प्यव। व्वथॖवार वोथ सान्यन गरन मंज़ यनॖ च़ायि सान्यन गरन मंज़ पर-ज़्यव। सोंचान छुस बॖ ओसुस कति तॖ वुछान वुछान यि क्याह गव।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

05.02.2020

05.02.2020, माघ (माघ) ज़ूनॖ पछॖ (शुक्ल पक्ष) काह (एकादशी) ब्वदवार (बुधवार) श्री सप्तर्षी सम्वत 5095, राश मिथुन (दुहचि 1.59 बजि प्यठॖ) ऋतु शिशर (चलान)
**************************
             गुरु स्तुति
नमामि सद् गुरुं शान्तं प्रत्यक्षं शिवरूपिणम्
शिरसा योगपीठस्थं धर्मकामार्थ सिद्धये
**************************
            लल वाक्         
ॳसिय ॴस्य तय ॳसी आसव
असिय दोर कऺर्य पतयवथ
शिवस सोरि नॖ ज़्यॊन तय मरुन
रवस सोरि नॖ अतॖ गत
          ************
अर्थात:- इस संसार में हम ही बहुत पहले से जीव के रूप में जन्म लेते और मरते आए हैं। जिस प्रकार सूर्य का उदय अस्त तथा शिव का शरीर धारण करके पुन: त्याग करना निरन्तर है, और आगे भी रहेगा, इसी प्रकार जीव का जीना और मरना जारी रहेगा।
कभी यही जीव राजा रहा है और कभी यही जीव दूसरे रूप में भिखारी बना। अर्थात, हम ही एक चोला छोड कर दूसरा चोला धारण करते आए हैं।
**************************
           नुंदॖ ऱेशिन्य श्रुक्य   
युस ओस यॆति सुय छुय तते
सुय छुय प्रथ शायि रऺटिथ मकान
सुय छुय प्यादॖ तॖ सुय छुय रथय
सुय छुय सोरुय गुपिथ पान
           ************
माने:- युस यॆति छु सु छु तति ति। सु छु सर्वॖव्यापक। सु छु पैदल पकनवोल ति तॖ रथ ति छु सुय पानय। सु छु सोरुय तॖ सऻरिसॖय मंज़ ति छु सुय। सु छु सूक्षम (नॖ बोज़नॖ यिनॖवोल) तवय छु नॖ सान्यन अज्ञऻन्य ॳछन बोज़नॖ यिवान
**************************
पंचान्ग:- व्वसॖ द्रौस ॴस व्वथान तिमन खान्दरन मंज़ मगर बासान ओस ज़ि खान्दर छु। शौकॖ सान, दिलो जानॖ सान, लोलॖ सान, मॊहब्बतॖ सान, च़ुकि सान तॖ विश्वासॖ सान ॴस्य सऻरीय अंग ॴश्यनाव, हक़ हमसायि, इस्तर्यन हॖन्द्य पिस्तऺर्य रऺलिथ मीलिथ कारस अंद वातनावान। कऺशीरि मंज़किस तॖ कऺशीरि न्यबर व्वंय खान्दर करनस छि ज़मीन आसमानॖच फर्ख आमॖच। पऺट्य च़ादरि प्यठ बत्तॖ ख्यनॖच प्रथा म्वकल्येयि करताम। खड़ा खड़ा या मेज़स प्यठ बत्तॖ ख्यनुक दॊस्तूर चल्यव। बूठ छ़ॖन्यथॖय बतॖ ख्यॊन बन्याव सोन रिवाज। जंज गरन मंज़ खान्दर करॖन्य छि अख मजबूरी योर यिथ। हालांकि कुनवुहशत तॖ नमतॖ ब्रौंठुय ॴस्य असि ज्यॆमिस मंज़ॖय जंज गरॖच रीथ पऻज्यमॖच़। सालर छि यिवान बॆहनावनॖ होटलन मंज़ ब्यॊन ब्यॊन कमरन मंज़। यॆलि बिगुल छु बजान तॖ आमॖत्य सालर छि समान ॳकिस हालस मंज़ नाशतॖ करनॖ बापथ तॖ ख्यथ-च्यथ गछ़ान  पनॖन्यन पनॖन्यन कमरन मंज़ वापस। न लेन कऻन्सि सॗत्य न देन। कुस कति प्यठॖ छु आसान आमुत यि ज़ानुन छु नॖ यिवान ज़रूरी मानॖनॖ।  बिगुल छु ब्यॆयि बजान तॖ छि ब्यॆयि यिवान सालर  लंच या डिन्नर करनि तॖ कऺरिथ ब्यॆयि पनॖन्यन पनॖन्यन मुर्यन मंज़ अच़ान तॖ प्रारान ब्यॆयि बिगुल कर बजि। अज़कलक्यन खान्दरन मंज़ छु हाव-बाव ज्यादॖ, माय-मॊहब्बत कम, मान मान ज़्यादॖ, लोल तॖ च़ुक कम। कऺशीरि मंज़ ओस बोज़नॖ यिवान मिलच़ार, बासान ओस पानियार मगर अज़कलक्यन खान्दरन मंज़ छि नज़र यिवान सिरिफ माया तॖ मायायि हुन्द ज़ोर। वनवन हुर त्रावन वोल छु नॖ मेलान कांह। व्यछ़य छि प्रथ कुनिच। ब्रह्मन छु नॖ व्वंय सानि ज़ऻच़ मंज़ कांह तिथ पऻठ्य यिथॖ पऻठ्य कऺशीरि मंज़ॖ ॴस्य आसान पनॖन्य क्वल ब्रह्मन। यि कऻम ति रऺट व्वंय उत्तराखण्डक्यव या उत्तरांचलक्यव लूकव या बिहारक्यव लूकव। कोताह शुद्ध ज्ञान छु तिमन सान्यन शास्त्रन हुन्द, सु छु साफ़ साफ़ नज़र यिवान। सान्यन रसमन रिवाजन हॖन्ज़ कऻच़ाह ज़ऻन्यकऻरी छि तिमन, यिति छु ननान असि मगर वनान नॖ कांह कॆंह। काम चलाव सरकार छि सऻनिस समाजस मंज़ ज़ोर रऺटिथ।ॳस्य ति छि यि हज़ीमतस ग़नीमत समजिथ पनॖन्य ज़डाह कडान तॖ पऺतिम पथकुन त्रऻविथ ॳछ वऺटिथ नविस आलमस कुन लमान। मायायि हुन्द ज़ोर छु, वखतॖच कऺमी छि, ज़िठ्यन हॖन्ज़ व्यछ़य छि, नव्यन हॖन्ज़ अज्ञऻनी छि रसमन रसूमातन हॖन्ज़, माय मॊहब्बतुक अभाव छु, रिशतन हॖन्ज़ि रज़ि मंज़ छि गन्ड आमॖत्य हदॖ रॊस। गन्ड गन्ड छु हुर्रानॖय मगर मुच़रावनवोल छु नॖ बोज़नॖ कांह यिवान। निवान कथ दिशायि कुन छु यि अज़कलुक हवा सानि ज़ऻच़, ज़ानि दय। ॳस्य आयि वलनॖ मान मानि। न व्वंय कंज़ तॖ न सु मुहुल यथ मंज़ मुनान ॴस्य ॳस्य दानि।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

04.02.2020

04.02.2020 माघ माघ) ज़ूनॖ पछॖ (शुक्ल पक्ष) दऺहम (दशमी) बॊम्वार (मंगलवार) श्री सप्तर्षी सम्वत 5095, राश वृष (चलान) ऋतु शिशर (चलान)...चिल्लॖ ख्वरुद ति छु चलान त्रॖहमि जनवऺरी प्यठॖ युस वुहन दॊहन रोज़ान छु
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
            गुरु स्तुति         
ध्यान मूलं गुरोमूर्ति: पूजामूलं गुरो: पदम
ज्ञान मूलं गुरोर्वाक्यं मोक्षमूलं गुरो: कृपा
**************************
           लल वाक्         
अज़पा गायत्रय हमसॖ हमसॖ ज़ऺपिथ
अहम त्रऻविथ अदॖ सुय रठ
यॆम्य त्रोव अहम सुय रूद पानय
बो नॖ आसुन छुय व्वपदीश
        ************
अर्थात:- सोहम (मैं वहीं हूं, शरीर नहीं) का अजपाजप जाप कर। (स:+अहं) से अहं अर्थात "मैं" में जो अहंकार का प्रतीक है को त्याग दे। फिर केवल "सू" अर्थात वह परमशिव शेष रहेगा। "मैंपन" का न होना अर्थात अहं का त्याग करना ही तेरे लिए श्रेष्ठ उपदेश है।
**************************
           नुंदॖ ऱेशिन्य श्रुक्य   
क्या करि दन्दॖ रॊस डूनिस
क्या करि रऺनिस तीर कमान
क्या करि म्वख्तॖहार हूनिस
क्या करि ॳनिस पदमान
           ********
माने:- दन्दॖ रॊस्यतिस डून, रऺनिस तीर कमान, हूनिस म्वख्तॖहार, ॳनिस पदमान (अछ़रछ़) ब्रौंहकनि थवॖन्य छु सोरुय तिहन्दि बापथ बेमतलब तॖ बेमकसद।
**************************
पंचान्ग:- गन्दॖ कोच ॴस्य वातलन अथि साफ़ करनावान।  बाज़रॖ प्यठॖ अंदर ताम चूनॖ त्रावान। कऺशिस ॴस्य रंग दिवान तॖ कोचन मंज़ वाहरावान। हरीर काग़ज़स ॴस्य  तिकूनी शक्लि मंज़ च़ऺटिथ सॖतलि रज़ि मंज़ गऺन्डिथ डॆडि बनावान तॖ कोचन मंज़ अकि अंदॖ प्यठॖ ब्यॆयिस अंदस ताम गन्डान माहराज़स स्वागत करान। दोत्यन हुन्द गेट ओस यिवान बनावानॖ। यॊदवय द्वन माहराज़न आसिहे आसान युन, सायबानस मंज़ ॴस्य साड्यव सॗत्य ज़ॖ खानॖ बनावान माहराज़न हॖन्दि बॆहनॖ बापथ तमि आयि ज़ि द्वन माहराज़न गऺछ़ नॖ अख ॳक्यसॖन्ज़ नज़र प्यॆन्य लगनॖ ब्रौंठ। क्रूल ॴस्य खारान ब्रान्दॖ-द्वारस। ल्वकॖट्य शुर्य कोरि लऺडकॖ ॴस्य नॖ व्यच़ान कुनि। दरवाज़स प्यठॖ कनि ॴस्य ल्यॆखान "स्वागतम" "फलान् व्यडॖस फलान्" या "Long live the couple "। द्वारक्यन द्वनवऺन्य तरफ़न ॴस्य ब्यॊन ब्यॊन  रंगव सॗत्य पोशि-थरि बनावान। ओम् या स्वास्तिक ॴस्य बनावान। माहराज़स सॗत्य आमॖत्य सालरन ॴस्य पथर बिहिथ बतॖ ख्यावान। पॊट ओस यिवान वाहरावनॖ तॖ तथ पॊटिस द्वनवऺनी तरफन ॴस्य बिहान सालर। थाल ॴस्य यिवान थावनॖ सालरन ब्रौंह कनि तॖ बऻगरावन वऻल्य ॴस्य अख अख कऺरिथ स्युन त्रावान थालन मंज़। पतॖ ओस यिवान बतॖ त्रावनॖ तॖ अंद ॴस्य दिवान रसदार सिनिस सॗत्य।  यि प्रथा ॴस्य ख़बर कऺच़व वऺरियव प्यठॖ चलान आमॖच़ मगर वारॖ वारॖ गऺयि यि प्रथा खतम तॖ बदलाव आव बरऻच़ बतॖ ख्यावनस। म्यॆ छु नॖ याद यिवान ज़ि कऺशीरि मंज़ ओसा कांह जंज-गरॖ। कथ छि जऻरी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)

03.02.2020

03.02.2020 माघॖ (माघ) ज़ूनॖ पछॖ (शुक्ल पक्ष) नवम (नवमी) च़ऺन्दॖरवार (सोमवार) श्री सप्तर्षी सम्वत 5095, राश वृष, ऋतु शिशर (चलान)
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
           गुरु स्तुति:           
गुरु ब्रह्मा: गुरु विष्णो गुरु साक्षात् महेश्वरा:
गुरु एव जगत् सर्वं तस्मै श्री गुरवे नम:
**************************
         लल वाक्           
कलन कालॖ ज़ॊल्य यॊदवय च़ॖय गॊल
व्यंदिव गेह वा व्यंदिव वनवास
ज़ऻनिथ सर्व गथ प्रभू अमॊल
युथुय ज़ान्यख त्युथुय आस
         ************
अर्थात:- काल के फंदे अथवा दराड से तभी छूटेगा जब तुझ में "मैं" अर्थात "द्वैत भाव" मिटेगा। फिर वनवास या घर में रहने में कोई अंतर नहीं है। यह जानकर कि जो भी (गतिविधि) संसार में हो रही है उसी प्रभू की ही निर्मल गतिविधि है। ऐसा ज्योंही जानेगा तो तू भी वही हो जाएगा अर्थात अपनी वास्तविकता को प्राप्त होगा।
**************************
          नुंदॖ ऱेशिन्य श्रुक्य     
कऻव्य ख्यॆयि गूज कान सतॖतिस
पंथस मूरुन कन्दे
ब्रारि हुन्द लोलऺर प्यव क्वकर पूतिस
उतनि बलाय तुतिस द्वन्दै
         *******
माने:- पनॖनि लक्ष्य निश यॊद इन्सान डलि, तस सपदि ब्रम तॖ ह्यॆयि ओरॖ योर थपॖ दिनि। यिथॖ काव ख्यॆयि गोजि कान, सतॖथ्य पूतिस मूरन कलॖ तिथॖ छि ब्रऻर पनॖन्य यड बरनॖ खऻतरॖ क्वकर पूतिस मऻरिथ ख्यवान। उतनि बलायि तुत लगुन छु द्वन्द संसारुक।
**************************
पंचान्ग:- कऺशीरि मंज़ ॴस्य खान्दर यिवान करनॖ पनॖन्यन पनॖन्यन गरन मंज़ॖय वखतॖ अकि।जाया ॴस आसान खुलॖ-डुलॖ, आंगन ॴस्य आसान बऺड्य बऺड्य। हमसायन हॖन्द्य आंगन ति ॴस्य यिवान अकार-बकार। वॖरॖ ॴसॖ यिवान दिनॖ आंगनन मंज़। सायबानॖ या शामियानॖ ओस यिवान लगावन बड्यन आंगनन मंज़। क्रालस ॴस कमऻय गछ़ान कतरिव बानॖ कॖन्य कॖन्य। देगॖ, ल्यॆजि, टऻक्य, तब्चि, नऺट्य, च़ऺड्य, डुलजि, सन्यवारि, च़ऻन्ग्य वगैरा वगैरा ह्यथ ओस यिवान खान्दर वाल्यन निश। वॖरि प्यठ ओस यिवान छप्पर दिनॖ।कुनि कुनि जायि ॴस्य टीनॖ पट्यन हुन्द छप्पर लागान या ॴस्य प्यठॖ तरपालॖ त्रावनॖ रूदॖ निशि बचनॖ म्वखॖ। सायबानस ओस च़्वनवऺनी तरफन तऺजीरॖ यिवान दिनॖ। फर्श ओस यिवान वाहरावनॖ यानि सतरंजि, कऻलीनॖ, मसनंदॖ, ड्रजट बेतरी। वॖरिबलस प्यठ ऒस यिवान वगुव वाहरावनॖ तॖ गर्युक कांह वाज़ॖवानुक ज़ऻन्यकार ओस बिहान तऺथ्य प्यठ तॖ थवान नज़र गुज़र वाज़न तॖ तिमन वातॖनावान तील, नून, मसालॖ विज़ि विज़ि। वॖरि बापथ ज़्युन ओस आसान अनुन, बतस छाव अनॖनॖ बापथ आसॖ च़ॖनि यिवान मंगनावनॖ, बतॖ फ्यारनॖ बापथ ओस टाठ यिवान मंगनावनॖ। ब्यॆयि गऺयेयि बानॖ सॊम्बॖरॖन्य, बिस्तरॖ सॊम्बरुन।यिम चीज़ ॴस्य यिवान अनॖनॖ हमसायन हॖन्द्यन गरव प्यठॖ। दीकचि, पऺहरात, चिलमची, बॊहगन, ल्येफॖ, मसनंदॖ, गब्बॖ, वगैरा तॖ तिमन सारिनी चीज़न ओस यिवान मीलि सॗत्य या नेल-पालशि सॗत्य निशानॖ थावनॖ ज़ि कुस चीज़ कऺम्यसॖन्दि गरि प्यठ आव अनॖनॖ। कथ छि जऻरी।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)