26.06.2020

26.06.2020 हारॖ (आषाढ) ज़ूनॖ पछॖ (शुक्ल पक्ष) पऻन्च़म (देवादेव) (पन्चमी) शॊकुरवार (शुक्रवार/जुम्मा) श्री सप्तर्षि सम्वत 5096, राश सिंह (चलान) ऋतु ग्रीष्म (चलान)..अज़ छि कुमार शॆयम ति... चूंकि पगाह छि शॆयम रावान, शॆयम हुन्द वॊहरवोद यी ॳज़्य यानि पऻन्च़म दुहुय

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

        महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

           लल वाक्

क्याह करॖ पऻन्च़न दऺहन तॖ काहन

व्वखशुन यथ ल्यजि कऺरिथ यिम गऺय

सऻरी समहन यथ रज़ि लमहन

अदॖ क्याज़ि राविहे काहन गाव

           *************

अर्थात :- पांच मनोवृत्तियों (काम, क्रोध, लोभ, मोह तथा अहंकार) दस इन्द्रियों (पांच ज्ञान तथा पांच कर्म इन्द्रियांं) तथा ग्यारह (10 इन्द्रियां+मन) को क्या करूं जो अलग अलग मेरी काया रूपी हान्डी को उभाड गए। यॆदि यह सारे केन्द्रभूत हो कर रस्सी (साधन) को पकड कर काम करते तो मनुष्य की गाय रूपी आत्मा क्यों संसार में भटक कर खो जाती। 

(भाव यह है कि अपनी सारी इन्द्रियों को भटकने से रोक कर खोया हुआ पदार्थ (आत्म भाव) प्राप्त हो सकता है।

**************************

कऻशिर्य पऻठ्य हफ्तॖक्यन दॊहन हॖन्द्य नाव :-

1.च़ऺन्दॖरवार (सोमवार) 2. बॊम्वार (मंगलवार) 3. ब्वदवार (बुधवार) 4. ब्रसवार (वीरवार/बृहस्पतिवार) 5. शॊकुरवार (शुक्रवार/जुम्मा) 6. बटॖवार (शनिवार/शनिश्चरवार) 7. आथवार (रविवार/एतवार)

**************************

पंचान्ग:- ॳज़्यकिस लल वाकस मंज़ छु आमुत अकि मुहावरुक प्रयोग करनॖ यानि काहन गाव रावॖन्य। अथ पतॖ छि अख लोक-कथा ज़ि दपान कुनि अकि वख्तॖ ॴस काहन बायन मंज़ ॶख गाव रऻवमॖच़। प्रथ अख बोय द्राव ब्यॊन ब्यॊन वति यि रऻवमॖच़ गाव छ़ान्डनि। अख बोय फ्यूर वापस गरॖ खऻली अथव यि सूंचिथ ज़ि दॊयमिस बऻयिस मा आसि शायद गाव मीज्यमॖच़। यी सोंचान सोंचान फीर्य सऻरी बऻय गरॖ कुन वापस खऻल्य अथव। यि गाव लऺब नॖ कऻन्सि ॳक्य ति। लल द्यदि हुन्दिस अथ मुहावरस आयि अज़ ताम सऻरी लूख ब्यॊन ब्यॊन मॊकन प्यठ तमि तमि सातन इस्तिमाल करान यॆमि यॆमि सातन कुनि कुनि जायि व्यवस्था आसि नॖ व्यस्तऻरिथ या ॴस व्यवस्था बनेमॖच़ खुर्यलद, यॆमि यॆमि सातन ॳक्यसॖय मुद्दहस प्यठ ॴस्य व्यच़ार रोज़ान ब्यॊन ब्यॊन, यॆमि यॆमि सातन गरस मंज़ ॴस नॖ कुनी कथ व्यतरावनॖ यिवान, यॆमि यॆमि सातन ब्यॊन ब्यॊन संस्थायन ॴस नॖ कुनी दिशा रोज़ान कांह ति समस्या हल करनॖ बापथ। हालांकि दपान लल द्यदि छु यि मुहावरॖ पानस प्यठ लागू कॊरमुत यि वऺनिथ ज़ि अगर सारेय इन्द्रीय कॊबूहस मंज़ आसहन तॖ तॆलि रोज़िहे मन ति डन्जि। मतलब यि ज़ि समुतस या यकुत आसनस छि शक्ति तॖ अकॖय आवाज़ तॖ कुनी कथ आसॖनॖ सॗत्य ह्यॆकि इन्सान कांह ति किलॖ फतह कऺरिथ। कुनि ति मन्ज़िलस ताम वऻतिथ। सऻरी सऺमिथ, कुनी कथ कऺरिथ, ॳक्यसॖय रज़ि लऺमिथ छु मुम्किन पनॖन्यन मसलन हल छ़ान्डुन। त्रॖह वऺरीवऻत्य असि कऻशिर्य बटन बस रऻवमॖच़ गावॖय छ़ान्डान तॖ रोज़व तॊत ताम छ़ान्डान यॊत ताम नॖ ॳस्य अथॖवास कऺरिथ, इकॖवटॗ पकिथ छ़ऻन्ड दिमव तॖ अनोन यि रऻवमॖच़ गाव लऺबिथ। यकजाह रऺलिथ ह्यमव ईश्वर सुन्द नाव तॖ मंगोस यॆमि महामऻरी निशि असि बऺचिराव तॖ हाव त्युथुय कांह चमत्कार। 

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)