04.01.2020

04.01.2020, पॊह (पौष) ज़ूनॖ पछ (शुक्लॖ पक्ष) नवम (नवमी) बटॖवार (शनिवार/शनिश्चरवार) श्री सप्तर्षी सम्वत 5095, राश मेष (दुहचि 10.4 बजि प्यठॖ) ऋतु हेमन्त (चलान)..द्रठॖपऻंन्च़ुक(पंचक) म्वकलि अज़
**************************
नमस्कार माहरा त्वहि सारिनी म्योन। त्वहि ऒरज़ुव तॖ दॊरकॊठ।
**************************
   *गीता ज्ञान**  :अध्याय 18
अगर अहंकार किन्य च़्यॆ छुय ख़याल, बॖ य्वद करनॖ छु अथ प्यठ दरुन मुहाल। च्योन स्वभाव च्यॆ य्वद करनावान
वॊन भगवानन गीता ज्ञान
**************************
             *लल वाक्*         
मुढस प्रॖनुन छुय म्वय वाल छ़्यदुन
मूढस प्रॖनुन छुय मुरि द्युन कोह
मूढस प्रॖनुन छुय समंदर पूरुन
मूढस प्रुनुन रावी द्वह
        **************
*अर्थात*:- मूढ या बात को न समझजने वाले को समझाना बाल को चीरने, पर्वत को गोद में लेने या समुद्र को भरने जैसा है।  इस्लिए मूढ को समझाना व्यर्थ है।इस कारण उसे नऺ समझाना ही ठीक् है। ऐसा प्रयत्न करके आप अपना समय व्यर्थ करेंगे।
**************************
             नुंदॖ रॆशिन्य श्रुक्य
ला इला इलल्ला सऺही कॊरुम
वऺही कॊरुम पनुन पान
व्वजूद त्रऻविथ मोजूद म्यूलुम
हर म्वखॖ वुछुम पनुन पान
       ************
*माने*:- यिति कॆंछ़ा छु सु छु दय सुन्द सोरुय। मऻनिथ तॖ व्यवहारस  मंज़ ॳनिथ प्रोवुम पनुन मकाम।
यॆमिकिन्य पनुन पान मऺशरिथ बास्योम हर कऻन्सि मंज़ दय सुन्द रूप
**************************
*पंचान्ग*:- कऻशिर्य ज़बऻन्य मंज़
छि दॊहन हॖन्द्य नाव यिथकऺन्य, च़ऺन्दॖरवार, बॊम्वार, ब्वदवार, ब्रसवार, शॊकुरवार, बटॖवार तॖ आथवार। जंत्री मंज़ छि हऻविथ विक्रम सम्वतॖक्य द्वह। तिम छि सोमवार, बोम्वार, बुधवार, वीरवार या गुरुवार, शुक्रवार, शनिवार तॖ रविवार। अंग्रीज़स मंज़ छि यिमय द्वह यॆमि नावॖ सॗत्य ज़ानान, मनडे, ट्यूसडे, व्यनसडे, थऺरॖसडे, फ्राइडे, सैटरडे, सनडे।
म्यॆ लीख्य यिम नाव कऻशिर्य ज़बऻन्य मंज़ मगर छि यिम नाव   दरअसल अंग्रीज़स मंज़ॖय। हऻरऻनी छि यि ज़ि सान्यन शुर्यन छॆ नॖ कऻशिर दॊहन हॖन्द्य नाव यादॖय। कॆंच़न मा आसन मगर ज़्यादॖतर बचन छि नॖ दॊहन हॖन्द्य नाव तगान वनॖन्य ति। यि छि वाकय तऻज्यबॖच कथ ज़ि कऻशिर्य ॴसिथ नॖ कऻशिर चीज़न हॖन्ज़ ब्वय आसॖन्य। सानि जंत्री मंज़ ति छु कऻशुर तॖ हॆन्दी रलॖ गोमुत कुनि कुनि जायि। जंत्री मंज़ लीखित छु यि कॆंछ़ा तमिच ज़ऻन्यकऻरी छे नॖ असि सारिनी। यि विद्या छि तगान ज्योतिषाचार्यन। प्यॆठ प्यॆठ यॊदवय वुछव तॖ ननान छु ज़ि पान्च़न अंगन हुन्द शब्द छु पंचान्ग। यिम पांछ़ अंग छि 1. तिथि, 2. वार 3. नक्षत्र 4. योग 5. करन। मगर सानि मतलबॖक्य छि
केवल त्रॆ अंग यानि तिथि, वार तॖ नक्षत्र। बचेमॖत्य ज़ॖ अंग यानि योग तॖ करन छि ज्योतिष वरतावान यॆलि ज़ातुक वातुक बनावुन छु आसान या यॆलि ट्यॆकिन्य  व्यॆकिन्य मिलनावॖन्य छि आसान। पगाह वुछव ॳस्य यिम त्रॆ अंग छि क्याह आसान तॖ यिमन अंगन हॖन्ज़ कऻम क्याह छि आसान। माजि गछ़ शर्ण, माजि प्यॆ परण, मऻज्य शारिका द्वख तॖ दऻद्य कासान
**************************
कऻशुर ह्यॆछव कऻशुर परव
कऻशिर्य पऻठ्य पानॖवुन्य कथबात करव
**************************
 नविव तॖ फॊलिव
  भूषण कौल "दीप"
(बूज़िव ॳज़्युक सबक़ म्यानि ज़्यॆवि ति)
koshursabak.blogspot.com.ति वुछिव