26.01.2020

26.01.2020, माघ (माघ) ज़ूनॖ पछॖ (शुक्ल पक्ष) द्वय (द्विती) आथवार (रविवार/ऐतवार) श्री सप्तर्षी सम्वत 5095, राश कुम्भ(शामन 5.38 बजि प्यठॖ), ऋतु शिशर(चलान)...ॳज़्यकि प्यठॖ छु द्रठख पऻन्च़ुक (पंचक) ति शुरु।
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
          नित्य नियम विधि
ऊं गायत्र्यै: नम: ओम् भूर्भुव: स्व: तत्सवितुर् वरेण्यं भर्गो देवस्य धीमहि धियो यो न: प्रचोदयात्।
(मुंह धोकर यज्ञोपवीत धोते हुए तीन बार पढें)
गायत्री मंत्र में 24 अक्षर हैं।इन्हें मिलाकर पढने से ही इनका शब्दार्थ और भावार्थ समझ में आता है।
**************************
            लल वाक्     
कायस बल छुय मायस ज़ागुन
प्रानस बल छुय शब्दॖ सोरूफ
आयस बल छुय तत्व व्यद्ध ज़ानुन
ज्ञानस बल छुय आदि अन्त तान्य
         *************
अर्थात:- काया का बल तरलता है। प्राणों का बल शब्द स्वरूप है।
आयु का बल तत्व विज्ञान को जानने से है। यह सभी बल अस्थायी हैं परन्तु ज्ञान का बल स्थायी है।
**************************
           नुंदॖ ऱेशिन्य श्रुक्य       
बुगि च़्यॆति कल गऺयी म्यऻनी
गोसय बॖ गऺल्य गऺल्य च़ऺमिथ कथ
अवॖ व्वंय बॖति कल त्रावनॖ च्यऻनी
याम हऻन्कल गछ़्यम च़मिथ कथ।
            *************
माने:- संशय सॗत्य गनेय म्यऻनिस मनस म्यऻन्य कल। यने तस गव अहंबाव, मगर हीनॖ बाव यिथ फ्यूरुस बॖ दयस कुन। दय गन्डस तल रूज़िथ गनेयम तसॖन्ज़ कल तॖ कॊरुम तहिया तिहुन्द दामनॖ रटनुक।
**************************
पंचान्ग:- बॖ यॆलि यॆलि पनुन पॊतकाल छुस याद करान हऻरान छुस बॖ गछ़ान फरॖख वुछिथ कति कोर तथ समयस तॖ यथ समयस।कऺशीरि मंज़ ॴस्य आसान प्राइवेट स्कूल स्यठाह कम तॖ सरकऻर्य स्कूल यसलॖ। अज़कल छु बिल्कुल फिरिथ यानि क़दमस क़दमस प्यठ छि प्राइवेट स्कूल तॖ सरकऻर्य स्कूल छि अज़कल बासान ग़रीब खानॖ ह्यि। आम इन्सान छु नॖ पनॖनिस शुरिस सरकऻर्य स्कूलस कुन वथ हावान। तऺमिस छि बासान पनॖनिस यज़तस ख़लल हिश यॊदवय सु पनॖनिस शुरिस सरकऻर्य स्कूलस मंज़ परनावि। द्वदॖ शुर्य ति छि त्रावान प्राइवेट नर्सरी स्कूलन मंज़। सान्यव ज़िठ्यव ति छु पॊरमुत तॖ सुति सरकऻर्य स्कूलन मंज़ॖय। गुर्बतकिस तनावस मंज़ तॖ पनॖनि मेहनऺच़ सॗत्य छु सान्यव तिमव ज़िठ्यव विज़ि विज़ि नाव ति कमोवमुत।अल्बतॖ सानि कोरि आसॖ तथ वखतस मंज़ कमॖय पहान परान। तिम आसॖ गरॖ सम्बालान, शुर्यन पालान पोसान संस्कऻरी बनावान। मगर यनॖ प्यठॖ कोरि द्रायि पऺरिथ लीखित कमावनि बासान ज़न अख इन्कलाब आव। यि छि अख स्यठाह जान कथ ज़ि सान्यन कोर्यन म्यूल मोकॖ पनॖन्य कला हावनुक। होवुख ज़ि तिम ह्यकन सारेय तिम कामि कऺरिथ यिम मर्द लूख सऺदियव प्यठॖ करान आयि।मगर तिहॖन्दि न्यबर व्येरनॖ सॗत्य प्यव कॆंह बुरॖ असर ति युस ॳस्य सऻरी छि च़्येनान मगर वऺनिथ छि नॖ ह्यकान। सु गव शुर्यन हॖन्द्यन संस्कारन प्यठ। शुर्यन हॖन्दिस रख रखावस प्यठ। शुर्य ज़्यॆविरावनस प्यठ। गर गृहस्ती आयि दायन हवालॖ करनॖ। शुर्य आयि क्रचन मंज़ या डे कियरन मंज़ त्रावनॖ।वगैरा वगेरा। दॊयिम बदलाव वुछ म्यॆ ज़ि पोत कालॖ आसॖ सरकऻर्य नोकरी मेलान सान्यन बायन।  मगर यथ वखतस मंज़ छॆ नॖ सरकऻर्य नोकरी मेलानॖय। सानि ज़ऻच़ मंज़ छि म्यॆ बासान 98 प्रति शत लूख अज़कल प्राइवेट नोकरियन मंज़। फिरिथ गऻमॖच़ छि यि व्यवस्था ति। अखराजात ति ॴस्य कम तथ वखतस मंज़ मगर यथ वखतस मंज़ छु नॖ अखराजातन अंदॖय अथि यिवान। पलवन दलवन मंज़ ति ॴस्य स्यठाह सादॖगी नज़र यिवान मगर अज़कल छु तथ मंज़ ति स्यठाह फिरॖथुर गोमुत। शर्म हय्या ति ॴस प्रथ गरस मंज़ मगर अज़कल छु तिमन संस्कारन नाव दिनॖ आमुत दऺक्यानूसी। पॊत कालॖ आसॖ सानि कोरि वऺलिथ मऺलिथ पकान तॖ थोरान मगर अज़कल छि तिम पनॖनिस पानस गतॖ ग्यूर तुलान पनुन पान पऻरावनस मंज़। मायायि हुन्द ज़ोर छु अज़कल ज़्यादॖ तॖ कायायि हॖन्ज़ फिकिर छि कमॖय पाहन। च़्वपल होन्यन हॖन्द्य पऻठ्य छि च़ूर तॖ च़टल ति नच़ान च़्वपऻर्य अज़कल तॖ सान्यन माज्यन तॖ ब्यॆन्यन छु नॖ पनुन पान महफूज़ बासान। युथ नॖ कांह अहमक़ ज़ऻनिथ मऻनिथ तेज़ाबॖ छॆकि, पनुन बुथ बंद कऺरिथ छि सारेय कोरि अज़कल वति पकान। ज़मानॖ छु खराब द्वह ख्वतॖ द्वह गछ़ान। प्रोन समय म्यॆ बासान ओस ज़न स्यठाह रुत। अज़कल छु सोरुय फिरॖथुर।अयाल छु फिरॖथुर, खयाल छु फिरॖथुर। अथ फिरॖथुरिस तॖ बदलावस कुस छु ज़िम्मवार? टी वी,  सिनमा, फऻशन, देखा-दीखी,  मायायि हुन्द ज़ोर किनॖ  ख़यालन हॖन्ज़ आज़ऻदी? कुस दी यिमन
कथन सऺही जवाब? ॳस्य छि सऻरी नवाब।
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
नऺविव तॖ फॊलिव
 भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
(koshursabak.blogspot.com ति वुछिव)