14.06.2020

14.06.5096, हारॖ (आषाढ) गटॖ पछॖ (कृष्ण पक्ष) नवम (नवमी) आथवार (रविवार/एतवार)श्री सप्तर्षि सम्वत 5096, राश मीन (चलान), ऋतु ग्रीष्म (चलान) द्रठॖपऻन्च़ुक (पंचक) (चलान)

**************************

नमस्कार माहरा त्वहि सारिनी म्योन। त्वहि ऒरज़ुव दॊरकॊठ आय बत्तॖ तॖ दाय मॊह्यनिव

**************************

          श्रीचण्डीकवच

पद्मावती पद्मकोषे कफे चूडा मणिस्तथा।

ज्वालामुखी नखज्वालामभेद्या सर्वसन्धिषु ।।

शुक्रं ब्रह्माणि में रक्षेच्छायां क्षत्रेश्वरी तथा।

अहंकारं मनोबुद्धि रक्षेन्मे धर्म धारिणी।।

          **************

अर्थ :-  पद्मावती पद्मकोश (मूलाधार आदि चक्रों में रहता है) की और चूडामनि कफ की रक्षा करें, ज्वालामुखी नखों की किरणों  और अभेद्या सभी सन्धियों की रक्षा करें। ब्रह्माणी मेरे वीर्य की और छत्रेश्वरी छाया की रक्षा करें और धर्मधारिणी हमारे अहंकार, मन और बुद्धि की रक्षा करें

**************************

     महामारी नाश - मंत्र

जयन्ती मन्गला काली भद्रकाली कपालिनी दुर्गा क्षमा शिवा धात्री स्वहा स्वधा नमोस्तुते

**************************

            नुंदॖ ऱेशिन्य श्रुक्य

आयि ति बवनय गछ़व ति बवनय

बवनस ख्वतॖ नॖ बवनय ख़ास

यॊद वनि आसन व्यनदख कवॖनय

ख्यनॖ ख्वतॖ छुय आपरुनुय ख़ास।।

         *************

माने :- आयि ति दयस निश छ़्यनॖ गऺछ़िथ, गछ़ुन ती छु ब्यॆयि मऺरिथ तऺस्य निश। तसॖन्दिस दामस बराबर छुनॖ ब्याख कांह ति दाम। यॊद हे इन्सानॖ, च़्यॆ अमिच ज़ान आसिय, तॆलि क्याज़ि व्यच़ारख नॖ  ज़ि पनॖन्य यड बरनॖ ख्वतॖ छुय ब्यॆयिस आपरुनुय जान

**************************

पंचान्ग:- कऺशीरि मंज़ क्याह छु नॖ। अख समंदर त्रऻविथ म्यॆ बासान दुनिहीक्य सऻरी रंग छि नज़र यिवान अथ जायि। निशात बाग़, शालमऻर बाग़, हऻर्वन, चॆश्मऻशऻही, परी महल, नहरू पार्क आसनॖ सॗत्य बडेयि कऺशीरि हॖन्ज़ रोनक ब्यॆयिहऻन। गुलमर्ग, सॊनॖमर्ग, पहलगाम, डकसुम छि क्वदर्यतन ग्वडय खूबसूरत तोफॖ सूज़मॖत्य अथ जायि। जीलि डल, व्वलर, मानसबल आसनॖ सॗत्य छु कऺशीरि मंज़ बॆहनस दिल करान। आबशारन हुन्द नज़ारॖ वुछिथ छु नॖ इन्सानस कऺशीरि न्यबर नेरनस मन हर्गिज़ करान। ॳहरबलुक आबशार वुछिथ छुस बॖ यि कथ वऻयिथ वनान। तीर्थन हॖऩ्ज़ कथ कऺर, साधु संतव हॖन्ज़ कथ कऺर, दऻछ्य गाम, ज़बरवन, ॴश्यमुकाम, क्वकरनाग, अछॖबल जायि यॆम नॖ वुछ कऺशीरि मंज़ तऺम्य मऻन्यतव वुछ नॖ किहीं। वेरनाग युस व्यतस्तायि हुन्द आगुर छु आसुन छु कऺशीरि पानि रंग्य मालामाल  कऺरिथ। मनॖच शऻन्ती ॴस कऺशीरि मंज़ वखतॖ अकि। मगर आव नॖ ख्वश कॆंच़न दहशतगर्दन, कॆंच़न आतंकवाद्यन, कॆंच़न बद-द्यमाग तनज़ीमन, कॆंच़न कऻत्यलन, कॆंच़न मारॖवातलन तॖ कॊरुख कऺशीरि हवा ज़हरीलॖ। नफरतुक ब्यॊल वॊवुख तथ सर ज़मीनस प्यठ य्वस ज़मीन नॖ तिहॖन्ज़ ॴसॖय ज़ांह। लडायिगऺर्य बऺनिथ आयि, खौफज़द कऺरिख तमिसातॖ कऺशीरि हॖन्द्य कऻशिर्य बट्टॖ, धर्म-परिवर्तन करनऻविख ज़ोर ज़बर्दऺस्ती तॖ पनुन सिक्कॖ जमोवुख तथ सतीसरस मंज़, तथ ऋश्यवारि मंज़ तॖ वारॖ वारॖ पनुन ख्वर ठीकॖरऻविथ च़ऻनिख च़लॖ लार ततिक्यन असली बसकीनन यिमव बिचार्यव मुकाबलॖ ह्यॊक नॖ कऺरिथ यिमन पुज्यन सॗत्य। सोरुय ज़मीन जायदाद त्रऻविथ आयि नीरिथ तॖ लऺग्य दक्कन डुलन तॖ बालन तॖ बछ्यन कऺशीरि न्यबर। मगर वुनि ति छि नॖ तिम नाफलख होशि यिवान, तोति ज़िख ज़िख दिवान तॖ सानि समाज्यक्यन कॆंच़न शखसन च़ऻर्य च़ऻर्य पनॖन्यन गोल्यन हुन्द निशानॖ बनावान युस ति तथ कश्यपमऻरस मंज़ तिमन नज़रि  गछ़ान छु। अजय पंडिता भारती जियिन निर्मम हत्या राथ ऊतरय छि अख ज़िन्दॖ मिसाल। क्वदर्यथ गऻलिन यिमन नफ़रन हुन्द ब्यॊल यिमव सोन शान्त वातावर्ण कऺशीरि मंज़ॖ डोल। महामऻरी मत्येयि अकि तरफॖ, नयपालस ति आयि ह्यन्ग तॖ गव ख्यथ सानि वतनुक अख अंग। चीन छु ब्रऻर्यसॖन्द्य पऻठ्य ज़ागान ब्यॆयि तरफॖ तॖ पकान क़दमा क़दमा अन्दर कुन। पऻकिस्तान छु गगरॖ सॖन्द्य पऻठ्य अमनुक ज़ाल च़टनस मंज़ पनॖन्य कऻम करान् असि थऻव्यख यिम सारेय ब्यमारि प्यतरावनॖ बापथ।

**************************

कऻशुर ह्यॆछव कऻशुर परव

कऻशिर्य पऻठ्य पानॖवुन्य कथ बाथ करव

**************************

नऺविव तॖ फॊलिव

भूषण कौल "दीप"

(बूज़िव ॳज़्युक सबक़ म्यानि ज़्यॆवि ति)

(koshursabak.blogspot.com ति वुछिव)