02.01.2020

02.01.2020, पॊह (पौष) ज़ूनॖ पछ (शुक्लॖ पक्ष) सतम (सप्तमी) ब्रसवार (वीरवार/ब्रहस्पथवार/ गुरुवार)श्री सप्तर्षी सम्वत 5095, राश मीन (चलान) ऋतु हेमन्त (चलान), द्रठॖपऻन्च़ुक (पंचक)(चलान) ************************** नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ। ************************** गीता ज्ञान :अध्याय 18 सऻरी कर्म म्यॆ मनॖ किन्य अर्पण कर, समतव बोज़ यूगॖ म्यॆ पान पुशर, निशचय कऺरिथ दार म्योन ध्यान वॊन भगवानन गीता ज्ञान ************************** लल वाक् "मूढो क्रय छय नॖ दारुन तॖ पारुन मूढो क्रय छय नॖ रछिन्य काय मूढो क्रय छय नॖ दीह संदारुन सहज़ व्यच़ारुन छुय व्वपदीश" *********** अर्थात:- ऐ मूर्ख, पदार्थों को संचय करना, केवल काया को ही संभालना तथा सजाना वास्तविक क्रिया नहीं है। वास्तविक क्रिया तो सहज अर्थात स्वात्म का विचार करते रहना है" पऺरिव यि लल वाख ति ************************** नुंदॖ ऱेशिन्य श्रुक्य ॳल्लाह परनस दोरा फिर्यज़े ज़गतॖच लादन स्वरिज़ि नॖ ज़ांह यादस तिहॖन्दिस द्वह द्यन बऺर्यिज़े ज़िन्दॖय ॴसिथ मऺर्यज़ि नॖ ज़ांह ************ माने:- दय ज्ञान प्रावुन गव संसऻर्य कल मऺशिरावॖन्य। दय सॖन्दिस यादस मंज़ कर अभ्यास। ख्यनॖ ख्यनॖ द्वह द्यन तिहॖन्दिस यादस मंज़ बरुन गव बे ख़ोफ़ सपदुन। ************************** *पंचान्ग*- सानि यानि कऻशिर बटन हॖन्ज़ जंत्री अर्थात विजयेश्वर पंचान्गस मंज़ छि आमॖत्य त्र्यॆयव प्रकऻर्य पंचान्ग हावनॖ। सु गव (1) सप्तर्षि (2) ईस्वी (3) विक्रमी। यिमव त्र्यॆयव पंचान्गव मंज़ छु सारिवी ख्वतॖ प्रोन पंचान्ग सप्तर्षि सम्वत युस पऺत्यम्यव 5095 वऺरियव प्यठॖ छु आमुत चलान। ॳस्य कऻशिर्य बटॖ आमॖत्य छि ॳथ्य पंचान्गस मुतऻबिक अज़ ताम पनॖन्य संस्कार, त्यौहार, वॊहरवोद, खान्दर व्वछ़ब मनावान। यि पंचान्ग छु शुरु गछ़ान प्रथ वऺरियि च़िथ्थरॖ ज़ूनॖ पछॖ प्यठॖ तॖ अंद वातान छुस च़िथ्थरॖ गटॖ पछॖ मावसि द्वह। ईस्वी सनॖ यानि पंचान्ग छु शुरु गछ़ान जनवरी कि ग्वडनॖकि द्वह प्यठॖ दिसम्बरकिस ॴखरी द्वहस ताम तॖ विक्रमी पंचान्ग छु शुरु गछ़ान चित्र कि पऺत्यमॖ हफ्तॖ प्यठॖ चित्र किस 23 किस द्वहस ताम। विक्रमी सम्वत छु 2076 वऺरी प्रोन तॖ ईस्वी सम्वत छु 2019 वऺरी प्रोन। कऻशिर पंडित त्रऻविथ छि बाकय सऻरी हॆन्द्य विक्रमी सम्वत मुतऻ़बिक पनुन हिसाब किताब थावान। अल्बतॖ ईसवी पंन्चान्गॖ हिसाबॖ छि सार्यॆय ज़ाच़ कार्यक्रम करान ति क्याज़ि अथ पंचान्गस छि सरकऻर्य मान्यता प्राप्त सपदेमॖच़। बाकय ज़ऻच़न छु पनुन पनुन पंचान्ग यॆमि हिसाबॖ तिम पनुन धर्म-कर्म करान छि। यिमन पंचान्गन मंज़ ऱयतन हॖन्द्य नाव ति छि ब्यॊन ब्यॊन। तिम वुछव पगाह वारॖ कारॖ। म्यऻन्य व्यनती छि म्यान्यन ब्यॆन्यन तॖ बायन ज़ि तिम दिन पनॖन्यन शुर्यन पंचान्गॖच ज़ऻन्यकऻरी। त्वहि ईश्वर करुन यऻरी। ************************** कऻशुर ह्यॆछव कऻशुर परंव कऻशिर्य पऻठ्य पानॖवुन्य कथबात करव ************************** नऺविव तॖ फॊलिव भूषण कौल "दीप" (बूज़िव ॳज़्युक सबक़ म्यानि ज़्यॆवि ति) (koshursabak.blogspot.com ति वुछिव)