25.06.2020

25.06.2020 हारॖ (आषाढ) ज़ूनॖ पछॖ (शुक्ल पक्ष) च़ोरम (देवादेव) (चतुर्थी) ब्रसवार (वीरवार/ बृहस्पतिवार/गुरुवार) श्री सप्तर्षि सम्वत 5096, राश सिंह (दुहॖचि 12.26 बजि प्यठॖ) ऋतु ग्रीष्म (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

      महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

               लल वाक्

अछ़्यन आय तॖ गछ़ुन गछ़े

पकुन गछ़े द्यन क्यो राथ

योरय आयि तॖ तूर्य गछ़ुन गछ़े

कॆंह न तॖ, कॆंह नतॖ कॆंह, नतॖ क्याह

           ***********

अर्थात :- जीव कब से जन्मता तथा मरता रहा है। यह ज्ञात नहीं। किन्तु यह क्रम रात दिन चलता रहता है। जहां (प्रभु) से आये हैं अवश्य वहां अपने स्रोत में ही जाना चाहिए है। यदि माना जाए कि ऐसा कुछ नहीं है फिर भी कुछ न कुछ रहस्य तो अवश्य ही है। नहीं तो यह सारा तथ्य क्या है? यह जाने बिना यहां रहना व्यर्थ है।

**************************

ऱयतन हॖन्द्य नाव कऻशिर्य पऻठ्य :-

1. च़िथ्थॖर (चैत्र) 2. वह्यक (वैशाख) 3. ज़्येठ (ज्येष्ठ) 4. हार (आषाढा) 5. श्रावुन (श्रावण) 6.बऻद्रप्यथ (भाद्र) 7. ॴशिद (आश्विन) 8. कार्तिक (कार्तिक) 9. मॊन्जहोर (मार्ग) 10. पॊह (पौष) 11. माग (माघ) 12. फागुन (फाल्गुन)

**************************

पंचान्ग:- नऺव्य नऺव्य चीज़ यिनॖ सॗत्य लॊग प्रान्यन चीज़न पथकुन दक्कॖ। फिकिरी छु नॖ तरान ज़ि सु प्रोन वख ओसा ठीख किनॖ यि नॊव वख छु ठीख। युस हालय हालॖ ज़न्मस आव तऺमिस छॆ नॖ पताह ज़ि प्रोन समय क्युथ ओस या प्रऻन्य चीज़ किथ्य ॴस्य। इस्लिये छु नॖ तिमन कांह कॊसूर तॖ न ह्यकव ॳस्य तिमन खऻतरॖ तिम चीज़ वापस ॳनिथ तॖ तिमन चीज़न सॗत्य पऻर्यज़ान करनऻविथ।बस मिसाल ह्यकव दिथ। मसलन मशॖक्य यानि दूज तॖ नरकऻन्य क़लम तॖ स्यॆपि मील गव गऻबॖय ॳज़्यकिस शुर्यसॖन्दि बापथ। तऺम्य ह्यॊत स्यॊदुय कापी प्यठ लेखुन मगर सु लेखुन ति छु कमसॖय कालस सिरिफ अ आ इ ई ह्यॆछनॖ बापथ। अमि पतॖ छु यि ॳज़्युक शुर यकदम व्वठ छॖनान मोबायलस प्यठ तॖ अति प्यठॖ यिछ़नॖय बलायन प्यठ जैसे लैपट्वाप, टेबॖल, आईप्वाड, कमप्यूटर बेतरी। यिथय पऻठ्य आव बदलाव ॳमिस शुर्यसॖन्दिस रिशतन मंज़। मास मासू, माम मामन्य, प्वफ पॊफू बन्यॆयि व्वंय सिरिफ आंटी तॖ अंकॖल या ज़्यादॖ ख्वतॖ ज़्यादॖ मामी, बडी मामी, छॊटी मामी, बडे मामू, छोटे मामू, मासी तॖ बुआ। रिशतन हॖन्ज़ अहमियत छ़ॊकेयि तॖ दूरेयि वारॖ वारॖ। मज़मून छु स्यठाह बॊड त्यूतुय छु बऺहस बॊड। अज़ करव कथ सिरिफ पनॖनि ज़बऻन्य प्यठ।सान्यव शुर्यव ह्यॊत मऺशरावुन कऻशुर, कऻशिर पऻठ्य कथ करॖन्य, कऻशिर्य पऻठ्य लेखुन तॖ कऻशुर परुन। मोबायलस प्यठ हालांकि कऻशुर ज़बऻन्य मंज़ लेखनुक तोर तरीकॖ, की-बॊर्ड वगैरा छु मय्यसर मगर यछ़ायि हॖन्ज़ व्यछ़य छि तॖ सऻरी छि दवान अंग्रीज़स कुन। संस्कृत तॖ ह्यॆन्दी ति छु व्वंय यिवान लेखनॖ अंग्रीज़स मंज़ॖय। कऻशिरिस सॗत्य रॖश छॆयी छि। कऻशिर्य ज़बऻन्य हुन्द नाव ह्यॊन छु ॳज़्यकिस शुरिस बासान ज़ि ॳम्यसॖन्दिस यज़तस खलल हिश। मगर बाकय ज़बानॖ छु चिक चावॖ सान ह्यॆछान, फखरॖ सान बोलान तॖ दिल खूलिथ लेखान। कमी कत्यन रूज़ असि मंज़ ज़ि असि ह्यॊक नॖ पनुन शुर तमि त्रायि बऺडरावुन यॆमि त्रायि ॳस्य आयि पानॖ वुन्युखताय बडान। हालांकि बदलाव छु नॖ कांह नोन लफॖज़ म्यॆ बासान। यॆलि ॳस्य ल्वकॖट्य ॴस्य, तॆलि ति आयि नऺव्य नऺव्य चीज़ बारसस तॖ ॳस्य गऺयि पानॖनावान मगर थफ ॴस पूरॖ कऺरिथ पनॖन्यन चीज़न, पनॖन्यन रिशतन तॖ पनॖनि ज़बानि, पनॖन्यन संसकारन तॖ पनॖनि सभ्यतायि। अथ प्यठ पज़ि व्यच़ार करुन, म्यॆ बासान। मऻज्य दुर्गा छि द्वख तॖ दऻद्य कासान। वऺलिव गछ़व तस शर्ण।

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)